Lucas 10 - Ntsoj Lucas tmatya'aky Jesús jyüky'ajjt

Jesús tpakkexy nituki'pxymyajkmäjtsk pyattuu'yo'ypyë

¹ Kuts najj tukkë'yë nyajjxy, nits Jesús twinwaay aweky nituki'pxymyajkmäjtsk pyattuu'yo'ypyëttëjjk, nits tpakkejjxy nimäjtskjäty jäts tyuwëktë't, tukkë'yë kajjp majäty y'ijjty Jesús nyaxwa'anyë'm.

² Jäts tnëëjmjaay: «Tëyë'm jä' maynyäxy tunk, jäts ni'ey tumpë. Jäkëjxts ëjts nwa'any, nëëjmëtë Wintsën jäts tumpëttëjjk tjakpakkäxt.

³ Nëjkxtë; jäts na'y'ijxy'ittëtë jä'ku najj ëjts miits npakkexy naa'xk worrekë yyëkkexy mëy'uk'akujkm.

⁴ Kä'ä xpakko'ntë't meeny, xuumy, kë'ëk; katij mëët jaa'y jeky xmëëtnakyäjpxyëtë tuu'aajy.

⁵ Pënmaj mja'at'të, jawyiin jaa'y xkë'paat'të't, jäts xnëëjmëtë't: "Wä'n tjää'jë jotkujjk'ajjt ya'at tëjjky."

⁶ Pën oyjyaa'yts jä' kuttëjjktë, kuytyunë'pts jä' ayuujk mati' wyä'në tëj xtanikkajpxëtë; pën kä'äts, kä'ä jä' kyuytyunë't.

⁷ Tu'kwiinyë mja'ata'aktë't, katij mwittit'të tëjkmtëjkm, kaytyë, uuktë tukkë'yë pëntij kuttëjjk moojyëtë'p, jä'ku paajt'ajjtë'p nitukkë'yë tumpëttëjjk jyuu'nypyëktë't.

⁸ Ku oymyaa'jë kajjp mja'at'të't jäts yëkxon jaa'y mwaatsowëtë't, kaytyë jëë'kxtë pëntij jaa'y mmoojyëtë'p;

⁹ yëktso'oktë nitukkë'yë pa'amjaa'y, jäts xnëëjmëtë't: "Winkon miits ixyam mtaa'nxyë Yës Teety kyuttujjkë'n."

¹⁰ Pën maj kajjp jaa'y mkakkuppekyëtë, pitsëmtë tuu'äjpy nits mwa'antë't:

¹¹ ¡Ixyam ëëts nax'ooky nwixity mati' ëëts tëj ntekyëjjxy xpaaty, najjts kyä'äjxjë'ëkt jäts nittij pöky ëëts nkajakyepy pëntsoj miits mjat'të! Nnijawëtë jäts winkonnë'p Yës Teety kyuttujjkë'n.

¹² Ixyam ëjts nnikkäjpxy, jä' xëëw ku jaa'y yëktëytyu'ntë't mëjk jä' kajjp y'ayo'otë't, kä'ä në'n sodomë'tjaa'y y'ayo'otë't.»

Kajjp mati' kattëyjyaaw'eetyë'p

¹³ «¡Ayoopë mijts Corazín! ¡Ayoopë mijts Betsaida! Ku y'ijjty Yës Teety tyëknikkä'äjxjë'ëjky myëjk'ajjt jäm Tiro jäts Sidón kyajjpjotm, naa'xkë'n tëj tyëknikkä'äjxjë'ëky ya'at kajjpjoojty, tëënë jä' jyeexyë jä' jaa'y Yës Teety t'awimpijjt'eenyëtë, yo'tspëwit y'ijjty tpëmtë jäts jaam tnityakkujaa'xkëjjxë najjts tyëknikkä'äjxjë'ëktë't jäts y'ijxkajptë'p tyakkoo'ny.

¹⁴ Kuts jä' xëëw tpaatt ku nijkxy Yës Teety nitukkë'yë jaa'y ttëytyüny, mëjk miits nijkxy ayoo'n mtakita'akyëtë kä'ä jä' në'n y'ayo'otë't jaa'y mati' jäm tsënäätyë'p Tiro mëët Sidón.

¹⁵ Jäts mijts Capernaúm, ¿mwinmaypy mijts jäts mja'atp tsapjotm? ¡Kä'äts, jënjötypy mijts mnëjkxt xëmëkkunäxy!

¹⁶ »Nits Jesús tnëëjmjaay y'ixpëjkpëttëjjk: —Pënpën miits matoojjëtë'p, ëjts jä' na'it xmatootë'p; jäts pënjäty miits mkakuppëjjkëtë'p, ëjts jä' na'it xkakuppëjktë'p; jäts mëët wyä'në tkakkuppëktë pën ëjts xpakkäjxp.»

Ku nituki'pxymyajkmäjtsk jya'anëtë

¹⁷ Jäts nituki'pxymyajkmäjtsk jotkujjknäxy jya'nëtë nits Jesús tnëëjmjäätyë: —¡Wintsën, mëët mëjjku'ujy tyumpëttëjjk ëëts tëj xmumatoy mijts këjxm!

¹⁸ Jäts Jesús nyëë'mxëtë: —Tëyë'm jä', ëjts kë'm tëj n'ijxy ku mëjjku'ujy tëj kyunäxy naa'xkë'n tu'uk witsuk.

¹⁹ Tëj ëjts miits majaaw nmo'oy, oyë'm tsaa'ny ok kajjpy xtawa'kpät'të't kä'ä tij mjattëtë't, jäts mëët mëjjku'ujy xmumata'aktë't.

²⁰ Katij yë' jä'yë xtajotkujjkta'aktë ku mëjjku'ujy mmumatoyëtë, jä' miits tajotkujjta'ak ku jäjpnë mxëëw tsapjötypy kyëjxja'ayë.

Jesús ttaxonta'aky Yës Teety

²¹ Nits Jesús, jotkujjknäxy Yës Teety jyaa'wë'nkëjxm wyaany: «Nteety'ajjt tsapjötypy, tsapwiin naxwiin niwintsën, mijts ntajotkujjktäkypy, jä'ku tëj mijts ayoopëttëjjk xtok'ijxy tukkë'yë mati' mijts yu'utsy myëk'ijtypy, jäts kä'ä tëj xtok'ijxy ixpekytyëjjk. Jä'ku najj mijts tëj xtsöky.

²² »Tëj ëjts nteety tukkë'yë xkë'moykyexy. Nippën tkanijawë pën Yës Teety y'uu'nk'eepy, nitteety jä' jä'yë tnijaa'w'eepy; jäts nippën tkanijawë pën tnitteety'eepy, y'uu'nk jä' jä'yë tnijaa'w'eepy, jäts pën Yës Teety y'uu'nk tyamutsöjkpy tyok'ijxëwyämpy.»

²³ Nits tni'ijxwimpijjty y'ixpëjkpëttëjjk, jäts jä' jä'yë tnëëjmjaay: «Jotkujk'ajjt pyaatp jä' jaa'y pënjäty t'ijxtë'p mati' miits ixyam m'ijxtë'p m'aa'xtujktë'p;

²⁴ tëy ëjts nwa'any jäts nimay yëk'ayuujknajxpëttëjjk mëët yëkkuttujkpëttëjjk ojts tja'ijxwa'antë mati' miits ixyam m'ijxtë'p m'aa'xtujktë'p, kä'äts ojts t'ijxtë; ojts tjamatowa'antë mati' miits ixyam matootë'p, kä'äts jä' tmatootë.»

Samaria'tjaa'y y'ijxpäjjt mati' myuku'uk tpa'ayoow

²⁵ Tu'uk pawaa'n yëk'ixpëjkpë ojts Jesús tmukkäjpxy, jäts nikoj tkäjpxy'ijxy jakëjxts tyëktëëy: —Wintsën, ¿tij ëjts ntu'mp jäts npaatt jüky'ajjt mati' Yës Teety y'awaa'n'eepy?

²⁶ Nits Jesús t'atsooy: —¿Ntsoj pawaa'n yä'äny? ¿Ntsots y'ijxë mijts xwinjawë?

²⁷ Nits pawaa'n yëk'ixpëjkpë y'atsooy: —Tsok mteety'ajjt tu'k'aaw tu'kjoojt, tu'kwinmaa'ny nits mëët tukkë'yë mmëjk'ajjt; jäts, "tsok mmuku'uktëjjk naa'xk mijts kë'm mnatsyökyë."

²⁸ Nits Jesús y'atsooy: —Naa'm jä', tunts jä' najj naa'xkë'n mwa'any nits jüky'ajjt xpaatt.

²⁹ Jäts pawaa'n yëk'ixpëjkpë kä'ä tjämjaa'w'ajjty ntsoj Jesús y'atsoojjë, nits tyëktëë'atëëjtsy: —¿Pënts ëjts nmuku'uk'eepy?

³⁰ Nits Jesús y'atsooy: —Tu'kyaajjë, tu'uk jaa'y tsyoo'jny Jerusalén jäts nyijkxy Jericó, nits mää'tspë tmëëtnawyaajtë tuu'am jäts tukkë'yë yyëkpëjkkëjjxjaay, wyit paat; jäts yyëkkojx'oo'jky, jawäänë mää'tspë kyayëk'oo'jkë.

³¹ Jäts kakkumaynë jäm tu'uk teety nyajjxy; kuts t'ijxpaajty jä' jaa'y tuu'aajy tëj tsyäätsyëkyexy jä'yë tjë'yo'ynyajjxy.

³² Jäts mëët jäm nyajjxy tu'uk tsaptëjjkniwintsën, kuts t'ijxpaajty jä' jaa'y, ninyajj mëët tjë'yo'ynyajjxy.

³³ Ku nyajjxy tu'uk Samaria'tjaa'y, kuts t'ijxpaajty jä' jaa'y, ojts tpa'ayoy.

³⁴ Nits twijjtsjë'ëjky, tsoyëjyaay tsyäätsyë jäts tsuujmjaay. Nits wyurrë këjxm tyëkpejjty, jäts tmëët'ajjty maj jäjp jaa'y myaaktantë, jäjpts tpa'am'ijxy.

³⁵ Kyujawom samaria'tjaa'y mäjtsk xëëw nittüny meeny tmooy kuttëjjk, nits tnëëjmjaay: "Ijxy'ijjtjääky ëjts ya'at jaa'y, pën janii'xyë'n ya'at meeny kyamata'aky jäts kë'm mjä'ä xyëktu'nt, nyëkwimpitp ëjts jä' ku ëjts jatu'kyaajjë nmi'nt."

³⁶ Kuts najj Jesús myatyakkëjjxy, nits tnëëjmjaay pawaa'n yëk'ixpëjkpë: ¿Ntsots mijts mwinmay pën ojts tmuku'ukwa'any jä' jaa'y mati' y'ijjty tëj mää'tspë tmëëtnawyaatyë?

³⁷ Nits pawaa'n yëk'ixpëjkpë y'atsooy: —Jä' pën pa'ayoojjë. Jäts Jesús tnëëjmjaay: —Nëjkxts mijts jäts tun ninyajj.

Jesús tëjk'ayo'oy Marta mëët María

³⁸ Nits Jesús jyaktuu'yo'ojy jäts jya'ajty tu'uk kajjpjötypy, jäjpts tu'uk to'oxytyëjjk wyatsoojjë mati' txëëw Marta.

³⁹ Jämts y'ijjty Marta tu'uk y'ütsy mati' txëëw María, jä'äts twinkunëjkx'ëëy Jesús jäts y'aaw y'ayuujk tmatoojjë't.

⁴⁰ Jäts Marta, tyunk jä' y'ijjty jä'yë tyajottakoypy, jakëjxts t'anëjkx'ëëy Jesús jäts tnëëjmjaay: —Wintsën, ¿kä'ä xka'oy'ijxy ku ëjts n'ütsy nityu'uk tunk xtamunikkääjkëkyexy? Nnëëjmë jäts ëjts xputtëkkë't.

⁴¹ Nits Jesús y'atsoojjë: —Marta, Marta, kyoojyë mijts mtunk xtajottakkoy jäts m'ampeky,

⁴² tu'ukëm jä' mati' ka'ijtp. Jä'äts tëj María twin'ijxy, nippën yë' kyappëjjkxë't.