Ipranin 1 - LON ILOPOROT LOKAPIK NATHAM NꞌREK NNONATHAM NOMAꞌROT

Ukul woKapik akkrïk nouꞌrupa wothothïlettat woKapik

¹ Kapik kerntenet thiki thonnon maꞌrot maꞌri moppot nnul wothernte lon loKapik ana nathar kurekkurek,

² anaruk nomaꞌri emmi imocothothe, kerenet ton nukul wung ia kwopakkethe naꞌrupu woththan appik ana ia kwokkothe capu ngngin.

³ Ukul wung wathoporot thothrïk thoKapik ana wungkworok llon appik. Ukul wangwot ana okkot lon appik mpuꞌran polon lung. Anakka kwonthukkiet kin, Kapik kikkiekathok cik iccik kung nthokkun wothothari woKapik ikaik tothiꞌrot.

⁴ Ittina kwothakkakathe prïk nouꞌrupa wothothïlettat woKapik ana kꞌran kung ika Kapik kethok krïk nouꞌrupa wothothïlettat.

⁵ Oththa nti iuꞌrupa wothothïlettat woKapik ia Kapik kiꞌrethe itti, “Oung ukul win, inenni mpothakkat oththe”? Ana itti, “Mpathakkanok oththan pung ana ook othakkanin ukul win”?

⁶ Ana attang amma Kapik ona ukul wung wonothon nocapu, kiꞌre itti, “Auꞌrupa wothothïlettat woKapik appik aꞌranok ngaꞌrama.”

⁷ Ana Kapik kerekanthet uꞌrupa wung akiꞌrekat itti, “Kathikkie uꞌrupa wothothïlettat woKapik kanang ana ul iarekinok luꞌre lolik.”

⁸ Anaruk kwerekathe Ukul akwiꞌrekat itti, “Kapik, ngili ngang ngaꞌrungkot cik thupuththuput. Ana thoporot thang tokït koKapik thaka cuꞌrang coili ngang thupuththuput.

⁹ Ngkwongothe lon ilocoꞌrotheik ana ꞌra lon ilokithak, Ilen akka oun Kapik kang pothikkierung prïk nakarkangon nthoꞌrokung ngaak ngothopira noka athakka ili.”

¹⁰ Ana kwiꞌrekathe cakuruk itti, “Ili, nci nomun, ngkwokuꞌret capu ncik ana tothiꞌrot tangkwokkothe nyaun nyang.

¹¹ Capu ana tothiꞌrot thintat cik okin thukkwa ana okïttako ere eret ana okucittakoik ere eret anaruk ngkwaꞌrungkwot cik.

¹² Ngkwaꞌremethet kin tit ere kret ikakatta ikukwit ana oportto kin cik ere eret. Anaruk ngkwaꞌrungkot cik ammakka ngkwaik, ana luput lang lakorronno omattat.”

¹³ Uꞌrupa wothothïlettat woKapik wiatha ia Kapik kiꞌrethe itti, “Ikkik iccik kin nthokkun wothothari win puccuk anonekkekat thoꞌrak thang iracok tang acukkwarat kin cik”?

¹⁴ Uꞌrupa wothothïlettat woKapik appik wakanang ikareko, okin thothïlathe akin athorekine ul iaik wathopakkot nothoꞌrettat.