1 PITA 1 - Disambi Dipyadipya

¹ PITA, mutumibwi a Yisu Kalistu, kudi basungudibwi badi bantu babene ba Lucakacaka mu Ponto, Ngalatia, Kapadokia, Asia, yi Bitinia ;

² bamasungudibwa ku kilubukilu kia buxi kia Ncembi Tete, yi bamabalolebwa ku kubalolebwa kwa Mwoxixi, ndo kwakala yi diedya, yi kucakibwa kwa maxi a Yisu Kalistu ; lwoxixi lwakali yinenu yi polo bungi bungi.

³ Ncembi yi Tete a Fumwecu Yisu Kalistu atumbixibwi, akatulela kabidi bea biakadi mwengo ănci mungi, bituxeakala yi mudingidilu ă môyo bwalo bwa kubika kwa Yisu Kalistu kudi bafu,

⁴ bituxeakala yi mwokito utena musalu, yi utena mbindu, yi utasolengowa, ămabumbibwa mu melu kulu ku micwe yenu ;

⁵ nonu bamanamibwa ku ngulu ya Ncembi ku kwetabusa, pôi ku kipandilu kia môyo kitanalanda kwebexebwa ku kikondo kia ku sula.

⁶ Ku bwalo bobu ndo kunwaxekyelela kungi ; isanga nwamatekyebwa yi buxitu ku nkyekyu you yi ku kakondo kabende, ndo bwalo budi noku, kudi bielekyexelu binga ;

⁷ nako, kwelekyesa kwa kwetabusa kwenu, kwamadika ôlo dipiko unancimina isanga ămakwelekyexebwa ku mudilu, kuxesañanibwa yi lotumbu yi dikai yi kinemu, ku kiebexelu kia Yisu Kalistu ;

⁸ unwamananga kutena nwamamumona ; yi isanga kanusomumona nkyekyu, kaninga nwamamwetabuxila yi nwamaxekyelela kungi yi kiango kitabiyi kusakolebwa, kiamakwolubila dikai ;

⁹ yi nudi mu kwangata sayi ya kwetabusa kwenu, kupandixibwa kwa bidimu bienu.

¹⁰ Ku bwalo bwa kupandixibwa koku, badimuxi bakakwakwala yi bakapalala kungi, bakadimusa dia lwoxixi luxelwa kunudi ;

¹¹ bakadi mu kupalala kikondo, yi butonga bwa kikondo, kiakakwebesa Mwoxixi a Kalistu akadi munda mwabo, pakatôbôlayi buxi dia masama a Kalistu yi dia makai axealanda kunyuma.

¹² Kwakabebexebwa ene, kumoni kudibo mikyeabo mo kunudi ndo kwakalongolabo bintu bebi biamanwambidibwa kudi bantu bamanwambila losangu lunengela kudi Mwoxixi a babala akatumibwa mu diulu ; bintu biamakyeba bangele kuxixima.

¹³ Mbwôso nukobi makondu a nkanyi yenu yi nwakali yi mulangu, nudi mu kudingidila lwoxixi dyendeli lunacwadibwa kunudi ku kiebexelu kia Yisu Kalistu ;

¹⁴ bea bana ba diedya, kanufwanixibwi yi xindilu yenu ya kalikali ku kikondo kia bwilwa bwenu ;

¹⁵ kate bea bidi you babala akanubikila ndo binwakali nonu kabidi babala ku mwosambu ěnu muncimancima ;

¹⁶ bwalo bwakafundibwa ene, Nunakala babala, bwalo bundi meme babala.

¹⁷ Yi ndo nwamakwabila you ene, Tete, amasambola mudimo ă muntu mwoso kutena kuyila bantu kikanda, nudikisi kikondo kia kuxikama kwenu yi bowa ;

¹⁸ bwalo bunwalubukwa ene, nwakapikudibwa, kumoni yi bintu binasaluka, bea mpalata yi ôlo, kudi mwosambu ěnu ă kanana ăkanuxiyidibwa kudi batetenu ;

¹⁹ kate yi maxi a dipiko, bea a mwana a mukwakwa utena bwalo bubi yi utena kantobo, maxi a Kalistu ;

²⁰ akalubukibwa sôsôlwo buxi bwakadi loboko kalusobangibwa, mo akakwebexebwa ku sula kwa bikondo ku micwe yenu ;

²¹ ya nonu badi betabuxi, bamakwetabuxila Ncembi ku bwalo bwanci, akamubisa kudi bafu, yi akamupa dikai ; bixeakala kwetabusa kwenu yi mudingidilu enu kudi Ncembi.

²² Bwalo bunwamasusula micima yenu ku kwedeya kwenu kwa sôsôlwo ku nyinga ya bakunyi yitena mancanga, nunanganani kungi ku mucima ă babala ;

²³ bwalo bunwamalelebwa kabidi kumoni ku mitongu yalubukwa kusaluka, kate ku mitongu yitabiyi kusaluka, ku diyi dia Ncembi didi yi môyo yi dinasala kô kô.

²⁴ Bwalo budi munyu mwoso bea bilo, yi bungi bwa dikai diau didi bea disusu dia bilo. Bilo ndo biomoma, yi disusu ndo dinapona ; mo diyi dia Fumu dinasala kô kô.

²⁵ Dedi ndo diyi dia losangu lunengela diakanwambidibwa.