Lucas 13 - Ntsoj Lucas tmatya'aky Jesús jyüky'ajjt

Yëktikkatstë ntsoj mjaa'yëtë mjükyëtë

¹ Najyä' xëëw ojts ni'ey jaa'y Jesús tmumatya'aktë ku Pilato tëj y'ijjty tnakyëk'ookyë nimay Galileatjaa'y, jäts tnakmyuttëjjkëkyexyë jaa'y nyë'ëjpy mëët tanë'ëk nyë'ëjpy mati' y'ijjty tëj Yës Teety ttawintsë'ëkëtë.

² Nits Jesús nyëë'mxëtë: «¿Mwinmaytyë'p miits jakëjx jä' jaa'y najj jyajt'të ku tëj pyöky tyëknippät'të naa'xkë'n pën kyappökytyüny jäjp kyajjpjötypy?

³ Ixyam ëjts nnikkäjpxy jäts kä'ä jä' nyajjë; pën kä'ä miits Yës Teety x'awimpittëtë, m'ooktë'p ninyajj.

⁴ ¿Ok mwinmaytyë'p miits nits mati' nimajktuktujjk oo'ktë ku mëjjne'ey tyakitaapäjjtëtë jäm Siloé nyë'am, jä' y'ijjty jawäänë may tyakkoo'ny, naa'xk pën tyakkoo'ny kya'ity nii'xyë'n kyukkajjpëtë Jerusalén?

⁵ Ixyam ëjts nnikkäjpxy nits kä'ä jä' nyajjë; pën kä'ä kë'm Yës Teety x'awimpittëtë m'ooktë'p miits ninyajj.»

Kattëëm'eepyë kepy y'ijxpäjjt

⁶ Nits Jesús myatyaajkxëtë ya'at ijxpäjjt: «Jäm tu'uk jaa'y y'ijjty tyëkyöny kyamjotm tu'uk tsawäjkx, jäts t'a'ijxy tuwëëkjumëjjt nits jyeexyë tyëëmë, kä'äts tyëëm'ajjty.

⁷ Nits tnëëjmjäänyë kyam'ijxy'ijtpë: “Tëj ëjts tuwëëk jumëjjt nja'a'ijxy ya'at kepytyëëm, kä'äts yë' tyëëmë. Poo'jtjë'knë yë', nikoj yë' kyam'attänë.”

⁸ Nits kam'ijxy'ijtpë y'atsoowimpijjty: Wintsën, yëk'a'ijx jatu'kjumëjjt; wä'n ëjts naajx ttaj yuu'nkë niwittity nits ëjts npu'utyë't.

⁹ Ntsoj ku najj tyëëmë't, pën kä'äts tyëëmë, nits wyä'në xpooty.»

Jesús tyëktso'oky tu'uk to'oxytyëjjk poo'kxë'nxëëw'it

¹⁰ Tu'kpoo'kxë'nxëëw'it, tëj y'ijjty Jesús yyëk'ixpëjk'axajjy majjäjp jaa'y xëmë yo'ymyuktë.

¹¹ Jäjpts y'ijjty tu'uk to'oxytyëjjk mati' majktuktujjk jumëjjt tëj pya'amtsënäänyë. Tu'uk mëjjku'ujy tyumpë tëj y'ijjty kyäjjxnyë jë'kux, kä'ä jä' jyëxk y'oktëënë.

¹² Ku Jesús t'ijxpaajty jä' to'oxytyëjjk, nits tyaajxjaay jäts tnëëjmjaay: —To'oxytyëjjk, ixyam mpa'am mniwa'atsyë.

¹³ Nits tkë'nixajjy, jätyë jä' to'oxytyëjjk jyëxk tyëëy, nits Yës Teety ttaxontak'axajjy najjts tmëjj'ijxy tmëjjkejjxy.

¹⁴ Jä'äts tëjkniwintsën y'ampëjjk, ku Jesús yëktsoojky poo'kxë'nxëëw'it, nits jaa'y tnëëjmjaay: —¡Jäj tutujjk xëëw nits ntuu'në'n; mintë akkujjkxëëw jäts mtso'oktë't, kä'ä poo'kxë'nxëëw'it!.

¹⁵ Nits Jesús y'atsoowimpijjty: —¡Miits ëë'mpë jaa'y! ¿Kä'ä miits nitu'ukën xmukkäjjëtë mkaaj ok mwurrë nits x'as'yëk'uuktë't poo'kxë'nxëëw'it?

¹⁶ Jäts ya'at to'oxytyëjjk, Abraham nyaskä'äxë, ixyam majktuktujjk jumëjjt mayë' mëjjku'ujy pya'am mo'oyë ¿kä'ä yë' nyëktsoojkë'n oyë'm jyappoo'kxë'nxëëw'ittë?

¹⁷ Ku Jesús najj wyaany, kutso'oy jä' myutsip'eepyëttëjjk tyankëjxtë; jäts nitukkë'yë jaa'y ttaxontaktë Yës Teety ku t'ijxtë tij y'ijjty Jesús mëjjkäjäj tyümpy.

Naanëx pajjk y'ijxpäjjt

¹⁸ Nits Jesús wyaany: «¿Tu'ktii'n kye'exy Yës Teety kyuttujjk? ¿Tits ëjts jä' yi'it ntamu'ijxë'p?

¹⁹ »Najj'ämpy jä' naa'xkë'n tu'uk naanëx pajjk mati' jaa'y tëj tni'ipy kyamjötypy, kuts jä' mëjj yeeky jämts joon tu'k'akëjjxkëjjx nyapye'enyë.»

Tsapmokway tsyooy y'ijxpäjjt

²⁰ Jatu'kyaajjë Jesús wyankojmë: ¿Tits ëjts jä' njaktamu'ijxë'p Yës Teety kyuttujjk?

²¹ Najj'ämpy jä' naa'xkë'n tsooy mati' to'oxytyëjjk tyamujaa'jx'eetyë'p tuwëëk kijpxy tsapmokway jäts tsapkääky tyattukt.

Winmutsk tëjk'akkaj

²² Ku Jesús nyijkxy Jerusalén, nitukkë'yë y'ijjty jaa'y tyëk'ixpeky pënmaj tpaaty mëjjkajjp ok mutskkajjp.

²³ Jäts tu'uk jaa'y yyëktëëjjë: —Wintsën, ¿Ni'ey jä' mati' nitso'oktë'p? Nits Jesús y'atsooy:

²⁴ Ttajottakkoytyë nits winmutsk akkaj'aajy mtëkkëtë't, ixyam ëjts nnikkäjpxy, jäts nimay wyä'në jaa'y jya'oktëkkëwyanëtë kä'äts pën y'oktëjjk'eenyë't.

²⁵ Jä'yë ku kuttëjjk tyenkyukkë't nits tyëjjk tyëk'attukt, jäts miits, pënjäty tëj wyä'në mtantë tëjkwimpy, nits xja'okkajpxtäänyëtë't, jäts xja'oknëëjmjäänyëtë't: "Wintsën, yëk'awa'ats tëjjk. "Nits kuttëjjk jä'yë m'atsoowimpittëtë't. "Kä'ä ëjts nijawë puppën miits, jäts pumaj mtsoontë.

²⁶ Nits miits xja'oknëëjmjäänyëtë't: "Tëj ëëts mijts tu'ukyë nmëëtkay nmëët'uuky, jäts mijts ëëts y'ijjty xyëk'ixpëjkp nkajjpjotm."

²⁷ Nits jä'yë m'atsoowimpittëtë't: "Kä'ä ëjts nnijawë pumaj miits mtsoony. Winwa'kwatstë'k ëjts, miits ka'oytyumpë jaa'y."

²⁸ Nits miits mjë'ëytyë't mya'axtë't jäts mtsatsywyinma'ytyë't ku x'ijxtë't Abraham, Isaac, Jacob maj jäm Yës Teety yëkkuttüky mëët nitukkë'yë yëk'ayuujknajxpëttëjjk, jäts miits kä'ä wyä'në jäm tëj mja'at'të.

²⁹ Jä'ku minwantë'p yuk'amë'tjaa'y, apa'ajtë'tjaa'y, xëëwpitsempyë'tjaa'y, xëëwkitäkypyë'tjaa'y nits kyaywya'antë maj jäm Yës Teety yëkkuttüky.

³⁰ Jäts nitu'ukën pën ixyam oojk ja'atë'p jä'äts jawyiin'eenyëtë'p, nits pën ixyam jawyiin ja'atë'p jä'äts ix'oojk ta'ntë'p.

Jesús tniya'axy Jerusalénkë'tkajjp

³¹ Najyä' xëëw Jesús nyija'ajtë ni'ey fariseostëjjk jäts nyëë'mxë: —¡Kä'äk, nëjkx jakkäm, Herodes myëk'ookwaajnë'p!.

³² Jäts Jesús t'atsoowimpijjty: —Nëjkxtë, nits xnëëjmëtë't jä' waajx: "Jäts ixyam nits jawom ëjts mëjjku'ujy tyumpë nyëkpitsëmwa'any, pa'amjaa'y nyëktso'okwa'any, wixtëjkmnë'm ëjts wyä'në tëj ntunk y'awaatë.

³³ Jaktuu'yo'oywyampnë'm ëjts ixyam, jawom nits wixtëjkm, kä'ä jä' y'oyë't nits tu'uk yëk'ayuujknajxpë jakkäm y'ookt, Jerusalén jä' xëmë tyëk'ooktë.

³⁴ «¡Jerusalén, Jerusalén, myëk'oo'ktë'p miits yëk'ayuujknajxpëttëjjk, mnaska'tstë'p pën Yës Teety jyakkejxypy kukkexy'eepyë! Tëj ëjts mayyaajjë m'uu'nk njawaamukwa'any naa'xkë'n tu'uk tsajptaak y'uu'nk tyaxmüky nits tmu'uxt, kä'äts miits xtsojktë.

³⁵ Nnijawëtë ixyam, appak mjëën mtëjjk tyanwa'any; ixyam ëjts nnikkäjpxy jäts kä'ä ëjts miits x'ok'ijxnëtë't, kunë'm jä' xëëw tpaatt maj miits mwa'antë't: "Mëjj'ijxy mëjjkexy jä' pën Yës Teety pakkäjjxë'p kuttänääpyë!"»