Ị́jọ́ Uꞌbéŋá 19 - Aringa

¹ ꞌBá lẽmẽrí ị́jọ́ pịrị rĩ ngalépi rĩ ndẽ; ꞌbá azalépi aza-azâ ị́jọ́ pịrị rĩ jọlépi ku rĩ rá.

² Adrujó ãvá trũ ị́jọ́ nị̃jó ku rĩ adru múké ku; yãjó ị́jọ́ sĩ yã-yã rĩ la fẽ mi gẹ̃rị̃ pịrị rĩ aꞌbe rá.

³ ꞌBá la lị́kị̃ ají ĩꞌdi drị̃ gá aza ĩꞌdidrị̂ sĩ; ꞌdã ꞌbã ũngúkú gá ĩꞌdi dó unu Úpí ụrụꞌbá gá.

⁴ Málĩ la fẽ la mi adru wọ̃rị́ trũ ũꞌbí ru; wó ꞌbá lẽmẽrí rĩ ꞌbã wọ̃rị́ka kí ĩꞌdi aꞌbe pírí rá.

⁵ Sãdínĩ ĩnzó rĩ kí ꞌbá ĩnzõ jọlépi ambamba rĩ be icó kí ĩcẽlé drị̃rịma ịsụ́ŋá gá ku.

⁶ ꞌBá ũꞌbí kí mũkẽ ndrụ̃ ꞌbá ãko fẽlépi fẽ-fẽ rĩ ꞌba rụ̂ sĩ; ãzíla ꞌbá pírí kí adru wọ̃rị́ ꞌbá ãko fẽlépi fẽfẽ rĩ ãni.

⁷ ꞌBá lẽmẽrí rĩ ꞌbã kãká drĩ kí dó ĩꞌdi ngụ̃ ũnzí; ꞌbá ĩꞌdi ꞌbã wọ̃rị́ka rú rĩ kí dó apá ĩꞌdi sĩ íngõpí! Drĩ táni uꞌde kí vú gâ sĩ mãmálá ꞌbãŋá trũ tí, icó kí ịsụ́lé ku.

⁸ ꞌBá ũndũwã ịsụ́lépi rĩ lẽ ídri ĩꞌdidrị̂ rá; ꞌbá vãtáŋá trũ rĩ la drị̃lẹ́ba ịsụ́ rá.

⁹ Sãdínĩ ĩnzó rĩ icó ĩcẽlé drị̃rịma ịsụ́ŋá sĩ ku; ãzíla ꞌbá ĩnzõ jọlépi ambamba rĩ icó ĩcẽlé drị̃rịma ịsụ́ŋá gá ku.

¹⁰ ꞌBá azalépi aza-azâ rĩ ní uꞌájó ꞌbá kụ́rẹ́nị́ ru rĩ áni rĩ drĩ dó adru ũnzí; ãtíꞌbó ní adrujó úpí ru úpí ꞌbã ngọ́pị ní rĩ ꞌbã ũnzĩkãnã lã dó adru íngõpí!

¹¹ ꞌBá ũndũwá ru rĩ la ũmbã ĩꞌdidrị̂ drị̃ ụtrị́ rá; ĩꞌdi ãrútáŋá ịsụ́ ĩꞌdi ꞌbã ị́jọ́ ũnzí ꞌbã ãrígó tị ũfẽjó ku rĩ sĩ.

¹² Úpí ꞌbã ũmbã ĩꞌdi cécé kẹ̃mị̃ ní awájó rĩ áni; wó ĩꞌdi ꞌbã ásị́ ị̃gbẹ̃ ĩꞌdi cécé andrẹlị́ká kalépi ásé drị̃ gá rĩ áni.

¹³ Ngọ́tị́ŋá azalépi aza-azâ rĩ la átẹ́pị̃ ní lị́kị̃ ají; ũkú ru lẽlépi ãwãŋá sĩ rĩ ĩꞌdi cécé uzogó ralépi jó agá sáwã pírí sĩ rĩ áni.

¹⁴ Átẹ́pị la jó kí aꞌbe málĩ be ãwítã rú anzị ĩꞌdidrị̂ ꞌbaní; wó Úpí la ũkú ị́jọ́ ífí vãlépi rá rĩ fẽ nĩ.

¹⁵ Ũvũ la ꞌbá fẽ ụ́ꞌdụ́ kolé káyĩ rá; ãzíla ru drị́ alójó ku rĩ la ꞌbání ãbị́rị́ ají.

¹⁶ ꞌBá ãzị́táŋá tãmbalépi rĩ mba ru ídri tã rá; wó ꞌbá ãzị́táŋá tãmbalépi ku rĩ la drã rá.

¹⁷ ꞌBá ãko fẽlépi ꞌbá lẽmẽrí rĩ nî rĩ fẽ ãko ꞌdã Úpí nî; ãzíla Úpí la ĩꞌdi ũfẽ rá.

¹⁸ Íco mî ngọ́tị́ŋá ị̃ndụ́ ímbátáŋá ru ꞌdĩ sĩ iza drĩ ru ku rú; ídrĩ ĩꞌdi ị̃ndụ́ co ku, ĩꞌdi mụ drãlé rá.

¹⁹ Lẽ ꞌbá ásị́ ãcí rĩ ꞌbã ũfẽ ị́jọ́ ĩꞌdi ꞌbã izalé rĩ rá; ídrĩ ĩꞌdi ãzã ko rá, lẽ íko ĩꞌdi ãzã vúlé rĩ sĩ ị̃dị́.

²⁰ Mí are ị́jọ́ sĩ ími bụ̃rọ̃ jọjó rĩ ãzíla mí ãꞌị̃ ímbátáŋá rá; ị́jọ́ ꞌdĩ sĩ mi dó sĩ drụ́zị́ drị̃lẹ́ gâlé adru ũndũwá ru.

²¹ ꞌBá la ị́jọ́ kí ụ̃tị̃ ĩꞌdi ásị́ gâlé ũꞌbí ru; wó ị́jọ́ Úpí ꞌbã lẽlé rĩ la ru idé nĩ.

²² Ãko ꞌbá ꞌbã lẽlé rĩ ĩꞌdi lẽtáŋá ukólépi ku rĩ ꞌi; adrujó lẽmẽrí rĩ ĩꞌdi múké ndẽ adrujó ĩnzóꞌbá rĩ rá

²³ Úpí ụ̃rị̃jó rĩ la ꞌbá agụ ídri gá; ꞌbá ụ̃rị̃ ꞌdĩ trũ rĩ ásị́ la la adru ị̃gbẹ́ ru, ị́jọ́ ũnzí aló ĩꞌdi ku.

²⁴ Ũvúꞌbá la ru drị́ su mgbi íná ãtĩjó rá; ãzíla icó íná sulé ru tị gâlé ku.

²⁵ Íco ꞌbá idemará ru rĩ ꞌbã ị̃ndụ́, ꞌbá ũndũwá kóru rĩ kí dó sĩ ímbátáŋá ụ̃nị̃; mí uzá ꞌbá ị́jọ́ vãlépi rá rĩ drị̃ gá, ĩꞌdi dó sĩ ímbátáŋá ꞌbã ị́jọ́ vã.

²⁶ ꞌBá átẹ́pị̃ ní ũcõgõ fẽlépi ãzíla ãndrẽ drolépi lị́cọ́ agá rá rĩ; ĩꞌdi ngọ́tị́ŋá drị̃nzá ãzíla ásị́ ị̃gbẹ̃ ãkõ ajílépi la.

²⁷ Mâ ngọ́tị̂, ídrĩ gã ímbátáŋá arelé úmgbé; ígã ꞌdã ị́jọ́ nị̃ŋá.

²⁸ Sãdínĩ ũnzí rĩ la ị́jọ́ liŋá pịrị rĩ ꞌbã idemará ru; ãzíla ĩꞌdi uꞌá ị́jọ́ ũnzí sĩ ãyĩkõ sĩ cécé íná ãjị́-ambamba rĩ sĩ rĩ áni.

²⁹ Ídé drị̃rịma bábá ꞌbá idemará ru rĩ ꞌba nî; ãzíla ꞌbá azalépi aza-azâ rĩ kí ála kí ũngúkú co rá.