1 YOANO 2 - Disambi Dipyadipya

¹ BANA bamene, nwafundila bintu bebi binutaxekwona. Aka muntu mwoso onona, tudi yi Musamunini kwa Tete, Yisu Kalistu a nkwami :

² yei lolo udi kibondelu ku mucwe ă mabi ecu ; kaninga kumoni ecu matupu, kate ku mucwe ă bungi bwa loboko kabidi.

³ Nako ndo twalubukwa ene, tumubili, ndo twamanama milangu yenci.

⁴ You amatôya ene, Mubili, utasonama milangu yenci, udi muna ncimi, yi sôsôlwo kiena munda mwanci ;

⁵ kaninga muntu mwoso amanama diyi dienci, munda mwanci mwamakukixibwa nyinga ya Ncembi sôsôlwo. Nako ndo kutwalubukwa ene, tudi munda mwanci.

⁶ You amatôya ene, amasala munda mwanci, uxekwenda kabidi mikyenci bea biakakwendayi.

⁷ Banangibwi, kisonufundila mulangu mupyamupya, kate mulangu ă kalikali unwakamangata pôi bubangabanga. Mulangu ă kalikali udi diyi dinwamakwombwa.

⁸ Nwafundila lolo mulangu mupyamupya, udi sôsôlwo munda mwanci yi munda mwenu ; bwalo butanadika mwedima, yi obo a sôsôlwo amalumuka nkyekyu.

⁹ You amatôya ene, udi ku obo, yi amanyañana muna kwanci, udi mu mwedima pôi nkyekyu.

¹⁰ You amananga muna kwanci amasala ku obo, yi munda mwanci kamuna kiponexelu.

¹¹ Kaninga you amanyañana muna kwanci udi mu mwedima, yi endenda ku mwedima, yi kasolubukwa kuyeyayi, bwalo bwamaxipa mwedima ou meso anci.

¹² Nwafundila, bana, bwalo bwamanulekyelebwa mabi enu ku mucwe i ă dina dienci.

¹³ Nwafundila batete, bwalo bunwamalubukwa you udi pôi bubangabanga. Nwafundila, mapulwa, bwalo bunwamapidila you a bubi. Nwafundila, bana babende, bwalo bunwamalubukwa Tete.

¹⁴ Napunufundila, batete, bwalo bunwamalubukwa you udi pôi bubangabanga. Napunufundila, mapulwa, bwalo bunutani yi ngulu, yi diyi dia Ncembi diamasala munda mwenu, yi nwamapidila you a bubi.

¹⁵ Kanunangi loboko, ndo bintu bidi ku loboko. Aka muntu mwoso amananga loboko, nyinga ya Tete kayina munda mwanci.

¹⁶ Bwalo kintu kioso kidi ku loboko, luxindilu lwa munyu, yi luxindilu lwa meso, yi disasa dia môyo, kakina kia Tete, kate kidi kia loboko.

¹⁷ Yi loboko lunadika yi luxindilu lwalu, mo you encenca nyinga ya Ncembi unasala kô kô.

¹⁸ Bana babende, kudi ola a ku sula, yi byekyene binwamakwombwa ene, Anti-Kalistu ulolwa, biamalwa isanga nkyekyu ba-Anti-Kalistu bangi, mbwôso twamalubukwa ene, ola a ku sula udiko.

¹⁹ Bakasokowa kutudi, kate kabakadi becu ; ximbi bakakala becu baxesala yinecu ; kate bixekwebexebwabo, ene, bobo boso kabena becu.

²⁰ Yi nonu nudi yi kixingilu kinwamaxingibwa kudi you a babala, yi nwamalubukwa bintu bioso.

²¹ Kinufundili bwalo bunutasolubukwa sôsôlwo, kate bwalo bunwamamulubukwa, yi, ene, lodimbu lwoso kaluna lwa sôsôlwo.

²² Ñani udi muna ncimi utena you amanyañana Yisu udi Kalistu ? You udi Anti-Kalistu amanyañana Tete yi Mwana.

²³ Muntu mwoso amanyañana Mwana, yei kiena yi Tete ; you amasakola Mwana udi yi Tete kabidi.

²⁴ Ku bwalo bwenu, munwamakwombwa pôi bubangabanga musali munda mwenu : ndo bwalo bobu bunwamakwombwa pôi bubangabanga bwamasala munda mwenu, nonu kabidi nunasala munda mwa Mwana yi munda mwa Tete.

²⁵ Yi kunu kudi kilaka kiamatuxiyilayi, môyo ă kô kô.

²⁶ Napunufundila bintu bebi ku bwalo bwa bantu banwaungisaungisa.

²⁷ Yi ku bwalo bwenu, kixingilu kia manyi kinwakangata kudiyi kiamasala munda mwenu, yi kanusokwabila muntu a kunweyesa ; kate bwalo bwamanweyesa kixingilu kieki dia bintu bioso, yi kidi sôsôlwo, kakina lodimbu pô, yi bwalo bwamanweyesakio, ndo bununasala munda mwanci.

²⁸ Nkyekyu lolo, bana, nusali munda mwanci ; akali lolo yei unakwebexebwa, coco tunakala yi mucima, yi katunaxipibwa bundu ku mpala anci ku kiluiu kienci.

²⁹ Ndo nwamalembetela ene, yei udi yi nkwami, nwalubukwa ene, muntu mwoso encenca nkwami amalelebwa kudiyi.