1 YOANO 1 - Disambi Dipyadipya

¹ YOU akadi pôi bubangabanga, utwamakwombwa, utwamamona ku meso ecu, utwamaxixima, amababata makaci ecu, bwalo bwa Diyi dia môyo ;

² (bwalo bwamakwebexebwa môyo, yi coco twamaumona, yi twamatôbôla ntôbô, yi tunwasakolela môyo ou ă kô kô ăkadi yi Tete yi ămatwebexebwa) ;

³ you utwamamona, utwamakwombwa, tunwasakolelayi, binuxeakala nonu kabidi yinecu busangilañani bumobumwe, yi busangilañani bwecu budi yi Tete sôsôlwo, yi Mwananci Yisu Kalistu.

⁴ Tunwafundila bintu bebi, bixekukanana kiango kienu.

⁵ Kunu lolo kudi diyi ditwamakwombwa kudiyi, ditunwasakolela, ene, Ncembi udi obo, yi munda mwanci kamuna mwedima pô.

⁶ Coco ndo twamatôya ene, tudi yinanci busangilañani bumobumwe, kaninga twendenda ku mwedima, twamadimba, yi katusokwenca sôsôlwo.

⁷ Mo ndo twendenda ku obo bea bidiyi ku obo, tudi yi busangilañani bwecu bumobumwe, yi maxi a Yisu Kalistu Mwananci atwakusula bubi bwoso.

⁸ Ndo twamatôya ene, katuna yi bubi, twamadidimba mikyecu, yi sôsôlwo kiena munda mwecu.

⁹ Ndo twamasakola mabi ecu, yei udi yi kibaku yi nkwami ya kutulekyela mabi ecu, yi kutukusula kwona kwoso.

¹⁰ Ndo twamatôya ene, coco katwoneni, twamamwenca muna ncimi, yi diyi dienci kadina munda mwecu.