1 KOLINTI 12 - Disambi Dipyadipya

¹ NKYEKYU ku bwalo bwa malongi a Mwoxixi, kisonanga nonu kwakaia kutena kulubukwa.

² Nwalubukwa ene, panwakadi bena mabila, nwakacwadibwa kudi ngixi yei ya bimeme mu muxiyilu mwoso unwakaxiyibwa.

³ Mbwôso meme nwalubukisa ene, kakuna muntu mwoso, ndo amatôya kudi Mwoxixi a babala, unabikila Yisu ene, mufingibwi ; yi muntu kabiyi kutôya ene, Yisu udi Fumu, kutena kudi Mwoxixi a babala.

⁴ Malongi pako adiko ntonga yi ntonga, mo Mwoxixi umoumwe.

⁵ Yi midimo idiko ntonga yi ntonga, yi Fumu umoumwe.

⁶ Yi mikixilu idiko ntonga yi ntonga, mo Ncembi, umoumwe ndo akisa bintu bioso mu bungi bwayo.

⁷ Kaninga kudi muntu mwoso kwamapebwa mwebexelu ă Mwoxixi ndo kutetowesa bantu yinau.

⁸ Kudi muntu umoumwe kwamapebwa diyi dia bwinu kudi Mwoxixi ; kudi munga, diyi dia kilubukilu kudi Mwoxixi you umoumwe ;

⁹ kudi munga, kwetabusa mu Mwoxixi you umoumwe ; kudi munga, malongi a kupandisa bantu masama mu Mwoxixi you umoumwe ;

¹⁰ kudi munga, mikixilu ya makisa a ngulu ; kudi munga kudimusa ; kudi munga, kulembetela kwa bidimu ; kudi munga, ntonga yi ntonga ya ndimi ; kudi munga, kisakolelu kia ndimi.

¹¹ Kaninga bintu bebi bioso ndo biakisa Mwoxixi you umoumwe isanga yei mikyenci, udi mu kwabanyila muntu mwoso malongi, ku muntu ku muntu, mwoso mwanangayi.

¹² Bwalo luna bidi mumbidi umoumwe, yi udi yi bicini bingi, yi bungi bwa bicini bia mumbidi, isanga bingi, bidi mumbidi umoumwe, ndo bidi buna Kalistu kabidi.

¹³ Bwalo butwamanumeyebwa ku mumbidi umoumwe mu Mwoxixi umoumwe, ndo bena Yuda ndo bena Ngiliki ; ndo bapika ndo bena bula ; yi twamanuxibwa kudi Mwoxixi umoumwe.

¹⁴ Bwalo butasoakala mumbidi kicini kimokimwe, kate bingi.

¹⁵ Ndo dikasa dinatôya ene, Bwalo buntena kianca, meme kiena muna mumbidi, kadina lolo muna mumbidi ?

¹⁶ Yi ndo dicu dinatôya eñe, Bwalo buntena diso, meme kiena muna mumbidi, kadina lolo muna mumbidi ?

¹⁷ Akali mumbidi muncimancima uxeakala diso, kwombwa kwa macu kuxeakala kupai ? Ndo buncima bwau buxeakala kwombwa kwa macu, kwombwa kwa melu kuxeakala kupai ?

¹⁸ Mo nkyekyu Ncembi amateka bicini mu mumbidi, kicini ku kidi, kicini ku kidi, kwoso kwakanangayi.

¹⁹ Yi ndo bixeakala bungi bwabio kicini kimokimwe, mumbidi uxeakala kupai ?

²⁰ Mo nkyekyu bicini bidi ingi, kaninga mumbidi umoumwe.

²¹ Yi diso kadibiyi kutôyela kianca ene, Meme kisokudila owe ; yi mucwe kabidi kaubiyi kutôyela makasa ene, Meme kisokudila owe.

²² Kañana ; bicini bebi bia mumbidi biamakwencebwa ene, biamadika kulebela, biamadika kudidibwa ;

²³ yi bicini bebi bia mumbidi bitwencenca ene, biamakala kanana, kabebi ndo bitwamalatisa kinemu kingi ; yi bicini biecu bitena yi lwoxixi biapwakala yi lwoxixi lungi.

²⁴ Mo bicini biecu bia lwoxixi kabisokwayila ; kate Ncembi amakwelekyesa mumbidi ; amapela kicini kieki kinemu kingi kiakasaka ;

²⁵ bitaxeakala nkalu mwoso mu mumbidi, kate bicini bixenamañana bunami bumobumwe.

²⁶ Ndo lolo kicini kimokimwe kiombombwa kusama, bungi bwa bicini biombombwa kusama yinakio ; ndo kicini kimokimwe kiamatumbixibwa, bungi bwa bicini biamaxekyelela yinakio.

²⁷ Nonu lolo nudi mumbidi ă Kalistu, yi bicini biau, muntu kicini muntu kicini.

²⁸ Yi Ncembi amateka banga mu kikokye, ku buxi batumibwi, diamubidi badimuxi, diamusatu beyexi, kunyuma makisa a ngulu, kunyuma malongi a kupandisa bantu masama, bantu bamakwacisa bena kwabo, banamañani, ntonga yi ntonga ya ndimi.

²⁹ Badi batumibwi bungi bwabo ? badi badimuxi bungi bwabo ? badi beyexi bungi bwabo ? badi bakisañani ba makisa a ngulu bungi bwabo ?

³⁰ Bungi bwabo badi yi malongi a kupandisa bantu masama  ? bamatôya yi ndimi bungi bwabo ? bamasakola ndimi bungi bwabo ?

³¹ Mo nukyebi malongi adika manene ; kaninga ntananwebesa mwosambu ămadika loko lungi.