1 KOLINTI 3 - Disambi Dipyadipya

¹ MEME lolo bakunyi, nakadi kibiyi kutôya yinenu bea kudi bena Mwoxixi, kate bea kudi bena munyu ; bea kudi babaki mu Kalistu.

² Namanunusa mabele, yi kinudixili munyenye ; bwalo bunwakadi kanusoponyañana. Kate kanusoponyañana isanga nkyekyu,

³ bwalo bunukidi bena munyu. Pakala mwokunyo ukidi kwenu yi kitumba, ka nukidi bena munyu, yi nwendenda yi mwendelu ă bantu ?

⁴ Panakala muntu umoumwe ene, Meme ndi muna Paulu, yi munga ene, Meme ndi muna Apolo, ka bena paxi nonu ?

⁵ Ñani lolo udi Paulu ? Ñani Apolo ? Mo basadi banwamakwetabusa kudibo ; yi muntu mwoso bea biamamulongola Fumu.

⁶ Meme namakuna, Apolo amatopesa mai ; kate Ncembi amalundisa bintu.

⁷ Mbwôso you akuna kiena kwalo, ndo you atopesa mai ; kate Ncembi alundisa bintu.

⁸ Nako you akuna yi you atopesa mai badi umoumwe ; mo muntu mwoso unangata difuto dienci bea lwedi lwa mudimo ănci.

⁹ Bwalo butudi bantu ba mudimo umoumwe yi Ncembi ; nonu nudi kibidi kia Ncembi, ncibo a Ncembi,

¹⁰ Ku lwedi lwa lwoxixi lwa Ncembi Iwamangupebwa, yi bea mwabaki a ncibo a bwinu, ndo kunamabangola kibangolelu ; yi munga muntu amakwabaka kulu. Mo muntu mwoso adingili mwabakayi kulu.

¹¹ Bwalo butabiyi muntu mwoso kubangola kinga kibangolelu kitena kiekio kiamabangolebwa, kidi Yisu Kalistu.

¹² Mo muntu mwoso ndo abaka kulu kwa kibangolelu kieki ndo ôlo, ndo mpalata, ndo mabwe a mapiko, ndo mici, ndo bilo, ndo sono,

¹³ mudimo ă muntu mwoso unakwebexebwa ; bwalo bunakwebesau dituku dedi ; dinakwebexebwa yi mudilu ; yi mudilu mikyeu unakwelekyesa mudimo ă muntu mwoso butonga bwau.

¹⁴ Aka muntu mwoso mudimo ănci unasala ămakwabakayi kulu, yei unangata sayi.

¹⁵ Aka muntu mwoso mudimo ănci unalwa kwoxebwa, yei unapwexebwa ; mo yei mikyenci unapandixibwa ; kaninga bea ku mudilu.

¹⁶ Nonu kanubiyi ene, nudi tempelo a Ncembi, yi ene, Mwoxixi a Ncembi apwakala munda mwenu ?

¹⁷ Aka muntu mwoso amasalula tempelo a Ncembi, Ncembi unamusalula yei ; bwalo budi tempelo a Ncembi babala, unudi nonu.

¹⁸ Muntu kadidimbi mikyenci. Ndo muntu mwoso apwela lukanyi ene, udi yi bwinu kwenu ku mwociya ou, akali mudibi, bixeakalayi muna bwinu.

¹⁹ Bwalo budi bwinu bwa loboko lolu budibi yi Ncembi. Bwalo bwakafundibwa ene, Yei ndo akwata bena bwinu mu bwanya bwabo.

²⁰ Kabidi lolo ene, Fumu ndo alubukwa nkanyi yelela bena bwinu ene, idi kanana.

²¹ Mbwôso muntu mwoso kani mwanu bwalo bwa bantu. Bwalo budi bintu bioso bienu,

²² ndo Paulu, ndo Apolo, ndo Kyefasa, ndo loboko, ndo môyo, ndo lufu, ndo bintu bia nkyekyu, ndo bintu bilolwa ; bintu bioso bidi bienu,

²³ yi nonu nudi bantu ba Kalistu ; yi Kalistu udi a Ncembi.