Ipranin 8 - LON ILOPOROT LOKAPIK NATHAM NꞌREK NNONATHAM NOMAꞌROT

OMiccie pul iprïk ponoppan toKapik pothonekket lon cik ilie

¹ Lon anganna ilanïn thaik theret cene itti oron thonu pul iprïk ponoppan toKapik ipikkot cik thokkun wothothari woKapik tothiꞌrot,

² ana ook ipareko nokaꞌran ikupupure tothiꞌrot icüꞌrük icaik ïcat ica Kapik kokkothe ngka kung, okonnoka pul iponyi.

³ Pul iprïk ponoppan toKapik wipakot cik, aethet Kapik aꞌrupu wothethet nuthuk ana wothokiot ngüccük cik, pul ponoppan toKapik empi ponu itti pethet Kapik aꞌrupu wꞌrek cakuruk.

⁴ Amma kwappokat nocapu kwakannokat pul ponoppan toKapik akka ul waik ncinnan iethet Kapik aꞌrupu ammakka lon lothonceꞌret lon cik loMucca liꞌret.

⁵ Ngre iaul wonoppan toKapik waik wareko nokaꞌran ikupupure ngapurrut pongre iaik ïcat iaik tothiꞌrot. Ilen akka Kapik kaꞌrettot naMucca akka kwokat cik akwothuno cüꞌrük coret icupupure itti, “Amma auno tuꞌrot, auno cüꞌrük cungkot ica mpokenethung nocoꞌrong.”

⁶ Anaruk ngre iaIeccuo pettathe akkrïk nongre ngoul wonoppan toKapik, ien thonekket lon cik ithie ithrïk itha oIeccuo papul pokathar pen, ana ithen akkrïk naithipe akka thonekket lon cik ithie akkoporot ana thuntathe nothonekket lon cik ithoporot.

⁷ Akka amma thonekket lon cik thorokït thellat lon tit ila moloko, thonekket lon cik ithie thakannonekkettatheik.

⁸ Anaruk Kapik kiothe lon lamoloko noul wung ana kiꞌrekathe itti, “Caꞌri caik canthan, Ili wiꞌret, ica anonekket lon cik ilie nul woIccereil ana nul woIoutha.

⁹ Thonekket lon cik enthi thakannoka ammakka ithanïn thonekketheik ïnothiki then, caꞌri ica mponekot kin nukun win akka mponat kin noththok poMuccir, akka okin thakannaꞌrungkot nothoꞌrumo nolon lin ilanïn thonekketheik ana mpopaꞌranthet kin cik.

¹⁰ Ili wiꞌret itti, thonekket lon cik enthi itha mpaik panekket cik nul woIccereil nomaꞌri imanthan, Mpanekket thonceꞌret lon cik thin ima men ana okurrot nomïkït men. Mpaka Kapik ken ana okin thaka ul win.

¹¹ Pul pella ipappongkene pul ponocuruk cung ana opang itti, ‘Ina Ili,’ akka okin appik thinan itharran ana ithïttïttïk.

¹² Akka mpaccïkïnthet kin lon len ilokithak ana mpakorronno appokwarttikot athar wen iokithak ana lon len ilokithak attang.”

¹³ Ana amma Kapik eret thonekket lon cik ithie kwothikkiet thonekket lon cik thorokït thella ngre cik ana lon appik ilipe ana ilukkwat lakko napuththut lintat cik.