2 KOLINTI 3 - Disambi Dipyadipya

¹ COCO tutanabanga kabidi kudialakana mikyecu ? Ndo coco twamadila mikanda ya mwalakanu bea banga bantu ya kulwa kunudi yinayo ? ndo kuncuka kunudi yinayo ?

² Nonu nudi mukanda ěcu, mufunda mu micima yecu, ămalubukibwa yi ămabadibwa kudi bantu boso.

³ Bwalo bunwamakwebexebwa ene, nudi mukanda ă Kalistu, ămalongolebwa kutudi, mufunda kumoni yi mai a mukanda, kate yi Mwoxixi a Ncembi a môyo ; kumoni pa bikidi bia mabwe, kate pa bikidi bia munyu bia mucima.

⁴ Yi tudi yi kwetabusa kwa noku ku mpala a Ncembi kudi Kalistu.

⁵ Kumoni bea kutôya ene, coco twamalelekyela mikyecu kwela kintu kioso lukanyi ku bwalo bwecu mikyecu ; mo kulelekyela kwecu kwamalwa kudi Ncembi,

⁶ amatwelekyesa kabidi ndo kwakala basadi ba disambi dipyadipya ; kumoni bwalo bwa kileta kiadio kitupu kate bwa Mwoxixi. Bwalo bwaxipañana kileta, mo Mwoxixi ndo upapañana môyo.

⁷ Kaninga ndo kixingilu kia lufu (kiakafundibwa ku bileta yi kiakasongebwa mu mabwe), kiakalwa yi dikai, bitabiyi bena Isalele kudingila mpala a Mosese sosonyi, bwalo bwa dikai dia mpala anci, diamalengolebwa ;

⁸ ka kixingilu kia Mwoxixi kixedika kwakala yi dikai ?

⁹ Bwalo ndo kixingilu kia lopelo kidi dikai, ka kixingilu kia nkwami kiamadika kulekola yi dikai ?

¹⁰ Isanga kieki kiakatekyebwa yi dikai kakisotekyebwa yi dikai ku mucwe ou, ku bwalo bwa dikai diamadika bungi.

¹¹ Ndo kieki kiakalengolebwa kiakadi yi dikai, kieki kiamasala kiamadika kwakala yi dikai dingi.

¹² Mbwôso bwalo bututani yi mudingidilu ă noku, tudi mu kusakola sakola yi kusakola kwa loko ;

¹³ kumoni bea Mosese akateka kibukilu kia mbuxa ku mpala anci bitaxedingila bena Isalele sosonyi pôi ku sula kwa kieki kiamalengolebwa.

¹⁴ Kate nkanyi yabo yakadi kukola kungi ; bwalo bwamasala kibukilu kieki pôi dituku dedi kutena kuncudibwa, pa kubadibwa disambi dia kalikali ; kiamalengolebwa mu Kalistu.

¹⁵ Kate pôi dituku dedi, papubadibwa mikanda ya Mosese, kibukilu kiamalala pa mucima abo.

¹⁶ Kaninga panakala ămapinana kudi Fumu, panancudibwa kibukilu.

¹⁷ Fumu pako udi Mwoxixi you  ; yi kwoso kudi Mwoxixi a Fumu, ka bwana bwa bula koku.

¹⁸ Mo coco bungi bwecu, bitwatebela dikai dia Fumu (bea mu diba), yi mpala utena kibukilu, twamakulumunibwa ku kifwanisa kienci pôi dikai ku dikai, bea kudi Fumu Mwoxixi.