Lucas 5 - Ntsoj Lucas tmatya'aky Jesús jyüky'ajjt

Maynyäxy ajkx tmatstë

¹ Jäm y'ijjty tu'kyaajjë Jesús Genesaret nyë'am, nits jaa'y tyayo'ymyujjkë pënjäty y'ijjty tmatowantë'p Yës Teety y'aaw y'ayuujk.

² Jäts Jesús t'ijxpaajty në'aajy mäjtsk kanëw. Jä'ku tëj jä' y'ijjty ajkxmajtspëttëjjk wyinajknëtë ajkxmajjts'ëë'ny pujjpë.

³ Nits Jesús pyejjty tu'uk kanëw këjxm, mati' y'ijjty Simón jyä'eepy, jäts tnëëjmjaay nits wäänë tyëknëttëkkë't. Jämts Jesús tsyëënë'y'ixtaajky nits jaa'y tyëk'ixpëjk'axajjy.

⁴ Kuts yyëk'ixpëjk'awaajt'ëëy, nits tnëëjmjaay Simón: —Yëknëjkx yë' mkanëw mejyjyotm, jämts xkuyuupëtë't m'ajkxmajjts'ëë'ny, jäts ajkx xjuut'të't.

⁵ Nits Simón t'atsooy: —Wintsën, tëj ëëts yë' tu'ktsunäxy njattunkë nittu'uk ëëts tëj ajkx nkajuuty; pën mijts mwamp, oyts ëjts n'ajkxmajjts'ëë'ny nkuyuupë't.

⁶ Kuts najj ttuntë, maynyäxy ajkx tjuu't'të, jajä'yë ajkxmajjts'ëë'ny kyappojtkëjjxy.

⁷ Nits tyääjmjäätyë myuku'uktëjjk mati' y'ijjty jatu'uk kanëwjotm jäts y'asputtëk'attëtë't, nits jä' nyimiijnëtë, jäts wä'nmäjtsk kanëw tyëk'ujtskëjxtë, maynyäxy y'ijjty ajkx jajä'yë kyakkinkëjxtë.

⁸ Kuts Simón Pedro najj t'ijxy, jäts nyakyujxtänëtyaajkë Jesús wyinkujjky nits tnëëjmjaay: —¡Winwa'kwatsk ëjts, Wintsën, jä'ku pökytyumpëjaa'y ëjts!

⁹ Tsë'ëjk'ëëy Simón mëët nitukkë'yë myuku'uktëjjk ku maynyäxy ajkx tjuu't'të.

¹⁰ Jäm y'ijjty ninyajj Santiago mëët Juan Zebedeo myajjnktëjjk, jä'äts y'ijjty Simón myuku'uk'eepy. Jäts Jesús tnëëjmjaay Simón: —Katij mtsë'ëkë; kä'ä mijts ajkx x'okjuu'tnë't, ixyam xpatsoo'nta'akt jäts jaa'y xjuutt takkoo'nyjyötypy.

¹¹ Nits kyanëw tyëkpitsëmkëjxtë në'aajy, jäts t'okkäjxkëjxnëtë tukkë'yë nits Jesús tpanëjkxtë.

Jesús tyëktso'oky tu'uk jaa'y mati' pu'uts pa'am tmëët

¹² Jäm y'ijjty tu'kyaajjë Jesús tu'uk kajjpjotm, jämts jya'ajty tu'uk yaa'ytyëjjk mati' y'ijjty pu'uts pa'am tmëët; kuts jä' yaa'ytyëjjk t'ijxpaajty Jesús nits nyakyujxtänëtyaajkë jäts tmunuu'kxtaajky: —Wintsën, ¿kä'ä xtu'nt may'ajjt jäts ëjts xyëktso'okt?

¹³ Nits Jesús tkë'nixajjy jä' yaa'ytyëjjk jäts tnëëjmjaay: —Nyëktso'okp ëjts mijts ixyamyë. Niyam y'ijjty najj yä'äny ku jä' pu'uts pa'am tyakkoykyëjjxy,

¹⁴ nits Jesús tnëëjmjaay: —Katii'm pën xwaajnë; jä'yë mijts mnëjkxt jäts m'asnakkyä'äjxjë'ëkë't teety wyinküjkypy, mëët xmunëjkxt tukkë'yë wintsë'ëjk'ëë'ny mati' Moisés ojts tpawa'any jäts mnakwya'atsë't, najjts jä' teety ttëyjyawë't jäts tëë'm mtso'oky.

¹⁵ Oyë'mts jä' najj tjanëëjmjaay jä' yaa'ytyëjjk, nii'xyë'm jä' y'ijjty Jesús nyimatya'aky wya'kx'atë'ëtsy, nimay y'ijjty mëët jaa'y nyamyükyëtë jäts tmatoojjë't Jesús y'aaw y'ayuujk, jäts mëët yëktso'okëtë't.

¹⁶ Jäts Jesús ijtp y'ijjty nyijkxy nityu'uk appak'itjötypy nuu'kxtakpë.

Jesús tyëktso'oky jäts tmää'kxtüky tu'uk jaa'y mati' kayo'ypy

¹⁷ Tu'kyaajjë, maj jäjp y'ijjty Jesús jaa'y tyëk'ixpeky, jäjp y'ijjty mëët nitu'ukën fariseostëjjk mëët pawaa'n yëk'ixpëjkpëttëjjk, mati' y'ijjty mintë'p Galileat'itjotm, Judea jäts Jerusalén. Jämts y'ijjty Jesús tjakyepy Yës Teety myëjk'ajjt jäts pa'amjaa'y tyëktso'okt.

¹⁸ Jäjpts ni'ey jaa'y tkëyjya'atë maapäjjtkëjjxy tu'uk yaa'ytyëjjk mati' y'ijjty kayo'ypy. Jäts y'ijjty tjamuttëkkëwya'antë tijkypy nits Jesús wyinkujjky tkäxtë't,

¹⁹ kä'äts tpat'të maj tmunaxtë't, jä'ku nimaynyäxy y'ijjty jaa'y; jakëjxts tmuppäjt'të tëjkejxypy, nits wäänë tëjjk tnikkëywyatstë, jämts tkukkëynyäjxtë maapäjjtmëët jä' pa'amjaa'y jäts tyëknaxkitaktë Jesús wyinkujjky.

²⁰ Ku Jesús t'ijxy jä' tëyjyaa'w'ajjtë'n mati' y'ijjty jä' jaa'y jyakyäjptë'p, nits tnëëjmjaay jä' pa'amjaa'y: —Muku'uk, mää'kxtüky tukkë'yë mpöky tyäny.

²¹ Nits pawaa'n yëk'ixpëjkpëttëjjk mëët fariseostëjjk wyinmay'axajjtë: «¿Pën yë' nyatyijyë ku Yës Teety tkawintsë'ëkë? Yës Teety tu'uk pöky tmää'kxtujkp.»

²² Jäts Jesús tkumaay ntsoj jä' y'ijjty wyinmaytyë, nits tyëktëëy: —¿Tikëjx miits najj mwinmaytyë?

²³ ¿Mati' katsu'ux, ku nwaa'në'n: "Mää'kxtüky tukkë'yë mpöky tyäny", ok ku nwaa'në'n: "Tenkyukkë jäts yo'oy"?

²⁴ Ntok'ijxp ëjts miits, jäts jäj yaa'ytyëjjk y'uu'nk tjakyepy kuttujjk yaj naxwiiny nits pöky tmää'kxtukt. Nits Jesús tnëëjmjaay jä' jaa'y mati' y'ijjty kayo'ypy: —Mijts nnëëjmjääpy, tenkyukkë, këëjyë'knë maapäjjt jäts nëjkxnë mtëjkëntüjpy.

²⁵ Jäts pa'amjaa'y jätyë tyenkyuk'ajjty nitukkë'yë jaa'y wyinkujjky, jäts tkëëjjyë'knë myaapäjjt, nits Yës Teety ttaxontak'axajjy najjts nyëjkxnë tyëjkëntüjpy.

²⁶ Nitukkë'yë jaa'y tsyë'ëjk'eetyë jäts attëy'ajat tyantë najjts Yës Teety ttaxontaktë jäts wyantë: —Kattëyjyaa'w'eenyë mati' ixyam tëj n'ijxyë'n.

Jesús tpaway Leví

²⁷ Ku najj nyajjxy, nits Jesús tsyoo'në, jäts tuu'aajy tpaajty tu'uk yaa'ytyëjjk mati' y'ijjty txëëw Leví, tsyëënë maj jäm Roma myeeny myüky jä'ku jä'jä' y'ijjty tyunk'eepy. Nits Jesús tnëëjmjaay jä' yaa'ytyëjjk: —Pattuu'yo'yky ëjts.

²⁸ Nits Leví tyenkyuk'ajjty, jäts jääyë tukkë'yë t'okkäjxkëjxnë nits Jesús tpanijkxy.

²⁹ Jä' xëëw, Leví txëëwtuuny Jesús jäts jaa'y tyëkkaay tyëk'uujky tyëjkëntüjpy; jäjpts y'ijjty nimay yëkmyeenymyujkpëttëjjk kyaytyë mëët aweky wiijnkjaa'y.

³⁰ Nits pawaa'n yëk'ixpëjkpëttëjjk mëët fariseostëjjk tpakkajpx'axajjtë Jesús y'ixpëjkpëttëjjk. Jäts yyëknëëjmjäätyë: —¿Tikëjx miits xmëëtkay xmëët'uuky yëkmeenymyujkpëttëjjk mëët pökytyumpë jaa'y?

³¹ Nits Jesús t'atsooy jä' jaa'y: —Tukkë'yë jaa'y pën mëjkmajaaw kä'ä jä' tsoy'eewyë kya'ijjtxyëtë, pa'amjaa'y tsoy'eewyë ka'ijjtxëtë'p.

³² Kä'ä ëjts nniminy jaa'y mati' kappökytyuntë'p, pökytyumpëjaa'y ëjts nnimimpy, jäts Yës Teety t'awimpittëtë't.

Jesús tkajpxtëy ayuuj'ajjt

³³ Jäts Jesús tnëëjmjäätyë: —¿Tikëjx Juan pyattuu'yo'ypyëttëjjk mëët fariseostëjjk y'ayuujjëtë jäts ijtp nyuu'kta'aktë, nits mijts m'ixpëjkpëttëjjk ijtp kyaytyë y'uuktë.

³⁴ Jäts Jesús y'atsoowimpijjty: —¿Myëk'ayuujjëtë'p miits jyawë jaa'y mati' waatsoytyë amäjtsk'eekyuwam, pën nijyäj amäjtsk'eewyëttëjjk yëkxëëwtüny?

³⁵ Pyaatp jä' xëëw ku to'oxypyëjkpë kya'okpën'ijtnë't; nitnë'mts wyä'në y'ayuujjëtë.

³⁶ Ninyajj mëët tmatyaajky tu'uk ijxpäjjt: —Nippën tkappukkeepy tu'uk namwit jäts pakwit tta'akkëyë't. Ku najj ttu'nt, yëkwintakko'ypy jä' namwit; ninyajj, kä'ä jä' y'oykyä'äxt pakwit yëktamuxuyë't wäänë namwit.

³⁷ Nikkä' nam pa'aknëëj yëkpuutsë paktsyiwë'akjötypy, jä'ku nam pa'aknëëj kyëëtsp jä' chivë'ak ku pyuutsë't, najjts wä'nmäjtsk wyintakkoykyëxt.

³⁸ Jakëjxts yëkpuutsë nam pa'aknëëj nam chivë'akjötypy.

³⁹ Jäts nippën yi'it tka'ok'uukwanë't nam pa'aknëëj pëntëj jawyiin t'uuky pa'aknëëj mati' tëj yëkxon pyuutsë, jä'ku nëm wya'antë: "Jawäänë xu'uk jä' pa'aknëëj mati' tëj jeky puutsë y'ity."