Lucas 3 - Ntsoj Lucas tmatya'aky Jesús jyüky'ajjt

Juan Bautista tëtsta'aky itjotm

¹ Majkmojkx jumëjjt y'ijjty Tiberio yëkkuttüky jäm Roma, jäts Poncio Pilato y'ijjty yëkkuttujkp Judea. Herodes jäm Galilea, nits y'ajjtsy Filipo jäm Iturea mëët Traconítide'tkajjp, jäts Lisanias y'ijjty yëkkuttujkp Abilene.

² Anás mëët Caifás y'ijjty tuntë'p teety niwintsën nit'ämpy, ku Juan, Zacarías myajjnk Yës Teety myukkajpxë jäm tëtsta'aky'itjotm,

³ nits Juan t'ayo'ykyëjjxy tukkë'yë kajjp'uu'nk mati' jäm Jordánkë'tnë'am tamp, jäts nitukkë'yë jaa'y tnëëjmë jäts jyeexyë Yës Teety t'awimpittëtë nits mëët nyëppät'të't, najjts Yës Teety tyakkoo'ny myää'kxtujjkxëtë't.

⁴ Nits kyuytyunë't naa'xkë'n yëk'ayuujknajxpë Isaías jaypyëty tyëktaany maj jäjp yä'äny: «Jäm tu'uk mëjk aaw ayuujk yëkmatooy tëtsta'aky itjotm: “Yëkni'oyëtë Wintsën nyëë' tyuu'; yëk'awaajtsëtë tu'uk tëy tyuu'.

⁵ Tukkë'yë tamaak'it mëët tun kojpk y'akkijpxyëkyëxt, tukkë'yë neey tyuu' yëkwijtstëëkëxt, mëët y'ajoyë't tukkë'yë tuu' mati' ka'akkijpxy.

⁶ Nitukkë'yë jaa'y t'ijxt t'aa'xtukt nitsoojkë'n mati' Yës Teety pyakkejxypy.”»

⁷ Nimaynyäxy jaa'y myin'oo'ktë jäts Juan yyëknëppättëtë't, nits y'ijjty Juan jaa'y tnëëjmë: «¡Tsaa'ny miits mteety'eepy mtaak'eepy! ¿Pën miits tëj mnee'mxyë jäts mkukkä'äktë'p mëjk'ayoo'n mati' winkomp?

⁸ Jaa'yëtë jükyëtë yëkxon wä'n tnikkä'äjxjë'ëky jäts tëë'm Yës Teety x'awimpittëtë, katij miits mwinmaytyë jäts mpaat'të'p nitsoojkë'n jakëjx ku Abraham xteetyëtë. Ixyam ëjts nnikkäjpxy jäts maajyë'p Yës Teety nits ya'at tsaaj Abraham tokteetyjyawë't.

⁹ Ninyajjmë, jäänë poo'jtpujjx y'a'ijxy jäts tpoo'jtjë'ëkt y'aatsjötypy tukkë'yë kattëëm'eepyë kepy, nits tyëknaxto'yty.»

¹⁰ Nits jaa'y yyëktëëjë: —¿Tits ëëts jyeexyë ntümpy?

¹¹ Jäts Juan t'atsoowimpijjty jaa'y: —Pënpën tmëët mäjtsk ni'kx wit, mmo'otë tu'uk pën jyä' ka'ijtp; pënts kääky tojkx tmëët, akkaytyuktë pënjäty yu'oo'ktë'p.

¹² Mëët nyimiijnë nitu'ukën mati' Roma myeeny y'ijjty tyëkmujjkjäätyë'p nits nyëppät'të't, jäts Juan tyëktëëtë: —Wintsën, ¿tij ëëts jyeexyë ntümpy?

¹³ Nits Juan y'atsoowimpijjty: —Katij jaa'y këjx'am xnippëktë, nii'xyë'n jä'yë xnippëktë't naa'xkë'n nyikuttuk'ätyë.

¹⁴ Mëët nitu'ukën tsip'attänääwyëttëjjk tyëktëëtë: —¿Jäts ëëts? ¿Ntsoj ëëts jyeexyë y'ijxë ntüny? Mëët Juan t'atsoowimpijjty: —Katij opyënë tij xpëjjkëtë, kä'ä jaa'y xkajpx'atsë'ëkëtë't jäts katij oytyii'jë xtaniwampät'të mati' jyakattuntë'p; jämjawëtë mjuu'ny.

¹⁵ Nitukkë'yë y'ijjty jaa'y tnijawëtë jäts minwamp jä' Cristo, jakëjxts nyayëktëyëtë nyayëktu'mts'ätyëtë pën Juan jä' Cristo'eepy.

¹⁶ Nits Juan tnëëjmjaay nitukkë'yë jaa'y: «Nëëj ëjts miits jä'yë ntayëknëppejtypy; jäjpts ix'oojk jatu'uk myiny mati' jëën mtayëknëppättëtë'p mëët Yës Teety jyaa'wë'n. Jawäänë mëjk Jä', kä'ä ëjts jä' nnaspaatë, nikkä' ëjts xpaatë jäts kyë'ëk njääjnë't.

¹⁷ Ni'oyënë jä' myiny nits tyëkwa'atst tsapmoojk. Jäts jawyiin tsapmokpajjk tkoojnjë'ëkt nits pu'ux tyëkto'yty, jä' jënjötypy mati' nijunë ka'ookp.»

¹⁸ Najjts Juan ojts jaa'y tkajpxwijjy, nits mëët twaajnjaay oymyatya'aky.

¹⁹ Ninyajj mëët yëkkuttujkpë Herodes twintso'ojy ku y'ijjty kyap Herodías tmëëttsëënë, y'ajjtsy tyo'oxytyëjjk, jäts mëët ttawintso'ojy tukkë'yë tyakkoo'ny;

²⁰ nits Herodes, Juan tpujxtëjkpëëmy najjts tyuntakkoy'atëëjtsy.

Jesús nyëppety

²¹ Ku Juan y'ijjty nitukkë'yë jaa'y tyëknëppäjt'ooky, mëët Jesús nyëppejjty; yam y'ijjty nyuu'kxta'aky, nits ojts tsapwiin y'awa'atsy

²² jäts Yës Teety jyaa'wë'n tyanaxkitaajkë ijxnë kä'xnë, naa'xkë'n tu'uk poop pak, nits mëët yëkmatooy tsapwinm tu'uk ayuujk: —Mijts ëjts n'uu'nk'eepy mati' ëjts tëj ntsöky, ntajotkujjktäkypy ëjts mijts.

Jesús y'ap y'ok

²³ Ii'pxmajjk jumëjjt y'ijjty Jesús ku tyunk tpatsoo'ntaajky. Naa'xk y'ijjty yyëknijawë, José tyeety'ëëy. José, Elí y'uu'nk,

²⁴ Elí, Matat y'uu'nk, Matat, Leví y'uu'nk, Leví, Melquí y'uu'nk, Melquí, Janai y'uu'nk, Janai, José y'uu'nk,

²⁵ José, Matatías y'uu'nk, Matatías, Amós y'uu'nk, Amós, Nahúm y'uu'nk, Nahúm, Eslí y'uu'nk, Eslí, Nagai y'uu'nk,

²⁶ Nagai, Máhat y'uu'nk, Máhat, Matatías y'uu'nk, Matatías, Semeí y'uu'nk, Semeí, Josec y'uu'nk, Josec, Joiadá y'uu'nk,

²⁷ Joiadá, Johanán y'uu'nk, Johanán, Resá y'uu'nk, Resá, Zorobabel y'uu'nk, Zorobabel, Salatiel y'uu'nk, Salatiel, Nerí y'uu'nk,

²⁸ Nerí, Melquí y'uu'nk, Melquí, Adí y'uu'nk, Adí, Cosam y'uu'nk, Cosam, Elmadam y'uu'nk, Elmadam, Er y'uu'nk,

²⁹ Er, Jesús y'uu'nk, Jesús, Eliézer y'uu'nk, Eliézer, Jorim y'uu'nk, Jorim, Matat y'uu'nk,

³⁰ Matat, Leví y'uu'nk, Leví, Simeón y'uu'nk, Simeón, Judá y'uu'nk, Judá, José y'uu'nk, José, Jonam y'uu'nk, Jonam, Eliaquim y'uu'nk,

³¹ Eliaquim, Meleá y'uu'nk, Meleá, Mená y'uu'nk, Mená, Matatá y'uu'nk, Matatá, Natán y'uu'nk,

³² Natán, David y'uu'nk, David, Jesé y'uu'nk, Jesé, Obed y'uu'nk, Obed, Booz y'uu'nk, Booz Sélah y'uu'nk, Sélah, Nahasón y'uu'nk,

³³ Nahasón, Aminadab y'uu'nk, Aminadab, Admín y'uu'nk, Admín, Arní y'uu'nk, Arní, Hesrón y'uu'nk, Hesrón, Fares y'uu'nk, Fares, Judá y'uu'nk,

³⁴ Judá, Jacob y'uu'nk, Jacob, Isaac y'uu'nk, Isaac, Abraham y'uu'nk, Abraham, Térah y'uu'nk, Térah, Nahor y'uu'nk,

³⁵ Nahor, Serug y'uu'nk, Serug, Ragau y'uu'nk, Ragau, Péleg y'uu'nk, Péleg, Éber y'uu'nk, Éber, Sélah y'uu'nk,

³⁶ Sélah, Cainán y'uu'nk, Cainán, Arfaxad y'uu'nk, Arfaxad, Sem y'uu'nk, Sem, Noé y'uu'nk, Noé, Lámec y'uu'nk,

³⁷ Lámec, Matusalén y'uu'nk, Matusalén, Henoc y'uu'nk, Henoc, Jéred y'uu'nk, Jéred, Mahalaleel y'uu'nk, Mahalaleel, Cainán y'uu'nk,

³⁸ Cainán, Enós y'uu'nk, Enós Set y'uu'nk, Set, Adán y'uu'nk, Adán, Yës Teety y'uu'nk.