1 YOANO 3 - Disambi Dipyadipya

¹ NUMONI nyinga yamatupa Tete butonga bwayo, bituxebikidibwa ene, bana ba Ncembi ; tudi lolo noku. Mbwôso loboko kalusotulubukwa, bwalo butamulubukwalu.

² Banangibwi, nkyekyu tudi bana ba Ncembi, yi mutunakala kunyuma mukidi kamusokwebexebwa. Twamalubukwa ene, ndo yei unakwebexebwa, coco tunafwanañana yinanci, bwalo butunamumona luna bidiyi.

³ Yi muntu mwoso udi yi mudingidilu ou ă kumudingidila amadisusula mikyenci bea bidiyi susu.

⁴ Muntu mwoso onona encenca kabidi yi butomboki ; kwona pako kudi butomboki.

⁵ Nwalubukwa lolo ene, yei akakwebexebwa kuncula mabi ecu ; yi munda mwanci kamuna bubi.

⁶ Muntu mwoso amasala munda mwanci kasokwona ; muntu mwoso onona kamumonene, yi kamulubukili.

⁷ Bana, muntu kanuungixi pô ; you encencankwami udi yi nkwami, bea bidiyi yi nkwami.

⁸ You onona udi muna diabolo ; bwalo bwonona diabolo pôi bubangabanga. Ku mucwe ou kwakakwebexebwa Mwaña a Ncembi, bixexipayi makisa a diabolo.

⁹ Muntu mwoso amalelebwa kudi Ncembi kasokwenca bubi, bwalo bwamasala butonga bwănci munda mwanci ; kabiyi lolo kwenca bubi, bwalo bwamalelebwayi kudi Ncembi.

¹⁰ Nako kwamakwebexebwa bana ba Ncembi yi bana ba diabolo ; muntu mwoso utasokwenca nkwami kiena muna Ncembi, ndo you utasonanga muna kwanci.

¹¹ Kunu kudi diyi dinwakakwombwa pôi bubangabanga, ene, tuxenangañana ;

¹² kumoni bea Kyene akadi muna you a bubi, yi akaxipa mwakunyenci. Ku bwalo kai kwakamuxipayi ? Bwalo bwakadi makisa anci mabi, aa lolo a mwakunyenci akadi a nkwami.

¹³ Kanukami, bena kwami, ndo loboko lwamanunyañana.

¹⁴ Coco twalubukwa ene, twamancuka mu lufu kuya ku môyo, bwalo butwananga bakunyi. You utasonanga muna kwañci amasala mu lufu.

¹⁵ Muntu mwoso amanyañana muna kwanci udi muxipañani ; yi nwalubukwa ene, kakuna muxipañani umoumwe yi môyo ă kô kô amasala munda mwanci.

¹⁶ Kunu ndo kutwamamona nyinga, bwalo bwakatuladikilayi môyo ănci : yi coco tuxeladikila bakunyi mieyo yecu.

¹⁷ Kaninga muntu mwoso ndo udi yi bodidi bwa loboko, yi amamona muna kwanci amakwayila, ndo amamuncibikila mala anci, nyinga ya Ncembi yamasala munda mwanci beci ?

¹⁸ Bana, katunangi ku diyi, ndo ku ludimi, kate ku mudimo, yi ku sôsôlwo.

¹⁹ Nako tunalubukwa ene, tudi bena sôsôlwo, yi tunakwetabuxisa micima yecu ku mpala anci.

²⁰ Ndo mucima ěcu ămatubela, Ncembi amadika mucima ěcu bunene, ubili bintu bioso.

²¹ Banangibwi, ndo mucima ěcu kausotubela, tudi yi mucima ku mpala a Ncembi ;

²² yi kintu kioso kitwalcmba, tunakiangata kudiyi bwalo butwamanama milangu yenci, yi twencenca bintu bidi bimpe ku meso anci.

²³ Kunu kudi mulangu ănci, ene, tuxekwetabuxila dina dia Mwananci Yisu Kalistu, yi tuxenangañana, bea biakatulangayi mulangu.

²⁴ You amanama milangu yenci amasala munda mwanci yi yei munda mwanci. Nako ndo twamalubukwa ene, yei amasala munda mwecu, bwalo bwa Mwoxixi amatupayi.