1 PITA 5 - Disambi Dipyadipya

¹ BABAKULU badi pakacikaci penu, meme mbabondabonda, ndi yinabo mwamukulu, yi mutôbôdi akamona masama a Kalistu, ndi kabidi mwabanyanani a dikai ditanalanda kwebexebwa ;

² nwakali banami ba kibumbu kia Ncembi kia mikwakwa kidi pakacikaci penu ; nudi mu kunama kumoni bwalo bwa dibambu, kate ku nyinga ; kumoni ku bwalo bwa difuto dia mbindu, kate yi mucima ;

³ kumoni bea kwakala yi bufumu kulu kwa bima bienu, kate luna biebexelu ku mpala a kibumbu kia mikwakwa.

⁴ Yi panakwebexebwa Kalama ka kulu, nunangata kilongo kia dikai kitasolengowa.

⁵ Mo nako nonu babaki, nudipwesi mikyenu kudi babakulu ; yi bungi bwenu nudikobi diedya muntu yi muna kwanci, muntu yi muna kwanci ; bwalo bwamatanda Ncembi yi bena disasa, mo upapa bena diedya lwoxixi.

⁶ Mbwôso nudipwesi mikyenu muxi mwa kianca kia mpinyu kia Ncembi, bixenubandisayi ku kikondo kia loko ;

⁷ nudi mu kupula mutete ӗnu mwoso kulu kwanci, bwalo bunudi bwalo bwanci.

⁸ Nwakali bena milangu, nudingili. You amatanda yinenu, diabolo, endenda bea ntambwi amakwamena diyi dikola, udi mu kupalala bantu ba kudya.

⁹ Nutandi yinanci, yi kwetabusa bô, bwalo bunwalubukwa ene, masama aa noku atanakukixibwa kudi bakunyi benu badi ku loboko.

¹⁰ Mo Ncembi a lwoxixi lwoso akanubikila ku dikai dienci dia kô kô mu Kalistu Yisu, panakala nwamatata kakondo kabende, unanukukisa, unanusubisa, unanukolesa bô.

¹¹ Kudiyi kwakali mpinyu ku mieciya ya mieciya. Amen.

¹² Kudi Silasa, ungwencenca ene, udi mwakunyi a kibaku, ndo kunamanufundila kabende ; ndi mu kubondabonda yi mu kutôbôla ene, lolu ndo lwoxixi lwa sôsôlwo lwa Ncembi lunwamakwemana momu bô.

¹³ Kikokye kiakasungudibwa yinenu ndongo kidi ku Babelono kiamanubisa, yi Maku mwanami.

¹⁴ Nubisañani yi kunyita kwa nyinga. Polo akali yinenu bungi bwenu badi mu Kalistu.