Lucas 20 - Ntsoj Lucas tmatya'aky Jesús jyüky'ajjt

Kuttujjk mati' Jesús yëktümpy

¹ Ku Jesús y'ijjty jaa'y tyëk'ixpeky jäjp tsaptijkypy nits mëët twaajnë nam matya'aky, jäjpts jya'atë teety nyiwintsëntëjjk, pawaa'n yëk'ixpëjkpëttëjjk mëët majaa'ytyëjjk.

² Nits Jesús tnëëjmjäätyë: —¿Pën kyuttujjk myëktuujnjääpy nits yë' xtu'nt? ¿Pën mmoojyë'p yë' kuttujjk?

³ Nits Jesús y'atsooy: —Ninyajj ëjts miits mëët nyëktëwa'any. Atsoowimpijttë'k ëjts:

⁴ ¿Pën Juan pakkäjjxë nits yyëknëpätt? ¿Yës Teety ok naxwiinë'tjaa'y?

⁵ Nits nyawyan'axajjëtë tu'uk janitu'uk: Ku yë' nnëëjmjaa'yë'n jäts Yës Teety jä' pakkäjjxë, Tikëjxts xkattëyjyaa'w'eetyë nëmts yë' wya'ant yi'it.

⁶ Kuts nnëëjmjaa'yë'n nits jaa'y jä' pakkäjjxë, jaa'yts yi'it xnaska'ajtsë'm, jä'ku najj jä' y'ijjty Juan t'ijxëtë jäts Yës Teety jä' yëk'ayuujknajxpë.

⁷ Nits tnëëjmjäätyë jäts kä'ä tnijawëtë pën Juan pakkäjjxë jäts yyëknëpätt.

⁸ Nits Jesús y'atsooy: —Kä'äts ëjts mëët nnikkajpxt pën ëjts kyuttujjk nyëktuujnjääpy.

Ka'oyjyaa'y tumpëttëjjk y'ijxpäjjt

⁹ Nits Jesús ya'at ijxpäjjt tmatyak'axajjy: —Tu'uk jaa'y kyam tyëkni'oy'ëëy nits tniijpy aa'tspë'ujjts mati' txëëw uvë, jäts t'anüü'kxymyooy kamtumpëttëjjk nits tsyoo'jny jäts jakkäm nyijkxy.

¹⁰ Kuts jä' aatstëëm tsyaamy, nits tu'uk tyumpë tpakkejjxy jäts nijkxy t'amatoy nii'xyë'n jä' kukkam jyä' pyaatyë; jäts jä' kamtumpëttëjjktë kä' jä' tij tmoytyë, oo'ktëy jä' twojptë tkojxtë jäts najjyë tkäjxwimpijtnëtë.

¹¹ Nits kukkam jatu'uk tyumpë tpakkejjxy; ninyajjts jä' tkawintsë'ëjk'eetyë, twojptë tkojxtë nits janajjyë tkäjxwimpijtnëtë.

¹² Nits jatu'uk tyumpë tpakkäjxkojmë, ninyajj jä' ttuntë tyëktsäätsyëkyëjxtë, nits janajjyë tkäjxwimpijtnëtë.

¹³ Oojknë'm ojts kukkam wyinmay ¿tits ëjts ntu'mp? N'uu'nk ëjts npakkäxp jak'yë' wi'n wyintsë'ëkëtë'p.

¹⁴ Kuts jä' kamtumpëttëjjk t'ijxpat'të, nits nyawyaajnëtë tu'uk janitu'uk: Yë' jä' tmuttankëxwamp tukkë'yë mati' tyeety jyä'eepy; wä'n tyëk'oo'jkyë'n, najjts ëëtë'm tukkë'yë naajx kam nmuttankëjjxë'n.

¹⁵ Nits tmajtstë, twijtspitsëmtë kyamjotm jäts tyëk'oo'ktë ¿Ntsots miits mwinmaytyë ntsoj jä' kukkam tyunëtë't?

¹⁶ Kë'mts jä' kukkam nyëjkxt nits tyëk'oo'këxt jä' kamtumpëttëjjk, jäts wiijnk jaa'y kyam tmo'ott. Ku najj tmatootë teety nyiwintsëntëjjk mëët pawaa'n yëk'ixpëjkpëttëjjk, nits wyantë: —¡Nijunë najj kyajatt!

¹⁷ Nits Jesús twin'ijxy nitukkë'yë jaa'y, jäts wyaany: —¿Tits jä' tyijjpy Yës Teety y'aaw y'ayuujk ku yä'äny?: Tsaaj mati' pojtspëttëjjk tëj tkamëjj'ijxtë jä'äts tsakkojpk tëj tyäny.

¹⁸ Pënpën naxkitakp jä' tsakkëjjxy wojpwa'kxkëxp jä' tukkë'yë; ok pënpën jä' tsaaj päjjtë'p nax'ookyë'n jä' tya'nt.

¹⁹ Nits teety nyiwintsëntëjjk mëët pawaa'n yëk'ixpëjkpëttëjjk jätyë tjamatswantë Jesús, ku twinjaa'w'eetyë nits jä' yëkwinkajpxtë'p. Jaa'yts jä' tsyë'ëjk'eetyë pënjäty jäjp y'ijjty.

Ku jaa'y tyëktëëtë Jesús, pën oy tmuyaktë't yëkkuttujkpë mati' Roma

²⁰ Nits tpakkäjxtë ni'ey jaa'y mati' oyjyaa'y natyijjëtë'p, jäts t'ijxtë't ttu'ntë't junnë Jesús kyajpxtakko'yty, najjts tmatstë't nits yëkkuttujkpë tkëmo'otë't.

²¹ Jä' jaa'yts tnëëjmjäätyë Jesús: —Wintsën, nnijaa'w'eepy ëëts nits tyëëywyë mijts mnikkäjpxypy, kä'ä mijts xtüny ntsoj jaa'y tjatsoktë. Tu'ukyë mijts Yës Teety nyëë' tyuu' jaa'y xtawinjawë.

²² ¿Oy ëëts nmuyakt yëkkuttujkpë mati' jäm Roma ok kä'ä?

²³ Jäts Jesús tkumaay ntsoj jä' y'ijjty wyinmaytyë, nits tnëëjmjaay:

²⁴ Tok'ijxtë'k ëjts tu'uk pujjxmeeny. ¿Pën jäm xyëëw jaypyety mimp? ¿Pënts wyiin y'aaw jäm kä'äjxjë'ëkp? Nits jä' jaa'y y'atsootë: —Yëkkuttujkpë César yë' jyä'.

²⁵ Jäts Jesús nyëë'mxëtë: —Mmo'otë jä' César mati' César jyä'eepy, nits Yës Teety mati' Yës Teety jyä'eepy.

²⁶ Najjts nittij takkoo'ny tkappaajtjäätyë nits jyeexyë tmatstë, najjyë attëy'ajat tyantë jä'yë y'amonkëjxtë ku najj yyëk'atsootë.

Jaa'y tyëktëwtë jükypyëjjkë'n

²⁷ Nits ojts ni'ey saduceostëjjk Jesús t'ijxtë. Jä' jaa'y mati' tkattëyjyaa'w'eetyë'p ku oo'kpë jyükypyëkwa'antë; jakëjxts ojts tyëktëwtë Jesús:

²⁸ —Wintsën, najj Moisés jaypyety tyëktaany, ku tu'uk amäjtsk jaa'y tyo'oxytyëjjk tku'ookt jäts kä'änë'm wyä'në pën y'uu'nk, y'ütsyts jä' tmëët'amäjtskë'p jä' to'oxytyëjjk, pën niwinaakts uu'nk tmëëtëtë y'ajjtsyts jä' t'uu'nktijjp.

²⁹ Pën najjts jä', jää'ëëy niwixtujjk jaa'y tu'kmuku'uk nits nyimëjjpë y'amäjtsk'ëëy, jäts y'oo'jky kä'änë'm y'ijjty pën y'uu'nk.

³⁰ Ninyajj jyajjty y'ütsy.

³¹ Jäts myutuwëëk ütsy tmëët'amäjts'ëëy jä' to'oxytyëjjk mëët ninyajj y'oo'jky, kunë'm wä'nniwixtujjk tmëët'amäjtsk'eetyë jä' to'oxytyëjjk, jäts nitukkë'yë y'oo'këjxtë kä'änë'm y'ijjty pën uu'nk tmëëtëtë.

³² Oojknë'm mëët to'oxytyëjjk y'oo'knë.

³³ Kuu'mts jä' oo'kpëttëjjk jyükypyëktë't, ¿pënts tto'oxytyëjjkë'p jä' to'oxytyëjjk, kumwä'n niwijxtujjkts jä' y'ijjty tëj tmëët'amäjtskëtë?

³⁴ Nits Jesús y'atsoojjëtë: —Ya'at it naxwiin jä'yë jaa'y y'amäjtskëtë.

³⁵ Jäts pënjäty Yës Teety tëytyunë'p nits paat'attëtë'p jatu'uk jüky'ajjt ttaxo'ntë't mati' mimp, jäts jyükypyëktë't, tjayaa'ytyëjjkë ok tjatto'oxytyëjjkë kä'äts jä' y'ok'amäjtsk'eenyëtë't.

³⁶ Jä'ku kä'ä jä' oo'jkë'n t'okwinkëjxm'eenyëtë't. Najj jä' wyimpit'të't naa'xkë'n Yës Teety tyumpëttëjjk mati' jäm tsapjotm, Yës Teetyts jä' uu'nk'attëtë'p jakëjx ku tëj wyä'në jyükypyëktë.

³⁷ Mëët Moisés xtanijaaw'ëë'yë'n nits jükypyëjktë'p oo'kpëttëjjk, maj jäjp t'ijxy kujjp tyoy, jäts wyaany nits Abraham, Isaac mëët Jacob twintsën'eetyë'p Yës Teety.

³⁸ ¡Kä'äts jä' oo'kpëttëjjk tniwintsënë, jüky'eepyëttëjjk jä' nyiwintsën'eepy, jä'ku Yës Teety tumnijyüky jä' nitukkë'yë t'ijxy!

³⁹ Jäts nitu'ukën pawaa'n yëk'ixpëjkpëttëjjk tnëëjmjäätyë: —Tëyë'm mwa'any, Wintsën.

⁴⁰ Najjts nippën tij tka'okyëktëënëtë.

Pën jä' y'uu'nk Cristo'eepy

⁴¹ Nits Jesús yyëktëëjjëtë: —¿Tikëjx wya'antë nits David jä' nyaskä'äxë Cristo?

⁴² David ojts kë'm yä'äny ku Salmos tjaay: Najj Yës Teety tnëëjmjaay ëjts nwintsën: Tsëënë ëjts npaa'aajy.

⁴³ Kunë'm ëjts mijts mmutsip'eepyëttëjjk nkäjxkëxt mtekyë'ëjy.

⁴⁴ ¿Ntsots y'ijxë Cristo tnaskä'äxë David, ku David kë'm twintsëntijy Cristo?

Jesús tnimatya'aky pawaa'n yëk'ixpëjkpëttëjjk

⁴⁵ Nitukkë'yë jaa'y wyinkujjky Jesús tnëëjmjaay y'ixpëjkpëttëjjk:

⁴⁶ Na'y'ijxy'ittëtë, nits katij mwin'ëënyëtë pawaa'n yëk'ixpëjkpëttëjjk, jakëjx yë' y'oywyit tpëmtë jä'ku nimëjj yë' nyajyaw'ätyëtë, nits ttsoktë wintsë'ëkë yyëkkë'paat'të't maayjyötypy. Tum'oy tsëënpyäjjt yë' tsyojktë'p maj jäjp jaa'y yo'ymyuktë jäts maj jaa'y xyëëwtuntë;

⁴⁷ Jäts ku'ookytyo'oxytyëjjk tpëjjkëtë tukkë'yë myaay pyëjkta'aky, nits katij yyëkkumaytyë ku najj y'atë'ëtstë jekynyäxy nityijyë nyuu'kxta'aktë. Yë'ëts jawäänë mëjk ayoo'npaat'të'p.