Lucas 19 - Ntsoj Lucas tmatya'aky Jesús jyüky'ajjt

Jesús mëët Zaqueo

¹ Ku Jesús nyajjxy Jericó.

² Jäm y'ijjty kyukkajjpë tu'uk kumeenyjyaa'y mati' txëëw Zaqueo, Roma yëkmeenymyujkpëttëjjk nyiwintsën.

³ Jä'äts y'ijjty Jesús tja'ijxëwyamp, kä'äts jä' t'ijxpaaty jä'ku nimay y'ijjty jaa'y Jesús tyayo'ymyükyë jäts kon y'ijjty Zaqueo tyänë.

⁴ Jakëjxts pyujt'tuwëjjky, nits kepykyejxypy pyejjty jä' tuu'aajy maj y'ijjty Jesús nyaxwa'any, jäts t'ijxpaatt,

⁵ Ku Jesús jäjp nyajjxy nits y'ijxjë'ëjky jäts nyëë'mxë: —Zaqueo, winak atëtspekyë, jä'ku ixyam ëjts nmaaktanwa'any mtëjkëntüjpy.

⁶ Nits Zaqueo atëtspekyë wyinajjky, jäts oy jotkujjk tpawaay tyëjkëntüjpy.

⁷ Ku najj jaa'y t'ijxtë nits tpakkajpx'axajjtë Jesús, jakëjx ku y'ijjty tëj myaaktäny pökytyumpëjaa'y tyëjkëntüjpy.

⁸ Nits Zaqueo tyenkyuk'ajjty jäts tnëëjmjaay Jesús: —Wintsën, ixyam ëjts nnikkäjpxy, tukkë'yë pëntijjäty ëjts nmëët kujkwä'kxy ëjts nmo'ot ayoopëttëjjk, pën tëts ëjts jaa'y nmeetsy majktaxk nikkompät ëjts jä' nyëkwimpijjtjäänyë't.

⁹ Nits Jesús y'atsooy: —Tëj ixyam jya'aty nitsoojkë'n yaj tëjkjoojty, jä'ku ya'at yaa'ytyëjjk Abraham yë' nyaskä'äxë.

¹⁰ Yë'ëts jä' tëj tniminy Yës Teety y'uu'nk nits t'ijxta'at jäts tyëknitso'okt pënjäty tëj tyakkoynyë.

Meeny y'ijxpäjjt

¹¹ Jäts y'ijjty jaa'y t'amatoo'anaxtë ku Jesús najj wyaany, nits myatyaajkxëtë tu'uk ijxpäjjt, jä'ku Jerusalén myu'awinkonnë jä' y'ijt'të, najjts y'ijjty jaa'y wyinmaytyë nits jätyë jä' tsyoo'nta'akwa'any Yës Teety kyuttujjkë'n.

¹² Nits Jesús nyëë'mxëtë: Jää'ëëy tu'uk kumeenyjyaa'y, jäts tu'kyaajjë tsyoo'jny nits nyijkxy jatu'k'it, maj jäm y'ijjty kuttujjk yyëkkë'mo'owa'any, jäts jatu'kyaajjë wyimpitt.

¹³ Kuts y'ijjty tsyoonwa'any, nits nimajjk tyumpë twaatsooy, jäts meeny tmooy tu'uk jatu'uk nits tnëëjmjaay: Yëkmayëtë ya'at meeny kunë'm ëjts nwimpitt.

¹⁴ Mëjkts jä' y'ijjty myukukkajjp myutsip'ätyë, nits ix'oojk yyëktappakkejjxy ni'ey jaa'y jäts tnëëjmëtë't niwintsëntëjjk. Kä'ä ëëts ntsöky jäts yë' yyëkkuttukt.

¹⁵ Oyë'mts y'ijjty jaa'y jyakatsökyë, jä'äm ojts tyäny yëkkuttujkpë, kuts wyimpijjty kyajjpjotm nits twaatsookëjjxy pënjäty y'ijjty tëj meeny tmo'oy jäts tnijawë't nii'xyë'n meeny'uu'nk tëj y'ijjty tyëkmayëtë.

¹⁶ Kuts muttu'uk jya'ajty nits wyaany: Wintsën, tëj ëjts mmeeny nyëkmayë jamajjnk nikkompät.

¹⁷ Nits yëkkuttujkpë y'atsooy: Oynyäxy tëj mtüny; ku tëj yëkxon x'ijxy'ity mati' ëjts mijts tëj wäänë nmo'oy, ixyam ëjts mijts nkë'mo'oy majjk kajjp jäts xniwintsënë't.

¹⁸ Kuts mumäjtsk jya'ajty nits wyaany: Wintsën, tëj ëjts mmeeny nyëkmayë jamuwoxk nikkompät.

¹⁹ Ninyajj tnëëjmjaay: Mijts mniwintsënë'p muwoxk kajjp.

²⁰ Kuts jatu'uk jya'jty nits wyaany: Wintsën, ixyaj mmeeny, wit wintsümy ëjts yë' tëj nkoojnjë'ëky;

²¹ ntsë'ëjk'ëëy ëjts mijts, jä'ku kupety mijts mjaa'yë, mpejkypy mijts meeny mati' tëj xkanittüny, jäts mmokwämp mijts maj tëj mkani'ipy mkayu'uy.

²² Nits yëkkuttujkpë nyëë'mxë: Mijts ka'oytyumpë, kë'm m'aaw m'ayuujk xkumato'ot, mjanijaa'w'eepy nits kupety ëjts njaa'yë, npejkypy ëjts meeny mati' ëjts nkanittümpy jäts mokwämp ëjts maj tëj nkani'ipy nkayu'uy.

²³ ¿Tikëjxts ojts xkakkexy maj jäm meeny y'anüü'kxy yo'oy, kuts ëjts nwimpitt jäts meeny'uu'nk mëët jyeexyë xkë'yajknë?

²⁴ Nits tnëëjmjaay pënjäty jäjp y'ijjty: Pëjjkëtë yë' meeny, mo'otë mati' jyä' tëj tyëkmayë jamajjnk nikkompät.

²⁵ Nits jä' jaa'y y'atsootë: Wintsën, ¡Jamtsyë' tmëët'eenyë maymyeeny,

²⁶ Jäts yëkkuttujkpë wyaany: Ixyam ëjts nnikkäjpxy, pën tmëët jakyëkmo'opts jä'; pënts tkamëët, yëkpëjjkë'p jä' pën nii'xyë'n tjamëëtë.

²⁷ Jäts ëjts nmutsip'eepyëttëjjk pënjäty y'ijjty tkatsojktë'p nits ëjts nyëkkuttukt, yëkmintë jäts xyëk'oo'këxtë't ëjts nwinkujjky.

Jesús kyajjptëkkë Jerusalén

²⁸ Ku najj myatyakkëjjxy, nits jyaktuu'yo'jy jäts jya'att Jerusalén.

²⁹ Kuts tëj y'ijjty winkon jya'anëtë maj kajjp txëëwë Betfagé mëët Betania, Olivos kojpkwiiny, nits tpakkejjxy nimäjtsk y'ixpëjkpëttëjjk.

³⁰ Jäts tnëëjmjaay: —Nëjkxtë xim awinm maj yë' kajjp'uu'nk myëjjke'exy, kuts mja'at'të't jämts xpaat'të't yi'it tu'uk wurrë kyuwëënyë, mati' kä'änë'm pën ttappety. Mmukkäjjëtë nits xyëkmi'ntë't.

³¹ Kuts pën myëktëwëtë't tikëjx xmukkäjjëtë, nëëjmëtë jäts Wintsën yë' tyëktunwamp.

³² Nits ixpëjkpëttëjjk nyëjkxtë, najj jä' tukkë'yë tpatkëjxtë naa'xkë'n Jesús y'ijjty tëj nyee'mxyëtë.

³³ Yam jä' y'ijjty wurrë tmukkäjjëtë nits kuwurrë pyaajtëtë jäts nyëë'mxëtë: —¿Tikëjx yë' xmukkäjjëtë?

³⁴ Nits jä' ixpëjkpëttëjjk y'atsootë: —Wintsën yë' tyëktunwamp.

³⁵ Nits tsyamaan ttajëpä'ntë wurrë, najjts tta'anëjkx'eetyë Jesús nits toktappäjt'të.

³⁶ Mats y'ijjty Jesús yyëkmunäxy jäts jaa'y tsyamaan tyä'ptuu'eetyë jäts ttayo'ypyätt.

³⁷ Kuts y'ijjty jyuptaajkjë'ëkwanëtë Olivos kojpkëjxm, nitukkë'yë pyattuu'yo'ypyëttëjjk yaxkäk'axajjtë oy jotkujjk najjts Yës Teety tmëjj'ijxtë tmëjjkäjxtë jä'ku tëj y'ijjty t'ijxtë tukkë'yë mëjj may'ajjt mati' Jesús tyümpy.

³⁸ Najj y'ijjty wya'antë: —¡Mëjj'ijxy mëjjkexy jä' yëkkuttujkpë pën Yës Teety pakkäjjxë'p kuttänääpyë! ¡Jäm jotkujjk'ajjt tsapjotm nits mëjjkexy Yës Teety jäm y'ity!

³⁹ Nits nitu'ukën fariseostëjjk mati' jäm y'ijjty jaa'y'akujkm tnëëjmjäätyë Jesús: —Wintsën, nnëëjmë mpattuu'yo'ypyëttëjjk nits kä'ä najj wya'antë't.

⁴⁰ Jäts Jesús t'atsooy: —Ixyam ëjts nnikkäjpxy ku yë' y'amo'ntë't, tsaaj kajpxkä'äktë'p.

⁴¹ Jawäänë Jesús y'ijjty kyaja'aty Jerusalén ku t'ijxpaajty jä' kajjp, nits Jesús tniyax'axajjy.

⁴² Jäts wyaany: ¡Ku mijts jyeexyë ixyam x'ijxë pën mmo'ojë'p joktujjk'ajjt! Kä'äts jä' x'ijxpaaty jä'ku yu'utsy jä' m'ijjtxyë.

⁴³ Mniminë'p jä' ka'oyxyëëw, maj mmutsip'eepyëttëjjk myëkni'attujkpättë't,

⁴⁴ jäts myëkkutakkoyë't. Nitukkë'yë mjaa'y y'oo'këxt, tukkë'yë mne'ey jyijtkëxt, jä'ku kä'ä tëj x'ijxkäpy jä' xëëw ku Yës Teety tëj mjaniminyë jäts jyeexyë myëknitso'okyë.

Jesús tyëkwa'atsy tsaptëjjk

⁴⁵ Ku najj nyajjxy, nits Jesús tyëjjk'ëëy tsaptijkypy jäts jaa'y t'ojjpitsëmkëjjxy pënjäty jäjp y'ijjty too'ktë'p juytyë'p

⁴⁶ Nits tnëëjmjaay: —Najj jaypyety myiny: Nuu'kxtaktaajk ëjts yë' ntëjjk tyu'nt, jäts miits mää'tstajjk xyëktunëtë.

⁴⁷ Jawom jawom y'ijjty Jesús yëk'ixpeky tsaptijkypy, jäts teety nyiwintsëntëjjk, pawaa'n yëk'ixpëjkpëttëjjk mëët kajjp niwintsëntëjjk y'ijjty tniwinmayëtë ntsoj y'ijxë Jesús tyëk'ooktë't

⁴⁸ kä'äts jä' y'ijjty twinmaypyaattë ntsoj ttu'ntë't, jä'ku nitukkë'yë y'ijjty jaa'y tu'ukyë t'amatowtë ntsoj Jesús yëk'ixpeky.