1 YOANO 4 - Disambi Dipyadipya

¹ BANANGIBWI, kanwetabuxi kidimu kioso, mo nwelekyesi bidimu ndo bitani bia Ncembi ; bwalo bwamaya badimuxi bangi ba mancanga ku loboko.

² Nunalembetela Mwoxixi a Ncembi noku ; kidimu kioso kiamasakola Yisu Kalistu mulu mu munyu kidi kia Ncembi ;

³ yi kidimu kioso kitasosakola Yisu Kalistu mulu mu munyu kakina kia Ncembi ; kieki ndo kia Anti-Kalistu kinwamakwombwa ene, kilolwa ; yi kitani ku loboko isanga nkyekyu.

⁴ Nonu nudi bena Ncembi, bana, yi nwamabapidila ; bwalo you udi munda mwenu amadika you ngulu udi ku loboko.

⁵ Bobo badi bena loboko ; mbwôso bamatôya bea bena loboko, yi loboko lwamabombwa.

⁶ Coco tudi bena Ncembi ; you amalubukwa Ncembi utwombombwa coco ; you utena muna Ncembi kasotwombwa. Nako ndo twamalubukwa kidimu kia sôsôlwo, yi kidimu kia mwalo.

⁷ Banangibwi, tunangañani ; bwalo bwapwakala nyinga kudi Ncembi, yi muntu mwoso amananga amalelebwa kudi Ncembi, yi amalubukwa Ncembi.

⁸ You utasonanga kasolubukwa Ncembi, bwalo budi Ncembi nyinga.

⁹ Ku bwalo bwecu, nyinga ya Ncembi yamakwebexebwa noku ; Ncembi akatuma Mwananci umoumwe a ditôi ku loboko, bituxeakala yi môyo kudiyi.

¹⁰ Kunu kudi nyinga, kumoni ene, coco twakananga Ncembi, kate ene, yei akatunanga, yi akatuma Mwananci, kibondelu ku mucwe ă mabi ecu.

¹¹ Banangibwi, ndo Ncembi akatunanga noku, coco kabidi tuxenangañana.

¹² Muntu kienako amamona Ncembi ku kikondo kioso ; coco ndo twanangañana, Ncembi amasala munda mwecu, yi nyinga yenci yamakukixibwa munda mwecu.

¹³ Nako twamalubukwa ene, coco twamasala munda mwanci, yi yei munda mwecu, bwalo bwamatupayi Mwoxixi anci.

¹⁴ Yi coco twamamona yi twamatôbôla ntôbô ene, Tete akatuma Mwana, Mupandixi a loboko.

¹⁵ Muntu mwoso unasakola ene, Yisu udi Mwana a Ncembi, Ncembi amasala munda mwanci, yi yei munda mwa Ncembi.

¹⁶ Yi coco twamalubukwa yi twamakwetabusa nyinga yapwakala Ncembi yinayo ku bwalo bwecu. Ncembi udi nyinga ; yi you amasala mu nyinga amasala munda mwa Ncembi, yi Ncembi munda mwanci.

¹⁷ Kunu kwamakukixibwa nyinga yinecu, bituxeakala yi mucima ku diba dia lopelo ; bwalo butwapwakala coco kabidi ku loboko lolu, bea bidiyi.

¹⁸ Mu nyinga kamuna bowa, kate nyinga yamakukixibwa yamatenyeka bowa ; bwalo budi bowa yi kusama, yi you amacina bowa kasokukixibwa mu nyinga.

¹⁹ Coco twamananga, bwalo bwakatunangayi buxi.

²⁰ Ndo muntu amatôya ene, Ngwananga Ncembi, yi amanyañana muna kwanci, udi muna ncimi ; you utasonanga muna kwanci amamonayi, unalubukwa kunanga Ncembi beci, utamonayi ?

²¹ Yi twapwangata mulangu ou kudiyi, ene, You ananga Ncembi, anangi muna kwanci kabidi.