2 KOLINTI 10 - Disambi Dipyadipya

¹ WNKYEKYU meme Paulu mikyemi nwaxengula bwalo bwa diedya dia Kalistu yi kulebela kwanci ; isanga meme, udi kanana ku mpala enu, mo ndo kunga udi yi mucima mungi ku bwalo bwenu.

² Meme pako nwabondabonda, bintaxeakala yi mucima ku mpala enu yi mucima ou ungwencenca kwakala yi mucima bwalo bwa banga bantu batwakisa bea luna ndo twendenda yi mwendeiu ă munyu.

³ Bwalo isanga twendenda mu munyu, katusotanda mbita yi mutandilu ă munyu.

⁴ Bwalo butena bipiko bia mbita ecu bia munyu, kate bidi bia ngulu ku mpala a Ncembi ndo kuxinda bimana bia ngulu.

⁵ Tudi mu kuxinda mpeto yapetolabo, yi kintu kioso kile kiamadibandisa ndo kukanda kilubukilu kia Ncembi. Tudi mu kukwata lukanyi lwoso musungi, bixekwedeyalu Kalistu diedya.

⁶ Yi tudi yi lungwoso lwa kwambisa kudiula kwoso bwalo, panakala diedya dienu diamakukixibwa.

⁷ Nonu nwatebela bintu ku mpala kutupu ? Ndo muntu mwoso amadietabuxila ene, udi muna Kalistu, eli bwalo bobu lukanyi kabidi ene, bea bidiyi muna Kalistu ndo bitudi coco bena Kalistu kabidi.

⁸ Bwalo isanga nxekwana mwanu mungi bwalo bwa bumanya bwecu (bwakapa Fumu ndo kunwabaka, kumoni bwalo bwa kunuxinda), kinaxipibwa bundu ;

⁹ bintaxemoneka bea luna ndo ntananucinisa ku mikanda yamene.

¹⁰ Bwalo bwatôyayi ene, Mikanda yenci idi yi buxitu yi ngulu ; mo mumbidi ănci udi kulebela ku mpala, yi diyi dienci mo kanana.

¹¹ Muna noku eli lukanyi ene, bea bitudi ku diyi mu mikanda pakala tudi kunga, ndo bitwakala ku makisa kabidi ku mpala.

¹² Bwalo butwacina kudibala ndo kudielekyesa mikyecu yi banga bantu bamadialakana mikyeabo. Kate bobo bamangata lwedi lwabo kudi mikyeabo, yi bamadielekyesa mikyeabo kudi mikyeabo, kabasolembetela.

¹³ Bwalo bututasonanga kwana mwanu utena lwedi lwecu ; kate ă lwedi lwa kielekyexelu kiamatulungikila Ncembi ; lwedi lwa kufika isanga pôi kunudi.

¹⁴ Bwalo bututasodinana mikyecu bea ndo katupeteli kunudi ; bwalo butwakafika isanga pôi kunudi mu losangu lunengela lwa Kalistu.

¹⁵ Kumoni kwana kutena lwedi, bwalo bwa midimo ya banga bantu ; mo tudi yi mudingidilu, pa kulunda kwetabusa kwenu, ene, tunalundixibwa kungi pakacikaci penu, bea bidi lwedi lwecu,

¹⁶ bituxekwambila losangu lunengela kulekule ku buxi bwenu ; kumoni kwana mwanu bwalo bwa lwedi lwa munga muntu, ku mucwe ă bintu biamasananibwa ku kianca kiecu.

¹⁷ Kaninga you añana mwanu, ani mwanu bwalo bwa Fumu.

¹⁸ Bwalo butasolelekyela you amadialakana mikyenci, kate you amakwalakana Fumu.