2 KOLINTI 2 - Disambi Dipyadipya

¹ MO ku bwalo bwamene, nakakwela lukanyi munda ene, kinalwa kabidi kunudi yi buxitu.

² Ndo meme namanudidisa, nani lolo yei ungwaxekyelesa utena muntu you amadidixibwa kundi ?

³ Yi nakanufundila noku ximbi pandolwa, nxemona buxitu kudibo banxexekyelela ku micwe yabo ; bwalo bundi yi kwetabusa ku mucwe ěnu bungi bwenu, ene, kiango kiamene kidi kienu kia bungi bwenu.

⁴ Bwalo bunakanufundila yi buxitu bungi munda, yi kusama kungi ku mucima, yi masonci mangi ; kumoni binuxedidixibwa, kate binuxelubukwa nyinga yinamanunanga yinayo kungi.

⁵ Mo ndo muntu mwoso amafikisa buxitu, kasofikisa buxitu kundi meme mutupu kate buxitu bubende, (kisoli kununemenena), kunudi bungi bwenu.

⁶ Kwamakuka muntu a noku, kusama koku kwakamulwa kudi bantu benu bangi.

⁷ Mbwôso nuxetunga, kumoni kwenca noku kabidi, kate kumulekyela yi kumubondabonda ; ximbi ambeci you noku uxenemenenebwa ku bidilu bingi bingi.

⁸ Mbwôso meme nwabondabonda ene, numusubixili nyinga yenu.

⁹ Ku bwalo bobu kabidi ndo kunakanufundila, binxelubukwa kilembetelu kienu, ndo nwapwakala yi diedya mu bintu bioso.

¹⁰ Muntu unwamamulekyela bwalo bwoso, meme namamulekyela kabidi. Bwalo bwoso bunamalekyela muntu, ndo namalekyela bwalo bwoso, namabulekyela ku micwe yenu ku mpala a Kalistu ;

¹¹ bitutaxepeteyebwa kudi Satana ; bwalo bututasokodya kulubukwa nkanyi yenci.

¹² Panakalwa lolo ku Toloasa bwalo bwa losangu lunengela lwa Kalistu, yi pakangudipudibwa mbelo bwalo bwa Fumu,

¹³ nakadi kibiyi kwomowa ku mucima ămene, bwalo buntasañanini Tito muna kwami ; mo nakabalayisa yi makancuka kuya ku Makyedonia.

¹⁴ Mo Ncembi axingibwi biloba utwaxiyaxiya yi bumanya mu Kalistu, yi amakwebesa manonu kutudi a kilubukilu kienci mu kidi kioso.

¹⁵ Bwalo bututani manonu a Kalistu kudi Ncembi mu bantu bamapandixibwa yi mu bantu bamancimina.

¹⁶ Kudi bobo tudi manonu pôi lufu ku lufu ; kudi yiba tudi manonu pôi môyo ku môyo. Yi ñani amakuka ku bwalo bwa bintu bebi ?

¹⁷ Bwalo bututena bea bantu bangi bamaleka diyi dia Ncembi ; kate bea bena babala, kate bea ku mucwe ă Ncembi, ku meso a Ncembi, ndo bitwatôya mu Kalistu.