1 KOLINTI 6 - Disambi Dipyadipya

¹ MUNTU mwoso kwenu, ndo utani yi muna kwanci bwalo, udi yi mucima ă kwimuka kimu ku mpala ya bena mabi, yi kumoni ku mpala ya bena babala ?

² Nonu kanusolubukwa ene, bena babala banasambola loboko ? Yi ndo loboko lunasambolebwa kunudi, nonu kanusolelekyela yi kusambola malo mabende nci ?

³ Kanusolubukwa ene, coco tunasambola bangele ? Ape ki malo a môyo ou kabidi ?

⁴ Aka lolo nudi yi malo a bintu bia môyo ou, nuteki bantu kwasambola badi babende nci mu kikokye.

⁵ Ngwatôya ndo kunwombwesa bundu. Kudi lolo noku ; muna bwinu kwenu nyô ? Kumoni isanga umoumwe unalubukwa kusambola muna kwanci ?

⁶ Mo mwakunyi uyeya kimu yi mwakunyi, ku mpala ya bantu batena yi kwetabusa kabidi.

⁷ Mbwôso nudi yi kwona kungi isanga nkyekyu, bwalo bunwimukanana bimu. Kukai kanusotunga kwonenebwa ? Kukai kanusotunga kufinibwa ?

⁸ Kaninga nonu nwonona yi nwafina, isanga bena kwenu.

⁹ Kanusolubukwa ene, bena mabi kabanakita bufumu bwa Ncembi mwokito ? Kanudimbibwi ; ndo badibi, ndo baxingidi ba ngixi, ndo bena mendela, ndo bena mabombu, ndo bobo bamadiona mikyeabo yi babalumi,

¹⁰ ndo befi, ndo bena luxindilu, ndo bena nkolwa ya malufu, ndo bena mpolo, ndo bafinañani, kabanakita bufumu bwa Ncembi i mwokito.

¹¹ Yi banga badi yinenu bakadi mo nako ; kate nwamakusudibwa, kate nwamabalolebwa, kate nwamasuwixibwa ku dina dia Fumu Yisu, yi kudi Mwoxixi a Ncembi ecu.

¹² Bintu bioso bialelekyela ndo kwencebwa kundi, kate bintu bioso kabina yi kipoma kinengela ; bintu bioso bialelekyela ndo kwencebwa kundi, kate kinapwexebwa muxi mwa bumanya bwa kintu kioso.

¹³ Bidya ku bwalo bwa difu, yi difu ku bwalo bwa bidya ; mo Ncembi unancimisa yi dedi yi bebi. Mo mumbidi kauna ku bwalo bwa budibi, kate ku bwalo bwa Fumu, yi Fumu ku bwalo bwa mumbidi.

¹⁴ Ncembi lolo akabisa Fumu, yi unatubisa coco ku ngulu yenci.

¹⁵ Nonu kanusolubukwa ene, mimbidi yenu idi bicini bia mumbidi bia Kalistu ? Ngwangati lolo bicini bia Kalistu, mbiteki bicini bia mudibi ? Ai ! Kumoni.

¹⁶ Ape kanusolubukwa ene, you amasambikibwa yi mudibi udi mumbidi umounwe ? Bwalo bwakatôyayi ene, Babidi banakala munyu umoumwe.

¹⁷ Kaninga yei amasambikibwa yi Fumu udi mwoxixi umoumwe.

¹⁸ Nucini budibi. Kwona kwoso kwonona muntu kudi kunci kwa numbidi ; mo you onona ku budibi amakwonena mumbidi ănci mikyenci.

¹⁹ Ape kanusolubukwa ene, mumbidi ěnu udi tempelo a Mwoxixi a babala udi munda mwenu, unwapwangata kudi Ncembi, yi kanuna bantu benu mikyenu ?

²⁰ Bwalo bunwakakwodibwa yi diso ; mbwôso nutumbisi Ncembi mu mumbidi ěnu.