1 YOANO 5 - Disambi Dipyadipya

¹ MUNTU mwoso amakwetabusa ene, Yisu udi Kalistu, amalelebwa kudi Ncembi ; yi muntu mwoso amananga you ăkalela, amananga kabidi you amalelebwa kudiyi.

² Nako twalubukwa ene, twananga bana ba Ncembi, ndo twamananga Ncembi yi twamanama milangu yenci.

³ Kunu kudi nyinga ya Ncembi, ene, twamanama milangu yenci ; yi milangu yenci kayina maxitu.

⁴ Muntu mwoso amalelebwa kudi Ncembi ndo adika loboko bumanya ; yi kunu kudi bumanya bwamadika loboko bumanya, kwetabusa kwecu.

⁵ Ñani you adika loboko bumanya utena you amakwetabusa ene, Yisu udi Mwana a Ncembi ?

⁶ You ndo yei akalwa ku mai yi ku maxi, Yisu Kalistu ; kumoni ku mai kutupu, kate ku mai yi ku maxi.

⁷ Kudi Mwoxixi lolo amatôbôla ntôbô, bwalo budi Mwoxixi sôsôlwo.

⁸ Bobo batôbôla ntôbô badi basatu ; Mwoxixi, yi mai, yi maxi ; yi busatu bwabo badi yi ntôbô umoumwe.

⁹ Ndo twamangata ntôbô ya bantu, ntôbô ya Ncembi yamadika. Kunu kudi ntôbô ya Ncembi yamatôbôlayi dia Mwananci.

¹⁰ You amakwetabuxila Mwana a Ncembi udi yi ntôbô munda mwanci ; you utasokwetabusa Ncembi amamwenca muna ncimi, bwalo butakwetabuxilayi ntôbô yamatôbôla Ncembi dia Mwananci.

¹¹ Kunu lolo kudi ntôbô ene, Ncembi amatupa môyo ă kô kô, yi môyo ou udi munda mwa Mwananci.

¹² You apwangata Mwana udi yi môyo ; you utena yi Mwana a Ncembi kiena yi môyo.

¹³ Napunufundila bintu bebi binuxelembetela ene, nudi yi môyo ă kô kô, nonu bamakwetabuxila dina dia Mwana a Ncembi.

¹⁴ Yi kunu kudi mucima utwapwangata ku bwalo bwanci, ene, ndo tumwalomba kintu kioso kiamalelekyela yi nyinga yenci, yei utwombombwa.

¹⁵ Yi ndo twamalubukwa ene, utwombombwa ku kintu kioso kitwalomba, twalubukwa ene, twapwangata ndombu yitwamamulombela.

¹⁶ Ndo muntu mwoso amona muna kwanci udi mu kwona kwona kutena kwa lufu, unalomba ; yi unamupa môyo ku bwalo bwa bantu batasokwona kwona kwa lufu. Kwona kudiko kwa lufu ; kisotôya dia koku noku ene, unalomba lulombu.

¹⁷ Bwalo bwoso butena yi nkwami budi kwona ; yi kwona kudiko kutena kwa lufu.

¹⁸ Twamalubukwa ene, muntu mwoso amalelebwa kudi Ncembi kasokwona, kate you amalelebwa kudi Ncembi udianama mikyenci, yi you a bubi kasomubaka kianca.

¹⁹ Twalubukwa ene, tudi bena Ncembi, yi loboko buncima bwalu lwamalala mu you a bubi.

²⁰ Yi twalubukwa ene, Mwana a Ncembi amalwa, yi amatupa lukanyi, bituxelubukwa you udi sôsôlwo ; yi tudi munda mwanci mwa you udi sôsôlwo, mwa Mwananci Yisu Kalistu. Yei ndo Ncembi a sôsôlwo yi môyo ă kô kô.

²¹ Bana, nudinami mikyenu ku ngixi