Lucas 18 - Ntsoj Lucas tmatya'aky Jesús jyüky'ajjt

Tu'uk ku'ookytyo'oxytyëjjk mëët tu'uk yëkkuttujkpë y'ijxpäjjt

¹ Nits Jesús tmatyaajky tu'uk ijxpäjjt najjts tta'awaany y'ixpëjkpëttëjjk nits ijtp jyeexyë nyuu'kxta'aktë, jäts kä'ä jyot'amutskëtë't.

² Nits wyaany: Jää'ëëy tu'uk yëkkuttujkpë mati' y'ijjty tkatsë'ëjk'eepy Yës Teety, jäts nikkä' mëët jaa'y twintsë'ëkë.

³ Najyä' kajjp y'ijjty mëët tu'uk ku'ookytyo'oxytyëjjk kyukkajjpë jä'äts y'ijjty wä'nanaj yëkkuttujkpë t'asmupajktsoop nits pyuttëk'attë't, jäts katij myutsip ntsokkattunk tyünyë.

⁴ Jeky jä' yëkkuttujkpë tkapputtëjjk'ëëy jä' to'oxytyëjjk, oojknë'mts ojts twinmay nits wyaany: Oyë'm ëjts Yës Teety nkattëyjyawë, jäts nikkä' ëjts jaa'y nwintsë'ëkë.

⁵ Kumkä'äts yë' to'oxytyëjjk y'amöny wä'n ëjts yë' tputtëkkë, nits katij y'okminnë, nikoj ëjts yë' xyëk'ampeky.

⁶ Nits Jesús jyakwaany: Jaa'myätstë ntsoj ka'oyjyaa'y yëkkuttujkpë wyaany.

⁷ ¿Kä'äts jä' ninyajj Yës Teety tputtëkkë't pënjäty tëj twin'ijxy twinköny jäts jaxëëjny jakkoots myunuu'kxta'akyë? ¿Yëk'a'ijxp jä' yi'it jeky?

⁸ Ixyam ëjts miits nnëëjmëtë nits jätyë jä' y'atsoowimpitt jäts tkuwa'ant. Kuts Yës Teety y'uu'nk myi'nt, ¿jyakpaatp jä' tëyjyaa'w'eepyëttëjjk ya'at it naxwiin?

Tu'uk Fariseo mëët tu'uk yëkmeenymyujkpë y'ijxpäjjt

⁹ Jesús tmatyaajky jatu'uk ijxpäjjt jäts ttawinjawë't pënjäty najyaa'w'ajjtëtë'p nits tsätsy'oy Yës Teety tpattuntë jäts tka'oy'ijxy myuku'uktëjjk:

¹⁰ Nimäjtsk yaa'ytyëjjk nyëjkxtë tsaptijkypy nuu'kxtakpë: tu'uk y'ijjty fariseo jatu'uk y'ijjty mati' Roma myeeny tyëkmujjkjääpy.

¹¹ Nits Fariseo, tänääpy najj nyuu'kxta'aky: Yës Teety, mijts ëjts ntamëjjpempy jä'ku kä'ä ëjts nnajjë naa'xkë'n opyënë jaa'y, pën mää'tstë'p, pën ka'oyjyaa'y, pën tyo'oxytyëjjk tkawintsë'ëjk'eepy, ok naa'xkë'n yë' ixi'it yëkmeenymyujkpë.

¹² Mäjtskyaajjë ëjts n'ayuujjë tu'ksamanë jäts ijtp ëjts ndiesmo nkexy.

¹³ Jäts yëkmeenymyujkpë jakkämjawë tyaany, jä'yë tu'ukyë wyinta'aky nits nyakyak'akköxyë jäts yä'äny: ¡Yës Teety, pa'ayook ëjts, pökytyumpëjaa'yë'm ëjts!

¹⁴ Ëjts wamp nits jä' yëkmeenymyujkpë mää'kxtüky jä' wyimpijtnë tyëjkëntüjpy, jäts Fariseo kä'ä. Jä'ku pën kë'm nakyäjxtaajkë'p, jä'äts Yës Teety kya'oy'ijxypy; pënts tuta'aky jaa'y'eepy jä'äts Yës Teety myëjjpempy.

Jesús tkunüü'kxy una'ajnktëjjk

¹⁵ Mëët y'ijjty una'ajnk'uu'nk yyëkta'anëjkxë Jesús, jäts tkunuu'kxt; kuts Jesús y'ixpëjkpëttëjjk najj t'ijxtë, nits tkajpxtso'ytyë pënjäty y'ijjty y'uu'nk tta'anëjkx'eetyë'p Jesús.

¹⁶ Nits Jesús una'ajnk twaatsookëjjxy jäts y'ixpëjkpëttëjjk tnëëjmjaay: —Majtstu'ut'të yë' una'ajnktëjjk wä'n ëjts xnimintë, katij x'akkajpxtuktë, jä'ku yë' tjä'eetyë'p Yës Teety kyuttujktaajk pënjäty najj naa'xkë'n yë' una'ajnktëjjk.

¹⁷ Tëy ëjts miits nnëëjmëtë pën tkakkuppëjkp Yës Teety kyuttujjkë'n naa'xkë'n tu'uk una'ajnk, kä'ä jä' tyëkkë't maj jäm Yës Teety yëkkuttüky.

Tu'uk kumeenyjyaa'y Jesús tmëëtnakyäjpxyë

¹⁸ Tu'uk kumeenyjyaa'y tyëktëëy Jesús: Wintsën mijts tu'uk m'oyjyaa'y, ¿tij ëjts ntu'mp jäts npaatt jüky'ajjt mati' xëmëkkëjxm?

¹⁹ Jäts Jesús y'atsoojjë ¿tikku ëjts xnëëjmë oyjyaa'y? Tu'ukë'm Yës Teety y'oyjyaa'yë.

²⁰ Tëj xnijaa'wëkyexy tukkë'yë pawaa'n: Katij wiijnk to'oxytyëjjk xmëëtë, katij myëkjaa'y'ooky, katij mmeetsy, katij pën xniwampety, jäts wintsë'ëkë mteety mtaak.

²¹ Nits jä' yaa'ytyëjjk y'atsooy: —Nimyutsk'eewyë ëjts yë' tukkë'yë nkuytyun'axajjy.

²² Ku Jesús najj tmatooy, nits tnëëjmjaay: —Jatu'uk jä'yë mka'ijjtxyë xtu'nt: too'këx tukkë'yë tijjäty mëët jäts moykyëx ayoopëttëjjk. Najjts xpaatt oy'ajjt jäm tsapjotm. Nits min jäts pattuu'yo'yky ëjts.

²³ Kuts jä' yaa'ytyëjjk najj tmatooy, yëk'ayoopë nyajyaa'w'ajjtë jä'ku kumeeynyäxy jä' y'ijjty.

²⁴ Kuts Jesús najj t'ijxy nits wyaany: —¡Tsip yë' jyajjtxyë kumeenyjyaa'y tyëkkë't maj Yës Teety yëkkuttüky!

²⁵ Kä'ä yë' tsyippë jäts tu'uk camellë nyëknajjxë'n xuu'ny jutjötypy, yë' tsip jäts tu'uk kumeenyjyaa'y tyëkkë't maj jäjp Yës Teety yëkkuttüky.

²⁶ Pënts tmatootë jä'äts tyëktëëtë —¿Pënts tpaatp nitsoojkë'n?

²⁷ Nits Jesús y'atsoojjëtë: —Mati' ya'at naxwiinë'tjaa'y kamaajyë'p, maykyëjjxë'p jä' Yës Teety tukkë'yë.

²⁸ Nits Pedro tnëëjmjaay Jesús: —Wintsën, tëj ëëts tukkë'yë npëjkta'aky nnikkäkkexy ku ëëts mijts npattuu'yo'oy.

²⁹ Nits Jesús y'atsoowimpijjtë —Tëy ëjts miits nnëëjmëtë, pënjäty tëj tnikke'eky tyëjjk, tyo'oxytyëjjk, y'ajjtsy ok y'ütsy, tyeety ok y'uu'nk, Yës Teety kyëjxm.

³⁰ Yëkmo'op jä' jawäänë may pëntijjäty tëj tnikke'eky, pën nii'xyë'n jyükyë yaj naxwiin, jäts mëët yyëkmo'ot jüky'ajjt mati' xëmëkkëjxm.

Jesús mutuwëëkyaajjë tnikkäjpxy y'oo'jkë'n

³¹ Nits Jesús twinwaay nimajkmäjtsk y'ixpëjkpëttëjjk, jäts tnëëjmjaay: Wä'n ixyam tjaa'myë'n Jerusalén, jämts kyuytyunë't tukkë'yë naa'xkë'n yëk'ayuujknajxpëttëjjk tjaypyäjt'të ntsoj jä' jyatt yaa'ytyëjjk y'uu'nk.

³² Romë'tjaa'y jä' kyë'mo'otë'p, jä'äts ttaxi'iktë'p, tka'oymyukkajpxtë'p, twinkutsujjëtë'p.

³³ Twoptë'p tkoxtë'p, nits tyëk'ooktë't; kyutuwëëk xëëwts jä' nijkxy yaa'ytyëjjk y'uu'nk jyükypyeky.

³⁴ Nippënts tkawinjaa'w'ëëy jä' ayuujk, jä'ku kä'ä y'ijjty pën tnijawë puttij jä' najj tyijjpy,

Jesús tyëktso'oky tu'uk yaa'ytyëjjk jäm Jericó mati' y'ijjty ka'ok'ijxnë'p

³⁵ Jawäänë y'ijjty Jesús kyaja'aty Jericó, jämts tpaajty tu'uk yaa'ytyëjjk mati' ka'ok'ijxnë'p tuu'paa'aajy tsyëënë meeny t'amya'axy,

³⁶ kuts jä' yaa'ytyëjjk tmatooy nimay jaa'y nyaxtë jäts tyëktëëy tij tuujnë'p.

³⁷ Nits yëkwaajnjaay jäts Jesús najxp mati' Nazaret tsoo'mp,

³⁸ nits jä' yaa'ytyëjjk kyajpxkäk'axajjy: —¡Jesús, David tsyaanë kyoo, pa'ayook ëjts!

³⁹ Pënjäty y'ijjty tuwëjktë'p jä'äts tnëëjmjäätyë nits y'amo'nt, kä'äts jä' y'amoony jawäänë mëjk jä' kyajpxkäk'atëjjtsy: —¡David tsyaanë kyoo, pa'ayook ëjts!

⁴⁰ Nits Jesús wya'ktaany, jäts tpakkejjxy pyattuu'yo'ypyëttëjjk jäts t'aswa'atë't. Kuts nyimiijnë winkon, nits Jesús tyëktëëy:

⁴¹ —¿Tij mtsöjkypy ëjts ntu'mp? Nits jä' jaa'y y'atsooy: —Wintsën, ijxwamp ëjts jatu'kyaajjë.

⁴² Jäts Jesús tnëëjmjaay: —¡Oy m'ijxt! Mtëyjyaa'w'ajjtkëjxm tëj mtso'oky.

⁴³ Nits jätyë wyin'ijxwä'kxy, najjts tpanijkxy Jesús oy jotkujjk ttaxonta'aky Yës Teety, mëët jaa'y pënjäty t'ijxtë, ninyajj y'ijjty Yës Teety ttaxonta'aktë.