2 KOLINTI 1 - Disambi Dipyadipya

¹ PAULU mutumibwi a Kalistu Yisu ku nyinga ya Ncembi, yi Timoteo mwakunyi, kudi kikokye kia Ncembi kidi ku Kolinti, yi kudi bena babala boso badi mu bungi bwa Akaya ;

² lwoxixi lwakali yinenu yi polo kudi Ncembi Tetecu yi Fumu Yisu Kalistu.

³ Ncembi atumbixibwi, Tete a Fumwecu Yisu Kaiistu, Tete a mankangi yi Ncembi a kibondelu kioso,

⁴ utwabondabonda mu buxitu bwecu bwoso bituxelubukwa kubabondabonda badi mu buxitu bwoso yi kibondelu kieki kitwamabondebwa yinakio mikyecu kudi Ncembi.

⁵ Byaka biamalekola masama a Kalistu yinecu ndo biamalekola kabidi kibondelu kiecu kudi Kalistu.

⁶ Kaninga ndo twamatekyebwa yi buxitu, kudi bwalo bwa kibondelu kienu yi bwa kipandilu kienu ; sungu ndo twamabondebwa, kudi bwalo bwa kibondelu kienu kiakisañana ndo kunwombwesa masama aa yi bwika atwombombwa coco kabidi.

⁷ Yi mudingidilu ěcu ku bwalo bwenu udi bô, bwalo butwalubukwa ene, bea binwamakwabanyafiana yi masama ndo binwamakwabanyañana kabidi yi kibondelu.

⁸ Bwalo bututasonanga nonu kwakala kutena kulubukwa bakunyi, dia buxitu bwecu bwakatuponena mu Asia, bitwakanemenenebwa yi buxitu bungi bwakadika lwedi lwa ngulu yecu ; bitwakadixengaxenga isanga bwalo bwa môyo ăcu.

⁹ Kate coco mikyecu twakadi yi lopelo lwa kufwa munda mwecu, bitutaxedietabuxila mikyecu, kate Ncembi abisa bafu ;

¹⁰ akatupaula mu lufu lwa bubi lolu noku, yi unatupaula ; utwamamwetabuxila ene, unatupaula kabidi ;

¹¹ pakala nonu nudi mu kutusadisa yi lulombu lwenu ; bixe xingibwa biloba ku micwe yecu kudi bantu bangi, bwalo bwa dilongi diamatupebwa ku mucwe ă bantu bangi.

¹² Mwanu utwañana ka ou, ntôbô ya kilubukilu kiecu kia munda, ene, ku babala yi ku sôsôlwo a Ncembi, (kumoni ku bwinu bwa munyu kate ku lwoxixi lwa Ncembi), ndo kutwamakala yi mwosambu ěcu ku loboko, yi kunudi nonu.

¹³ Bwalo bututasonufundila binga bintu bitena bebi binwabala yi binwalembetela ; yi bingwakyeba ene, nunabilembetela pôi ku sula ;

¹⁴ bea binwakatulembetela kabidi kabende ene, coco tudi mwanu ěnu, bea binudi nonu mwanu ěcu ku dituku dia Fumwecu Yisu.

¹⁵ Yi ku kwetabusa kwa noku ndo kunakadi ene, ndolwa kunudi buxi, binuxeangata dilongi diamubidi ;

¹⁶ yi binxedika panudi kuya ku Makyedonia ; binxebatuka kabidi mu Makyedonia kulwa kunudi ; yi binxekwendexebwa kunudi mu lwendo Iwamene lwa kuya ku Yudiya.

¹⁷ Mbwôso binakadi yi lukanyi lwa noku, nakakwenca lolo yi mwocimbucimbu ? Ndo bebi bintu bingwelela lukanyi lwabio, mbielela lukanyi yi mwelelu ă munyu, bixeakala yinami ene, E, E, yi Kumoni, kumoni ?

¹⁸ Mo bea bidi Ncembi yi kibaku ndo bitena diyi diecu kwenu ene, E, yi, Kumoni.

¹⁹ Bwalo bwa Mwana a Ncembi, Yisu Kalistu, akakwambidibwa kwenu kutudi, kudi meme, yi Silasa, yi Timoteo, yei kakadi E yi Kumoni, kate munda mwanci mudi E.

²⁰ Ku bwalo bwa bilaka bioso bidiko bia Ncembi, munda mwanci mudi E ; mbwôso kudiyi kudi Amen, bixelundixibwa dikai dia Ncembi kutudi.

²¹ You pako utwasubisa coco yinenu kidi kimokimwe munda mwa Kalistu, yi amatuxinga, udi Ncembi ;

²² amatubaka kilembetelu kabidi, yi amatupa kibutuku kia Mwoxixi mu micima yecu.

²³ Kate ngwabikila Ncembi mutôbôdi ku bwalo bwa mucima ămene, ene, bwalo bwa kunulekyela ndo buntaluli pôi nkyekyu ku Kolinti ;

²⁴ kumoni luna kutôya ene, tutani yi bumanya kulu kwa kwetabusa kwenu, kate tudi basadisanani ba kiango kienu ; bwalo ku kwetabusa ndo kunwamakwemana.