1 KOLINTI 11 - Disambi Dipyadipya

¹ UNWAKALI bokodi bamene bea bindi meme kabidi mwokodi a Kalistu.

² Nkyekyu meme nwalakana bwalo bunungwelela nkanyi mu bintu bioso, yi nwabamba mixiyilu bea binakanulongolayo.

³ Mo ngwananga nuxelubukwa ene, mucwe ă mwamulumi mwoso udi Kalistu ; yi mucwe ă mwamukaxi udi mwamulumi ; yi mucwe ă Kalistu udi Ncembi.

⁴ Mwamulumi mwoso ndo alomba ndo adimusa, udi yi mucwe ănci mubukila, amakisa mucwe ănci lukisu.

⁵ Mo mwamukaxi mwoso ndo alomba ndo adimusa, udi yi mucwe ănci ololwo, amakisa mucwe ănci lukisu ; kulexi yi ndo amakuludibwa nyonyi.

⁶ Ndo mwamukaxi kasoncibikibwa mucwe, akuludibwi kabidi ; kaninga ndo kuxakibwa nyonyi ndo kukuludibwa kudi bundu, ancibikibwi mucwe.

⁷ Bwalo butaxencibikibwa mwamulumi mucwe ănci, bwalo budiyi kifwanisa kia Ncembi yi dikai dienci ; mo mwamukaxi udi dikai dia mwamulumi.

⁸ Bwalo butakadi mwamulumi kudi mwamukaxi, kate mwamukaxi kudi mwamulumi.

⁹ Yi mwamulumi akadi kasopangibwa ku bwalo bwa mwamukaxi, kate mwamukaxi ku bwalo bwa mwamulumi.

¹⁰ Ku mucwe ou kuxeakala mwamukaxi yi bumanya ku mucwe anci bwalo bwa bangele.

¹¹ Kaninga mwamukaxi kasoakala kutena mwamulumi, ndo mwamulumi kutena mwamukaxi kumoni, mu Fumu.

¹² Bea biakalwa mwamukaxi kudi mwamulumi, mwamulumi kabidi ndo alelebwa kudi mwamukaxi ; mo bintu bioso bilolwa kudi Ncembi.

¹³ Nusamboli bienu ; kudi mwosambu unengela, mwamukaxi kulomba kudi Ncembi yi mucwe ololwo ?

¹⁴ Ka mwosambu ă bantu mikyeu ămanweyesa ene, ndo mwamulumi udi yi nyonyi milemile, kudi bundu yinanci ?

¹⁵ Mo ndo mwamukaxi udi yi nyonyi milemile, kudi dikai yinanci ; bwalo bwamamupelebwa nyonyi yenci kibukilu ku mucwe.

¹⁶ Mo ndo muntu mwoso alanda kwelesa mbata, coco katuna yi mwosambu ă noku pô, ndo bikokye bia Ncembi.

¹⁷ Mo ku bunga bwalo bobu, meme kisonwalakana ; bwalo bunwalundisa bubi pa kusangila, kumoni kunengela.

¹⁸ Ku buxi buxi, binwasangila mu kikokye, ngwombombwa ene, pakacikaci penu padi nkalu nkalu ; yi namacina ene, ambeci padi noku.

¹⁹ Bwalo buxeakala kabidi bixe bixe pakacikaci penu, bixemoneka bantu pakacikaci penu bamakwalakanibwa.

²⁰ Mbwôso binwasangila kidi kimokimwe, kakuna ndo kudya kidilu kia Fumu.

²¹ Bwalo budedya muntu mwoso kienci kidilu buxi panudedya ; yi muntu umoumwe udi yi ncala, yi munga udi yi nkolwa ya malufu

²² Ai ! Nonu kanuna yi ncibo ya kudya yi kunwa munda ? Sungu nwatamuna kikokye kia Ncembi, yi nwaxipa bantu bundu batasodya ? Nakunutôyela kai ? Nwalakani ? Ku bwalo bobu kisonwalakana.

²³ Bwalo bunakangata kudi Fumu diyi dedi dinakanulongola, ene, Fumu Yisu, ku butuku bwakakwengebwayi, akangata dimpa ;

²⁴ yi pakadi amaxinga biloba, akanyowa, yi akatôya ene, Dedi ndo mumbidi ămene udi ku bwalo bwenu ; nwenci oku ndo kungwela nkanyi.

²⁵ Mo nako kabidi mpamba, pakadi bapudya, ene, Mpamba you ndo disambi dipyadipya mu maxi amene ; nwenci noku matuku moso anunonwa, ndo kungwela nkanyi.

²⁶ Bwalo matuku moso anudedya dimoa dedi, anunonwa mpamba you, nwamasakola lufu lwa Fumu pôi kikondo kilolwayi.

²⁷ Mbwôso muntu mwosb unadya dimpa, yi unanwa mpamba a Fumu, kutena kwenca noku yi nkwami, unakala yi kwona bwalo bwa mumbidi yi bwa maxi a Fumu.

²⁸ Kaninga muntu adielekyesi mikyenci, yi mo nako adi dimpa, anwi mpamba.

²⁹ Bwalo bwa you udedya yi unonwa, udiadila yi udianuna lopelo, ndo kasoxingulula mumbidi.

³⁰ Ku bwalo bobu ndo kwamakala bantu bangi yinenu bena mabombu yi bena masama, yi banga bamalala tulu.

³¹ Mo ndo tuxedixingulula, katuxebelebwa.

³² Kate panakala twamabelebwa twamatatixibwa kudi Fumu bitutaxebelebwa yi loboko.

³³ Mbwôso bena kwami, binwasangila kulwa dya, nukungilanani.

³⁴ Aka muntu mwoso ombombwa ncala, adi kunci kwanci ; binutaxesangila kulwa belebwa lopelo. Ku bwalo bwa binga bintu, nakubilungika pandolwa.