1 KOLINTI 10 - Disambi Dipyadipya

¹ WBWALO buntasonanga, bakunyi, nonu kwakala kutena kulubukwa dia batetecu, ene, bakadi muxi mwa dibaxi bungi bwabo, yi bakadika bungi bwabo munda mwa mai manene.

² Yi bungi bwabo bakanumeyebwa ku bwalo bwa Mosese mu dibaxi yi mu mai manene.

³ Yi bakadya bungi bwabo kudya kumokumwe kwa Mwoxixi,

⁴ yi bakanwa bungi bwabo kunwa kumokumwe kwa Mwoxixi ; bwalo bwakanwabo kudi Lubwe lwa Mwoxixi Iwakabalanda, yi Lubwe lwakadi Kalistu.

⁵ Kate ku bwalo bwa bantu bangi yinabo, Ncembi akadi kasobaxekyelela ; bwalo bwakaxindibwabo mu mbata a kisobe.

⁶ Bintu bebi noku lolo biakadi bielekyexelu bia bwalo bwecu, bitutaxeakala bena luxindilu lwa bintu bibi, bea biakadibo yi luxindilu.

⁷ Kanwakadi lolo baxingidi ba ngixi luna banga yinabo ; bea biakafundibwa ene, Bantu bakaxikama ndo kudya yi kunwa, yi bakakwemana ndo kusaba.

⁸ Katwakadi bena madibi kabidi, bea biakadi banga yinabo bena madibi ; yi bakapona ku dituku dimodimwe bantu masangi abidi a nkone yi bantu nkone isatu.

⁹ Katwelekyexi Fumu lolo, bea biakamwelekyesa banga yinabo, yi bakaxipibwa kudi nyoka.

¹⁰ Kanupindudi mapindu lolo, bea biakapindula banga yinabo, yi bakaxipibwa kudi muxipanani.

¹¹ Mo bintu bioso bebi biakabaponena luna bielekyexelu bia malof yi biakafundibwa ndo kutudimusa coco bamatulula ku sula kwa mieciya.

¹² Mbwôso you encenca ene, amakwemana, adingili ximbi uxepona.

¹³ Kielekyexelu kioso kakisonukwata kitena luna kia bantu boso ; kaninga Ncembi udi yi kibaku utasonulekyela ndo kwelekyexebwa ku lwedi lunutasoponyañana yinalu ; kate unadipula kipandilu yi kielekyexelu ndongo binuxelubukwa kwekyela yi bwika.

¹⁴ Mbwôso banangibwi bamene, nucini kixingilu kia ngixi.

¹⁵ Ngwatôya bea kudi bena bwinu ; nusamboli mungwatôya.

¹⁶ Mpamba a lotumbu utwatumbisa, ka busangilafiani bwa maxi a Kalistu ? Dimpa ditwanyowa, ka busangilafiani bwa mumbidi ă Kalistu ?

¹⁷ Bwalo butudi coco, isanga bangi, dimpa dimodimwe yi mumbidi umoumwe ; bwalo butwamakwabanyafiana ku dimpa dedi dimodimwe.

¹⁸ Numoni bena Isalele ku bwalo bwa munyu ; bobo badedya malongi amalongolebwa ki badi yi busangilafiani bumobumwe yi kilongolelu ?

¹⁹ Mbwôso ngwatôya beci ? Ene, dilongi diamalongolebwa ngixi didi bwalo ? Ndo ene, ngixi udi bwalo ?

²⁰ Kate ngwatôya ene, bintu biamalongola mabila malongi, bamabilongola kudi bidimu bibi, kumoni kudi Ncembi ; yi meme kisoli nuxesangilañana yi bidimu bibi.

²¹ Kanubiyi kunwa mpamba a Fumu yi mpamba a bidimu bibi ; kanubiyi kwabanyafiana yi mesa a Fumu, yi mesa a bidimu bibi.

²² Coco twatekyesa Fumu mwokunyo ? Coco tumwadika ngulu ?

²³ Bintu bioso bialelekyela ndo kwencebwa ; kate bintu bioso kabina yi kipoma kinengela ; bintu bioso bialelekyela ndo kwencebwa, kate bintu bioso kabisokwabakafiana.

²⁴ Muntu kapaladi bwalo bwanci mikyenci, kate bwalo bwa muna kwanci.

²⁵ Kintu kioso kiamakwodixibwa mu bixipilu bia nyama, nudi, kutena kwapangusa mwapangusu ku mucwe ă kilubukilu kia munda.

²⁶ Bwalo budi loboko lwa Fumu yi kiolubilu kialu.

²⁷ Aka muntu abo a bantu batasokwetabusa amanuswala ku bidya, yi nonu nwananga kuya, nudi kintu kioso kiamatekyebwa ku mpala yenu, kutena kwapangusa mwapangusu ku mucwe ă kilubukilu kia munda.

²⁸ Mo ndo muntu amawambila ene, you amalongolebwa ngixi dilongi, kanudi ku bwalo bwanci bwa you apwebesa noku yi ku bwalo bwa kilubukilu kia munda.

²⁹ Ngwatôya ene, kilubukilu, kumoni kiebe, kate kia munga you ; bwalo bwamabelebwa bumanya bwamene ku kilubukilu kia munga muntu kukai ?

³⁰ Meme ndo ndedya yi biloba, kukai namatangolebwa ku mucwe ă kintu kieki kinamakixingila biloba ?

³¹ Mbwôso ndo nudedya, ndo nunonwa, ndo nwencenca kintu kioso, nwenci bintu bioso ndo kulundisa dikai dia Ncembi.

³² Kanwakadi biponexelu ndo kudi bena Yuda, ndo kudi bena Ngiliki, ndo kudi kikokye kia Ncembi.

³³ Bea bingwaxekyelesa bantu boso kabidi mu bintu bioso, kumoni kupalala kutetowa kwamene mikyemi, kate kwa bantu bangi, bixepandixibwabo.