Lucas 12 - Ntsoj Lucas tmatya'aky Jesús jyüky'ajjt

Katij najj mjaa'yëtë naa'xkë'n fariseostëjjk

¹ Nits kawinaak miijl jaa'y nyamyujk'atëëjtsëtë, maynyäxy y'ijjty jaa'y, yëkxon nyanyastijjë'y'oo'kexyë tu'uk janitu'uk. Jäts Jesús jawyiin tnëëjmjaay y'ixpëjkpëttëjjk: Na'y'ijxy'ittëtë jäts katij fariseostëjjk mwin'ëënyëtë, yë' ëjts ntijjpy ku kä'ä tkuytyuntë mati' kë'm nyaskajpx'eetyë'p.

² Jä'ku yëkpatp jä' tukkë'yë mati' yu'utsy ijtp, jäts yëknijaa'w'eepy jä' mati' yëktump amää'tsk.

³ Tukkë'yë mati' miits tëj xkäjpxy akootsy'attüjpy yëknijawë'p jä' ku it xyëëjnyë't; jäts tukkë'yë mati' miits mkajpxtë'p amää'tsk attujkpety, nyijaa'wëkyëxtë'p jä' nitukkë'yë jaa'y.

Pën jä' jyeexyë yëktsë'ëjk'eepy

⁴ Miits muku'uktëjjktë, ixyam ëjts nwa'any, katij xtsë'ëkëtë pën nikkëjjx tyëk'oo'ktë'p, jä'ku yë' jä' jä'yë maajyëtë'p.

⁵ Ixyam ëjts nnikkäjpxy pën mtsë'ëkëtë'p: Tsë'ëkëtë jä' pën myëk'ookëtë'p jawyiin, nits tyëknikuttukkë't jäts jënjötypy mpakkäxëtë't. Tëy ëjts nwa'any jä' mtsë'ëkëtë'p.

⁶ Tyatsotüjkypy mäjtsk pujjxmeeny nimuwoxk jon'uu'nk, oyë'mts jä' në'n jyakatsowaaty, jaa'myetsy jä' Yës Teety yëk'ityëtë.

⁷ Ninyajjts miits, matsyoy Yës Teety mwaay tyëk'ity. Jakëjxts ëjts nwa'any katij mtsë'ëkëtë: Jawäänë këjx'am miits mtsowaaty, kä'ä në'n tsyowaaty nimay jon'uu'nk.

Katij Jesús xkutso'oyëtë

⁸ Ixyam ëjts nnikkäjpxy, pënpën tkakkutso'oy'eepy nits nitukkë'yë jaa'y tnëëjmë't jäts ëjts jä' xtëyjyaa'w'eepy, ninyajj ëjts nnëëjmë't Yës Teety tyumpëttëjjk mati' jäm tsapjotm, nits tëyë'm jä' jäts xtëyjyaa'w'eepyë'm ëjts jä'.

⁹ Pënts tkutso'oyjyaa'w'eepy jäts jaa'y tnëëjmë't nits x'ijx'eepy ëjts jä', ninyajj ëjts mëët nnëëjmë't Yës Teety tyumpëttëjjk mati' jäm tsapjotm jäts kä'ä ëjts jä' n'ijxë.

¹⁰ Myää'kxtukp Yës Teety pën y'uu'nk ka'oytyijjxë'p mäjtsk tuwëëkyaajjë; pënpënts tka'oytyijjp kë'm Yës Teety jyaa'wë'n, nittij mää'kx kya'itt.

¹¹ Ku jaa'y mmunëjkxëtë't, maj pawaa'n yëk'ixpëjkpëttëjjk yo'ymyuktë, ok yëkkuttujkpëttëjjk wyinkujkm, katij xwinmaytyë ntsoj mnakyuwa'anëtë't ok ntsoj mnakyu'atsowëtë't,

¹² ku tpaatt jäts miits mkajpxt, kë'm Yës Teety jyaa'wë'n mwaa'nxëtë't ntsoj mwa'antë't.

Kumeenyjyaa'y mati' winjaa'w'ëë'ny tkamëët

¹³ Jäm tu'uk jaa'y kyajpxkeejky jaa'y'akujkm jäts tnëëjmjaay Jesús: —Wintsën, nnëëjmë ëjts n'ajjtsy jäts ëjts xmo'ot mati' ëjts xpatp, jä' mati' ëëts nteety yyëktaan.

¹⁴ Jäts Jesús y'atsoojjë: —Muku'uk, ¿pën ëjts tëj xkexy yëkkuttujkpë jäts ëjts miits mtsip nyëkwin'oyë't?

¹⁵ Jäts jyakwaany: —Na'y'ijxy'ittëtë, katij x'appëjktëjjkëkyëxtë tukkë'yë pëntijjäty m'ijxtë'p m'aa'xtujktë'p; Jä'ku kä'ä yë' jotkujjk'ajjt xtappaajtë'n.

¹⁶ Nits Jesús tu'uk ijxpäjjt tmatyaajky: Jää'ëëy tu'uk kumeenyjyaa'y, mati' y'ijjty tëj yëkxon myoojk xyëjjk tyëëm'ajjtxyë.

¹⁷ Nits jä' kumeenyjyaa'y wyinmaay: ¿Tij ëjts ntu'mp? Kä'ä y'ok'ijtnë maj ëjts nkoojnjë'ëkt nmoojk nxëjjk.

¹⁸ Jäts nya'y'awinmaa'y'ajjtë kë'm: ¡Tëj nijawë tij ëjts ntu'mp!. Ntajjë'këxp ëjts yë' tukkë'yë ntëjjk mati'jäty ëjts nyëktümpy koojnjë'ktaajk nits y'eewyë nyëk'oyë't jawäänë mëjjäty, jäjpts ëjts nkoojnjë'ëkt nmoojk nxëjjk mëët tukkë'yë tijjäty ëjts mëët.

¹⁹ Nits ëjts nwa'ant: Muku'uk, jäj xmëëtë tij mtajükyë'p kawinaak jumëjjt; poo'kx, kay, uuk, jäts taxonta'ak jüky'ajjt."

²⁰ Jäts Yës Teety nyëë'mxë: ¡Kawinjaa'w'eepyë jaa'y! Ya'at tsuuj yi'it m'ookt, jäts mati' tëj xpëjjkjë'ëky, ¿pënts jä' tmutta'mp?

²¹ Najj jaa'y jyäty pën yaj naxwiiny mëjk'ajjt nikoj tyëkmay'eetyë'p, jäts ayoop tyantë Yës Teety wyinkujkm.

Y'ijxy'ijtypy Yës Teety y'uu'nktëjjk

²² Nits Jesús tnëëjmjaay y'ixpëjkpëttëjjk: «Ixyam ëjts nwa'any: Katij xmaytyë xtajjtë tij mka'ytyë'p mjëë'kxtë'p jäts xtajükyëtë't, ok tij mwittëtë'p.

²³ Jä'ku tsowatp yë' jüky'ajjt jawäänë këjx'am kä'ä në'n tsyowë kääky tojkx, jäts tsowatp mëët nikkëjjx kä'ä në'n wit tsyowaaty.

²⁴ Ijxtë aa'xtuktë jooky: Kä'ä nyi'iptë yyu'utë, jäts kä'ä tëjjk tmëëtëtë maj tkoojnjë'ëktë't jyee'kxy; oyë'mts jä' jyanajjë kë'm jä' Yës Teety yyëkjee'kxyëtë. Ntsots xtijy y'ijxë Yës Teety mkayëkkayëtë't mkayëk'uukëtë't, nimëjj miits, kä'ä nyë'në yë' tanë'ëk mati' käkyo'ytyë'p.

²⁵ Oyë'mts ëëtë'm në'n njamaa'yë'n njattajjë'n, ¿Ntsoj y'ijxë ntuu'në'n jäts njüky'ajjt yaj naxwiiny nyëkyoo'në'n jaktu'kxëëw?

²⁶ Pën kä'ä yë' jä'yë mmayëtë, ¿tikëjx xmaytyë xtajjtë mati' nijunë mkamayëtë'p?

²⁷ »Aa'xtuktë pëjjy mati' yomp kamjötypy: Kä'ä tyuntë nikkä' tya'aktë kyojjtë. Tëy ëjts nwa'any nikkä' yëkkuttujkpë Salomón najj nyaxyojjxë, oyë'm y'ijjty jyakkumeenyë.

²⁸ Ntsoj Yës Teety najj txöxy jä' aay jä' ujjts, mati' ixyam jäjp oy kä'xp kamjötypy jäts jawom tëj wyä'në tyëtskëjxnë, ¿ntsots y'ijxë miits xtijy mkaxoxëtë't? ¡Miits kattëyjyaa'w'eepyë jaa'y!

²⁹ Katij miits xmay xtajjy, tij mka'ytyë'p m'uuktë'p.

³⁰ Yë' jaa'y jä' tmaytyë'p ttajjtë'p pën Yës Teety tka'ijx'eetyë'p, jäts miits jäm xmëëtë mteety mati' tnijaa'w'eepy tij mka'ijjtxëtë'p.

³¹ Ijxta'atë jawyiin Yës Teety kyuttujjkë'n, nits xpaat'të't tukkë'yë mati' miits mka'ijjtxëtë'p.

Yëkmayëtë tsapjotm tukkë'yë mati' tsowatp

³² »Katij mtsë'ëkëtë, oy miits ni'ey ëjts xpattuu'yo'oytyë; Yës Teety, miits mteety'ajjt, mmo'owaajnëtë'p pya'ayoo'nkëjxm jüky'ajjt mati' jäm tsapjotm.

³³ Tooktë tijjäty mmëët'të, jäts mmo'otë ayoopëttëjjk; yëkni'oyëtë jäm tsapjotm meenykyoo'n'ëë'ny mati' nijunë kawintakko'ypy, mëjk'ajjtën mati' junë kakkëxp, maj kä'ä pën myeetsy jäts kä'ä tij wyökyë.

³⁴ Pën maj miits xkoojnjë'ëky tukkë'yë mati' këjx'am tsowatp, jämts miits m'aaw mjoojt xkexy.

A'ijxë miits mjää'jëtë't

³⁵ »Najj miits a'ijxtë naa'xk tu'uk tëjk'ijxy'ijtpë kyuttëjjk t'a'ijxy ku wyimpitt amäjtsk'eekyuwäjpy.

³⁶ Tukkë'yë jëën tyëktoypyëjkexy jäts jüky y'a'ijxy, ku wyintsën tëjjk twinkoxt jäts jätyë tyëk'awa'atst.

³⁷ Mëjj xontaajk pyaat'të'p muttumpëttëjjk mati' nijkxy wyintsën pyaatyëtë jüky. Tëy ëjts nwa'any jäts nëë'mxëtë'p kë'm kuttëjjk tsëënë wä'n ëjts kë'm kääky, tojkx t'ijxy.

³⁸ Mëjj xontaajk jä' jyup'ijxtë'p, ku nijkxy jüky pyaatyëtë wyintsën, oyë'm jya'att tsuu'm ok xëëjnytya'akwamp.

³⁹ Mnijaa'w'eepy miits: Ku jyeexyë kuttëjjk tnijawë junnë mää'tspë jya'atwa'any, kä'äts jä' tnittukt jäts mää'tspë tyëkkë't tyijkypy.

⁴⁰ Ninyajj miits, a'ijxtë jüky; jä'ku nit nijkxy Yës Teety y'uu'nk myiny maj miits wyä'në xkakkumay.»

Nitukkë'yë tumpëttëjjk tpëktë mati' paajt'ajjtëtë'p

⁴¹ Nits Pedro tyëktëëy Jesús: —Wintsën, ¿ku yë' ijxpäjjt xmatya'aky ëëts jä'yë xnëëjmjääpy ok mëët nitukkë'yë jaa'y xnëëjmë?

⁴² Nits Jesús wyaany: Jä' tumpë mati' tkuytyump yëkxon ntsoj wyintsën pyawa'anyë, jä'äts wyintsën ttamunikkääk'attë'p jäts tyëkka'yty tyëk'uukt nitukkë'yë pënjäty jäjp tyëjkëntüjpy pën junë tu'kyaajjë jatu'kyaajjë pyaatyëtë.

⁴³ Mëjjxontaajk jä' pyaatp muttumpë ku wyintsën wyimpitt jäts pyaatë't jäjp wyä'në tkuytyuujnë pyawaa'n.

⁴⁴ Ixyam ëjts nwa'any, jä'äts kuttëjjk kyë'moykyëxp tukkë'yë myaay pyëjkta'aky jä' muttumpë jäts t'ijxy'itt.

⁴⁵ Ok ntsoj jyatt ku jä' tumpë wyinma'yty nits kä'ä wyintsën jätyë wyimpitwa'any, jäts myëëttumpëttëjjk ntsokkattunk t'ijxt twopt tkoxt nits kya'yty jäts y'uukt myu'ukë't.

⁴⁶ Jä' xëëw maj wyä'në tkakkumay, nijkxy jya'aty wyintsën, mëjk jä' yyëk'ayoo'npaatë't, naa'xkë'n yyëktuntë ka'oytyumpëttëjjk.

⁴⁷ Jä' tumpë mati' tnijaa'w'eepy ntsoj wyintsën tsöky namyuttunë, jäts kä'ä tmumatoy, jä' nijkxy mëjk yyëkwöpy yyëkköxy.

⁴⁸ Jäts tumpë pën tkanijaa'w'eepy nits ttakkoypy, wäänë'ts jä' nijkxy y'ayoo'npaaty. Pënpën may yëkmoypy, ninyajj jä' may yëk'amato'ot; jäts pënpën may yëktakkë'tëjjk'eepy, may jä' yyëktappayo'oyty.

Jesús jaa'y tnaktsyiptünyë

⁴⁹ Tëj ëjts nminy jäts jëën nyëkmëjjë't ya'at it naxwiin; njatsöjkypy ëjts jäts jäänë jyeexyë jëën tyoynë.

⁵⁰ Kuwanë'ts ëjts jawyiin ntanaxt mëjknäxy ayoo'n, mëjk ëjts oy ntsätsywinmay kunë'm najj kyuytyunë't.

⁵¹ ¿Ntsoj miits mwinmaytyë jäts jotkujjk'ajjt ëjts nyëkmimpy yaj naxwiiny? Ixyam ëjts nnikkäjpxy jäts kä'ä, tsip ëjts tëj nyëkminy.

⁵² Ixyam tsyoo'nta'aky, maj nimuwoxk jaa'y tu'ktëjjk tsyëënëtë nyawyä'kxëtë'p jä', nituwëëk ttsiptu'ntë't nimäjtsk, ok nimäjtsk ttsiptu'ntë't janituwëëk.

⁵³ Kë'm nitteety ttsiptu'nt myajjnk, jäts jä' una'ajnk ttsiptu'nt tyeety; nittaak ttsiptu'nt nyëëx, jäts kiixy ttsiptu'nt tyaak; jäts xä'kxytyaak ttsiptu'nt xyä'kxy'uu'nk, nits jä' to'oxytyëjjk tsyiptu'mp xyä'kxytyaak.

Winjawëtë it xëëw

⁵⁴ Nits Jesús jaa'y tnëëjmjaay: Ku miits x'ijxtë yoots pyitsemy maj xëëw kyita'aky, nëm mwa'antë jäts tu'wamp it, mimpë'mts tuuj.

⁵⁵ Kuts it pyojjy wimpät, nëm mwa'antë jäts annaxwamp it, naa'mts y'annäxy.

⁵⁶ ¡Miits kawinjaa'w'eepyë jaa'y! Mjajt'të'p naxwiin tsapwiin xyëkwimpitsë'mtë't, ¿ntsots y'ijxë xkayëkwimpitsëmtë tij it tij xëëw ixyam mjükyëtë?

Mëëtnamyu'oy'attë mmutsip'eepyëttëjjk

⁵⁷ ¿Tij ku miits kë'm xkawin'ijxtë xkawinjawëtë mati' m'oy'ajjtxëtë'p?

⁵⁸ Ku jaa'y mniwampättë't, tamëëtyëkwin'oyë m'ayuujk jätyë, niyam mkamunijkxyë kumuun. Pën kä'äts xyëkwin'oyë jätyë, mpawawë'p jä' jaa'y yëkkuttujkpë wyinküjkypy, nits jä' yëkkuttujkpë mkë'yakkë't ijxy'ijtpë kyë'jë'm jä'äts mpujxtëjkpëmë'p.

⁵⁹ Ixyam ëjts nwa'any jäts kä'ä jäjp jätyë mpitsë'mtë't kunë'm tukkë'yë xkujuykyëxt.