1 PITA 2 - Disambi Dipyadipya

¹ MBWÔSO nwekyeyi mwoxingi mwoso, yi buluba bwoso, yi mancanga, yi mietumbu, yi mietangu mioso ;

² yi nukyebi mabele a lukanyi atena buluba, bea mayedi malela mo nkyekyu, binuxelunda yinao pôi ku kupandixibwa ;

³ akali nwamakikisa Fumu udi kunengela.

⁴ Binulolwa kudiyi, bea kudi dibwe dia môyo, diamanyananibwa sôsôlwo kudi bantu ; mo ku meso a Ncembi, diamasungudibwa yi diamanemekyebwa ;

⁵ nonu kabidi bea mabwe a môyo nudi mu kwabakibwa ncibo a Mwoxixi, ndo kwakala bubokanda bwa babala, ndo kulongola malongi a Mwoxixi, adi ñonu ku mpala a Ncembi kudi Yisu Kalistu.

⁶ Bwalo budiko mu mukanda ă Ncembi ene, Mona, ngwaladika dibwe mu Siono dia ku ilunga basodi diamasungudibwa, diamanemekyebwa ; yi you umwetabuxila kanaxipibwa bundu pô.

⁷ Mbwôso kunudi bamakwetabusa kwamanemekyebwayi ; mo ku bwalo bwa bena ntamu, dibwe diakanyañana babaki ba ncibo, kadedi diamatekyebwa mucwe ă ilunga basodi ;

⁸ yi dibwe dia kiponexelu yi dibwe dinene dia kixindilu kudi bantu bamapuma diya ku diyi, bwalo budibo bena ntamu ; yi kwakabalungi-kidibwa noku.

⁹ Mo nonu nudi bu-tonga bwa bantu bamasungudibwa, bubokanda bwa bufumu, bubila bwa babala, bantu badi bena diso dia-manculayi ; binuxekwebesa miesambu ya lwoxixi ya you akanubikila mu mwedima kulwa ku obo anci a kikamakama ;

¹⁰ isanga nonu batakadi bantu, mo nkyekyu nudi bantu ba Ncembi ; batasananini mwengo mo nkyekyu nwamasañana mwengo.

¹¹ Banangibwi, nwabondabonda bea bantu babene yi bea bena ngendo, ene, nuncili xindilu ya munyu yamatanda yi mucima ;

¹² nwakali yi mwosambu ěnu ă nkwami pakacikaci pa mabila ; mbwôso isanga bamatôya ku bwalo bwenu bea bwa bakixi ba malo mabi, kaninga ku mucwe ă makisa enu anengela amatebelabo, baxetumbisa Ncembi ku dituku dia kuxiximibwa.

¹³ Nwedeyi mulangu mwoso ă bantu ku mucwe ă Fumu ; ndo fumu munene amadika kulu,

¹⁴ ndo milopwe yamatumibwa kudiyi kuya ambisa bantu malo bamakwenca bubi, yi kutumbisa bantu bencenca kunengela.

¹⁵ Bwalo budi nyinga ya Ncembi ene, ku kukisa kwa kunengela ndo kunuxepudikisa bena madibi batasolubukwa malo.

¹⁶ Nudi bana ba bula, mo kanwakadi yi bwana bwa bula luna mucwala ă kuncibika mwoxingi, kate bea basadi ba Ncembi.

¹⁷ Nunemeki bantu boso. Nunangi bakunvi. Nucini Ncembi bowa. Nunemeki fumu.

¹⁸ Basadi ba ncibo, nwedeyi bafumu benu yi bowa boso ; kumoni bobo batupu badi kunengela yi kulebela, kate bena bwolemo kabidi.

¹⁹ Bwalo bobu budi nonu, ndo muntu ombombwa maxitu ku mucwe ă kilubukilu kia munda bwalo bwa Ncembi, udi mu kwombwa kusama kutena amakwenca bwalo bubi.

²⁰ Mo ndo nwamakwona yi nwamakumibwa, akali nwombombwa kusama yi bwika, lotumbu ludi lwa beci ? Kate ndo nwencenca kunengela yi nwombombwa kusama, akali lolo nwombombwa yi bwika, nako kudi nonu yi Ncembi.

²¹ Nwakabikidibwa ku bwalo bobu ; bwalo bwakanutacila Kalistu, amanuxiyila lwedi kwelekyesa, binuxetomba bipokye bienci ;

²² utakwenca bubi pô, yi mu musuku ănci kamwasañanibwa mwalo.

²³ Yei, pakatukibwayi, akadi kasotuka kabidi ; pakatatayi, akadi kasoxekyeya ; mo akadilongola mikyenci kudi you asambola yi nkwami ;

²⁴ akacwala mabi ecu mikyenci mu mumbidi ănci kulu kwa muci, bituxeakala yi môyo ku bwalo bwa nkwami, bwalo butwamafwa ku bwalo bwa mabi ; yi ku miekolola yenci ndo kutwamapandixibwa.

²⁵ Bwalo bunwakadi mu kuungaunga bea mikwakwa ; kate nwamapiñana nkyekyu kudi Kalama yi Munami a micima yenu.