Lucas 22 - Ntsoj Lucas tmatya'aky Jesús jyüky'ajjt

Ku tkäjpxy'eetyë ntsoj y'ijxë Jesús tmatstë't

¹ Winkonnë'p y'ijjty pascuaxëëw ku jaa'y tkaytyë pejytsyapkääky,

² Jäts Teety nyiwintsën mëët yëk'ixpëjkpëttëjjk jä' y'ijjty wyinmaytyë'p ntsoj y'ijxë Jesús amää'tsk tyëk'ooktë't, jä'ku jaa'y jä' y'ijjty tsyë'ëjk'eetyë'p pënjäty Jesús tpawittijt'të'p.

³ Nits tu'uk Jesús y'ixpëjkpë mati' txëëw Judas Iscariote mëjjku'ujy tyattëjjk'ajjtë.

⁴ Jä'äts ojts t'ijxy teety nyiwintsën mëët tsaptëjjkniwintsën, nits ttamëëtkäjpxy'ëëy ntsoj y'ijxë Jesús tkë'yakt.

⁵ Jä'äts niwintsëntëjjk y'oyjyaa'w'eetyë, jakëjxts meeny ttawinwaa'n'eetyë Judas.

⁶ Kyuppëjjk jä' najj, jä' xëëw tpatsoo'ntaajky, t'ijxy t'aa'xtüky junnë jaa'y kyappën'ity nits Jesús tkë'yakt.

Jatu'kyaajjë jä'yë Jesús tmëët'a'uxë y'ixpëjkpëttëjjk

⁷ Ku xëëw tpaajty maj jä' tkaytyë pejytsyapkääky, jäts ku mëët worrekë tyëk'ooktë mati' pascuaxëëw tya'a'ux'eetyë'p.

⁸ Nits Jesús tnëëjmjaay Pedro mëët Juan: —Nëjkx xyëk'oyëtë a'ux, jäts n'a'ux'ëë'yë'n ya'at xëëw'it.

⁹ Nits jä' tyëktëëtë: —¿Ma'it xtsöky ëëts nijkxy a'ux nyëk'oyë?

¹⁰ Jäts Jesús y'atsoowimpijjty: —Ku miits mkajjptëkkëtë't, jäjp yi'it tu'uk yaa'ytyëjjk xpaat'të't mati' tsiiyjötypy nëëj tpatsëmp. Jä'äts mpanëjkxtë'p, pënmats jya'aty,

¹¹ jä' kuttëjjkts mnëëjmëtë'p: Nëm Wintsën yä'äny: ¿Maj jä' tëjjk maj ëjts nmëët'a'uxë't n'ixpëjkpëttëjjk ya'at xëëw'it?

¹² Jä'äts mtani'ijx'attëtë'p tyëjjk mati' mumäjtsknippät ni'oyënë nits jäjp jaa'y y'a'uxëtë't. Jäjpts a'ux xyëk'oyëtë't

¹³ Nits Pedro mëët Juan nyëjkxtë, najj jä' tukkë'yë tpatkëjxtë naa'xkë'n Jesús y'ijjty tëj nyee'mxyëtë, jäjpts a'ux tyëk'oy'eetyë.

¹⁴ Ku a'ux'awts tpaajty, nits Jesús mëët y'ixpëjkpëttëjjk tsyëën'y'ixtaktë kaytyaajk'am.

¹⁵ Jäts Jesús wyaany: —¡Mëjknäxy ëjts yë' tëj n'atsöky nits jatu'kyaajjë ëjts miits nmëët'a'uxë't, ku ëjts nayaj njükyë!

¹⁶ Ixyam ëjts nnikkäjpxy nits kä'ä ëjts junnë ya'at n'okxëëwtunë't kunë'm jatu'kyaajjë tu'kmukkë nkaa'yë'n Yës Teety kyuttujktaajk'am.

¹⁷ Jäts Jesús tkoony tu'uk uujk'ëë'ny, kuts tkunuu'kxtak'awaajt'ëëy, nits y'ixpëjkpëttëjjk tnëëjmjaay: —Ixyaj, uuktë këëjwääjnjäty ya'at aatstëëmnëppuutsë.

¹⁸ Ixyam ëjts nnikkäjpxy nits kä'ä ëjts yë' junnë n'ok'uknë't ya'at aatstëëmnëëj, kunë'm Yës Teety kyuttujjkë'n tsyoo'nta'akt ya'at it naxwiin.

¹⁹ Nits tkoony tsapkääky, kuts tkunuu'kxtak'awaajt'ëëy, nits tujkwä'kxy jäts tmooy y'ixpëjkpëttëjjk nits tnëëjmjaay: —Ya'at ëjts nnikkëjjx'eepy, mati' miits mku'ookëwyaajnëtë'p, ttuntë ya'at najj, najjts ëjts xjaa'myätstë't.

²⁰ Kuts y'a'uxë y'awaajt'eetyë nits tkoony jatu'kyaajjë uujk'ëë'ny, jäts wyaany: —Ëjts ya'at nnë'ëjpy mati' tsunwamp ta'kxwamp miits këjxm, yë' këjxmts miits jatu'kyaajjë Yës Teety xmëëtnamyu'oy'attëtë't.

²¹ Nijawëtë'ts ixyam, jäts jäjjä' yaj jaa'y nmëëtkaa'yë'n nmëët'uujkyë'n pën ëjts xkë'yakwamp.

²² Naa'm jä' nyikuttuk'ätyë jyatt yaa'ytyëjjk y'uu'nk, yëk'ayoopë'ts jä' jaa'y jyatt mati' kë'yakkë'p.

²³ Jäts y'ixpëjkpëttëjjk nyayëktëë'axajjëtë tu'uk janitu'uk, tnijawëwya'antë pën jä' Jesús tkë'yakwamp.

¿Pënts nimëj ta'mp?

²⁴ Nits Jesús y'ixpëjkpëttëjjk nyayëktëë'axajjëtë pën nimëjj ta'mp ku Jesús y'ookt.

²⁵ Jäts Jesús nyëë'mxëtë: Ya'at naxwiinë'tjaa'y yëkkuttujktë'p yë' naa'xkë'n ttsoktë, oy jä' t'oytyu'nt ok tka'oytyu'nt kyajjp, nimëjj jä' nyajyaw'ätyëtë.

²⁶ Kä'äts miits najj m'atë'ëtstë't. Pën tnimëjj'eepy wä'n nimutsk tnapyemyë, pënts pawamp wä'n nitukkë'yë tmuttüny.

²⁷ ¿Pën yëkmëjj'ijxp? ¿Jä' mati' a'ijxp kaytyaajk'am ok mati' kääky tojkx tyëknajxp? Nitukkë'yë ëëtë'm nnijaa'w'ajjtyë'n nits jä' yëkmëjj'ijxp mati' kaytyaajk'am a'ijxp, kä'äts ëjts njä'jë mati' kaytyaajk'am a'ijxp, najj ëjts miits yaj nmëëtë naa'xkë'n mati' kääky tojkx tyëknajxp.

²⁸ Ijtp miits tëj mjää'jë ku ëjts atsijjpë'n tu'uk jatu'uk ntanäxy.

²⁹ Jakëjxts ëjts miits nmo'oy kuttujjkë'n, mati' ëjts nteety xmooy,

³⁰ najjts miits mka'ytyë't m'uuktë't ëjts nkaytyaajk'am jäts mtsëënëtë't maj ëjts nyëkkuttüky, nits xtëytyu'ntë't wä'nnimajkmäjtsk Israel y'uu'nk mëët mëët kyajjp.

Jesús tnikkäjpxy ku Pedro y'ëënwa'any

³¹ Nits Jesús wyaany: —Simón, Simón, tëj mëjjku'ujy m'amatoyëtë jäts myëkpökytyunëtë't.

³² Tëts ëjts mijts nkunuu'kxta'aky nits katij mtëyjyaa'w'ajjtë'n tyakkoy. Kuts ëjts xniwimpitt, kajpxjotmëjjë mmuku'uktëjjk jäts tu'ukyë ëjts xtëyjyawëtë't.

³³ Nits Simón y'atsooy: —Wintsën, nmëëtë'p ëjts mijts pujxtijkypy pën myëkpujxtëjkpëmp, nmëët'ookp ëjts mijts pën myëk'oo'jkë'p jaa'y.

³⁴ Jäts Jesús y'atsoowimpijjtë: —Pedro, ixyam ëjts nnikkäjpxy, kä'änë'm wyä'në tsajpna'aaw y'aya'axy jäts mijts mwa'ant yi'it tuwëëkyaajjë nits kä'ä ëjts x'ijxë.

Ku Jesús y'ixpëjkpëttëjjk kyawinjaw'ätyë

³⁵ Nits Jesús tyëktëëy y'ixpëjkpëttëjjk: —Ku ëjts miits npakkejjxy, jäts ëjts nwaany nits kä'ä xko'ntë't meeny, xuumy, kë'ëk, ¿tits mka'ijjtxëtë? Jäts y'ixpëjkpëttëjjk y'atsootë: —Kä' ëëts tij xka'ijjtjaay:

³⁶ Nits Jesús nyëë'mxëtë: —Ixyamts ëjts nwa'any, pën meeny tmëët wä'n tyëkminy, mëët xyuumy, pën tsujjx tkamëët wä'n kyukwop ttooky nits tu'uk tju'yty.

³⁷ Jä'ku kuwanë ëjts najj njatt nkopätt naa'xkë'n jaypyety myiny maj jäjp yä'äny: Najj jä' ojts yyëk'ijxy naa'xkë'n ka'oyjyaa'ytyëjjk. Kuytyunë'pts jä' najj.

³⁸ Nits jä' y'atsootë: —Wintsën, jäj ëëts mäjtsk tsujjx nmëëtë. Jäts Jesús t'atsooy: —Kä' ëjts miits xwinjawë, amontë.

Jesús nyuu'kxta'aky Olivos kojpkëjxm

³⁹ Nits Jesús tsyoo'jny jäts nyijkxy Olivos kojpkëjxm naa'xkë'n xëmë tüny, mëët y'ixpëjkpëttëjjk pyanëjkxë.

⁴⁰ Ku jäm jya'atë nits tnëëjmjaay y'ixpëjkpëttëjjk: —Nuu'kxta'aktë, jäts katij kya'oywyë mmumata'akyëtë.

⁴¹ Nits Jesús tu'knas'ijxë'n jyakkämkeejky jämts nyakyujxtänëtyaajkë jäts nyuu'kxtak'axajjy.

⁴² Nits wyaany: «Teety'ajjt tsapjotmë't, ku mijts jyeexyë xtüny nits kä'ä ëjts ya'at ayoo'n ntanaxt; kä'äts xtu'nt naa'xkë'n ëjts ntsöky, wä'n najj tünyë naa'xkë'n mijts xtsöky.»

⁴³ Nits nyimiijnë tu'uk Yës Teety tyumpë mati' jäm tsapjotm, jäts myëjkmo'ojë't.

⁴⁴ Kuts myëjktak'atëëjtsy Jesús y'ayoo'n, nits jawäänë mëjk nyuu'kxtak'axajjy, jäts në'ëjpymyëët y'ijjty pyüjxyky tyä'kxy.

⁴⁵ Ku nyuu'kxtak'awaajt'ëëy nits t'anëjkx'ajjty y'ixpëjkpëttëjjk, tummaap ojts tpaaty, tëj jä' y'ijjty tsätsywyinmaa'ny tanuu'kxkëxtë.

⁴⁶ Nits tnëëjmjaay: —¿Tikku mma'atë? Puttë'ëktë, nuu'kxta'aktë nits katij kya'oywyë mmumata'akyëtë.

Ku Jesús yyëkmätsy

⁴⁷ Kä'änë'm y'ijjty Jesús kyajpxkita'aky ku tu'uk y'ixpëjkpë mati' txëëw Judas tmëëtja'ajty nimay jaa'y. Nits Judas twinkunëjkx'ëëy Jesús jäts ttsüü'kxy,

⁴⁸ Jakëjxts Jesús nyëë'mxë: —Judas, ¿mtsuu'kxptam jawyiin yaa'ytyëjjk y'uu'nk najjts tkë'yakt?

⁴⁹ Ku najj t'ijxtë pënjäty y'ijjty Jesús jäm tmëët nits tyëktëëtë: —Wintsën, ¿wä'n ëëts tsujjx tawintsoy?

⁵⁰ Nits tu'uk Jesús y'ixpëjkpë tkaspoo'jtjaay y'akaa'nytyatsk tu'uk teety nyiwintsën tyumpë:

⁵¹ Jäts Jesús wyaany: —Majtstu'ut'të, katij mtsiptuntë. Nits Jesús tyatsk tyëk'oyëjyaay jä' jaa'y.

⁵² Jäts tnëëjmjaay teety nyiwintsën, tsaptëjk'ijxy'ijtpë mëët nitukkë'yë majaa'ytyëjjk pënjäty y'ijjty matswaajnëtë'p: —¿Tikëjx ëjts miits xnimintë tsujjxtsëm, kepykyap, naa'xkë'n ëjts jyawë nmää'tspëjaa'yë?

⁵³ Jawom jawom ëjts miits tëj nyëk'ixpeky jäjp tsaptijkypy, jäts kä'ä ëjts miits xmajtstë. Ixyamme'mts miits mtuntë, ku yë' tsuuj koots yëkkuttüky.

Ku Pedro yä'äny jäts kä' Jesús t'ijxë

⁵⁴ Najjts Jesús tmajtstë nits teety nyiwintsënëntum tmunëjkxtë. Jäts Pedro ix'oojk tu'knas'ijxë tpanijkxy.

⁵⁵ Kuts jäm jya'atë nits nyëjkxtë xampë tajjykyujkm maj jäm y'ijjty tëj jaa'y jëën tyëkmëjjë, mëët Pedro jäm nyijkxy xampë.

⁵⁶ Nits y'ijxpaajtë tu'uk to'oxytyëjjk mati' jäm y'ijjty tump jä'äts jeky wyin'ijxe nits wyaany: —Mëët yë' jaa'y të'y'ity Jesús tpawittity.

⁵⁷ Nits Pedro y'atsooy: —To'oxytyëjjk, kä'ä ëjts jä' n'ijxë puppën mijts mtijjpy.

⁵⁸ Jawäänë y'ijjty nits jatu'uk jaa'y wyaany: —Mijts të'y'ity mëët Jesús mpawittijtypy. Nits Pedro y'atsooy: Puppën mijts mtijjpy kä'ä ëjts junnë Jesús mpawittity.

⁵⁹ Jawäänë it nyajjxy nits jatu'uk jaa'y tëytu'mts wyaany: —Jäjp yë' të'y'ity tmëëtë Jesús, Galileatjaa'y yë'ëmë ninyajj.

⁶⁰ Nits Pedro y'atsooy: —Yaa'ytyëjjk, kä'ä ëjts nijawë puttij mijts mkäjpxypy. Kä'änë'mts y'ijjty Pedro kyajpxkita'aky ku tu'uk tsajpna'aaw y'ayaajxy.

⁶¹ Nits Jesús nyi'ijxwimpijjtë, jäts Pedro tjaa'myejjtsy ku Jesús y'ijjty tëj nyëë'mxë: Tëj wyä'në tuwëëkyaajjë m'ëëny ku tsajpna'aaw y'aya'axt yi'it.

⁶² Nits Pedro pyitsëëmy tëjkwimpy jäts yëk'ayoopë ojts yya'axy.

Jesús yyëknixi'iky yyëktaxi'iky

⁶³ Jäts jaa'y mati' jäjp Jesús t'ijxy'ijt'të'p jä'äts y'ijjty tnixiktë'p ttaxiktë'p, twojptë'p tkojxtë'p.

⁶⁴ Twintsumkëxtë nits tyëktëwtë: —Nikkajpx pën tëj mköxyë:

⁶⁵ Jäts ntsokkanëëjmjääky y'ijjty t'ijxtë.

Ku Jesús yyëkmunijkxy maj nimay jaa'y y'ijjty tëj yo'ymyüky

⁶⁶ Ku it xyëëjny'ëëy nits yo'ymyujktë majaa'ytyëjjk, teety nyiwintsëntëjjk mëët yëk'ixpëjkpëttëjjk, jäts Jesús tmunëjkxtë maj jäjp y'ijjty tëj jaa'y yo'ymyuktë nits tnëëjmjäätyë:

⁶⁷ Nikkajpx, ¿mijts jä' Yës Teety m'uu'nk'ajjtë'p? Jäts Jesús y'atsooy: —Ku ëjts nwa'ant nits ëjts jä', kä'ä ëjts miits yi'it xtëyjyawëtë't.

⁶⁸ Kuts ëjts miits yi'it njayëktë'ët, kä'äts miits yi'it m'atsoowimpitt.

⁶⁹ Tëts jä' xëëw tpaaty ku yaa'ytyëjjk y'uu'nk tsyëënëwya'any Yës Teety pyaa'am.

⁷⁰ Nits nitukkë'yë jaa'y Jesús tyëktëëtë: —¿Mijtsë'm Yës Teety m'uu'nk'ajjtë'p? Nits Jesús y'atsoojjëtë: —Miits kë'm najj mwantë'p.

⁷¹ Nits jä' jaa'y nyawyaajnëtë: —Tikku ntsojk'atëëjtsyë'n pën tjaknikkajpxpätp, tëj nmatoo'yë'n ku kë'm tëj najj yä'äny.