2 KOLINTI 13 - Disambi Dipyadipya

¹ KIEKI ndo kikondo kiamusatu kindolwa kunudi. Ku musuku ă batôbôdi ndo babidi ndo basatu kunasubixibwa diyi dioso.

² Nakanutôyela kalikali, yi meme nwadimusa bea ndo ku mpala diamubidi, kate kunga nkyekyu, bwalo bwa bantu bamakwona pôi nkyekyu, yi kudi banga bantu boso ene, aka ndolwa kabidi kinakwombwa mwengo ;

³ bwalo bunwakyeba kilembetelu kia Kalistu atôya munda mwamene ; (you utena kulebela ku bwalo bwenu, kate udi yi ngulu munda mwenu.

⁴ Bwalo bwakakopekyebwayi ku nkulusu bwalo bwa kulebela, kate udi yi môyo bwalo bwa ngulu ya Ncembi. Bwalo butudi kabidi kulebela munda mwanci ; mo tunakala yi môyo yinanci bwalo bwa ngulu ya Ncembi kunudi),

⁵ nudixiximi mikyenu, ndo nonu nudi bena kwetabusa ; nudielekyesi mikyenu. Nonu kanusodilembetela mikyenu ene, Yisu Kalistu udi munda mwenu, kutena nwapwakala banyañanibwi ?

⁶ Kaninga ngwadingila nunalubukwa ene, coco katuna banyañanibwi.

⁷ Twalomba lolo kudi Ncembi ene, nonu kanwenci bubi bwoso ; kumoni bituxemoneka yi mwalakanu, kate binuxekisa bwalo budi yi nkwami, isanga coco twakala bea banyañanibwi.

⁸ Bwalo bututabiyi kwenca kintu kioso kutanda yi sôsôlwo, kate kusadila sôsôlwo.

⁹ Bwalo butwaxekyelela bitwakala kulebela yi nonu nwakala yi ngulu ; yi twalombela kabidi nonu kwakala yi bwokokya.

¹⁰ Mbwôso ngwafunda bintu bebi pakala ndi kunga, bintaxetôya diyi dikola ku mpala, yi bumanya bwamangupa Fumu bwalo bwa kwabaka yinabu, kumoni bwalo bwa kuxinda paxi.

¹¹ Pôi nkyekyu bakunyi, nuxekyeleli. Nulungikibwi dyendeli ; nubondebwi ; nwakali yi lukanyi lumolumwe ; nwakali polo ; yi Ncembi a nyinga yi a polo unakala yinenu.

¹² Nubisañani yi kunyita kwa babala.

¹³ Bungi bwa bena babala banwabisa.

¹⁴ Lwoxixi lwa Fumu Yisu Kalistu, yi nyinga ya Ncembi, yi busangilañani bwa Mwoxixi a babala, biakali yinenu bungi bwenu.