Lucas 16 - Ntsoj Lucas tmatya'aky Jesús jyüky'ajjt

Tumpë y'ijxpäjjt mati' wyintsën y'ijjty tunkpëkwaajnë'p

¹ Ninyajj Jesús ya'at ijxpäjjt tmatyaajkjaay y'ixpëjkpëttëjjk: Jää'ëëy tu'uk kumeenyjyaa'y mëët tu'uk tyumpë mati' y'ijjty tukkë'yë myeeny tyok'ijxy'ijtypy; jäts ojts tnijawë ku jä' tyumpë kä'ä myeeny yëkxon y'ijxy'ijjtxyë.

² Nits tyumpë twaatsooy jäts tnëëjmjaay: ¿Tëyë'm jä' naa'xkë'n myëknikkäjpxy? Yëknikkä'äjxjë'ëk ntsoj y'ijxë meeny tëj xyëktüny, jä'ku kä'ä ëjts mijts n'oktunkmo'owanë.

³ Nits jä' tumpë wyinmay'axajjy: ¿Tits ëjts ntu'mp ixyam ku ëjts nwintsën xtunkpëkwa'any? Kä'ä ëjts n'okmëjk'eenyë jäts ëjts nkamtu'nt, kutso'oy ëjts mëët njawë't nits ëjts meeny n'amya'axt.

⁴ ¡Tëj nijawë tij ëjts ntu'mp! Jäts ntsoj y'ijxë ëjts jaa'y xkuppëkt tyëjkëntüjpy ku ëjts nwintsën xtunkpëkt.

⁵ Nits twaatsookëjjxy jaa'y pënjäty y'ijjty tmuyoj'eetyë'p wyintsën. Jäts mati' jawyiin ja'ajt tyëktëëy: ¿Nii'xyë'n xmuyojjë ëjts nwintsën?

⁶ Nits jä' y'atsoojjë: Tu'kmukkö'pxy tyu'ujts on ëjts ntamuyojjë. Nits tnëëjmjaay: Ixyaj nöky mati' yëktajaa'y'eepy; yëk'oyëtyikkats nits xpë'mt wixtekxymyajjnk tu'ujts jä'yë.

⁷ Jäts jatu'uk tyëktëëkojmë: Nits mijts, ¿Nii'xyë'n xmuyojjë ëjts nwintsën? Jä'äts atsoowimpijjt: Tu'kmukkö'pxy kyujxtaajn tsapmoojk. Nits tnëëjmjaay: Ixyaj nöky mati' yëktajaa'y'eepy; yëk'oyë jatu'uk jäts xpë'mt majktaxk'ii'px kujxtaajn jä'yë.

⁸ Nits jä' niwintsën t'ijxkajjpy jäts tëj jä' ka'oy myuttumpë tniwijyë naa'xkë'n jä' y'ijjty tëj tukkë'yë tyëkni'oyëkyexy. Jä'ku najj yë' jaa'y mati' Yës Teety tkattëyjyaa'w'eetyë'p, nyiwijy'eetyë'p jä' ntsoj y'ijxë myeeny tyëkwimpät'të't, kä'ä jä' nyajjëtë mati' Yës Teety ttëyjyaa'w'eetyë'p.

⁹ Najjts ëjts miits nkajpxwijjy nits najj xyëktu'ntë't jä' meeny mati' ya'at it naxwiin mpat'të'p jäts xpaat'të't pën m'oyjyaw'attëtë'p, kuts wyä'në kyëjxkexy tukkë'yë mmeeny, jäm wyä'në pën mmo'ojëtë'p tsëëntyaajk mati' xëmëkkëjxm.

¹⁰ Jä' pën t'oy'ijxy'ijtp mati' wäänë tsowatp, ninyajjts jä' t'ijxy'itt mati' këjx'am, pënts tka'oy'ijxy'ijtp mati' wäänë tsowatp ninyajjts jä' tka'oy'ijxy'itt mati' këjx'am.

¹¹ Pën kä'äts miits jä' myëkkë'mo'otë mati' wäänë tsowatp, naa'xkë'n meeny mati' yëkpatp ya'at it naxwiin, ¿Ntsots y'ijxë myëkkë'mo'otë't mati' këjx'am tsowatp?

¹² Pën kä'äts x'ijxy'it'të mati' miits mkajä'eetyë'p, ¿ntsots y'ijxë myëkmo'otë't mati' mjä'jëtë'p?

¹³ Nippën muttumpë yi'it kya'oy'ajjtxë't nimäjtsk wintsën ttuujnë't; tsyokp jä' tu'uk, myu'ampëkp jä' jatu'uk, tyuujnë'p yëkxon tu'uk, kya'oy'ijxp jä' jatu'uk. Kä'ä y'oyë't nits Yës Teety nmuttuu'në'n, jäts mëët meeny nmuttunwaa'në'n.

¹⁴ Jäts fariseostëjjk, pënjäty y'ijjty meeny t'oyjyaa'w'eetyë'p, ku ya'at najj tmatootë nits Jesús ttaxiktë.

¹⁵ Jäts Jesús nyëë'mxëtë: Miits jä' pën naknyajjxëtë'p wa'atsnäxy jaa'y wyinkujjky, Yës Teety m'ijx'ajjtëtë'p yëkxon m'am mjotm, jä'ku mati' jaa'y myëjjpëmtë'p, jä'äts Yës Teety kya'oy'ijxypy.

Pawaa'n mëët Yës Teety kyuttujjkë'n

¹⁶ Jäpaat yë' pawaa'n jyupkexy mëët yëk'ayuujknajxpëttëjjk, maj Juan Bautista jyüky'ëëy, nits tsyoo'ntaajky yë' oymyatya'aky ntsoj y'ijxë Yës Teety kyuttujjkë'n, jäts nitukkë'yë jaa'y ttajottakkoytyë nits tyëkkëtë't.

¹⁷ Kä' tsyippë tsyu'uxë jäts tsapwiin mëët naxwiin kyutakko'yty, yë' tsip jäts Yës Teety pyawaa'n jaknii'xyë'n pyuwa'atst.

Jesús t'awa'any ku amäjtsk jaa'y nyajyaywyä'kxyëtë

¹⁸ Ku tu'uk yaa'ytyëjjk tmëëtnajyaywyä'kxyë tyo'oxytyëjjk nits jatu'uk to'oxytyëjjk tmëët'amäjtskëkyojmë, pökytyünnë'pts jä' na'it jä'ku kä'ä twintsë'ëkë myëët'amäjtsk; pënts tmëët'amäjtsk'eepy jä' to'oxytyëjjk mati' tëj nyiyaa'y tmëëtnajyaywyä'kxyë, pökytyumpts jä' ninyajj.

Lázaro, mëët kumeenyjyaa'y y'ijxpäjjt

¹⁹ Jää'ëëy tu'uk kumeenyjyaa'y, mati' y'ijjty oy tsuj naxyojjxë'p, nits jawom jawom xyëëwtüny, jäts tumtsow takkaa'ny jä' y'ijjty yyëknäjxypy.

²⁰ Jää'ëëy mëët tu'uk ayoopë jaa'y mati' txëëw Lázaro, tëj y'ijjty tukkë'yë nyipputswatskëjxnë, jäts ijtp y'ijjty tsyëënë naxkëjjxy kumeenyjyaa'y tyëjk'atsunk'aajy.

²¹ Jä' ayoopëjaa'y, jä' jä' jyajëë'kxwämpy mati' kumeenyjyaa'y yyëkkunäjxypy kyaypyäjjtpa'tke'py; jäts uk paat y'ijjty nyiminyë jä'äts pyu'uts we'ejyxyë'p.

²² Pyaajt xëëw jäts Lázaro y'oo'knë, nits Yës Teety tyumpëttëjjk mati' jäm tsapjotm pyawaajjë Abraham pyaa'am kaypyë. Jäts mëët kumeenyjyaa'y y'oo'jky jä'äts yyëknittaj'ëëy.

²³ Nits kumeenyjyaa'y ayootaajkjötypy y'ijxjë'ëjky jäts jakkäm t'ijxpaajty Abraham mëët Lázaro jäm pyaa'am tsyëënë.

²⁴ Nits kumeenyjyaa'y kyajpxkeejky: ¡Teety Abraham, pa'ayook ëjts! Pakkäx yë' Lázaro wä'n kyë'jëëjp t'asyëkxooky, nits myi'nt jäts ëjts ntoojts xyëkxujjxë't, jä'ku mëjknäxy ëjts n'ayoy ntsätsypyaaty yajp jënjötypy.

²⁵ Nits Abraham y'atsoojjë: Uu'nk, jaa'myäts jäts tëj tukkë'yë oy'ajjt xpaaty ku tëj mjükyë, najjts yë' Lázaro tëj yë' y'ayoo'n tpaaty ku yë' tëj jyükyë. Jakëjxts yë' ixyam xontaajk pyaatyë, jäts mijts tëj mpaatyë ayoo'ntaajk.

²⁶ Ninyajjmë, jäj mëët apeky mëjjnäxy awa'ats mati' ëëtë'm xnakwyä'kxyë'm; najjts pënjäty yam kä'ä jäm nyaxtë't, pënjätyts jäm kä'ä yam nyaxtë't.

²⁷ Jäts kumeenyjyaa'y wyaany: Teety Abraham, tun may'ajjt, pakkäx yë' Lázaro ëjts nteetyëntüjpy.

²⁸ Jäjp ëjts nimuwoxk nmuku'uk, wä'n tnijkxy tka'amay nits katij yajp jya'at'të ayoo'ntaajkjötypy.

²⁹ Jäts Abraham y'atsooy: Jäjp jä' tmëëtëtë mati' Moisés mëët yëk'ayuujknajxpëttëjjk jyaytyë: ¡Wä'n jä' tmumatowtë!

³⁰ Nits kumeenyjyaa'y y'atsooy: Teety Abraham, kä'ä yë' myata'aky; ku jyeexyë tu'uk oo'kpë jyükypyeky jäts jäjp nyija'attetë't, najjts jä' ttëyjyawëtë't jäts tyikkatstë't.

³¹ Nits Abraham tnëëjmjaay: Pën kä'ä jä' tmumatowa'antë mati' Moisés mëët yëk'ayuujknajxpëttëjjk jyaytyë, kä'ämts jä ttëyjyawëtë't oyë'm tu'uk oo'kpë jyeexyë jyajükypyeky.