1 KOLINTI 9 - Disambi Dipyadipya

¹ KA meme ndo muna bula ? Ka meme ndo mutumibwi ? Ka meme namamona Yisu Fumwecu ? Ka nonu nudi mudimo ămene mu Fumu ?

² Ndo kisoakala mutumibwi kudi banga bantu, ngwakala noku kunudi sôsôlwo, bwalo bunudi nonu kilembetelu kia butumibwi bwamene mu Fumu.

³ Kukyata kwamene kudi bantu bangwakwakwala kudi noku, ene,

⁴ Coco katuna yi bumanya bwa kudya yi bwa kunwa ?

⁵ Coco katuna yi bumanya bwa kucwala mukaxi (ndo apwakala muna kwecu), bea bamo batumibwi, yi bea bana ba Fumu mamanci, yi bea Kyefasa ?

⁶ Sungu mo meme yi Banabasa badiko batena yi bumanya bwa kulekyela kwenca mudimo ?

⁷ Ñani uyeya ku kikondo kioso kuya tanda mbita, udiacinda mikyenci dicindu ? Ñani akuna kibidi kia finyo yi kasodya mamoma akio ? Ndo ñani anama kibumbu kia bibôbô yi kasonwa mabele a kibumbu ?

⁸ Ngwatôya bintu bebi bea mutôyelu ă bantu ? Ki bwadi kabidi bwamatôya noku ?

⁹ Bwalo bwakafundibwa mu bwadi bwa Mosese ene, Kusuki musuku ă ñombi panyata nyatayi miebele. Ncembi amadinyingisa mikyenci ku bwalo bwa ñombi mitupu ?

¹⁰ Ki ku micwe yecu kwatôyayi noku dyendeli ? Ku micwe yecu sôsôlwo kwakafundibwa noku ; bixedima mudimi yi mudingidilu, yi bixekwesa mwexi yi mudingidilu ă kudya kunyuma.

¹¹ Coco ndo twamanukunina bintu bia Mwoxixi, kudi bwalo bunene ndo twabuka bintu bienu bia munyu ?

¹² Ndo banga badedya bumanya bobu kulu kwenu, ka coco tuxedika ? Kate coco twakadi katusokwenca yi bumanya bobu, kate twombombwa bintu bioso yi bwika ximbi tuxekanda losangu lunengela lwa Kalistu.

¹³ Nonu kanusolubukwa ene, bobo basadila bintu bia babala badedya bidya bia tempelo ? Yi bobo basadila kilongolelu ka badedyañana yi kilongolelu ?

¹⁴ Mo nako Fumu amalungika ene, bobo bambila losangu lunengela baxedya bidya bia losangu lunengela.

¹⁵ Kaninga meme kiakisa yi kintu kimokimwe kia noku ; yi kisofunda bintu bebi bixengwencebwa noku ; bwalo bungwatunga kufwa, kumoni muntu mwoso kulengola mwanu ămene ungwañana.

¹⁶ Mo ndo ngwambila losangu lunengela, kiena yi kianinu kia kwana mwanu ; bwalo bunamabambibwa dibambu ; ya, mpeya kundi ndo kisokwambila losangu lunengela.

¹⁷ Ndo ngwencenca noku ku nyinga yamene mikyemi ndi yi sayi ; kate ndo yi nyinga yamene kumoni, bunkôngôlo bwamangupebwa.

¹⁸ Sayi amene udi beci lolo ? Mo pa kwambila losangu lunengela, nxeteka losangu lunengela kutena diso, bintaxekwenca yi bumanya budi bwamene mu losangu lunengela.

¹⁹ Isanga ndi yi bwana bwa bula bwalo bwa bantu boso, namaditeka mikyemi mupika a bantu boso, binxekwetabuxisa bantu bangi.

²⁰ Kudi bena Yuda nakalwa luna muna Yuda binxekwetabuxisa bena Yuda ; kudibo badi muxi mwa bwadi nakalwa bea muxi mwa bwadi, (isanga kiena muxi mwa bwadi mikyemi), binxekwetabuxisa bantu badi muxi mwa bwadi ;

²¹ kudibo batena yi bwadi nakalwa bea muntu utena yi bwadi, (kumoni kwakala kutena mulangu ku mpala a Ncembi, kate ndi muxi mwa mulangu ă Kalistu), binxekwetabuxisa bantu batena yi bwadi ;

²² kudi bena mabombu nakalwa bea muna bubombu, binxekwetabuxisa bena mabombu ; namalwa bintu bioso kudi bantu boso binxepandisa isanga banga bantu.

²³ Yi ngwencenca bintu bioso ku mucwe ă losangu lunengela binxekwabanyañana yinalu.

²⁴ Nonu kanusolubukwa ene, bobo basambolañana sambo basambola bungi bwabo ; kate umoumwe ndo angata kintu kia sambo ? Nusamboli binuxeangata.

²⁵ Yi mutandañani mwoso a bibula udi muna mulangu mu bintu bioso. Mo bobo bencenca noku ndo kwangata kilongo ku mucwe kifofwa yi kufwa ; mo coco ndo kwangata kilongo kitabiyi kufwa.

²⁶ Mbwôso meme ngwasambola, kumoni bea kuungaunga ; ngwatanda, kumoni bea muntu akuma mwoxixi kanana.

²⁷ Kate ngwapwesa mumbidi ămene, namauteka luna musungi amene, ximbi panakala namakwambila banga bantu nxenyañanibwa mikyemi.