Lucas 9 - Ntsoj Lucas tmatya'aky Jesús jyüky'ajjt

Jesús tpakkexy y'ixpëjkpëttëjjk Yës Teety y'aaw y'ayuujk kajpxwa'kxpë

¹ Jesús tyaxmujjky nimajkmäjtsk y'ixpëjkpëttëjjk, nits mëjk'ajjt tmooy jäts jaa'y tokniwa'atstë't mëjjku'ujy jäts mëët jaa'y tyëktso'oktë't.

² Nits tpakkejjxy jäts nijkxy tmatya'aktë Yës Teety y'aaw y'ayuujk nits mëët pa'amjaa'y tyëktso'oktë't.

³ Jäts tnëëjmjaay: —Najjyë mnëjkxtë't kä'ä xpakko'ntë't: mtajjk, mxuumy, kääky, meeny, ni wit mati' mpëmnaxtë'p.

⁴ Pën maj mja'ata'aktë, kuttëjjkëtë tu'ukyë, kunë'm jä' kajjp mtsoo'nëtë't.

⁵ Pën maj kajjp jaa'y mkakkuppekyëtë, naxtë jä'yë jäts ku mpitsë'mtë't kajjp'am wixit'të nax'ooky mtekyëjjxy, najjts kyä'äjxjë'ëkt jäts tëj jä' jaa'y Yës Teety tyëk'ampëktë.

⁶ Nits Jesús y'ixpëjkpëttëjjk tsyoo'ntë jäts nyëjkxtë kajjp kajjp tmatya'aktë Yës Teety y'aaw y'ayuujk jäts mëët pa'amjaa'y tyëktso'oktë.

Herodes kä'ä t'ijxë pën jä' Jesús

⁷ Nits Herodes t'amatoonajjxy tukkë'yë tij y'ijjty tuujnë'p; jäts attëy'ajat ttattaany jä'ku nitu'ukën jaa'y y'ijjty wya'antë jäts Juan Bautista tëj jyükypyeky,

⁸ janitu'uk wya'antë jäts yëk'ayuujknajxpë Elías jä', jämts pën wantë'p jäts tu'uk yëk'ayuujknajxpë tëj jyükypyeky mati' jeknyë jüky'eetyë.

⁹ Nits Herodes wyaany: —Ëjts kë'm nniwaa'n'ajjt jäts Juan tyëk'ooktë't. ¿Pënts jä' mati' ixyam yëknikkajpxp yëknimatyakp? Jäkëjxts y'ijjty Herodes tja'ijxëwya'any Jesús.

Jesús tyëkkay nimuwoxk miijl jaa'y

¹⁰ Kuts apóstolestëjjk wyimpijtnëtë, jäts tmatyaajkjäätyë Jesús tukkë'yë tij y'ijjty tëj ttuntë. Nits Jesús pyawaajjëtë tu'uk kajjp mati' txëëw Betsaida.

¹¹ Kuts jaa'y tnijaa'w'eetyë maj y'ijjty tëj Jesús nyijkxy, nits tpanëjkxtë; jäts Jesús yëkxon wyaatsoojjëtë, nits myatyaajkxëtë Yës Teety y'aaw y'ayuujk jäts mëët tyëktsoojky pa'amjaa'y.

¹² Kuts xëëw kyitaknë, nits apóstolestëjjk tnëëjmjäätyë Jesús: —Pakkäjxkëjxnë yë' jaa'y, wä'n tnëjkxtë kajjpjotm ok maj nitu'ukën jaa'y tsyëënë kamjoojty jäts pyoo'kxtë't nits mëët t'ijxta'atë't tij kya'ytyë'p y'uuktë'p, jä'ku nittij yaj kya'ity.

¹³ Nits Jesús nyëë'mxëtë: —Yekkaytyë miits. Jäts apóstolestëjjk y'atsootë: —Muwoxkë'm ëëts jä'yë nmëëtë tsapkääky jäts jamäjtsk ajkx, nit ku ëëts nijkxy njuy kääky tojkx jäts nitukkë'yë jaa'y ntaniwaajt'ëë'yë'n.

¹⁴ Jä'ku nimuwoxk miijlë'n y'ijjty yaa'ytyëjjk. Nits Jesús tnëëjmjaay y'ixpëjkpëttëjjk: —Nëëjmëtë jaa'y nits niwixtekxymyajjkjäty tsyëën'y'oyëtë't.

¹⁵ Najjts y'ixpëjkpëttëjjk jaa'y tyëktsëëny'oyëkyëjxtë.

¹⁶ Nits Jesús tkoony muwoxk tsapkääky mëët jamäjtsk ajkx, jäts tsapwinm pya't'ijxy nits tkunuu'kxtaajky, nitnë'mts tujkwä'kxy jäts tmooy y'ixpëjkpëttëjjk nits jaa'y tanipaattëtë't.

¹⁷ Jäts nitukkë'yë jaa'y ku'uxyë kyaytyë, kuts kaytyuk tpiimujknëtë majkmäjtsk käptyuj ojts y'ütsy.

Pedro tnikkäjpxy pën jä' Jesús

¹⁸ Tu'kyaajjë ku Jesús y'ijjty nyuu'kxta'aky nityu'uk appak'itjötypy, jäjpts y'ixpëjkpëttëjjk nyija'ajtë, Nits Jesús tyëktëëy: —¿Ntsoj jaa'y wya'antë pën ëjts?

¹⁹ Nits jä' y'atsootë: —Jäm nitu'ukën pën wantë'p jäts mijts Juan Bautista, jatu'uk wya'antë jäts yëk'ayuujknajxpë Elías mijts, jämts pën wantë'p jäts tu'uk yëk'ayuujknajxpë tëj jyükypyeky mati' jeknyë jyüky'eetyë.

²⁰ —Nits Jesús yyëktëëjjëtë, ¿jäts miits, ntsoj mwa'antë pën ëjts? Nits Pedro t'atsooy: —Cristo mijts, Yës Teety y'uu'nk.

Jesús tnikkäjpxy y'oo'jkën

²¹ Nits Jesús mëjk tyappawaajnëtë jäts kä'ä pën twaajnëtë't.

²² Nits nyëë'mxëtë: —Tsätsymyëjk y'ayowa'any yaa'ytyëjjk y'uu'nk, ka'oy'ijxë'p majaa'ytyëjjk, teety nyiwintsëntëjjk mëët pawaa'n yëk'ixpëjkpëttëjjk. Jäts jaa'y yëk'ookë't, kyutuwëëk xëëwts nijkxy jatu'kyaajjë jyükypyeky.

²³ Nits Jesús tnëëjmjaay nitukkë'yë y'ixpëjkpëttëjjk: —Pënpën ëjts xmuttunwamp, wä'n tjaa'tyakkoy mati' tsyöjkypy y'oyjyaa'w'eepy, nits wä'n tpakkë'ëy kryus jawom jawom najjts ëjts xpattuu'yo'oyty.

²⁴ Jä'ku pën kamajtstu'utyë'm jyüky'ajjt tjaa'w'eepy, ttakkoo'yxyë'p jä'; pënpënts ëjts këjxm oo'kp, pyaatp jä' jüky'ajjt mati' xëmëkkëjxm.

²⁵ ¿Tij jaa'y wyaa'nxë't oyë'm tjamëëtë't mëjk'ajjt, meeny, kuttujjk yaj it naxwiin, jäts jyüky'ajjt takkoykyunäxy y'itt?

²⁶ Pënpën ëjts xkutso'oyjyaa'w'eepy jäts mëët tkutso'oyjyawë ëjts n'aaw n'ayuujk, ninyajj jä' yaa'ytyëjjk y'uu'nk kutso'oyjyaw'attë't ku tmumi'nt myëjk'ajjt jäm tsapjotm.

²⁷ Tëy ëjts miits nnëëjmëtë, nitu'ukën nii'xyë'n miits yaj ixyam, kä'ä y'ooktë't kunë'm Yës Teety kyuttujjkë'n t'ijxtë't.

Ku Jesús tyikkätsy

²⁸ Ku najj Jesús tnëëjmjaay y'ixpëjkpëttëjjk, kyutuktujjk xëëw tmëët'ëëy Pedro, Santiago mëët Juan nuu'kxtakpë kojpkëjxm.

²⁹ Kuts y'ijjty Jesús jäm nyuu'kxta'aky, nits wyiin y'aaw tyikkajjtsy, jäts wyit poop tëë'kxp jyajtkëjjxy;

³⁰ nits atsu'ujky kyä'äjxjë'ëjky Moisés mëët Elías,

³¹ jäts tu'uk yëk'ääp ajajjk nyijajjëtë, jä'äts jä' y'ijjty kyajpxtë'p myatyaktë'p ntsoj Jesús y'ookt jäm Jerusalén, jyükypyëkt nits ntsoj nyëjkxnë't tsapjotm.

³² Oyë'm Pedro mëët myuku'uktëjjk mëjk y'ijjty tsuuj jya'ooktë, jüky y'a'ijxtë, najjts t'ijxtë Jesús myëjk'ajjt mëët nimäjtsk jaa'y mati' jäm y'ijjty Jesús myëëtnakyajpxë'p.

³³ Kuts y'ijjty tsyoonwanëtë Moisés mëët Elías, nits Pedro tnëëjmjaay Jesús: —Wintsën, ¡oynyäxy ku ëëts nyajjë! Wä'n ëëts tyëk'oyë tuwëëk ujts'aytyëjjk: Tu'uk mijts mjä'ä, jatu'uk Moisés, jäts jatu'uk Elías jyä'. Nikkä'äts Pedro y'ijjty tnijawë puttij najj tyijjpy.

³⁴ Niyam y'ijjty najj yä'äny ku yoots nyijuu'xëtë, jäts yootsjötypy mëjk tsyë'ëjk'eetyë.

³⁵ Nits jäjp tu'uk ayuujk tmatootë mati' wamp: «Ëjts ya'at n'uu'nk, mati' ëjts tëj nwin'ijxy nwinköny: Yë' mmumato'otë'p.»

³⁶ Ku najj tmatookitaktë, nits Jesús jatu'kyaajjë nityu'uk tyaany. Jäts Pedro, Juan mëët Santiago, nippën tkawaajnjäätyë tij y'ijjty tëj t'ijxtë t'aa'xtuktë.

Jesús tyëktso'oky tu'uk una'ajnk

³⁷ Kyujawom tsyoo'nëtë jäm kojpkëjxm jäts kyitaknëtë, nimay ojts Jesús jaa'y yo'ytsyoyë.

³⁸ Nits jäm jaa'y'akujkm tu'uk yaa'ytyëjjk mëjknäxy kyajpxkeejky: —Wintsën, tunmay'ajjt, puttëjjkëjyääky ëjts n'uu'nk, tu'ukëm ëjts yë' nmajjnkë;

³⁹ mëjk yë' yyëk'ayoyë tu'uk mëjjku'ujy tyumpë, atsu'ujkjäty yyëktsap'aake'ekyë jäts yëkmönyë, nits mëët öö'pky tyok'ëëtsyë, jäts kä'ä jätyë myajtstu'tyë.

⁴⁰ Tëj ëjts njamunuu'kxta'aky m'ixpëjkpëttëjjk nits jyeexyë tokniwa'atstë mëjjku'ujy, kä'äts tëj yyëkmata'akyëtë.

⁴¹ Jäts Jesús y'atsooy: —¡Miits kattëyjyaa'w'eepyë jäts ka'oytyumpë jaa'y! ¿Winaak jumëjjt ëjts miits njakta'awa'ant jäts kë'm xtu'ntë't? Yëkmin yaj m'uu'nk.

⁴² Kuts jä' una'ajnk Jesús y'ijjty t'anëjkxë, nits mëjjku'ujy yyëkkitaajjë jäts mëjknäxy yëkwippijpëjjkë; nits Jesús twinku'oj'ajjty jä' mëjjku'ujy, najjts tyëktsoojky jä' una'ajnk nits tyeety tkë'moynyë.

⁴³ Jäts nitukkë'yë jaa'y pënjäty jäm y'ijjtytë attëy'ajat tyankëjxtë ntsoj Yës Teety myëjk'ajjt tyëknikkä'äjxjë'ëky. Niyam y'ijjty jaa'y attëy'ajat, ku Jesús tnëëjmjaay y'ixpëjkpëttëjjk:

Jesús mumäjtskyaajjë y'oo'jkën tnikkäjpxy

⁴⁴ —Matowtë yëkxon ntsoj ëjts nwa'anwa'any jäts katij xjaa'tyakkooytyë: Jä'ku yëkkë'yakwamp yaa'ytyëjjk y'uu'nk myutsip'eewyë kyë'jë'm.

⁴⁵ Nippën tkawinjaa'w'ëëy tij jä' najj tyijjpy Jesús, jä'ku kä'änë'm y'ijjty winjaa'w'ajjtë'n tmëëtëtë; ninyajjmë tsë'ëjk'eetyë'p y'ijjty jäts tyëktë'ëtë't tij jä' najj tyijjpy.

¿Pën tnimëjj'eepy?

⁴⁶ Nit'ämpy Jesús y'ixpëjkpëttëjjk nyayëktëë'axajjëtë tu'uk janitu'uk pën tnimëjj'eepy.

⁴⁷ Ku Jesús tnijaa'w'ajjty ntsoj jä' wyinmaytyë y'ixpëjkpëttëjjk, nits tu'uk una'ajnk'uu'nk tyaxtsooy jäts pyaa'aajy tkejjxy

⁴⁸ nits tnëëjmjaay y'ixpëjkpëttëjjk: —Pënpën ëjts këjxm tkuppëjkp tu'uk una'ajnk'uu'nk naa'xk ya'at, ëjts jä' wyä'në na'it xkuppëjkp; pënpënts ëjts xkuppëjkp, jä'jä' na'it kyuppejkypy pën ëjts xpakkäjxp. Jakëjxts ëjts nwa'any, pën tuta'aky'ajjt tjakyäjpp, jä'äts tnimëjj'eepy.

Pën xkamutsip'ëë'yë'm, xputtëjjk'ëë'yë'm jä'

⁴⁹ Nits Juan tnëëjmjaay Jesús: —Wintsën, tëj ëëts tu'uk jaa'y n'ijxy mëjjku'ujy tyëkpitsemy mijts këjxm; tëts ëëts nnëëjmë jäts kä'ä najj y'atë'ëtst, jä'ku kä'ä ëëtë'm jä' xmëëtyo'ymyujjkyë'n.

⁵⁰ Nits Jesús y'atsooy: —Katij x'akkajpxtujjkëtë, pënpën ëëtë'm xkamutsip'ajjtyë'm, xmuku'ukwaa'nyë'm jä'.

Jesús t'ojjy Santiago mëët Juan

⁵¹ Ku y'ijjty wyinkonnë jä' xëëw maj Jesús wyimpijtnë't tsapjotm, nits Jesús tu'ukyë jyoojt tkejjxy najjts nyijkxy Jerusalén.

⁵² Jäts tkäjxtuwëjjky nitu'ukën kukkexy'eepyë, jä'äts nëjkxtë maj tu'uk mutskkajjp Samaria y'itjotm jäts t'ijxta'atë't tëjjk maj jya'ata'aktë't;

⁵³ jäts samaria'tjaa'y kä'ä tkuppëjktë jäts Jesús jäm jya'ata'akt, jä'ku kyumaytyë'p jä' y'ijjty jäts Jerusalén jä' nyijkxy.

⁵⁴ Kuts najj t'ijxtë Santiago mëët Juan, jäts Jesús tnëëjmjäätyë: —Wintsën, ¿wä'n ëëts tnuu'kxta'aky jäts jëën nyaxkita'akt nits nitukkë'yë jaa'y nyaxtoykyëxtë't?

⁵⁵ Nits Jesús wya'kwimpijjty jäts twinku'oj'ajjty y'ixpëjkpëttëjjk.

⁵⁶ Nits nyëjkxtë ayam jatu'uk mutskkajjp.

Ntsoj tsyippë Jesús npattuu'yo'ojyë'n

⁵⁷ Jäm tuu'am tu'uk jaa'y tpat'të, jä'äts Jesús tnëëjmjaay: —Wintsën, npanëjkxp ëjts mijts pënmaj mnijkxy.

⁵⁸ Jäts Jesús t'atsooy: —Jäm waajx tmëëtë tsa'aajnk jäts joon pyä'än maj mya'atë; nits yaa'ytyëjjk y'uu'nk nikkä' tmëëtë maj mya'at.

⁵⁹ Nits Jesús jatu'uk jaa'y tnëëjmjaay: —Pattuu'yo'yky ëjts. Jäts jä' jaa'y y'atsooy: —Wintsën, a'ijx wä'n ëjts jawyiin nteety t'oknittajjë nits ëjts ntsoont.

⁶⁰ Nits Jesús t'atsooy: —Wä'n oo'kpëttëjjk kë'm y'oo'kpë tnittajjëtë; nëjkx mijts Yës Teety y'aaw y'ayuujk xkajpxwa'kxë.

⁶¹ Jatu'uk jaa'y Jesús nyëë'mxë: —Wintsën, ëjts mijts njappattuu'yo'oywyämpy, a'ijxk ëjts jyeexyë, wä'n ëjts jawyiin nmuku'uktëjjk t'aswaajnë.

⁶² Jäts Jesús t'atsooy: —Pënpën yëkyuup jäts y'ijxwimpity, kä'äts jya'att maj jäm Yës Teety yyëkkutüky.