Lucas 24 - Ntsoj Lucas tmatya'aky Jesús jyüky'ajjt

Jesús jyükypyeky

¹ Ku xyëëjntyaajky dominkë xëëw, nits to'oxytyëjjk najyokyë namyöny tmunëjkxtë pa'akxuu'kpënëëj mati' y'ijjty tëj tyëk'oyëtë, jäjp maj Jesús yëkpëëmy.

² Kuts jäjp jya'atë, kä'ä ninyajj tsaaj t'okpatnëtë naa'xkë'n yyëkta'akkëëy.

³ Nits jäjp tyëjjk'eetyë, kä'äts Jesús nyikkëjjx t'okpaajtjäänyëtë.

⁴ Jäts jä' to'oxytyëjjktë najjyë attëy'ajat tyantë, ku atsu'ujky t'ijxpat'të nimäjtsk yaa'ytyëjjk jääyë pyaa'aajy tyänëtë, tëë'kxp ajajjp wyit tëj tpëmtë.

⁵ Nits to'oxytyëjjk jawëtsë'ëkë nyakyujxtänëtyaajkëtë; nits jä' jaa'y nyëë'mxëtë: —Tikëjx x'ijxta'atë oo'kpë'akujjky mati' jüky?

⁶ Kä'ä jä' yaj y'okpën'ijtnë, tëj jä' jyükypyeky. Jaa'myätstë ntsoj mnëë'mxëtë ku najyäm y'ijjty Galilea.

⁷ Ku wyaany: Yyëkkë'mo'owamp yë' pökytyumpë jaa'y yaa'ytyëjjk y'uu'nk jäts tyëk'ooktë't kruskëjxm, kyutuwëëkxëëwts jatu'kyaajjë jyükypyëkt

⁸ Jäts ojts to'oxytyëjjk tjaa'myätstë ntsoj Jesús wyaany,

⁹ nits jätyë wyimpijt'të jäts ojts twaajnëtë wä'nnimajktu'uk Jesús y'ixpëjkpëttëjjk mëët nitukkë'yë jaa'y pënjäty jäjp y'ijjty.

¹⁰ María Magdalena, Juana Santiago tyaak mati' txëëw María jäts mëët apeky wiijnk to'oxytyëjjktë jä' ojts tmatyaajkëtë Jesús y'ixpëjkpëttëjjk.

¹¹ Jäts Jesús y'ixpëjkpë taay kyäjpxy jä' tjaa'w'eetyë ku najj jyayëknëëjmjäätyë, kä'ä jä' ttëyjyaa'w'eetyë.

¹² Oyë'mts jä' tkattëyjyaa'w'eetyë, Pedro nëjkx tsätsypyujtp jäts ojts t'ijxy maj jäjp Jesús yëkpëëmy, kuts jäjp jya'ajty kä'ä pën t'okpatnë, jä'yë wit tpaajty mati' Jesús yyëktawimpijjt, nits Pedro attëy'ajat najjyë wyimpijtnë.

Ku Jesús nyaknyikä'äjxjë'ëkyë Emaús tyuu'am

¹³ Najyä' xëëw y'ijjty nimäjtsk Jesús pyattuu'yo'ypyëttëjjk nyëjkxtë maj tu'uk kajjp mati' txëëw Emaús, tuwëëk oorë yo'oyë'n jyakkämmë maj Jerusalén.

¹⁴ Jä' jä' y'ijjty nyikkajpxtë'p nyimatyaktë'p tij tëj tyünyë jäm Jerusalén.

¹⁵ Yam jä' najj nyakyäjpxyëtë nyamyatya'akyëtë ku Jesús nyaspaajt'ajjtëtë.

¹⁶ Oyë'm jä' y'ijjty yëkxon tja'ijxtë tja'aa'xtuktë kä'äts jä' t'ijxkajptë pën jä'.

¹⁷ Nits Jesús yyëktëëjjëtë: —¿Tij miits mnikkajpxtë'p mnimatyaktë'p yaj tuu'yo'ykyuwaajy? ¿Tikku mtsatsywyinmaytyë?

¹⁸ Nits tu'uk mati' txëëw Cleofas y'atsooy: —¿Mijts janityu'uk pënjäty xëëw tyëknajxtë'p yaj Jerusalén tkanijaa'w'eepy tij tëj tyünyë?

¹⁹ Nits Jesús yyëktëëjjëtë: —¿Tits tëj tyünyë? Jäts tnëëjmjäätyë: —Jä' ëëts nnikkäjpxypy nimatyäkypy ntsoj tëj Jesús jyäty kyowety. Yëk'ayuujknajxpë mati' tsoo'mp Nazaret, yyëknikkä'äjxje'kypy jä' y'ijjty myëjk'ajjt tij tyümpy kyäjpxypy, jaa'y wyinkujjky jäts Yës Teety wyinkujkm.

²⁰ Ntsoj jä' teety nyiwintsëntëjjk mëët ëëts nkuttunktëjjk tyëknikuttujjk'eetyë jäts kruskëjxm tyëk'ooktë't.

²¹ Jä' ëëts y'ijjty n'a'ijx'eepy jäts jyeexyë Israelë'tjaa'y tyëknitso'oky. Tëts tuwëëk xëëw nyajxnë maj tyëk'ooktë.

²² Oyë'm ëëts tëj ixyam ni'ey to'oxytyëjjk x'atsë'ëkë pënjäty ojts tëj najyokyë y'otstë maj Jesús nyaxtëjjk'ëëy,

²³ kuts tëj jya'anëtë nits myatya'aktë jäts kä'ä tëj Jesús nyikkëjjx t'okpaajtjäänyëtë, jäts tëj mëët t'ijxtë nimäjtsk Yës Teety tyumpë mati' jäm tsapjotm, jä'äts tëj nyee'mxyëtë nits jüky jä' Jesús.

²⁴ Tëts nitu'ukën ëëts nmuku'uk t'as'ijxtë maj jäjp Jesús nyaxtëjjk'ëëy, naa'mts jä' tëj tpaat'të naa'xkë'n to'oxytyëjjk wya'antë, kä'ämts tëj Jesús nyikkëjjx t'okpaajtjäänyëtë.

²⁵ Nits Jesús nyëë'mxëtë: —Kä' miits winjaa'w'ëë'ny xmëëtë, nits kä'ä jä' xtsojjktëyjyawëtë ntsoj wyantë yëk'ayuujknajxpëttëjjk:

²⁶ —¿Kä'ämts miits xnijawë nits naa'm jä' jyeexyë jawyiin y'ayoy Yës Teety y'uu'nk nitnë'mts kyuttujjkë'n tsyoo'nta'akt jäm tsapjotm?

²⁷ Nits Jesús wyankëjjxëtë ntsoj jäjp jaypyety myiny Yës Teety y'aaw y'ayuujk, maj kë'm yëknikkäjpxy yëknimatya'aky, jäjp tpatsoo'ntaajky majjäjp Moisés jyaay nits tpaja'ajty majjäjp yëk'ayuujknajxpëttëjjk jyaytyë.

²⁸ Kuts jya'atë jä' kajjp maj y'ijjty nyëjkxtë, nits Jesús nyëë'mxëtë jäts jaktuyo'oywyamp.

²⁹ Nits mëjk tnëëjmjäätyë: —Mëët'tank ëëts yaayë, tëj tsyuu'w'eenyë kootsëwyanë'p it. Nits Jesús tkupëjjky jäts tya'nt.

³⁰ Kuts y'ijjty y'a'uxëwya'antë nits Jesús tkoony tsapkääky jäts tkunuu'kxtaajky, nits tyëkniwaajt'ëëy.

³¹ Nitnë'mts pyattuu'yo'ypyëttëjjk y'ijxkajjpë, jätyë'ts Jesús pyojjtakkooy.

³² Nits jyo'knawyaa'nyëtë: —¿Jakëjx nää'në të'y'ity njaa'w'ëëyë'n n'am njotm naa'xk jëën jyajjy ku të'y'ity tu'ktuu'aajy tmatya'aky ntsoj jäjp jaypyety myiny Yës Teety y'aaw y'ayuujk?

³³ Nits jätyë wyimpijt'të Jerusalén, jämts tpat'të wä'nnimajktu'uk Jesús y'ixpëjkpëttëjjk tu'kmukkë, mëët myuku'uktëjjk.

³⁴ Jä'äts nëë'mxëtë: —Tëyë'm jä', tëë'm Jesús jyükypyeky, tëj Simón tmëëtnawyaatyë.

³⁵ Nits janimäjtsk myatyaktë ntsoj tëj jyat'të tuu'aajy ku tëj y'ijjty nyëjkxtë Emaús, jäts ntsoj tëj Jesús t'ijxkaptë ku tëj tsapkääky ttujkwä'kxy.

Jesús nyakkyä'äjxjë'ëkyë maj jäjp y'ixpëjkpëttëjjk

³⁶ Niyam jä' y'ijjty najj myatya'aktë ku Jesús nyakkyä'äjxjë'ëjkë jäjp, nits nyëë'mxëtë: —Wä'n jotkujjk'ajjt mtanaxkita'akyëtë.

³⁷ Nits nitukkë'yë mëjk tsyë'ëjk'eetyë, jä'ku najj jä' wyinmaytyë jäts pajaa'y y'ijxtë'p.

³⁸ Nits Jesús nyëë'mxëtë: —¿Tikku mtsë'ëkëtë? ¿Tikëjx jätyë xkattëyjyawëtë?

³⁹ Aa'xtuktë ëjts nkë', nteky, ëjts yaj kë'm. Tontë'k ijxtë'k ëjts: kä'ä pajaa'y nyikkëjjxmëëtë naa'xkë'n ëjts miits yaj x'ijxtë.

⁴⁰ Ku najj nyëë'mxëtë nits tyok'ijxëtë kyë' tyeky.

⁴¹ Jotkujjk jäts attëy'ajat tyantë ku t'ijxtë oyë'm kä'änë'm y'ijjty yëkxon tjattëyjyawëtë, jakëjxts Jesús nyëë'mxëtë: —¿Jäj xmëëtëtë tij nkaa'yë'm njëë'kxë'm?.

⁴² Nits tmoytyë wäänë ajkxtsa'ay.

⁴³ Jäts Jesús tkontsooy jäts tsu'ujtsy jääyë wyinkujjkytyë.

⁴⁴ Nits nyëë'mxëtë: —Mati' tëj x'ijxtë x'aa'xtuktë ntsoj ëjts tëj njäty nkopety, jä' yë' mati' ëjts nnikkajpx ku ëjts miits najyäj y'ijjty nmëëtwittity: Jä'ku kuwanë'm jä' jyeexyë kyuytyünyë naa'xkë'n Salmos yä'äny, mëët mati' Moisés jyaay jäts mati' jyaytyë yëk'ayuujknajxpëttëjjk.

⁴⁵ Najjts ojts tyawinjaw'ätyëtë Yës Teety y'aaw y'ayuujk,

⁴⁶ Jäts nyëë'mxëtë: —Jaypyety myiny nits naa'm jä' y'ookt Yës Teety y'uu'nk, nits kyutuwëëk xëëw jatu'kyaajjë jyükypyëkt.

⁴⁷ Jäts jä' këjxm jaa'y yyëkka'ama'yty, nits Yës Teety t'awimpittëtë't jäts myää'kxtujjkxëtë't tyakkoo'ny, Jerusalén jä' tpatsoo'nta'aktë't.

⁴⁸ Miits yë' mpaajtëtë'p xkajpxtë't xmatya'aktë't ya'at aaw ayuujk.

⁴⁹ Ntanikkäxp ëjts miits mati' ëjts nteety wyampäjjt. A'ijxtë yaayë Jerusalén kunë'm Yës Teety myajaaw mtanaxkita'akëtë't.

Jesús nyëjkxnë tsapjotm

⁵⁰ Nits Jesús pyawaajjëtë jäts myëët'ajjtëtë Betania, jämts Jesús atsowkë' xyajjë'ëjky jäts kyunuu'kxëtë.

⁵¹ Yam jä' y'ijjty kyunüü'kxyëtë nits nyikkääjkëtë jäts pyattëjjk'eenyë tsapjotm.

⁵² Nits ixpëjkpëttëjjk ttaxontaktë Jesús najjts twintsë'ëjk'eetyë, jäts oy jotkujjk wyimpijtnëtë Jerusalén.

⁵³ Najjts y'ijjty jawom jawom Yës Teety ttaxonta'aktë jäjp tsaptijkypy.