1 KOLINTI 13 - Disambi Dipyadipya

¹ ISANGA ngwatôya yi ndimi ya bantu yi ya bangele, mo ndo kiena yi nyinga, namalwa bea kiamu kia mulaku mungi, ndo bea mwangala ătenda kanana.

² Isanga lolo ndi yi mudimuxilu, yi ngwalembetela malo moso a bwisa, yi kilubukilu kioso ; yi isanga ntani yi kwetabusa kwoso kwa kututula mpongo, kaninga ndo kiena yi nyinga, ndi kanana.

³ Yi isanga ngwalongola bima biamene bioso ndo kudisa bakombi, yi isanga mpapa mumbidi ămene ndo kwoxebwa, meme ndo kiena yi nyinga, kisotetowa kintu.

⁴ Nyinga yamakwekyela yi kiekyelo kia bwika, yi idi yi bonkangi ; nyinga kayisoakala yi mwokunyo ; nyinga kayisodianina mwanu, kayisokwolubila disasa ;

⁵ kayisoakala yi mwosambu utasoleiekyela ; kayisopalala bwalo bwanci mikyenci ; kayisonyungula mangwoso ku mucima ; kayisobanda muntu bwalo bubi ;

⁶ kayisoxekyelela kwona mo yamaxekyelela yi sosôlwo ndongo ;

⁷ yamakwombwa bintu bioso yi bwika  ; yamakwetabusa bintu bioso yi mwetabusu  ; yamadingidila bintu bioso yi mudingidilu ; yamatata bintu bioso yi kicwandundu.

⁸ Nyinga kayisoxikila nyô ; mo ndo midimuxilu, yei yinalengolebwa ; ndo ndimi, yei yinalekyela ; ndo kilubukilu, kieki kinalengolebwa.

⁹ Bwalo butwamalubukwa ku kusaka, yi twamadimusa ku kusaka.

¹⁰ Mo panakala bwokokya bwamalwa, kusaka kunalengolebwa.

¹¹ Panakadi mwamuki nakatôya bea mwamuki, nakakwenca munda bea mwamuki, nakakwela lukanyi bea mwamuki ; binamafika mwamukulu namamana yi miesambu ya mwamuki.

¹² Bwalo butwamona nkyekyu bea mu mulondo lubungi peta, mo ku kikondo yikia tunamonañana ku mpala ; nkyekyu ngwalubukwa ku kusaka, mo ku kikondo yikia nakulubukwa bea binamalubukibwa kabidi.

¹³ Nkyekyu kwamasala kwetabusa, mudingidilu, nyinga ; bintu bebi bisatu ; mo kieki kiadika bunene kidi nyinga.