Ị́jọ́ Uꞌbéŋá 7 - Ị́jọ́ Úꞌdí rĩ

Bị́lẹ́-ị̃ndụ́ liŋá ũkú ãwụ́ꞌbá ru mịfị́ ãcí rĩ ꞌbã ị́jọ́ sĩ rĩ

¹ Mâ ngọ́pị, ímba ị́jọ́ mádrị̂ kí tã ãzíla ímba ãzị́táŋá ꞌdĩ kí tã ími ásị́ gá.

² Ímba ãzị́táŋá mádrị̂ kí tã, mi dó sĩ adru ídri; ímba ímbátáŋá mádrị̂ kí tã cécé ími mịfị́ ífí áni.

³ Mí umbé kí ími tĩndrímváŋá kí agá; ísĩ kí ími ásị́ gá.

⁴ Ị́jọ ũndũwã ní, “Mi mâ ámvọ́pị ꞌi,” ãzíla ị́jọ́ vãŋá ní mi mâ kãká mgbã rĩ.

⁵ Ũndũwã la ími tã mba ũkú ãwụ́ꞌbá ru mịfị́ ãcí rĩ sĩ; angájó ũkú mịfị́ ãcí rĩ ꞌbã tị ũré sĩ ꞌbá uléjó rĩ gá.

⁶ Ụ́ꞌdụ́ ãlu mání ãngũ andré agâ dẹ̃rị́sã mádrị́ jó agá rĩ ꞌbã ílé gâ sĩ,

⁷ ándre kãrị́lẹ̃ ãzí ị́jọ́ nị̃lépi ku la kî, kí agá ꞌdãá ándre kãrị́lẹ̃ ãzí ũndũwã kóru la.

⁸ Kãrị́lẹ̃ ꞌdĩ la ilú agá gẹ̃rị̃ kónã rú ũkú ãwụ́ꞌbá ru mịfị́ ãcí rĩ ꞌbã sĩ uꞌájó rĩ gâ sĩ, ri mụlé gẹ̃rị̃ ãni rú ũkú mịfị́ ãcí ꞌdã drị́ jó andre gá rĩ gâ sĩ

⁹ ĩndró sĩ ị̃tụ̂ ꞌbã ꞌde agá ãngũ ꞌbã mọ̃nị̃mọ̃nị̃ gá ꞌdĩ,

¹⁰ ũkú ãwụ́ꞌbá ru ꞌdĩ amụ́ drị̃ ụfụlé ĩꞌdi be, sụ̃ ru ũkú mịfị́ ãcí rĩ áni wó ásị́ la agá mũlũmbẽ ga tré.

¹¹ Ĩꞌdi ị́jọ́ jọ rere drị̃ ũnzĩ sĩ ị̃ndụ́ la ri ĩꞌdidrị́ lị́cọ́ gá ku;

¹² Sáwã ãzí rĩ kí sĩ ĩꞌdi adru gẹ̃rị̃ ꞌbã kónã cí rĩ gá ãzí rĩ sĩ ĩꞌdi adru sụ̂ agá sĩ ꞌbá kí ũmbãjó.

¹³ Amvu kãrị́lẹ̃ ꞌdĩ kpãrã ãzíla drị̃nzá kóru jọ ĩꞌdiní:

¹⁴ “Ãndrũ ámba ũyõ mání nalé rĩ ꞌbã tã rá, má idé ídétáŋá ãzíla mádrị́ lị́cọ́ gâlé ĩzá cí.

¹⁵ Ị́jọ́ ꞌdĩ bã sĩ mání ãfũjó sĩ drị̃ ụfụjó mí be ꞌdĩ; ándrụ̃ mi rá ãzíla má ịsụ́ dó mi ꞌbo!

¹⁶ Má idé mgbọ́lọ́ mádrị̂ drị̃ sókã mịfị́ níríŋá uꞌbélé gbẽtí ndú-ndú sĩ angálépi Mị̃sị́rị̃ gá rĩ sĩ.

¹⁷ Má ũyã mgbọ́lọ́ mádrị̂ ãdu ãjị́ ngụ̃lépi vĩrĩ umvelé mírã, álọ̃yị̃ ãzíla sínãmõnĩ rú rĩ sĩ ꞌbo.

¹⁸ Mí amụ́, ãma dó sĩ mí be ãyĩkõ lẽtáŋá drị̂ idé sĩ agajó kpere ụ̃ꞌbụ́tị gá; ãma dó sĩ ãma amvu mí be ãyĩkõ lẽtáŋá drị̂ sĩ

¹⁹ ãꞌdusĩku mâ ágô ĩꞌdi lị́cọ́ gá ꞌdãá ꞌdá yụ; mụ ãcị̃ ãzo la gá.

²⁰ ꞌDụ sĩlíngĩ bẹ́gị̃ gá tré ãzíla ĩꞌdi ꞌbã ãgõŋá la ụ́ꞌdụ́ ꞌdụ ãzo rú.”

²¹ Ũkú ꞌdĩ ulé dó ĩꞌdi tị ũré sĩ se dó kãrị́lẹ̃ ꞌdĩ drị̃ ị́jọ́ ãfũlépi ĩꞌdi tị gá ũré ꞌdĩ kí sĩ.

²² ꞌDe dó vú la gâ sĩ cọtị́ cécé mọ́nị̃gọ́ ꞌbã mụjó ãngũ sĩ ĩꞌdi lịjó rĩ gá rĩ áni cécé mũcé ꞌbã ꞌdejó ímbá agá rĩ áni

²³ kpere ꞌé ꞌbã úgú la sõ agá, cécé ãríŋá ꞌbã ru afụjó ímbá gá nị̃ŋá kóru rĩ áni, ĩꞌdi ĩꞌdi ꞌbã ídri ãvĩ rá.

²⁴ Ị́jọ́ ꞌdĩ sĩ mâ anzị, ĩmi are ma; ĩꞌbã bị́lẹ́ ị́jọ́ mání jọlé rĩ arejó múké-múké.

²⁵ Lẽ ĩmi ásị́ ꞌbã ja ru gẹ̃rị̃ ũkú ꞌdĩ áni rĩ drị̂ kí agá ku jõku ĩmụ ụ̃cẹ̃ trũ ĩꞌdi vú gâ sĩ ku.

²⁶ Fẽ ãgọbị ũꞌbí ị̃lị̃kị̃ kí rá ãzíla ꞌbá ũꞌbí kãlãfe lalé ku la ũdrã kí rá.

²⁷ Jó ĩꞌdidrị̂ ĩꞌdi gẹ̃rị̃ ꞌbá agụlépi drã gá rĩ ꞌi ãzíla ĩꞌdi ꞌbá agụ ãngũ ꞌbá drãlépi rá rĩ ꞌbadrị̂ gá.