1 TIMOTEO 4 - Disambi Dipyadipya

¹ MO Mwoxixi atôya yi ngulu ene, ku bikondo bia kunyuma kunasaluka banga bantu bwalo bwa kwetabusa, banabaka macu kudi bidimu biaungisa ungisa bantu, yi ku kweyesa kwa bidimu bibi

² bidi mu kutôya kudi bantu bamadimba ndimbu ku mancanga, bamakwoxebwa mu kilubukilu kiabo kia munda bea yi kipiko kia mudilu ;

³ bamancidika dia kubaka mabakwa, yi dia kudya kwa minyenye yakapanga Ncembi ndo kwangacibwa yi biloba kudi bantu bamakwetabusa yi bamalembetela sôsôlwo.

⁴ Bwalo budi kipangu kioso kia Ncembi kinengela ; kumoni kintu kimokimwe kunyananibwa ndo kiamangacibwa yi kuxinga kwa biloba ;

⁵ bwalo bwamabalolebwakio ku diyi dia Ncembi yi ku lulombu.

⁶ Ndo unakwelesa bakunyi bintu bebi nkanyi, owe unakala musadi unengela a Kalistu Yisu, wamalundixibwa mu meyi a kwetabusa yi a kweyesa kunengela kwamalandudila owe.

⁷ Mo nyañana tufumu twa mietangu yi twa binunu bia babakaxi. Udiekyelesi mikyebe yi mwosambu ă Ncembi ;

⁸ kwekyelesa mumbidi kudi loko lubende, mo mwosambu ă Ncembi udi loko ku bintu bioso, udi yi kilaka ku bwalo bwa môyo ou udiko nkyekyu, yi kia ou ulolwa.

⁹ Diyi didi diyi dia ko, diamalelakyela yi kwangacibwa kudi bantu boso.

¹⁰ Ku mucwe ou ndo kutwamakamba yi kutwamatanda, bwalo bututani yi mudingidilu ěcu ă kudingila Ncembi a môyo, udi Mupandixi a bantu boso, yi a bantu pako betabusa.

¹¹ Ulangi bintu bebi, yi ubieyesi.

¹² Muntu katamuni bwabuki kwebe ; kate ikala owe kielekyexelu kia bantu bamakwetabusa, ku diyi, ku mwosambu, ku nyinga, ku kwetabusa, ku babala.

¹³ Pôi kikondo kinalwa, baka mucima ăbe ku kubala, yi ku kubondabonda, yi ku kweyesa.

¹⁴ Kwelu dilongi didi munda mwebe, diakakupebwa ku kidimuxilu kiakadimuxibwa, yi ku kubakibwa kwa makaci a babakulu.

¹⁵ Lukutila bintu bebi mulukutu, ikala munda mwabio dyendeli, bixemoneka kulunda kwebe kudi bantu boso.

¹⁶ Uditebeli mikyebe yi kweyesa kwebe. Xina mwoxinu yi bintu bebi ; bwalo pa kwenca noku unapandisa yi mikyebe yi bantu bakwombombwa.