1 PITA 3 - Disambi Dipyadipya

¹ MO nako nonu bakaxi, nwakali yi diedya kudi babayenu ; mbwôso, isanga banga kabasokwedeya diyi, baxepucibwa kutena diyi, ku bwalo bwa mwosambu ă bakaxi babo ;

² badi mu kutebela mwosambu ěnu ă babala yi diedya.

³ Kubonga kwenu kakwakadi kwa kunci, kwa nyonyi kuluka, yi kwa bikanu bia ôlo kuteka, yi kwa bilamba kulata ;

⁴ kate kwa muntu musokoka a mucima, kubonga kutena musalu kwa mucima ă diedya yi ă polo, udi ă dipiko dikola ku meso a Ncembi.

⁵ Mo nako kwakadibongesa mikyeabo babakaxi ba babala kalikali, bakadingidila Ncembi, bakadi yi diedya kudi babayabo ;

⁶ bea biakakwedeya Sala Abalami, udi mu kumubikila ene, fumu ; unwapwakala bana banci ndo nwencenca kunengela, yi kanusocina bowa bwoso.

⁷ Mo nako nonu, babalumi, nuxikami yi mukaxi luna bialelekyela yi kilubukilu, bea kuxikama yi mumbidi ă butonga bulebela, nudi mu kubanemeka, bwalo bunudi yinabo kabidi bakitañani ba mwokito ă lwoxixi lwa môyo ; bitaxekandibwa ndombu yenu.

⁸ Ku sula, bungi bwenu nwakali yi lukanyi iumolumwe, nudi mu kwombwelañana mwengo, yi mu kunangañana bea bakunyi, yi micima yilebela yi nkanyi ya diedya ;

⁹ kanupingaxi bubi ku mucwe ă bubi, ndo lukisu ku mucwe ă kukixibwa kumoni ; kate bunga bwalo, nulwangwasani ; bwalo bunwakabikidibwa ku noku binuxekita mulwangwasanu mwokito.

¹⁰ Bwalo you akyeba kunanga môyo yi kumona matuku anengela, aximbi ludimi lwanci ku bubi yi milomo yenci ku kutôya kwa ncimi.

¹¹ Akulumuki kudi bubi, yi akisi kunengela ; apalali polo yi amulabeli ;

¹² bwalo bwamatebela meso a Fumu bena nkwami, yi macu anci ombombwa mwapangusu ăbo ; mo mpala a Fumu amatanda yi bantu bencenca malo mabi.

¹³ Ñani lolo unanutatisa ndo nwakala yi mulukutu ă kulukutila bwalo bunengela ?

¹⁴ Kate ndo nuxetata ku mucwe ă nkwami kabidi, balwangwasanibwi nonu ; mo kanucini ku bowa bwabo, yi kanutepexebwi ;

¹⁵ mo nubaloli Kalistu mu micima yenu, Fumu ; yi nwakali yi lungwoso matuku moso lwa kulwandwadila muntu mwosondwandwa amanwapanguxila dia mudingidilu udi munda mwenu, kate yi diedya yi bowa ;

¹⁶ nudi yi kilubukilu kia munda kinengela ; bixexipibwabo bundu, ku bwalo bunwatôyelabo, bamatangola mwosambu ěnu unengela mu Kalistu.

¹⁷ Bwalo bwamadika loko, akali nyinga ya Ncembi yamananga nako, nonu kutata ku bwaio bwa kukisa kunengela, kumoni bwalo bwa kwenca bubi.

¹⁸ Bwalo bwakatata Kalistu kusama kabidi ditata dimodimwe dyendeli nya ku bwalo bwa mabi, muna nkwami ku mucwe ă bantu batena yi nkwami ; bixetufikisayi kudi Ncembi ; akaxipibwa mu munyu, mo akatekyebwa yi môyo mu Mwoxixi ;

¹⁹ mwakayayi kabidi munda mwanci kuya ambila bidimu mu ncibo a nkanu,

²⁰ biakadi yi ntamu kalikali, ku kikondo kiakakunga kicwandundu kia Ncembi ku matuku a Nowa, pakadi kibusu kidi mu kulungikibwa ; kiakapandixibwa bantu babende munda mwakio, bantu yenana, ku mai ;

²¹ amanupandisa nkyekyu ku kifwanisa kabidi, isanga kunumeyebwa ; kumoni kunamuna lobindu lwa munyu, kate kwapangusa kwa kilubukilu kinengela ku mpala a Ncembi, bwalo bwa kubika kwa Yisu Kalistu kudi bafu, udi ku kidyo kia Ncembi,

²² bwalo bwamabwelayi munda mwa diulu ; yi bangele yi mamanya yi ngulu bamapwexebwa muxi mwanci.