Luke 7 - Lahta1 ဟိုစွမ့်ဖီပလူးဖုန်းထွို့ ကိုယ်တော်ကြွာလေ ကပေရနောင်ဝိန်းကု။ 2 ဝိန်းအွယ့်ဝိန်းကု ရောမကန်မင်းစုံ တပ်ပဒူ အိုအပလား။ အာဆောင့်အွယ့် ဟွမ့်ခိုထွို့ အာကွိုလတန် စွမ်းအိုအပလား။ စွမ်းအွယ့်ပလား အိုခိုဟတာထွို့ ဗွမ့်တွို့အီစီ့စီ့။ 3 တပ်ပဒူအွယ့်ပလားအွယ့် ထွိုင်းဟွမ့်ကိုယ်တော်ယေရှု ခရားထွို့ အာကြွလေ ဂျူးမျိုစာပဒူဖုန်းကိုယ်တော်ဆောင့် ဖီပင်းဖီကုဖီအာစွမ်းတာ။ 4 ပလူးအွယ့်ဟိုအွယ့် လျှောက်လိုကားကိုယ်တော် ဖီကကူညီကျွယ်းဖီ တပ်ပဒူစွမ်း။ ပဒူးအွယ့်ဟိုအွယ့် "တပ်ပဒူဒွိုးပလားဒွို့ ပျန့်တိုပလူးခံစာထွိုက် ကိုယ်တော်တကူညီ။ 5 အာဒီ့ ရက်က့ခွိုနွယ်ဖုန်းထွို့ ပျန့်တိုပလူးကလူဖီး က့ဓမ္မာရုံအဘာစာတို" လျှောက်ကာနိန်းအွယ့်။ 6 ကွက်အွယ့်မဲ့ ကိုယ်တော်ယေရှုအွယ့် ကြွကျိန်းတွဲ့ အာကား။ ထွိုင်ကျိန်းတွို့ဘို့ထွို့ တပ်ပဒူအွယ့်ပလားယွမ်ခါ့ တပ်ပဒူအွယ့် အန်ကြွလေး အာဖောဝ်ဖုန်းထွို့ "ဗွယ်၊ ခံခုဲင်ငါးတာထွို့ ကျန်ကြွာ့လေမာ။ ငါးဒွို လိထွိုက်တန်ဟာနောင် ကိုယ်တော်ကြွလေးငါးယွမ်တာဟာ။ 7 ဒါ့မဲ့ ငါးအီးကလေခွဲဗွယ်လဲ့ လိထွိုက်တန်ဟဒေါင်ငါး။ ကိုယ်တော်မေမိန့်လင်းငါးမထွို့ ငါးစွမ်းရောဂါဒွို အီးတမာကျိန်းတိုး။ 8 ငါးကျွော့်ခလားကူ့ဒွို ကျေးစာဖုန်း အိုဟေးတန်ထွို့ အာကားအွယ့် နားခံကားဘား ငါးအမိန့်။ ငါးမေမိန့် ကျေးစာအပလား 'စွာလုဲင်' လဲ့ အာစွာ ဘာ။ ငါးမေမိန့် ကျေးစာဒါအပလား 'လေးလုဲင်' လဲ့ အာလေးဘာ။ ငါးမေဒေါင့် ငါးစွမ်းဖုန်း 'မိုးဒွိုးဘာ' အာကားအွယ့် မိုးကားဘာ" အာလျှောက် ကိုယ်တော် နိန်းအွယ်။ 9 ကိုယ်တော်ယေရှုထွိုင်ဟွမ့် တဒေါင့်နိန်းအွယ့်ထွို့ အာဟွမ်ဆန်ယွမ်းတွိုးထွို့မဲ့ "ငါးဘသာဒေါင့်နားက့ဒွို အစ္စရေးအရပ်ကူ့ဒွို့ ခသျှီဖိုကောင်း ပလူးယွမ်းအန်းယွမ်တွို့ နောင်နိန်ဒွို့" အာမိန့်လူထုကတွဲ့ဒါ အာကန်းစာ့စားဖုန်းနိန်းအွယ့်။ 10 ကကြွလေဒါပလူးဖုန်း ထွိုင်ကျိန်းတွိုယွမ်းခိန် သျှီးလိုကားဘား စွမ်းအွယ့်ပလား အိုခိုလိ။ 11 ထွို့ဒါ့အငြီ့ ကိုယ်တော်ယေရှုအွယ့် နောင်အာတပည့်ဖုန်း ထွိုင်ကြွလေးကာ နာဣနဝိန်းခိန်း လူထုဖုန်းလည်း တွဲလေးလိုကား။ 12 ကိုယ်တော်ယေရှုအွယ့် ထွိုင်တွိုဝိန်းကန်တင်းငွာ့ဆောင့်ကုခါ့ ပလူးအစုအွယ့် အီစင်းဂြိုးကာ ပလူးစီ့အပလားအွယ့်ကြား ယိုးထန်လိုကား မြိုင်ဖောင် ဝိန်းခူးနောင်။ ပလူးစီ့အွယ့်ပလားအွယ့် ပျန့်မယ်မုဲင်မော်ဖုခုအပလားတိုထွို့ ဝိန်းစာဖုန်းလဲ့ လေတုန်းတွဲ့လိုကားအာ။ 13 ဗွယ်ဒီ့ ထွိုင်းသျှီပမွော်အွယ့်ပလားထွို့ သညင်လွန်ထန်းအာထွို့မဲ့ "ကျန်းငွိုမာ" မိန့်လင်နိန်းအွယ့်။ 14 ထွို့မဲ့ အာဒီ့ ကြွာ့လေး ပလားကယိုးလေဒါ မြိုင်ဖောင်ဆောင့်ထွို့ ခွိုင်းပလူးစီ့စင်းဒေါင်အာကျွော့်။ အွယ့်ခါ့အွယ့် ပလားယိုးလေး မြိုင်ဖောင်စားဖုန်းလဲ့ အိုထွိုင်းဖီးကားထွို့ ကိုယ်တော်အွယ့် " ပသားပီ၊ ငါဒေါင့်ဖီနားဒွို ။ထွိုင်ချန်းလုဲင်း " မိန့်လေနိန်းအွယ့်။ 15 ပခုပီကစီ့ဒါအွယ့်ပလားအွယ့် ထွိုင်းအိုနင်းတာထွို့ တေးဒေါင်ထန်ငို။ထွို့မဲ့ ကိုယ်တော်ယေရှုအွယ့် ပြန်အပ်ချားဒါ့ ပသားပီးအွယ့်ပလားအမွိုဆောင့်။ 16 ပလူးကားကအိုအွယ့် ဟွမ်ဆန်တဝါ့ကာထွို့ "က့ကူဒွို အရိယာဆူတော်ကောင်မြတ်အပါး ပိုထန်လိထွို့။ ဗွယ်ဖရာဒွို ဟောင့်ဖီလိထွို့ အာပလူးဖုန်း" အန်ဖရာလိုကာ ဗွယ်ဖရာဂုဏ်တော်နိန်းအွယ့်။ 17 ထွိုမဲ့ ကိုယ်တော်ယေရှု ကမိုးစေကန်းဒါတာစတင်းဖုန်းအွယ့် ကျွက်လေတွို့ ယုဒကန်အကန်အာနောင် ဒေသရပ်ဘို့ကားကအိုကူ့။ 18 ထွို့မဲ့ ယောဟန်တပည့်ဖုန်းအွယ့် ဒေါင်ဟွမ်ကားယောဟန် အကြောင်ခရာကားကအိုထွို့မဲ့ အာအွယ့် ဟောင့်တပည့်အန်ငြီ့ပလား။ 19 အာအွယ့် "ကိုယ်တော်ဒွို ပျန့်တို အိုဒေါင့်စေးကန်းဒါ အီကြွာ့လင်း အွယ်ပါးနဝ်၊မေဟလဲ့ ကားအီ အိုပွိုင်းဘားထွိုင်ဒါ့ ဒါ့အပလားနဝ်" ဖီးကတစီ့လျှောက်ကိုယ်တော်ဆောင့်ထွို့ အန်ကြွလေအာတပည်အန်းတငြီ့။ 20 ပလားအွယ့်ဟို့လည်း တွို့လေးကာ ကိုယ်တော်ယေရှုဆောင့်ထွို့ "ကားကကွင်းဒါး ဗွယ်ကဒေါင့်စေးကန်းဒါး အီကြွာ့လင်း အွယ်ပါးနဝ် မေဟလဲ့ ကားအီ အိုပွိုင်း ဘားထွိုင်ဒါ့ ပုဂ္ဂိုလ်ဒါ့အပါးနဝ်'' ငွတ်သျှီ့မင်္ဂလာဆရာဒူး 'ယောဟန်' အန်းချန့် ကားလေတစီ့ဗွယ်နိန်းအွယ့်မဲ့ ဖီကြွလေက" လျှောက်ဒင်းကားနိန်းအွယ့် ဟနေ။ 21 အွယ့်ခိန်းဒီ ကိုယ်တော်ယေရှုအွယ့် အိုကူ့ဖီးပလူး ပျန့်တစာ့တဟွို့စားဖုန်းထွို့ အာဝါစွာ့ဖီတာလေခိုဟအိုပူစာဖုန်းကာဟ အာဒီ မိုးခါ့ဖီးပတုဲင်း ပလူးမေးသျှီ့စာဖုန်း။ 22 ထွို့မဲ့ ကိုယ်တော်အွယ့် "ဒေါင့်နေချာဒါ့ ယောဟန် နားက့ကသျှီဘာဒွိုးဟိုလုဲင်။ ပလူးမေးသျှီးစားဖုန်း ဒွိုးခ မေးခါ့ချားကားလိ၊ ပလူးကျွော့ခင်းလိခိုငါ့စာလဲ့ စစွာ့ကားဒါးလိ၊ နူနာရောဂါစာလဲ့ ရောဂါ တမာကင်ကားလိ၊ နာလိဟွမ့်ဟစားလဲ့ နာပြန်ဟွမ်ကာချားလိ၊ ပလူးစီ့လဲ့ မွမ့်ချားလိ၊ ပလူးဆင်ရဲစားဖုန်းလဲ ဟွမ်ကားဘာလိထွို့ မင်္ဂလာစတင်း။ 23 ပလူးလိဆန့်ကင်ထွို့ ငင်းပယ်ဟ ငါးကမိုးဖီတာအမှုဖုန်းဒွို ဗွယ်ဖရား အီဖီတို တခိုမင်္ဂလာ" မိန့်နိန်းအွယ့်။ 24 ယောဟန် ကကြွလေဒါ တပည့်ဖုန်း ထွိုင်ကျိန်းကာထွို့ ကိုယ်တော်အွယ့် ဟိုဖီးနေ လူထုပရိသတ်ဖုန်း ယောဟန်ခရား နိန်းဒွို့ " နားကားဒွိုး လေးကာနိုင့်ကန္တာရ ကူ့ထွို့ အီးလေဟွိုင့်ကာ တဟနာ။ ပုန်းမ့မွိုင်ထွော့ထွော့ဖုန်း စယွိုးတွဲ့ဒါ ကန်ဇျီးဖုန်းနောဝ်။ 25 နားက့ ထန်ကာခူးနောင့်ထွို့ ဘာသသျှီကာ တာဟနာ။ ဘာသသျှီကားပလူးအိုတို့ ကန်ကျိန်းခို ကန်ကျိန်းဖု စားဖုန်းနောဝ်။ ပလူးအိုတို့ဒေါင် ကန်ကျိန်းတန်ဖိုဒူထွို့ ခံစားစည်းစိမ်းစာဖုန်းဒွို အီသျှီဒါဘို့ ခွမ်ခမ်းဟိုကုဟို့။ 26 နားကားထန်ကာခူနောင့်ထွို့ ဘာသခွဲကား ပုဂ္ဂိုလ်မျိုးနိန်းမာစား။ဘာသသျှီ အရိယာဆူတော်ကောင်အပလားနောဝ်။ မေတို။ ငါးဘာသဒေါင့် နားက့ဒွို အာဒီ့ ပျန့်တိုပလူး ဒူမြတ်လွို့ထိုင် အရိယာဆူတော်ကောင်။ 27 လိတ်ကျမ်ကူ့ နေစေကန်းယောဟန်ခရာဒီ့ " ငါးဖရာဒွို့ ဖုခုကအီလေ့ဒါ ကလေ့မေငါ့ဖီးကအိုးရျန်းစေကန်းထွို့တာ အကီစွက် ငါးအီကြွဖီ စေတမာန် " နိန်းအွယ့်ဟနေ။ 28 ငါးအီဒေါင်နားက့ဒွို့။ ကမ်ဖာကူ့ဒွို့ ပလူးမြတ်ထိုင်ယောဟန် လိအန်းလွူဖိုးကောင်း အပလားပလားဟာ။ဒေါင့်မားလဲ့ ဗွယ်ဖရာသာသနာတော်ကူ့ ပလူးလီခံဘာဟဖီအရေစာဒီ့ အီမြတ်ထိုင်ယောဟန်" မိန့်နိန်းအွယ့်။ 29 တေတွို့ အခွန်ကောက်စာဖုန်း ပလူးကနာဒါ ကိုယ်တော်ယေရှုငိုမိန့်ဖုန်းစာ ကားကအိုအွယ့် လွိုက်နာကာ ဗွယ်ဖရာ ဩဝါဒထွို့ ခံလိုကာငွတ်သျှီမင်္ဂလာ ယောဟန်ဆောင့်။ 30 ဒေါင့်မာလဲ့ ဖာရိရှဲဖုန်းနောင် ကျမ်ဒါဆရာဖုန်းအွယ့် ငြင်းလိုကာ အီလွိုက်နာ ဗွယ်ဖရာဩဝါဒနောင် အီခံဘာ ငွတ်သျှီမင်္ဂလာယောဟန်းဆောင့်။ 31 ထွို့မဲ့ ကိုယ်တော်ဒေါင့်ဆွက်ဒါ့အွယ့် "နားက့ဒွို ဗွမ့်တဟနား၊ ပျန့်ပလူးနိန်းမာကြား မေဒေါင်ဘားအွယ့် 32 ဗွမ့်တွို့နောင် ပသားပီဖုန်း အိုနင်းအွမ်လိုကာတာ ကန်စီ့ကူ့ ထွို့ဒေါင့်လိုကာ"က့ဒုန်ဖီတချင်လဲ့ နားကားလိကျူဟ၊ တချင်နေတလွိုးတာလဲ့ နားကားလိငွိုဟ" နိန်းအွယ့်။ 33 ငွတ်သျှီမင်္ဂလားဆရာယောဟန်အွယ့် ရှောင်စား၊ အိုဟတာကမွမ်းဒါ ဝိုင်ထွို့ မေစလေစွာ့တာလဲ့ နားကားအွယ့်အီဒေါင့်ကာ "ယောဟန်ဒွို တလိခိုဟ အိုပူ" နိန်းအွယ့်။ 34 ဒေါင့်မာလဲ့ ဖရာဖုခုအွယ့် မေအန်အိုတာနောင်ပလားလငါ့လဲ့ နားကားအွယ့် "ယေရှုဒွို ပျန့်ပလူးမက်တအန်းတအိုထွို့ ပေါင်းဖောဝ်နောင် ပလူးကျက်တခွန်စာ၊ ပလူးမိုက် အပျက်စာဖုန်း" ဒေါင်ကားလေနိန်းအွယ့်။ 35 ဒေါင့်မာလဲ့ ဟွိုင့် ပလူးကထောင့်တွဲ့ဒါး ကလေအွယ့်ဘောင်ထွို့ သိဒါတို ဗွယ်ဖရာတနယ်နောင်ပညာအိုဒွို့ အိုမှန်တို" မိန့်နိန်းအွယ့်။ 36 ထွို့မဲ့ ဖာရိရှဲအပလားအွယ့် ပင့်လေ ကိုယ်တော်ယေရှု ဖီလေဆုံဖီ ယျန်မွိုင်ဟအယွမ်ကုတာ။ ကွက်အွယ့်မဲ့ ကိုယ်တော်အွယ့် ကြွလေဖာရိရှဲယွမ်ထွို့ အီအန်းတား အိုနန်းတာခုံဆောင့်။ 37 အွယ့်ခါ့ ဝိန်းအွယ့်ဝိန်းကူ့ဒီ ပမွော်အန်ကားနန်အိုအပလား။အာဟွမ့်ကိုယ်တော် အိုနန်းအန်တာ ဖာရိရှဲယွမ်ကူ့ အွယ့်ကြားမဲ့ အာလေးလေအွယ့််ကု ထွို့ ကျိလေးနောင် ရေမွှေးတန်ဖိုဒူ အကောင်။ 38 ထွို့မဲ့ အာအွယ့် လေးလေကိုယ်တော်ကန်စာ့ထွို့မဲ့ အိုထွိုင်ငွိုနောင်တာထွို့ မိုးကြိုဖီကိုယ်တော်ခင်နောင် အာမေ့သျှီ့ ထွို့ ဒူ့ကိုဖီးနောင် ခူစွမ်အို အာခူလောင်။ ထွို့မဲ့ နူ့လင်းကိုယ်တော်ခင်အစုံထွို့ ကျွော်ဖီးနောင်ရေမွှေး။ 39 ပလူးကပင့်လေဒါ ကိုယ်တော်ဖာရိရှဲပလားအွယ့် ထွိုင်းသျှီးထွို့ တာအွယ်ဗားထွို့ "ပလူးဒီ့ပလား မေပျန့်ယွမ် အရိယာဆူတော်ကောင်မှန်လဲ့ အာအီသိဘာတို ပမွော်ကခင်းဒါအာဒီ ပျန့်ပမွော် နိန်းမာ။ ပျန့်ပမွော် လီခိုဟလဲ့ အီသိဘာတို" အိုယူသကူ့နိန်းအွယ့််။ 40 ကိုယ်တော် ဖရေချာဒါ့အာအွယ့် "ရှိမုန် ငါးလူဒေါင့်နားအိုအဘာ" မိန့်နိန်းအွယ့်ထွို့ 'ရှိမုန်'အွယ့် "ဆရာ၊ တဟနာအယ်၊ ဒေါင့်လုဲင်" ဒေါင့်နိန်းအွယ့်။ 41 ကိုယ်တော်အွယ့် "ပလူးဖီးငှာကွမ့်စာ အပလားဆောင့်အွယ့် ပလူးအန်းတငြီ့ ချွော့်ငှာကားကွမ့်။ အပလားကူ့အွယ့်နီအို ကွမ့်ဗီ အန်းငေရား၊ ဒါအပလားအွယ့် အိုကွမ့်ဗီအန်းငေစီ့။ 42 အာကားအွယ့် လီဆပ်ချာဒါဟ နီဗွယ်မဲ့ နီဗွယ်အွယ့် မေဒေါင့်လူးအာကားအန်းတငြီ့ အိုလူဆပ်ချာဒွမ်း နီးဖုန်းနိန်အွယ့်အွယ့် လမာအီကေဇူတင်လွို နီဗွယ်အယ်" တစီ့လင်းအာနိန်းအွယ့်။ 43 ရှိမုန်အွယ့် "နောင်ငါးတယူဒွို ပလူးနီ ပေါင်ဒူစာအွယ့်ပလား အီကေးဇူတင်းလွို့တို" လျှောက်ဒင်းလေနိန်းအွယ့်။ ကိုယ်တော်အွယ့် " နားမှန်းတို" မိန့်နိန်းအွယ့်။ 44 ကိုယ်တော်အွယ့် လှည့်ဟွိုင့်ချာဒါ့ ပမွော်အွယ့်ပလားဒိုင့်ထွို့ " နား ဒင်းစတိတိနဲ့အာ။ ငါးကြွလေးနားကားယွမ်ခါ့ နားနုဲင့် ဖီဟသျှီ့ အီကူးကျီ ငါးခင်းတာ။ ဒေါင့်မာလဲ့ အာဒီ့ ကူဖီးငါးခင်နောင် အာမေးသျှီ့ထွို့ ဒူ့ကိုဖီနောင်အာခူစွမ်း။ 45 နားနုဲင့်၊ ငါးထွိုင်ကြွလေးထွို့ နားနုကြိုဟငါး။ အာဒီ့ နုငါးခင် ခမင်လိုင်းလိုင်းတွို့။ 46 နားနုဲင့် ဒေါင်နန်းမန်သံလွင်ငါးလဲ့ လီကျွော်ဖီဟငါးခူ ဒေါင့်မာလဲ့ အာဒီကျွော်ဖီတွို့ငါးခင်ဒေါင် ရေမွှေး တန်ဖိုဒူး။ 47 ကွက်အွယ်မဲ့ ငါးဒေါင့်နားဒွို့ "ပမွော်ဒွိုးပလားဒွို အီခံဗာ တခွင်လွှတ်ဖီ အာအပျက်ဖုန်းဟေတန်အွယ့်မဲ့ အာရက်ဟေတန်။ပလူးခံဗာ တခွင်လွှတ်အပျက်ဆျန်စာဒီ့ အာကအီရက်ဆျန်ဟို့။" 48 ထွို့မဲ့ ကိုယ်တော်အွယ့် "ငါးခွင်ဖီလူးလိ နားအပျက်ဖုန်းကာကအို" မိန့်လင်း ပမွော်အွယ့်ပလားနိန်းအွယ့်။ 49 ထွို့မဲ့ ပလူးအိုနန်းတာလငါ့စာနောင် ကိုယ်တော်အွယ့် " အပျက်မသဲ ခွင်လွတ်ဒါ ကာအိုးဒေါင့်ဒါဒွို လာမာ" အာကားချင်ချင် ဝေဖန်ဒေါင်ကားနိန်းအွယ်။ 50 ဒေါင့်မာလဲ့ ကိုယ်တော်ယေရှုအွယ့် " ကွက်နားယွမ်းအန်ငါးလောင်မဲ့ ဗွယ်ဖရာဒွို ကယ်လိနား။ နားစစွ့ာငင်တာဒါလိထွို့" အာမိန့်ပမွော်အွယ့်ပလားနိန်အွယ့် ။ |
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.