1 KOLINTI 5 - Disambi Dipyadipya

¹ LWINDU lwamakumibwa ene, budibi bwapwakala kwenu ; yi budibi bwa bubi butenako isanga kudi mabila ; muntu kwakala yi mukaxi a tetenci.

² Yi nonu nwamadibandisa ; kaninga kanwadila bixencudibwa muntu you kunudi akakwenca bwalo bobu.

³ Meme sôsôlwo, isanga ndi kulekuie ku mumbidi, ndiko ku mucima ; yi namasambola isanga nkyekyu, kulexi ndo napwakala koku, ku bwalo bwa muntu you amakwenca noku, ku dina dia Fumwecu Yisu Kalistu.

⁴ Namasambola panwamakokama yi mucima ămene kidi kimokimwe, yi ngulu ya Fumwecu Yisu Kalistu,

⁵ ndo kulongola muntu a noku kudi Satana, munyu kuxipibwa, bixepandixibwa kidimu ku dituku dia Fumu Yisu.

⁶ Mwanu ěnu kauna loko. Kanusolubukwa ene, kiolubixilu kibende kiamakwolubisa kimoma kincimancima ?

⁷ Mbwôso nunamuni kiolubixilu kia kalikali, binuxeakala kimoma kipyakipya, bea binwakala kutena kiolubixilu. Bwalo bwakaxipibwa Kidikixilu kiecu, Kalistu ;

⁸ mbwôso tunami kitula kumoni yi kiolubixilu kia kalikali, ndo yi kiolubixilu kia mwoxingi yi kia bubi ; kate yi mampa atena kiolubixilu, a babala yi a sôsôlwo.

⁹ Namanufundila mu mukanda ămene ene, kanusangidi yi badibi.

¹⁰ Mo kifundili dyendeli bwalo bwa badibi ba loboko lolu, ndo bena luxindilu yi bafinañani, ndo baxingidi ba ngixi ; ximbi ndo kwenca nako, nuxeakala yi bwalo bwa kuncuka mu loboko.

¹¹ Kate namanufundila nkyekyu ene, kumoni kusangila yinanci, ndo muntu amabikidibwa ene, mwakunyi, apwakala mudibi, ndo muna luxindilu, ndo muxingidi a ngixi, ndo muna mwotangu, ndo muna nkolwa ya malufu, ndo mufinañani ; bwalo bwa muntu a noku, kumoni isanga kudya yinanci.

¹² Ape bwalo budi bwamene ndo kusambola bantu badi kunci ? Ki bwalo bwenu kusambola bantu badi munda ?

¹³ Mo bobo badi kunci, Ncembi ndo ubasambola. Nusokoli muntu you mubi kunudi.