Lucas 8 - Ntsoj Lucas tmatya'aky Jesús jyüky'ajjt

To'oxytyëjjk mati' y'ijjty Jesús tputtëjjk'eetyë'p

¹ Kuts najj nyajxkëjjxy, nits Jesús tsyoo'jny mëët nimajkmäjtsk y'apostolestëjjk jäts t'ayo'ykyëjjxy mëjjkajjp, mutskkajjp jäts nitukkë'yë jaa'y twaajnë Yës Teety y'aaw y'ayuujk.

² Jäm y'ijjty mëët to'oxytyëjjktë mati' Jesús yëktsoojk jäts pënjäty mëjjku'ujy tyumpë tyokniwaajts. Mëët María mati' y'ijjty yëkkuxëëw'eepy Magdalena, jä' y'ijjty tëj pyitsëë'mxyë niwixtujjk mëjjku'ujy tyumpë;

³ mëët Juana Cuza tyo'oxytyëjjk Herodes tyumpë; jäts mëët Susana; nits aweky wiijnk to'oxytyëjjktë mati' kääky tojkx t'ijxtë'p.

Kamtumpëjaa'y y'ijxpäjjt

⁴ Nimay jaa'y tsyoo'ntë kyajjpjotm jäts nyëjkxtë Jesús nijkxy t'ijxtë. Nits Jesús myatyaajkxëtë tu'uk ijxpäjjt:

⁵ «Tu'kyaajjë tu'uk kamtumpë nyijkxy kyamjötypy jäjpts najjyë tëmt twëjwa'kx'axajjy. Jämts mati' ojts nyaxkita'aky tuu'aajy, jä'äts yëktää'nwa'kxkëjxnë nits joon tpiikëjjxy.

⁶ Jawäänë nyaxkitaajky tsakkëjjxy; kuts jä' jyamujjxy, ojts tyëtskëjxnë jä'ku katij tpaajty niknaajx.

⁷ Jawäänë nyaxkita'aky yo'tspëjotm; kuts jä' tjamëëtye'ejky ojts nyiyonxëjpkexyë.

⁸ Jäts mati' naxkitaajk oynyaxkëjjxy, jä'äts yää'jk jäts tyëëm'ajjty tu'kmukkö'pxy'am tu'ktëmt.» Kuts najj Jesús myatyakkëjjxy, nits mëjk kyajpxkeejky: «¡Pënpën ya'at ayuujk tmatootë'p, winjawëtë yëkxon!»

Tikëjx Jesús myatya'aky ijxpäjjt këjxm

⁹ Jäts Jesús y'ixpëjkpëttëjjk yyëktëëjjë tij jä' najj tyijjpy jä' ijxpäjjt mati' y'ijjty tëj tmatya'aky.

¹⁰ Nits Jesús nyëë'mxëtë: «Tëj miits Yës Teety mtawinjaw'ätyëtë kyuttujjkë'n, mati' yu'utsy ijtp; jäts wiijnkjaa'y ijxpäjjt këjxm jä'yë tmukkäjpxy, oyë'm jä' yëkxon tja'ijxtë't tja'aa'xtuktë't kä'ä tij t'ijxpaat'të't, ninyajj oyë'm yëkxon tjamato'otë't kä'ä jä' twinjawëtë't.

Jesús tkajpxtëy ntsoj wyimpitsemy kamtumpëjaa'y y'ijxpäjjt

¹¹ »Najj yë' wyimpitsemy ijxpäjjt mati' ëjts tëj nmatya'aky: Mati' tëmt'eepy Yës Teety jä' y'aaw y'ayuujk;

¹² jäts tëmt mati' ojts nyaxkita'aky tuu'aajy jä' jaa'y jä'ätë mati' Yës Teety y'aaw y'ayuujk tmatoojjäätyë'p, nits jätyë mëjjku'ujy myiny jäts tyokjaa'tyakkoyëtë, nits kä'ä ttëyjyawëtë't jäts nitsoojkë'n tpaat'të't.

¹³ Jä' tëmt mati' ojts nyaxkita'aky tsakkëjjxy jä' jaa'y jä'ätë mati' tmatootë'p Yës Teety y'aaw y'ayuujk jäts oy jotkujjk tmuttun'axajjtë, kumkä'änëmts yëkxon twinjawëtë; kuts nyiminyëtë atsijjpë'n atsuujxë'n jätyë jä' y'amutskëtë nits kä'ä t'oktëyjyaa'w'eenyëtë Yës Teety.

¹⁴ Jä' tëmt mati' ojts nyaxkita'aky yo'tspëjötypy jä' jaa'y jä'ätë mati' tmatootë'p Yës Teety y'aaw y'ayuujk, nits tmaytyë ttajjtë tijjäty ka'ijjtxëtë'p najjts tuta'aky meeny tpanëjkxnëtë mëët xontaajk mati' ya'at jüky'ajjt y'awaa'n'eepy, jakëjxts kä'ä jyüky'ajjt tyikkatstë.

¹⁵ Jäts tëmt mati' naxkitaajk oynyaxkëjjxy, jä' jaa'y jä'ätë mati' Yës Teety y'aaw y'ayuujk tmatoojjäätyë'p jäts tkuytyuntë tu'k'aaw tu'kjoojt, nits yëkxon Yës Teety tpattuu'yo'oytyë.

Pujjxjëën y'ijxpäjjt

¹⁶ »Kä'ä pën tu'uk pujjxjëën tyëktoypyeky nits tnippe'eny witpa'tke'py ok tkukkonë maapäjjt pa'tke'py, oo'ktëy jä' këjxm tpëmtë jäts tkuno'okt pënjäty ja'atë'p.

¹⁷ Ninyajjmë, kä'ä tij tu'uk yu'utsy y'ity mati' junë kayëkpaatp, nittij mëët tu'uk amää'tsk kya'ity mati' junë kayëknijawë'p.

¹⁸ Jakëjxts ëjts nwa'any, winjawëtë yëkxon, pën tmëët winjaa'w'ajjt jakyëkmo'op jä', pënts tkamëët, yëkpëjjkë'p jä' mati' wääne jyamëët.»

Jesús y'ütsytyëjjk mëët tyaak

¹⁹ Jesús y'ütsytyëjjk mëët tyaak nyëjkxtë maj jäjp y'ijjty Jesús, kä'äts jä' tpat'të jä'ku nimaynyäxy y'ijjty jaa'y.

²⁰ Nits Jesús jaa'y nyëë'mxë: —Jäjp tëjkwimpy mtaak mëët m'ütsytyëjjk, mijts mukkajpxwaajnë'p.

²¹ Nits Jesús y'atsooy: —Jä' ëjts ntaak'eepy, nmuku'uk'eepy pënjäty Yës Teety y'aaw y'ayuujk t'amatoojäätyë'p jäts tkuytyuntë.

Jesús tyëk'attëyë tsätsytyuuj tsätsypyoj

²² Tu'kyaajjë, Jesús tyëjjk'ëëy tu'uk kanëwjötypy mëët y'ixpëjkpëttëjjk, jäts tnëëjmjaay: —Wä'n tnënajjxyë'n. Nits tsyoo'ntë,

²³ jämts y'ijjty nyënaxtë jäts Jesús myaatakkooy. Ku atsu'ujky myiiny tsätsytyuuj tsätsypyoj, nits kanëwjötypy nëëj tyëjjkë'y'axajjnë jäts kyinwanëtë.

²⁴ Nits ojts Jesús tyëkniwijjtë, jäts tnëëjmjäätyë: —¡Wintsën! ¡Wintsën! ¡Kinkëxwaa'nyë'm! Nits Jesús tyenkyuk'ajjty jäts twinku'oj'ajjty jä' tuuj jä' poj, jätyë tukkë'yë y'attëyëkyëjjxy.

²⁵ Nits y'ixpëjkpëttëjjk tnëëjmjaay: —¿Maj mtëyjyaa'w'ajjt y'it'të? Tsë'ëjkë'y'oo'këjxtë'p jä' y'ijjty y'ixpëjkpëttëjjk nits attëy'ajat nyayëktëëjëtë tu'uk janitu'uk: —¿Pën jaa'y yë', ntsoj yë' y'ijxë tuuj, poj, myumatoyë?

Yaa'ytyëjjk mati' maynyäxy mëjku'ujy tyumpë tatsënaajyë'p

²⁶ Kuts pyitsëmtë në'am, Gerasa y'itjotm, Galilea kyajjp'awimpy.

²⁷ Nits Jesús wyinajjky kanëwkëjxm, jämts nyimiijnë tu'uk yaa'ytyëjjk, mati' mëjjku'ujy tyumpë y'ijjty tatsënaajyë'p. Tëj y'ijjty jyäjknë maj kya'oknaxyojxnyë jäts nikkä' y'oktsënäänyë tyëjkëntüjpy, jäm jä' y'ijjty tsyëënë maj oo'kpë yëknittajjë.

²⁸ Kuts jä' jaa'y t'ijxpaajty Jesús, nits nyakyujxtänëtyaajkë Jesús wyinkujjky jäts mëjknäxy kyajpxkeejky: —¡Katij ëjts xmuwa'any Jesús, Yës Teety tsapjotmë't y'uu'nk! ¡Tunmay'ajjt katij ëjts xyëk'ayoy!

²⁹ Jakëjxts najj wyaany jä'ku tëj y'ijjty Jesús tnëëjmë mëjjku'ujy tyumpë jäts tniwa'atst jä' yaa'ytyëjjk. Kawinaakyaajjë y'ijjty tëj mëjjku'ujy tyattëk'ätyë; jäts yëknijkxyë tëtsta'aky'itjötypy oyë'm jaa'y pujjxtejpxy jyattatsümyë, tukkë'yëts y'ijjty tpojtkexy.

³⁰ Nits Jesús tyëktëëy jä' yaa'ytyëjjk: —¿Tij mxëëw? Jäts jä' jaa'y y'atsooy: —Legión ëjts nxëëw. Jakëjx jä' najj wyaany jä'ku nimay jä' y'ijjty tëj mëjjku'ujy tyattëk'ätyë,

³¹ nits mëjjku'ujy tmunuu'kxtaktë Jesús jäts katij pyakkexyëtë akkootsy'attüjpy ayoopë xëmëkkëjxm.

³² Jäm y'ijjty tunkëjxm nimay kääm wyittit'të, nits mëjjku'ujy tnëëjmjäätyë Jesús jäts tnittukt nits kääm ttattëkkëtë't; nyi'atsoo'ajjt Jesús.

³³ Nits jä' mëjjku'ujy tniwatstë jä' jaa'y jäts kääm ttattëjjk'eetyë, nits kääm kyäts'appujtkëjxtë jäts mejyjyötpy ojts jya'akextë, jäjpts nyëxi'pxkëjxtë.

³⁴ Nits jaa'y mati' y'ijjty kääm t'ijxtë'p, kyäktakkoykyëjxtë jäts ojts tukkë'yë jaa'y twankëjjxëtë tij y'ijjty tëj t'ijxtë.

³⁵ Nits jä' jaa'y nyëjkx'oo'ktë jäts ojts t'ijxtë mati' y'ijjty tëj yëkwaajnëtë. Kuts jya'atë maj jäjp y'ijjty Jesús, jäjpts tpat'të jä' yaa'ytyëjjk mati' y'ijjty tëj pyitsëë'mxyë mëjjku'ujy, tsyëënë tëj nyaxyojjxnyë jäts tëj wyijjnë; nits jä' jaa'y mëjk ojts tsyë'ëkëtë.

³⁶ Jäts jaa'y pënjäty t'ijxtë tukkë'yë tij y'ijjty tëj tyünyë, jä'äts tmatyaajkjäätyë myuku'uktëjjk ntsoj y'ijxë y'ijjty Jesús tëj tyëktso'oky jä' yaa'ytyëjjk pën tsee'my mëjjku'ujy yyëk'ayoojjë'p.

³⁷ Nits nitukkë'yë Gerasa'tjaa'y tmunuu'kxtaktë Jesús jäts nyëjkxnë't, jä'ku tsë'ëjk'eetyë'p jä' y'ijjty. Najjts Jesús tyëjjk'eenyë kanëwjotm jatu'kyaajjë nits wyimpijtnë.

³⁸ Jäts yaa'ytyëjjk mati' mëjjku'ujy y'ijjty tëj nyiwa'atsyë tjamunuu'kxtaajky Jesús nits jyeexyë pyawayë, kä'äts Jesús kyuppëjjkë, jä'yë nyëë'mxë:

³⁹ —Nëjkxnë mtëjkëntüjpy jäts matya'ak tukkë'yë ntsoj tëj Yës Teety mputtëk'ätyë. Nits jä' yaa'ytyëjjk nyëjkxnë tyëjkëntüjpy jäts tmatyaajkjaay tukkë'yë kajjp ntsoj Jesús y'ijjty tëj pyuttëk'ätyë.

To'oxytyëjjk mati' pëjjkë'p mëët Jairo nyëëx

⁴⁰ Kuts Jesús pyitsëëmy jatu'kyaajjë në'am Galilea y'itjotm, jämts y'ijjty nimay jaa'y y'a'ijxyë jä'äts waatsoojjë oy jotkujjk.

⁴¹ Jäts mëët jäm jya'ajty tu'uk yaa'ytyëjjk mati' txëëw Jairo, jä' y'ijjty tniwintsën'eepy tëjjk maj jaa'y yo'ymyuktë. Jäts nyakyujxtänëtyaajkë nits Jesús tmunuu'kxtaajky jäts jyeexyë pyatsoonyë tyëjkëntüjpy,

⁴² jä'ku tu'ukëm nyëëx mati' majkmäjtsk jumëjjt jüky'eepynyë'm, jä' y'ijjty ookwanë'p. Kuts Jesús nyijkxy Jairo tyëjkëntüjpy, nimay jaa'y pyanëjkxë jäts Jesús nyajyaa'w'ajjtë jaa'y nyastijjë'y'oo'kexyë.

⁴³ Jämts mëët y'ijjty jaa'y'akujkm tu'uk to'oxytyëjjk mati' tëj tmutsënäänyë majkmäjtsk jumëjjt në'ëjpypya'am, tëj y'ijjty too'këjxnë tukkë'yë myaay pyëjkta'aky nits ttamuju'yty tsoy'eewyëttëjjk, jäts nippën kyamayë nits yëktso'okë't.

⁴⁴ Nits jä' to'oxytyëjjk t'anëjkx'ajjty Jesús winkon jäts ojts wyit ttaxajpäjjtë, nits tu'mtsyë ojts në'ëjpy y'attüky.

⁴⁵ Jäts Jesús wya'kwimpijjty nits jaa'y tyëktëëy: —¿Pën ëjts tëj xtaxajjpety? Kuts kä'ä pën tkuppeky pën tëj y'atë'ëtsy, jäts Pedro y'atsooy: —Wintsën, maynyäxy jaa'y jäts mnastijjë'y'ookyë tum'aajny jatu'm'aajny nits mijts xyëktëy ¿pën ëjts tëj xtaxajjpety?

⁴⁶ Jäts Jesús wyan'atëëjtsy: —Jäm tu'uk jaa'y pën ëjts tëj xtaxajjpety, jä'ku njaa'w'ajjt ëjts tëj nmajaaw pyitsemy.

⁴⁷ Kuts jä' to'oxytyëjjk t'ijxy nits tëj y'ijjty yyëkkumaynyë, jäts jawëtsë'ëkë t'anëjkx'ajjty Jesús jäts wyinkujjky nyakyujxtänëtyaajkë. Nits tmatyakkëjjxjaay nitukkë'yë jaa'y wyinkujjky tikëjxë'm y'ijjty tëj ttaxajjpety, jäts ntsoj y'ijxë y'ijjty mëët tëj tsyo'oky.

⁴⁸ Nits Jesús nyëë'mxë: —Uu'nk, mtëyjyaa'w'ajjt këjxm mijts tëj mtso'oky. Nëjkxnë jotkujjk.

⁴⁹ Niyam y'ijjty Jesús najj yä'äny, ku jya'ajty tu'uk kukkexy'eepyë jäts Jairo yyëknëëjmjaay: —Tëj mnëëx y'oo'knë; katij Wintsën x'oknä'mnë.

⁵⁰ Jä'äts Jesús myatoow nits tnëëjmjaay Jairo: —Katij mtsë'ëkë; tëyjyaa'w'eeky ëjts, tso'okp jä' mnëëx.

⁵¹ Kuts jya'ajty jäjp tëjkëntüjpy, kä'ä Jesús tsojjky jäts pyattëk'attë't nimay jaa'y, Pedro jä'yë tëjjk'ëëy, mëët Santiago, Juan, jäts kiixy'uu'nk tyeety tyaak.

⁵² Nitukkë'yë jaa'y mati' jäjp y'ijjty, mëjk jä' tniya'axtë tnitsätsywinmaytyë jä' kiixy'uu'nk, nits Jesús tnëëjmjaay jä' jaa'y: —Katij mya'axtë; kä'ä yë' y'ooky, maap yë' jä'yë.

⁵³ Nits jaa'y katij ttëyjyaa'w'eetyë jä'yë tnixiktë, jä'ku nyijaa'w'eetyë'p jä' y'ijjty yëkxon jäts tëj jä' kiixy'uu'nk y'oo'knë.

⁵⁴ Nits Jesús tmajjtsy kyë'këjjxy jä' kiixy'uu'nk jäts mëjk tmukkäjpxy: —¡Kiixy, puttë'ëk!

⁵⁵ Nits jä' kiixy'uu'nk jyükypyëjjky; jäts jätyë pyuttë'ëjky, nits Jesús tniwaa'n'ëëy jäts tyëkka'ytyë't.

⁵⁶ Jäts nitteety nittaak attëy'ajat ttattantë; nits Jesús nyëë'mxëtë jäts katij pën tmatyaajkëtë tij tëj tyünyë.