Lucas 17 - Ntsoj Lucas tmatya'aky Jesús jyüky'ajjt

Tsu'ux yë' jäts pöky nka'ijxë'n

¹ Jäts Jesús tnëëjmjaay y'ixpëjkpëttëjjk: Kä'ä tyi'ity tij ntuu'në'm nits kä'ä pöky n'ijxë'n; ¡yëk'ayoopë'ts jä' jaa'y jyatt pën myuku'uktëjjk tyëkpökytyump!

² Oy'aajtxë'p jä' jyeexyë jäts tu'uk tsappaan yyëktamutsumë't nits maaxynyëjötypy yyëknëyuu'pätt, jä'ku jawäänë mëjk jä' y'ayo'ot ku tyëkpökytyu'nt pënjäty jot'amutsk.

³ ¡Na'y'ijxy'ittëtë, katij nikoj mpökytyuntë! Pën mmutakkoojyë'p mmuku'uk, ttawintso'oy; pën y'ijxkäjpypy tyakkoo'ny, mmää'kxtuk.

⁴ Oyë'm mmutakkoyë't wixtujjkyaajjë tu'kxëëw, jäts wä'nwixtujjkyaajjë mniminë't nits mnëë'mxë't: Mijts okmää'kx, kä'ä ëjts najj n'ok'atëtsnë't, mmää'kxtujjkë tyakkoo'ny.

Teyjyaa'w'ëë'ny myëjk'ajjt

⁵ Nits apóstolestëjjk tnëëjmjäätyë Jesús: —¡Wintsën! Moyky ëëts jawäänë tëyjyaa'w'ajjtë'n.

⁶ Nits Jesús y'atsoojjëtë: —Ku miits jyeexyë xmëëtë tëyjyaa'w'ajjt, jaknii'xyë'n naa'xkë'n naanëxpajjk, mnëëjmjäätyë'p jyeexyë ya'at xoj: Nawyijxë yaj, nits nëjkx mnanyi'ipyë maaxynyëjotm, mmumatoojë'pts yë' jyeexyë.

Mati' jyeexyë tyümpy muttumpëttëjjk

⁷ Ku miits nitu'ukën mtumpë jya'änë tsuujnë, jäts tëj wyä'në y'asyëkyu'uy ok y'askaaj'ijxy, ¿mnëëjmëtë'pts jä' yi'it: Nax, tsëënë jäts mka'yty?

⁸ Ëjts wamp jäts kä'ä, nëm jä' yi'it xnëëjmëtë't: Yëk'oyëjyääky ëjts n'a'ux, nits a'ijxë mjää'jë't yam ëjts nkay n'uuky jäts ëjts nkääky ntojkx xjakkukkoojnë't. Ix'oojk mijts yi'it m'a'uxë't.

⁹ Nixkanëëjmëtë't jä' yi'it Yës tkuju'ypy oyë'm jä' tëj wyä'në tjattunkexy tukkë'yë mati' tëj xtappawa'antë.

¹⁰ Ninyajjts miits, ku tëj wyä'në tukkë'yë xtunkëxtë naa'xkë'n Yës Teety pyawaa'n yä'äny, nits miits jyeexyë mwa'antë: Kä'ä ëëtë'm n'oymyuttuu'nyë'n, jä'ku yë' jä'yë tëj ntuu'nyë'n mati' tëj nyëktappawaa'nyë'n, kä'ä tij ntuu'nyë'n jawäänë aweky.

Jesús tyëktso'oky nimajjk jaa'y mati' pu'utspa'am tmëët

¹¹ Jerusalén y'ijjty Jesús nyijkxy, nits nyajjxy Samaria mëët Galilea y'itjotm.

¹² Jäts jya'ajty tu'uk mutskkajjpjotm, jämts yo'ytsyoojjë nimajjk jaa'y mati' y'ijjty pu'utspa'am tmëët'të, nits jä' jaa'y nijyakkäm

¹³ mëjknäxy kyajpxkäktë: —¡Wintsën, pa'ayook ëëts!

¹⁴ Ku Jesús t'ijxpaajty jä' jaa'y, nits tnëëjmjaay —Nëjkx mnaknyikkä'äxjë'ëkyëtë teety wyinküjkypy. Kuts jä' y'ijjty teety t'anëjkxëtë, nits tuu'aajy tsyokkëjxtë.

¹⁵ Kuts tu'uk nyajyaa'w'ajjtë nits tëj tsyo'oky, jätyë Yës Teety ttaxontak'axajjy jäts wyimpijjty.

¹⁶ Nits Jesús wyinkujjky nyakyujxtänëtyaajkë nits tnëëjmjaay ¡Yës tkuju'ypy tëj ëjts xyëktso'oky! Jäts jä' yaa'ytyëjjk, Samaria'tjaa'y jä' y'ijjty.

¹⁷ Nits Jesús wyaany: Kanimajjkë'pts jä' mati' tëj tsyo'oktë, ¿mats y'it'të janitaxtujjk?

¹⁸ ¿Ntsoj y'ijxë jä'yë ya'at mimpëjaa'y nityu'uk tëj wyimpity jäts Yës Teety tmëjj'ijxt tmëjjkäxt?

¹⁹ Nits Jesús tnëëjmjaay jä' yaa'ytyëjjk: —Tenkyukkë jäts nëjkxnë; tëj mtso'oky ku ëjts tëj xtëyjyawë.

Ntsoj y'ijxë jya'att Yës Teety kyuttujjkë'n

²⁰ Nits Fariseostëjjk tyëktëëtë Jesús junnë jä' Yës Teety kyuttujjkë'n jya'att, jäts Jesús y'atsoowimpijjty: —Kä' jä' ijxnë kä'xnë Yës Teety kyuttujjkë'n myi'nt

²¹ Nippën kyawa'ant: Ixyaj jä', ok ixim jä'; jä'ku jäänë jä' yaj Yës Teety kyuttujjk xjakyäptë.

²² Jäts tnëëjmjaay y'ixpëjkpëttëjjk: —Pyaatp jä' xëëw ku miits xjatsokt jaktu'kxëëw x'ijxtë't Yës Teety y'uu'nk, kä'änë'mts jä' wyä'në tpaaty jäts x'ijxtë't.

²³ Jäm pën wa'amp: Ixyaj jä', ok Ixim jä'; katii'm xtëyjyawëtë nixkappanëjkxtë't.

²⁴ Jä'ku najj naa'xkë'n witsuk y'astoypyeky nits tukkë'yë tsapwiin y'askä'xkexy, najjts kyä'äxt ku Yës Teety y'uu'nk jatu'kyaajjë myi'nt.

²⁵ Mëjknäxyts jä' jawyiin y'ayowa'any, nits jaa'y pënjäty ixyam jüky'eetyë'p ka'ijxyë'm tyunë't.

²⁶ Naa'xkë'n jyajjty ku Noé jyüky'ëëy, najjts jyatt ku Yës Teety y'uu'nk jatu'kyaajjë myi'nt

²⁷ Ku y'ijjty jaa'y y'amäjtskëtë, kyaytyë, y'uuktë, kunë'm Noé tyëjjk'eenyë mëjjkanëwjötypy, nits komtuuj myiiny jäts nitukkë'yë y'oo'këjxtë,

²⁸ ninyajj jyajjty ku Lot jyüky'ëëy: Jaa'y y'ijjty kyaytyë y'uuktë, jyuytyë tyooktë, nyi'iptë, tyëjkkojjtë;

²⁹ kuts Lot pyitsëëmy jäm Sodoma, nits tsätsymyëjk jëën nyaxkitaajky naa'xkë'n tuuj nyaxkita'aky jäts nitukkë'yë jaa'y y'oo'këjxtë.

³⁰ Najjts jä' jyatt ku Yës Teety y'uu'nk jatu'kyaajjë nyaknyikä'äjxjë'ëkë't.

³¹ Jä' xëëw pën wyä'në jäjp tëjknikkejxypy, katii'm tniwinäky pyëjkta'aky mati' jäjp tyijkypy; jäts pën jäjp kam jötypy, katii'm wyimpity tyëjkëntüjpy.

³² Jaa'myätstë ntsoj jyajjty Lot tyo'oxytyëjjk.

³³ Pën jyüky'ajjt kamajtstu'utyë'm tjaa'w'eepy, ttakkoo'yxyë'pts jä'; pënts oo'kp ëjts këjxm; pyaatpts jä' jyüky'ajjt mati' xëmëkkëjxm.

³⁴ Ixyam ëjts nnikkäjpxy, jä' tsuuj jäjp wyä'në jaa'y amäjtsk mya'atë, tu'uk yyëkpawa'at jatu'uk yyëknikkä'äkt.

³⁵ Ok nimäjtsk wyä'në to'oxytyëjjk tu'ukyë jyëtstë, tu'uk yyëkpawa'at jatu'uk yyëknikkä'äkt.

³⁶ Ok nimäjtsk wyä'në kamjötypy; tu'uk yyëkpawa'at jatu'uk yyëknikkä'äkt.

³⁷ Nits ixpëjkpëttëjjk tyëktëëtë Jesús: —Wintsën, ¿ma'it jä' najj jyatt? Nits Jesús y'atsoowimpijjty: —Pën maj tu'uk oo'kpë jämts nyamyukkëtë't xiijky.