Lucas 23 - Ntsoj Lucas tmatya'aky Jesús jyüky'ajjt

Jesús Pilato wyinkujkm

¹ Nits Jesús tmutsoo'ntë jäts tmunëjkxtë maj jäm Pilato yëkkuttüky.

² Jä'äts myupaktsootë jäts tnëëjmjäätyë: —Tëj ëëts ya'at jaa'y nkuppaatë naajx kajjp t'amayë t'akkajpxë. Nëm yë' jaa'y tnëëjmë jäts kä'ä jyeexyë yëkkuttujkpë César yyëkmuyäky, nits mëët wintsën nyatyijyë jä'ku nëm yë' yä'äny jäts Yës Teety yë' uu'nk'ajjtë'p.

³ Nits Pilato tyëktëëy Jesús: —¿Mijts Judíostëjjk mniwintsën'eepy? —Jäts Jesús y'atsooy: Mijts kë'm najj mwamp.

⁴ Nits Pilato tnëëjmjaay teety nyiwintsëntëjjk mëët nitukkë'yë jaa'y: —Kä' ëjts ya'at jaa'y pyöky npaajtë.

⁵ Nits jä' teety nyiwintsëntëjjk jawäänë mëjk tnëm'atëëjtsjäätyë Pilato: —Tëj yë' nitukkë'yë jaa'y t'amaa'yëkyexy, Galilea tpatsoo'ntaajky, jäts ninyajj mëët y'atë'ëtsy yaj Judea.

Jesús Herodes wyinkujkm

⁶ Ku Pilato najj tmatooy, nits tyëktëëy, pën Galileatjaa'y jä'.

⁷ Kuts tnijaa'w'ëëy nits jäm jä' y'ijjty tsyoony, jakëjxts ttanikkejjxy Herodes jä'ku jä' y'ijjty yëkkutujkp jäm Galilea, jäts Herodes jäm jä' y'ijjty mëët Jerusalén xyëëwë.

⁸ Kuts Herodes twinku'ijx'ajjty Jesús, jotkujjknäxy jä' nyajyaa'w'ajjtë, jä'ku jekynyë'eewyë jä' y'ijjty tja'ijxëwya'any, tëj y'ijjty tmatoy ntsoj Jesús yyëknikkäjpxy yyëknimatya'aky, jäts mëët y'ijjty tja'ijxwa'any Jesús mëjj'ajjt ttu'nt.

⁹ Jäts Herodes tyëktëëy tukkë'yë tijjäty y'ijjty jyanijawëwyämpy, kä'äts Jesús y'atsoowimpijjtë.

¹⁰ Jäjpts y'ijjty mëët teety nyiwintsëntëjjk, yëk'ixpëjkpëttëjjk, jäts pënjäty y'ijjty Jesús tniwampäjt'të'p.

¹¹ Nits Herodes mëët tsyip'attänääpyëttëjjk ka'ijxyë'm Jesús ttuntë, tnixiktë ttaxiktë jäts wit ttokpëmtë mati' yëkkuttujkpëttëjjk pyëmtë'p. Nits jatu'kyaajjë ttanikkejjxy Pilato.

¹² Jä' xëëw nyamyu'oy'ajjtëtë, jä'ku tsip jä' y'ijjty y'it'të.

Ku nyikuttukkë jäts Jesús y'ookt

¹³ Nits Pilato twaamujjky teety nyiwintsëntëjjk, kuttunktëjjk, mëët nitukkë'yë kajjp,

¹⁴ jäts tnëëjmjaay: —Miits ya'at jaa'y tëj xyëkmintë jäts mwa'antë nits yë' nitukkë'yë kajjp t'amaa'yëkyëjxp, tëts ëjts yë' yëkxon njayëktëy miits mwinkujjky, nittij pöky ëjts yë' nkappaajtë naa'xk miits mwa'antë.

¹⁵ Ninyajj Herodes kä'ä tëj tpökypyaaty, jakëjxts tëj tkäjxwimpity. Miits m'ijxtë'p jäts kä'ä ya'at jaa'y tij pyöky, tij kyu'ookë'p.

¹⁶ Jä'yë ëjts yë' tsätsymyëjk n'ayoo'nmo'ot nits ëjts yë' nmajtstu'utt.

¹⁷ Jä'ku jä' xëëw'it y'ijjty tu'uk pujxtëjkjaa'y tyëkpitsëmtë.

¹⁸ Nits nitukkë'yë jaa'y kyajpxkäktë jäts wyantë: —¡Yëk'ook yë'! ¡Barrabás myëkpitsë'mp!

¹⁹ Jä' y'ijjty Barrabás kyuppujxtëjktsënääpy ku yëkkuttujkpë tmutakkooy nits tëj y'ijjty mëët yyëkjaa'y'ooky.

²⁰ Jäts Pilato jatu'kyaajjë jaa'y tjanëëjmjaay nits jyeexyë Jesús tmajtstu'uty;

²¹ jäts jä' jaa'y jawäänë mëjk kyajpxkäktë: —¡Yëkkruspät, Yëkkruspät!

²² Mutuwëëkyaajjë Pilato jaa'y tjanëëjmjaay: —¿Tij ka'oy yë' tëj tüny? ¿Tij kyowätp? Kä'ä ëjts tyakkoo'ny npaajtë. Jä'yë ëjts yë' tsätsymyëjk n'ayoo'nmo'ot nits ëjts yë' nmajtstu'utt.

²³ Jäts jaa'y tsätsymyëjk kyajpxkäktë, kuwanë jä' y'ijjty ttsoktë nits Jesús kyruspätt.

²⁴ Jakëjxts kuwanë Pilato ttuuny naa'xkë'n jä' jaä'y y'ijjty ttsoktë.

²⁵ Nits Pilato tyëkpitsëëmy yëkjaa'y'oo'kpë mati' jäjp y'ijjty pujxtijkypy, jäts Jesús tkë'mooy jaa'y nits ttu'ntë't ntsoj kë'm ttsoktë.

Jesús kryuspety

²⁶ Ku y'ijjty tmunëjkxtë Jesús jäts tyëkkruspät'të't, jäm tuu'am tpat'të tu'uk Cirene'tjaa'y mati' y'ijjty kyamjötypy as'ojtsp, jä'äts tya'akkuwaa'n'eetyë jäts Jesús kryus tpakkëëjyë't nits ix'oojk tpayo'oty.

²⁷ Nimaynyäxy y'ijjty jaa'y tpanëjkxtë Jesús jäts mëët nimay to'oxytyëjjk y'ijjty jyë'ëytyë ya'axtë ix'oojk.

²⁸ Nits Jesús nyi'ijxwimpijjtëtë jäts nyëë'mxëtë: —Jerusalénkë't to'oxytyëjjk katij ëjts xniya'axtë, nanyiya'axëtë miits kë'm jäts niya'axtë mëët m'uu'nktëjjk.

²⁹ Jä'ku pyaatp jä' xëëw maj nijkxy wya'antë: Jotkujjk jä' to'oxytyëjjk pën y'uu'nk ka'ijtp, jäts pën kayëk'uu'nkyää'ktë.

³⁰ Jäts nijkxy jaa'y kojpk tjo'knëëjmjäänyëtë: Takitaapäjtk ëëts, mëët tun tjo'knëëjmjäänyëtë't: Yu'tsk ëëts.

³¹ Pën najjts ttuntë tsujxkkepy ¿ntsots yë' të'ëtskepy tkatu'ntë't?

³² Mëëtts jä' y'ijjty nimäjtsk yëkjaa'y'oo'kpë tpawitstë, jäts tyëkkruspätwa'antë mëët Jesús.

³³ Ku jya'atë maj it tkuxëëwëtë: «Oo'kpë kupajjk» Jämts Jesús tyëkkruspäjt'të mëët janimäjtsk yëkjaa'y'oo'kpë tu'uk akaa'ny jatu'uk anajjy.

³⁴ Nits Jesús wyaany: «TEETY mää'kxtujjkë yë' jaa'y tyakkoo'ny, kä'ä yë' tnijawëtë tij tyuntë'p.» Nits tsip'attänääpyëttëjjk myokpajkwëjjtë najjts tnijawëtë't pën Jesús wyit tmuttaajnë'p,

³⁵ jämts y'ijjty nimay jaa'y t'aa'xtuktë, jäts kuttunktëjjk paat y'ijjty tnixi'iktë ttaxi'iktë Jesús jäts wya'antë: —Tëj wyiijnkpë tyëknitso'oky, wä'nts yë' yi'it kë'm tnaknyitso'okyë naa'mtamts yë' Yës Teety y'uu'nk'ätyë.

³⁶ Mëët y'ijjty tsip'attänääpyëttëjjk tnixi'iktë ttaxi'iktë, jäts y'ijjty ttok'uukwa'antë ta'amnëëj.

³⁷ Nits tnëëjmjäätyë: —Pën mijtsë'mtam Yës Teety m'uu'nk'ajjtë'p judíostëjjk wyintsën, winak jäm kë'm.

³⁸ Nits tmëjwojpäjt'të tu'uk pu'uy maj y'ijjty tëj tkëjxja'aytyë: «YA'AT JÄ' JUDIOSTËJJK KYUTTUJKPË'EEPY.»

³⁹ Nits tu'uk yëkjaa'y'oo'kpë mati' jäm y'ijjty tëj yyëkkuttëy, tka'oymyukkajpx'axajjy Jesús: —¡Pën mijtsë'mtam Yës Teety m'uu'nk'ajjtë'p, winak jäm, jäts ëëts mëët xyëkwinakt!

⁴⁰ Nits myuku'uk nyëë'mxë: —¿Ninaj Yës Teety xkatsë'ëkë oyë'm najj mja'ayoy?

⁴¹ Npökyë'm ëëtë'm nkopejjtyë'm xpaajt'ëe'yë'm najj n'ayoo'jë'n, kuts yë' yaa'ytyëjjk kä'ä yë' tij tyakkoo'ny.

⁴² Nits tnëëjmjaay Jesús: —Wintsën, jaa'myäjtsk ëjts ku myëkkuttujk'axajjt.

⁴³ Jäts Jesús y'atsoojjë: —Tëy ëjts mijts nwaajnë, ixyamyë yi'it njaa'më'n tsapjötypy.

Ku Jesús y'ooky

⁴⁴ Jä' xëëw majkmäjtskyaxp it kyoots'ëëy, tuwëëk yaxpnë'm ojts jatu'kyaajjë xyëëjnyë.

⁴⁵ Ojts xëëw pyi'itsy, jäts wit tyakkëë'jts'ëëy këëjkujjk mati' y'ijjty attëytyuk yyëktuntë'p jäjp tsaptijkypy.

⁴⁶ Nits Jesús tsätsymyëjk kyajpxkeejky: —¡Teety, mkë'jë'm ëjts njaa'wë'n nkexy! Kuts najj wyaany nits y'oo'knë.

⁴⁷ Ku tsip'attänääpyë niwintsën t'ijxy ntsojjäty tukkë'yë jyajjty, nits Yës Teety t'ijxkajjpy jäts wyaany: —Tëyë'mtam jä', kä'ämtamtsee'my yë' jaa'y tij pyöky.

⁴⁸ Jäts nitukkë'yë jaa'y nii'xyë'n jäm y'ijjty tëj t'ijxtë tij tëj tyünyë, tsätsywyinmaypy wyimpijtkëjxnëtë tyëjkëntüjpy, jäts nyakyak'akköxyëtë jä'ku tuntakoypy nyajyaa'w'ajjtëtë.

⁴⁹ Nits jaa'y pënjäty Jesús myëëtnamyaajyë'p jakkäm jä' y'ijjty y'ijxtë y'aa'xtuktë mëët to'oxytyëjjktë pënjäty Galilea patsoo'jnë.

Ku Jesús nyaxpaaty

⁵⁰ Jämts y'ijjty tu'uk Arimatea'tjaa'y mati' txëëw José, tu'uk kajjp mati' tamp Judea't'itjotm, wa'ats tëy jä' y'ijjty jyaa'yë jyükyë jäts jäjp y'ijjty mëët yëkkuttüky maj jäjp Judíostëjjk tyëknikuttukkëtë tukkë'yë

⁵¹ Kä'ä jä' tjatsojjky nits jyeexyë Jesús tyëk'ooktë, jä' y'ijjty tjatsojkp nits Yës Teety kyuttujjk tyunë't ya'at it naxwiin.

⁵² Jä'äts ojts Pilato t'amatoy Jesús nyikkëjjx nits tyëknaxtëkkë't.

⁵³ Kuts tyëkwinajjky Jesús nyikkëjjx kruskëjxm nits ttawimpijjty tsätsy'oywyit jäts ojts tpemy tsajjutjötypy maj nippën oo'kpë y'ijjty kyayëkpemnyë'm.

⁵⁴ Jä' xëëw jä' y'ijjty maj jaa'y tukkë'yë tyëkni'oyëkyëxtë nits poo'kxë'nxëëw t'a'ijxtë't.

⁵⁵ Jäts to'oxytyëjjk pënjäty tpatsoo'ntë Jesús jäm Galilea, ojts t'ijxtë maj jäjp Jesús yëkpëëmy.

⁵⁶ Kuts wyimpijtnëtë tyëjkëntüjpy nits tyëk'oy'eetyë pa'akxuu'kpënëëj. Nits pyoo'kxtë poo'kxë'nxëëw'it naa'xkë'n Moisés pyawaa'n yä'äny.