1 KOLINTI 14 - Disambi Dipyadipya

¹ NULABELI nyinga, yi nukyebi kungi malongi a Mwoxixi, kaninga nutungi ndo kudimusa.

² Bwalo bwa you amatôya mu ludimi lutasolubukibwa kasotôyela bantu kate Ncembi ; bwalo butasomwombwa muntu ; mo ku kidimu kienci ndo kwatôyayi malo a bwisa.

³ Mo you amadimusa amatôyela bantu yi kiabakilu, yi kisubixilu, yi kibondelu.

⁴ You amatôya mu ludimi amadiabaka mikyenci ; mo you amadimusa amakwabaka kikokye.

⁵ Ngwadila pako nuxetôya bungi bwenu yi ndimi, mo ngwatunga nuxedimusa ; bwalo bwadika mudimuxi munene, kumoni you amatôya yi ndimi, kutena yei amasakola bixeangata kikokye kiabakilu.

⁶ Nkyekyu lolo bakunyi, ndo nakulwa kunudi ndi mu kutôya yi ndimi, nakunutetowesa kai kutena namanutôyela ndo yi kiebexelu, ndo yi kilubukilu, ndo yi kidimuxilu, ndo yi kieyexelu ?

⁷ Bintu biamatôya diyi, isanga kabina yi môyo, ndo muxembi, ndo lusese, aka kabisoxiyañanisa meyi, musambu unalubukibwa beci ămakumibwa ku muxembi ndo ku lusese ?

⁸ Bwalo bwa mpungi ndo amasakola diyi dia kanana, ñani unadilungika bwalo bwa mbita ?

⁹ Mo nako nonu, kutena nwamasakola ku ludimi meyi amalembetelebwa loko, bwalo bunalubukibwa beci bwamatôyebwa ? bwalo bununatôya kulu ku mwoxixi kanana.

¹⁰ Meyi adiko ku loboko, ambeci ntonga yi ntonga, yi kumoni diyi dimodimwe ditena yi sakolo.

¹¹ Aka lolo meme kisokyendula diyi, nakwakala yi muntu you atôya bea Musenci, yi you atôya unakala bea Musenci yinami.

¹² Mo nako nonu, bwalo bunudi yi nyinga ya malongi a Mwoxixi, nupalali kulekola yinao bwalo bwa kwabaka kwa kikokye.

¹³ Mbwôso you amatôya mu ludimi alombi bixesakolayi.

¹⁴ Bwalo ndo ngwalomba mu ludimi, kidimu kiamene kiamalomba kate lukanyi lwamene ludi kikuta.

¹⁵ Mbwôso bwalo budi beci ? Nakulomba yi kidimu yi nakulomba yi lukanyi kabidi ; nakwembikisa yi kidimu yi nakwembikisa yi lukanyi kabidi.

¹⁶ Ximbi, ndo owe wamatumbisa yi kidimu kiebe, you axikama mu bolelo bwa bantu batabiyi, unatôya Amen beci ku kikondo kiamaxinga owe biloba ? bwalo butasolubukwayi mwatôya.

¹⁷ Owe waxinga loko sôsôlwo, kate munga you kasokwabakibwa.

¹⁸ Ngwaxinga Ncembi bwalo bunamanudika bungi bwenu yi kutôya kwa ndimi.

¹⁹ Kaninga mu kikokye nxetunga kutôya meyi atano yi lukanyi lwamene binxekweyesa banga kabidi, kumoni kutôya meyi nkone disangi mu ludimi.

²⁰ Bakunyi, kanwakadi babaki ku lukanyi ; kaninga ku bwalo bwa mwoxingi nwakali babaki ; mo ku bwalo bwa lukanyi nwakali babakulu.

²¹ Ku bwadi kwamafundibwa ene, Kudi bantu ba ndimi ya babene, yi ku milomo ya babene ndo kunatôyela bantu baba ; mo isanga nako bobo kabanangwombwa ; Fumu ndo atôya noku.

²² Mbwôso ndimi idi kiiayixilu, kumoni kudi bantu bamakwetabusa, kate kudi bantu batasokwetabusa ; mo kidimuxilu kidi bwalo kumoni bwa bantu batasokwetabusa, kate bwa bantu bamakwetabusa.

²³ Mbwôso ndo bungi bwa kikokye bamasangila kidi kimokimwe, yi bungi bwabo bamatôya yi ndimi, aka bantu bamabwela batasolubukwa ndo batasokwetabusa, ki banatôya ene, nwamapasuka ?

²⁴ Mo ndo bantu boso bamadimusa, yi muntu amabwela utasokwetabusa ndo utasolubukwa, amatongolebwa kudi bantu boso, amabelebwa kudi bantu boso ;

²⁵ malo a bwisa a mu mucima ănci amakwebexebwa, yi mo nako unapona ku mpala anci yi unaxingila Ncembi, yi unacwala losangu ene, Ncembi udi yinenu sôsôlwo.

²⁶ Mbwôso bwalo budi beci, bakunyi ? Oka nwasangila, muntu mwoso udi yi musambu, udi yi kieyexelu, udi yi kiebexelu, udi yi ludimi, udi yi kisakolelu. Bintu bioso biencebwi ndo kwabakanana.

²⁷ Aka muntu mwoso amatôya mu ludimi, batôyi babidi ndo isanga basatu, (banga kumoni) ; yi balandudilañani ; yi muntu umoumwe asakoli.

²⁸ Mo akali musakodi kienako, apudikili mu kikokye ; aditôyeli munda mwanci yi kudi Ncembi.

²⁹ Badimuxi lolo batôyi ndo babidi ndo basatu ; banga basamboli.

³⁰ Mo ndo kiebexelu kiamakwebexebwa munga amaxikama padiyi, you a buxi apudikili.

³¹ Bwalo bununadimusa ku muntu ku muntu, bixekweya bantu boso, bixesubixibwa bungi bwabo.

³² Yi bidimu bia badimuxi biamakwedeya badimuxi.

³³ Bwalo butena Ncembi muna lwobuncu, kate muna polo, bea mu bikokye bioso bia bena babaia.

³⁴ Babakaxi benu bapudikili mu bikokye, bwalo butasobapebwa kutôya, kate ndo kwakala yi diedya, bea biamatôya kabidi bwadi.

³⁵ Yi ndo bakyeba kweya kintu kioso, bapangusi babayabo kunci kwabo ; bwalo bwapwakala bundu mwamukaxi kutôya mu kikokye.

³⁶ Kai ? Diyi dia Ncembi diakabatuka kunudi ? sungu diamafika kunudi batupu ?

³⁷ Aka muntu udiencenca ene, udi mudimuxi, ndo udimuna Mwoxixi, alembeteli bintu binwafundila ene, bidi milangu ya Fumu.

³⁸ Mo ndo muntu kasolubukwa, asali kutena kulubukwa.

³⁹ Mbwôso bakunyi, nukyebi kungi kudimusa, yi kanukandi bantu kabatôyi yi ndimi.

⁴⁰ Bintu bioso biencebwi yi mwosambu unengela yi ku loici.