Maththa 1 - LON ILOPOROT LOKAPIK NATHAM NꞌREK NNONATHAM NOMAꞌROT

Thiki thoIeccuo

¹ ꞌRan enni wothiki thoIeccuo oMiccie ukul woThauth, ukul wAprein.

² Aprein pokwonot oIccaak ana oIccaak pokwonot oIakup ana oIakup pokwonot oIoutha akin opangon,

³ ana oIoutha pokwonot oPparic ana oThara nti iaThthamar ana oPparic pokwonot Accrun ana Accrun pokwonot oRam,

⁴ ana aRam pokwonot Aminathap ana Aminathap pokwonot oNaccun ana oNaccun pokwonot oCalmon

⁵ ana oCalomon pokwonot oPuac nti iapari oRaap ana oPuac pokwonot Opet nti iaRauth ana Opet pokwonot oIecce

⁶ ana oIecce pokwonot ili oThauth. Ana oThauth pokwonot oCiliman, nti ipari oUria,

⁷ ana oCiliman pokwonot oRapaam ana oRapaam pokwonot Apia ana Apia pokwonot Acca

⁸ ana Acca pokwonot oIuccappat ana oIuccappat pokwonot oUram ana oUram pokwonot oUthia

⁹ ana oUthia pokwonot oIutham ana oIutham pokwonot Aac ana Aac pokwonot Acikkia

¹⁰ ana Acikkia pokwonot oManacce ana oManacce pokwonot Amun ana Amun pokwonot oIuccia

¹¹ ana oIuccia pokwonot oIakkunia ana opangon nocaꞌri ica ul wonekittat noththok pen akin onekittat noththok poPapil.

¹² Anakka ul wonekittathe noththok poPapil oIakkunia pokwonathe oCcaliththil ana oCcaliththil pokwonot oCerupapil

¹³ ana oCerupapil pokwonathe Apiuth ana Apiuth pokwonot Aliakkim ana Aliakkim pokwonot Acur

¹⁴ ana Acur pokwonot oCcathuk ana oCcathuk pokwonot Akim ana Akim pokwonot Aliuth

¹⁵ ana Aliuth pokwonot Aliacir ana Aliacir pokwonot oMaththan ana oMaththan pokwonot oIakup

¹⁶ ana oIakup pokwonot oIuccip olle poMeriom ipokwonot oIeccuo ipakkarako itti oMiccie.

¹⁷ Ittina thiki ithanthan appik thokat attul ana ikken kocoꞌrin nci nAprein oingkanthet oThauth (14). Ana nci naThauth caꞌri ica ul waik ikwat noththok poPapil, thiki thokat attul ana ikken kocoꞌrin (14). Ana nci nocaꞌri ica ul waik ikwat noththok poPapil oingkanthet oMiccie thiki thokat attul ana ikken kocoꞌrin (14).

Thokwonta thoIeccuo oMiccie

¹⁸ Lon elli ileret kathar kothokwonta thoIeccuo oMiccie. Onnan pung oMeriom pokat pokkaccakinet oIuccip anaruk akka okin thaththarthuk ikkoik tothun kwincakathe itti kwoppethe mpuꞌran poKanang ikupupure.

¹⁹ Ana oIuccip olle pung pappokat pul poporot tokït koKapik ana kwꞌrakathe itti kwakinnitto lon lopari oMeriom, akka ul occirok ngngin ana kwiꞌrekathe itti kwathïok nthuꞌran.

²⁰ Anaruk akka kwokat akweret noucce itti kwathïok, auꞌrupa wothothïlettat woIli akkakanthok inthe athintiekathok aiꞌrekathok itti, “Iuccip ukul woThauth, kirrnni ipo nꞌre itti ngkwaneko oMeriom akwothakka pari pang, akka kwoppethe mpuꞌran poKanang ikupupure.

²¹ Ana kwakwono ukul ana ngkwaccie kꞌran itti oIeccuo, akka waꞌret ul wung nti ilon ilokithak.”

²² Elli lokat cik appik othakka itti alomartto lon ila Ili wiꞌret nthon thopul pothernte lon loKapik oka ïcat itti,

²³ “Iꞌre wꞌrek iakannaꞌrutta ngngin aththik wappet ana wakwono ukul ana waccietta itti Amanauil” ilonu itti 'Kapik kaik naron.'

²⁴ Anakka oIuccip purttat nti inthe, akwokkat ammakka uꞌrupa wothothïlettat woIli wiꞌrethok. Akwonakat pari pung tuan thanung.

²⁵ Anaruk kwakannaꞌrat ngngin puccuk mono apokwonat ukul, akwocciekat kꞌran itti oIeccuo.