1 KOLINTI 1 - Disambi Dipyadipya

¹ PAULU, amabikidibwa mutumibwi a Yisu Kalistu ku nyinga ya Ncembi, yi Sostene muna kwecu,

² kudi kikokye kia Ncembi kidi ku Kolinti ; bobo bamabalolebwa mu Kalistu Yisu, bamabikidibwa bena babala ; yi kudi bantu boso mu kidi kioso badi mu kwabila dina dia Fumwecu, Yisu Kalistu, yi Fumwabo yi Fumwecu ;

³ lwoxixi lwakali yinenu yi polo kudi Ncembi Tetecu yi Fumu Yisu Kalistu.

⁴ Ngwaxinga Ncembi amene biloba matuku moso ku mucwe ěnu, bwalo bwa lwoxixi lwa Ncembi lwamanupebwa munda mwa Kalistu Yisu ;

⁵ bwalo bunwamapebwa bodidi bwa bintu bioso munda mwanci ; mu diyi dioso yi mu kilubukilu kioso ;

⁶ bea biakasubixibwa ntôbô ya Kalistu munda mwenu.

⁷ Mo nako kanusokwayila Sdilongi dioso ; nudi mu kukungila ebexelu kia Fumwecu Yisu Kalistu,

⁸ unanusubisa kabidi pôi ku sula, kutena bwalo mu dituku dia Fumwecu Yisu Kalistu.

⁹ Ncembi udi yi kibaku unwakabikidibwa kudiyi ku busangilañani bwa Mwananci Yisu Kalistu Fumwecu.

¹⁰ Nkyekyu nwabondabonda bakunyi, ku dina dia Fumwecu Yisu Kalistu, ene, nutôyañani diyi dimodimwe bungi bwenu ; kakwakadi nkalu kunudi ; kate nusambikibwi dyendeli lukanyi lumolumwe, yi kusambola kumokumwe.

¹¹ Bwalo bunamakwambidibwa ku bwalo bwenu, bakunyi bamene, kudi bena Kolowe, ene, bitumba bidi kwenu.

¹² Ngwatôya ku bwalo bobu ene, muntu mwoso amatôya ene, Meme ndo muna Paulu, meme ndo muna Apolo, meme ndo muna Kyefasa, meme ndo muna Kalistu.

¹³ Ape Kalistu amasambudibwa ? Paulu akanuxipidibwa kunkulusu ? Nonu nwakanumeyebwa mu dina dia Paulu ?

¹⁴ Ngwaxinga Ncembi biloba bwalo buntanumeyeli bantu kwenu batena Kilisipo yi Ngayo ;

¹⁵ ximbi muntu uxetôya ene, nwakanumeyebwa mu dina diamene.

¹⁶ Yi nakanumeya kabidi bena ncibo a Stefanasa ; kutena baba, kisolubukwa ndo nakanumeya munga muntu.

¹⁷ Bwalo butasongutuma Kalistu kuya numeya, kate ndo kwambila losangu lunengela ; kumoni yi bwinu bwa meyi, ximbi nkulusu a Kalistu uxetekyebwa kanana.

¹⁸ Bwalo budi diyi dia nkulusu budibi kudibo bancimina ; kaninga kutudi bamapandixibwa, didi ngulu ya Ncembi.

¹⁹ Bwalo bwakafundibwa ene, Nakuxipa bwinu bwa bena bwinu yi nakulengola bweso bwa bena bweso.

²⁰ Muna bwinu udi kupai ? Mufundi a mukanda udi kupai ? Muna mpeto a mwociya ou udi kupai ? Ki Ncembi amasalula bwinu bwa loboko lolu ?

²¹ Ku bwinu bwa Ncembi, (bwalo butalubukwa loboko Ncembi ku bwinu bwalu), ndo kwakamonebwa loko kudi Ncembi kupandisa bantu bamakwetabusa ku budibi bwa diembi dia nkulusu.

²² Bwalo bwakyeba bena Yuda bilayixilu, yi bena Ngiliki bapalala bwinu ;

²³ kaninga coco twambila diembi dia Kalistu, akakopekyebwa ku nkulusu ; kudi bena Yuda ndo kiponexelu, yi kudi mabila ndo budibi ;

²⁴ mo kudi bantu bamabikidibwa, (ndo ba bena Yuda, ndo ba bena Ngiliki), kudi Kalistu ngulu ya Ncembi yi bwinu bwa Ncembi.

²⁵ Budibi bwa Ncembi bwamadika bantu bwinu, yi kulebela kwa Ncembi kwamadika bantu ngulu.

²⁶ Nutebeli kubikidibwa kwenu bakunyi,—kumoni bantu bangi yi bwinu bwa munyu ; kumoni bena ngulu bangi ; kumoni bena bikupu bangi ;

²⁷ kate Ncembi akasungula bintu bia budibi bia loboko, bixexipayi bena bwinu bundu ; yi Ncembi akasungula bintu bilebela bia loboko, bixexipayi bintu bia ngulu bundu ;

²⁸ yi bintu bia kanana bia loboko, yi bintu biamatamunibwa ndo biamasungula Ncembi, yi bintu bitenako ; ndo kulengola bintu bidiko ;

²⁹ bitaxekwana munyu mwoso mwanu ku mpala a Ncembi.

³⁰ Mo butonga bwanci ndo bunwapwakala nonu munda mwa Kalistu Yisu, akatutekyelebwa bwinu kudi Ncembi, yi nkwami, yi babala, yi kupikudibwa ;

³¹ bea biakafundibwa ene, You añana mwanu, ani mwanu bwalo bwa Fumu.