Luke 22 - Lahta1 တအန်ငြီလွတ်ပွဲ ကဟောင့်ဒါ ပသခါပွဲအခိန်း ဘို့တွိုလေလိ။ 2 ပုရောဟိတ်အဒူအကဲဖုန်း နောင် ကျမ်ဒါဆရာဖုန်းအွယ့် စကန်းလိုကာ ပလူးဖုန်းမဲ့ ကွင်လိုကာ တနည် အီမိုးစီ့ကိုယ်တော်ယေရှုနိန်းမာတာ။ 3 ထွို့မဲ့ မာနတ်အွယ့် ပူကျိန်း သာဝကအစီ့ငြီ့ပါးကု ကပါဒါ ယုဒရှကာရုတ်ကု။ 4 ယုဒအွယ့် ရီ့ဘို့လေ ပုရောဟိတ်အဒူအကဲဖုန်းနောင် ဗိမာန်တော်အရာအိုစာဖုန်းဆောင့်ထွို့ အီအပ်ဘာကိုယ်တော်ယေရှု အာကာကျွော့်ကု နိန်းမာစား တင်ပင်နောင် အာကာ။ 5 ပလူးအွယ့်ဟိုဖုန်းလဲ့ ဟွမ့်ခိုလိုကာထွို့ အီဖီလိုကာ ယုဒကွမ့်တာ စဖိုတူလိုကာ။ 6 ယုဒအွယ့်လဲ့ စဖိုတူးလေအွယ့်မဲ့ ပလူးစုဝေတာ မေလီအိုဟခိန်း အီကျန်းကိုယ်တော်ယေရှုတာ အာအိုပွိုင်း အခါ့ခိုခိန်းဟနေ။ 7 ထွို့မဲ့ တအန်ငြီလွတ်ပွဲငြီး ကဟောင့်ဒါ ပသခါပွဲတာ ပူဇော်ဘာ ဘဲပီ မငြီးဒွို တွိုလေလိ။ 8 အွယ့်ကြားမဲ့ ကိုယ်တော်ယေရှုအွယ့် "က့အီအန်းကိုကိုကားပွဲ ပသခါတာ လေပျင်ကာချန်းလုဲင်" မိန့်ပေတရု နောင် ယောဟန်နိန်းအွယ့်။ 9 အာကာအွယ့်လဲ့ "ကိုယ်တော်၊ဘာသအန်ချန့်ကားပျင် ကမာကု"တစီ့လျှောက်ကာ နိန်းအွယ့်။ 10 ကိုယ်တော်အွယ့် " နားက့မေနွူးကျိန်းဝိန်းကုခါ့ နားကအီခွယ်ဘာပလူးယိုးလေနောင် သျှီ့ပွိုင်းဒူပလား ထွို့ ကျိန်းတွယ့် ပလူးအွယ့်ပလား ကနွူးကျိန်ယွမ်ကုလုဲင်။ 11 မေထွို့ "ကဆရာအွယ့် အန်ချန်တစီ့နား နေ့ဖီခန် အာနောင်တပည့်ဖုန်း အီအန် ပသခါပွဲယျန်မွိုင်ဟတာ" ဒေါင့်ကာယွမ်စာနိန်းအွယ့်လုဲင်။ 12 ထွို့မဲ့ ယျန်စာအွယ့် အီးဟောင်ထန်းနားက ယွမ်းလွို့ထွို့ အီနေ ခမ်းလန်လေတန် အခန်း နေ။ရျန်းကာ အွယ့်ခန်ကုလုဲင်" မိန့်နိန်းအွယ့်။ 13 ထွို့မဲ့ ပေတရု နောင် ယောဟန်အွယ့် စစွာ့ထန်ကာထွို့ သျှီလိုကာနောင် ကိုယ်တော်ဒေါင့် အွယ့်ကြားမဲ့ ရျန်းစေးကန်း တဲဝါးလိုကာ ပသခါပွဲ။ 14 အခိန်းအန်တာ တွိုလေးထွို့ ကိုယ်တော်အွယ့် အိုနန်းတာ ခုံလောင် နောင် အာတပည့်ဖုန်း။ 15 ထွို့မဲ့ ကိုယ်တော်အွယ့် "ငါးဒွို ခံစာဝေဒနာဖုန်းထွို့ ခစီ့ကောင်းခါ့ ပွဲပသခါဒွိုးဘာကု ငါးဘသာအန်ကိုနောင် နာက့။ 16 ငါးဒေါင့်နားက့ဒွို၊ ဗွယ်ဖရာဒွို တေတွို့ပသခါပွဲထွို့ တွိုတွို့ကန်စွက်ခိန်း မေလီတွိုကောင်း အခိန်းအီအုပ်စိုဘာ ပလူးကျွမ်ပလားပလား၊ခမ်းလန် ကျွမ်တောင်တောင် လီအန်ဒွမ်ဟာ ပွဲပသခါ အလိုင်လိုင်ဟ" မိန့်နိန်းအွယ့်။ 17 ထွို့မဲ့ ကိုယ်တော်အွယ့်ချွော်ကလောက်ထွို့ အန်ဖရာဖရာဂုဏ်တော်ထွို့ "ချွော်ဝိုင်ကလောက်ထွို့ ဝေအိုလိုကာလုဲင်။ 18 ငါးဘာသဒေါင့် နားကဒွို့၊ ငါးဒွို့ တွိုတွို့ ဗွယ်ဖရာသာသနာတော် ကပို အီအိုဒါ့ တသျှီ့ကအိုဒါး စပျစ်ကုထန်လီမေဟာ" ဒေါင့်နိန်းအွယ့်။ 19 ထွို့မဲ့ ချွော်တကိုးထွို့ အန်ဖရာ ဗွယ်ဖရာဂုဏ်တော်ထွို့ ပီ့သကိုထွို့ ဖီးတပည့်ဖုန်း "တကိုးဒွိုးဘာဒွို ဖီနားက့တာ ပျန့်ငါးနန်ဟနေ။ အိုယူငါးထွို့ အန်ကာလုဲင်" မိန့်နိန်းအွယ့်။ 20 အန်ကာနိန်းအွယ့်ထွို့ ကိုယ်တော်အွယ့် အိုပန်နောင်ကလောက်ထွို့ "စပျစ်သျှီ့ ဒွိုးဘာဒွို့ပုံဆောင်ဖီငါးကျွူတို။ကျွူဒွိုးဘာဒွို့ ပျန့်တို ငါးဟွာစေးကန်း ကျွူခံသစ္စာသ့ နားက့လောင်။ 21 ဒေါင့်မာလဲ့ ပလူးအီအပ်ငါး ငါးရန်ဆူကျွော့်ကုဒွို့ အိုအန်ကိုတိုငါး။ 22 ဗွယ်ဖရာဖုခုဒွို အီပျန့်တိုနောင် ဗွယ်ဖရာအိုလူအတွိုင်လဲ့ ပလူးအီသစ္စာဖောက် ဗွယ်ဖရာဖုခုစာတာဒွိုး ခုဲင်းယွမ်တွို့" မိန့်နိန်းအွယ့်။ 23 ထွို့မဲ့ တပည့်ဖုန်းအွယ့် က့ကုဒွို လမာအိုကြံတာနိန်းအွယ့် အချင်ချင် တစီ့လိုလေးလိုကာ။ 24 ထွို့မဲ့ တပည့်ဖုန်းအွယ့် အာကာကုဒီ့ အီမှတ်ဘာ လမာပျန့် ပုဂ္ဂိုလ်အမြတ်စွက် အချင်ချင် ငြင်းလိုလေလိုကာ။ 25 အွယ့်ကြားမဲ့ ခွမ့်ခမ်းကန်လငါ့စာဖုန်းဒီ့ အုပ်ချုပ်ကာ အာကာကန်စာဖုန်း နောင်အမိန့်အာဏာလဲ့ပလူးအာဏာစာအွယ့်ဟိုအွယ့် အန်ချန့်ဟောင့်ချာတိုအာကာနန် နောင်ပလူးမိုးဖီ အမျာကျိုစာထွို့ ဘာသအန်ချန့်သိလိုကာ အာကာဒွို့ ပျန့်ခေါင်းဆောင်မြတ်ဖုန်း။ 26 ဒေါင့်မာလဲ့ နားက့ဒွို လီလူပျန့်ဟာ နောင်ပလူးအွယ့်ဟိုဖုန်း။ နားက့ကုဒီ့ ပလူးအရေပါအရာအိုစွက်စာဒွို့ အိုလူပျန့်ဗွမ့်နောင် ပလူးအပီစွက်စာထွို့ ပလူးပျန့်ခေါင်ဆောင်စာဒွို အိုလူအိုခံအောက်နန် ဗွမ့်နောင်စွမ်း။ 27 ပလူးအီအန်တာ အိုနန်းတာခုံလောင်စာ နောင် ပလူးကပျင်ဖီးဒါ တအန်တအိုစားဒွို့ လမာမြတ်လွို့။ ပလူးကအိုနန်းတာ ခုံလောင်စာအွယ့်ပလား မြတ်လွို့ထိုင်မေဟနောဝ်။ ဒေါင့်မာလဲ့ ငါးဒွို နားက့ကု ပျန့်တိုနောင် ပလူးပျင်ဖီ တအန်တအိုစာ။ 28 နားက့အွယ့် ဖီးကေ့ဖိုဟငါး အလိုင်လိုင်။ ကြုံခွယ်ဘာနောင် တစို့တနာတမိုးရှုပ်ဖုန်းလဲ့ နားက့ဒွို့ ပျန့်တို ပလူးအိုငါးဒိုင့်စာဖုန်း။ 29 ဗွမ့်နောင် ငါးဖာ့ ဖီငါး အာသာသနာတော် ငါးသာသနာတော်ဒွိုလဲ့ ငါးဖီအပ်နားက့အွယ့်မဲ့ 30 နားက့ဒွို့အိုငါးသာသနာတော်ကုထွို့ မဲ့ အီအိုနန်းငါးခုံလောင်ထွို့ အီအန်း၊အီအို့လိုကာဘာ။ထွို့မဲ့ နားက့ဒွို အီအိုနန်းဘာ ပလ္လင်လောင်ထွို့ အီအုပ်စိုဘာအစ္စရေးခွိုနွယ့် အစီ့ငြီးစု။" 31 "ရှိမုန်၊ရှိမုန်၊နာလုဲင်၊ ဗွမ့်နောင်လုဲင်စာဒီ့ ခွယ်ခြာစေးကန်း ဘွူ့ကုမ့်နောင် ဘွူ့ကွော မာရ်နတ်ဒီ့လဲ့ ဖီကကျန်နာက့ အပလားပလားကြား အကျွူလီ့ထွို့ အခွင်အခါ။ 32 ရှိမုန်၊ နားတယွမ်အန် ဖီးကျန်းကေ့မာ ငါးဆူတောင်ဖီတိုနားတာ။ နားမေကျိန်းငါးဆောင့်ခါ့ ဖီအားဒါ့ ပလူးကပျန့်ဒါ နားပွော်ဝေဖုန်း တယွမ်အန် ဖီယွမ်အန်ငါးလောင်လုဲင်" မိန့်နိန်းအွယ့်။ 33 ထွို့မဲ့ ပေတရုအွယ့် "ဗွယ်၊ ထောင်ကုယောဝ်၊ ပျန့်တွို့တစီ့ယောဝ် အီတွယ်လေးကိုယ်တော်တာ ငါးပျင်စေကန်းထွို့လိ" လျှောက်ဒင်ကိုယ်တော်နိန်းအွယ့်။ 34 ထွို့မဲ့ ကိုယ်တော်အွယ့် "ပေတရု၊ ငါးအီဒေါင့်နားဒွို။ဒွိုးငြီးကု ထျက်စာ့ခအွော့်ကောင်ခါ့ နားအီငြင်းဟ နားသီ့ဟငါး အန်တွမ့်လိုင်မှန်မှန်" မိန့်နိန်းအွယ့်။ 35 ထွို့မဲ့ ကိုယ်တော်အွယ့် "ငါးဒွို ဗီဆန်၊ တန်ပွို့ နောင် ခင်ဖာဖုန်းငါးလဲ့ ဖီကျီ့လေးဟ နားက့ထွို့ ဖီကြွလေး နားက့ခါ့ တခုဲင်တညစ်တစွိုစွို အိုနဲ့ နားက့ဆောင့်"တစီ့ တပည့်ဖုန်း နိန်းအွယ့်ခါ့ တပည်ဖုန်းအွယ့် "လီအိုဘာဟာ" လျှောက်ကာနိန်းအွယ့်။ 36 ထွို့မဲ့ကိုယ်တော်အွယ့် "ဒွိုခါ့ ဗီဆန်အိတ် မေအိုလဲ့ ချွော်ကာလုဲင်။ တန်ပွို့ မေအိုလဲ့ ချွော်ကာလုဲင်။ နားက့ဆောင့် ဒို့မေလီအိုဟလဲ့ အန်ကား ကန်ကျိန်းအခို့ထွို့ အန်ပလီးကာဒို့လုဲင်။ 37 ငါးဒေါင့်နားက့ဒွို၊ 'အာဒွို အီခံဘာ ပလားမှတ်ပျန့် ပလူးလွန်မာအပျက်စာ' နောင်လိတ်ကျမ်ကု ကနေ့စေးကန်းဒါ ငါးခရာအတွိုင် အီဝေစွမ်းဘာအွယ့်ကြားမဲ့ဟနေ" မိန့်နိန်းအွယ့်။ 38 ထွို့မဲ့ ကိုယ်တော်အွယ့် "ဗွယ်၊ ဟွိုင့်လုဲင်။အားကုဒွို့ ဒွိုအိုအွို အန်ငြီ့ဘာ" ထွိုင်လျှောက်ထွို့နိန်းအွယ့်ခါ့ ကိုယ်တော်အွယ့် "လွမ်လိထွို့" မိန့်နိန်းအွယ့်။ 39 ထွို့မဲ့ ကိုယ်တော်အွယ့် ဗွမ့်နောင် အိုမိုးတစေစေ ကြွာ့ထန်သံလွင်ခေါင့်လောင်။ တပည့်ဖုန်းလဲ့ တွယ့်လိုကာ အာကန်စာ့။ 40 မေတွိုထွို့ အွယ့်ကူထွို့ ကိုယ်တော်အွယ့် "ဖီကျန်းခံဘာမာ ပလားအော်မာ ဆူတောင်လိုကာ ဗွယ်ဖရာဆောင့်လုဲင်" မိန့်အာတပည့်ဖုန်းနိန်းအွယ့်။ 41 ထွို့မဲ့ ကိုယ်တော်အွယ့် အိုအာကာဆောင့်ထွို့ လေးလေ ခမ်လန် ယားတျာ ခါ့လောက်လေး အလိုင်တာကုမဲ့ အိုနန်းခေါက်တာထွို့ 42 "ဖား၊ ငါးဆောင့် အီပျန်ထန်ဘာ တပျန့်ကေ့အွယ့်ဟိုဖုန်း ဖာ့ ဗွယ်ဖရာ အလိုမေလီအိုဟလဲ့ ဖီကျန်ပျန့်မာ။ ဒေါင့်မာလဲ့ ဖာ့ ဗွယ်ဖရာအလိုမေအိုတိုအွယ့် ဖီပျန့်ထန်လုဲင်။ ဖီးကျန့်ပျန့်မာ နောင်ငါးအလိုအတွိုင်မာ" ဆုတောင်နိန်းအွယ့်။ 43 ထွို့မဲ့ လွှော်ကအိုဒါ ဝိန်းခမ်းကုအပါးအွယ့် တွို့လေထွို့ လေဖီအာကိုယ်တော်။ 44 ကိုယ်တော်အွယ့် ခံစားဘာယွမ်တွို့ ဝေဒနာဖုန်းထွို့မဲ့ စုအာရုံထွို့ ထွိုင်ဆူတောင်တာခါ့ အိုကိုယ်တော်ဆောင့်ကလင်းဒါ ငန်တင့်သျှီ့ဖုန်းအွယ့် ဗွမ့်တွို့ ကျွူဖုန်း အိုလင်ကြိုက်တာ ဟန်ယာလောင်။ 45 ကိုယ်တော်အွယ့် ဆူတောင်တာနိန်းအွယ့်ထွို့ ပြန်ကျိန်းချာဒါ့ အာတပည့်ဖုန်းဆောင့်ခါ့ အာထွိုင်သျှီ တပည့်ဖုန်းအွယ့် သပီဟွမ့်ရွိုးထွို့ အိုငြီ့ပိန်းလိုကာတာခါ့ 46 ကိုယ်တော်အွယ့် "ဘာဟနာ အိုငြီ့ပိန်းလိုကာတာ။ ထွိုင်ထွို့ ဆူတောင်လိုကာတာ ဖီကျန်းလင်တေးမာ ပလားတအော်ကုမာလုဲင်" မိန့်ထိုင်ဒါ့ အာတပည့်ဖုန်းနိန်းအွယ့်။ 47 ကိုယ်တော်အိုမိန့်တာနိန်းအွယ့်ခိန်း ပလူးကျွိုဒူအကျွိုအွယ့် တွိုလေးလိုကာ ကိုယ်တော်ဆောင့်။ သာဝက အစီ့ငြီ့ပလားကု ကပျန့်ဒါ ယုဒအွယ့်ပလားအွယ့် ကွဲအွမ့်ဟောင်လေး ပလူးကျွိုအွယ့်ဟိုဟနေ။ ယုဒအွယ့် ရီဘို့ကိုယ်တော် အီနူ့တာ။ 48 ကိုယ်တော်အွယ့် " နားဒွို့ နောင်တနူ့ထွို့ အီအပ် ဗွယ့်ဖရာဖုခု ရန်ဆူကျွော့်ကုနောဝ်" တစီ့လေအာနိန်းအွယ့်။ 49 တပည့်အပလား ထွိုင်သျှီတာပျန့်အွယ့်ဟိုခါ့ "ဗွယ်၊ က့အီတွိုက်ဘာအာကာနောင်ဒို့နောင်" တစီ့လျှောက်နိန်းအွယ့်။ 50 ထွို့မဲ့ ပေးလင် ပုရောဟိတ်အဒူအကဲအပလားစွမ့် နောင်ဒို့ထွို့ ပေးဘာအာနာလာပန်ချိုဒိုင့်ထွို့မဲ့ တကျွောကေ့။ 51 ကိုယ်တော်အွယ့် "အန်ဆောဝ်းကေ့ချန်း တျာနုဲင့်ငါ့" မိန့်နိန်းအွယ့်ထွို့ ကိုယ်တော်အွယ့် ခွိုင်းကလင်တေးဒါး စွမ်းအွယ့်ပလား နာလားနောင်ကျွော့်ထွို့ ပြန်စွက်ဖီချာဒါ့နောင် ပကတိ။ 52 ထွို့မဲ့ ကိုယ်တော်အွယ့်မိန့် ပလူးကအီလေကျန်းဒါအာစာ ပုရောဟိတ် အဒူအကဲဖုန်း၊ အိုပွိုင်းဗိမာန်တော်စာဖုန်းနောင် ဂျူးခေါင်းဆောင်ဖုန်း "နားက့နုဲင့် ဗွမ့်တွို့နောင် အီကျန်းကာကျွန် ကျီ့လေးကာနောင် ခွမ်းဖုန်း၊ဒို့ဖုန်း ထွို့ မိုးဟနာလေးကာငါးဆောင့် 53 ငါးအိုဗိမာန်တော်ကု ကျွမ်ငြီးငြီးခါ့ နားက့ဘာဟနာ လီလေကျန်းကာဟငါး။ဒေါင့်မာလဲ့ ဒွိုးခိန်းဒွို့ ပျန့်နားက့ခိန်းထွို့ မာရ်နတ်တာလဲ့ ပျန့်တိုအီမိုးအာ တကေ့ဖုန်းခိန်း" မိန့်လင်နိန်းအွယ့် ။ 54 ထွို့မဲ့ အာကာအွယ့် ကျန်းလိုကာ ကိုယ်တော်ထွို့ ဟောင့်လေးလိုကာ ပုရောဟိတ်အဒူစွက်ပလားယွမ်ကုခါ့ ပေတရုအွယ့် အိုပေါင်းတ့တ့ထွို့ ယောင်လေးတွယ့် အာကာကျန်စာ့။ 55 ပလူးဖုန်း အိုနန်းဝိုင်ထွို့ အိုဒီးလိုကားမီး ယွမ်းကွင်ကုခါ့ ပေတရုအွယ့် အိုနန်းတာ အာကာခါ့ကု။ 56 ထွို့မဲ့ စွမ်းမွော်ပလားအွယ့် သျှီ့ထွို့ ပေတရု အိုနန်းတာထွို့ ယီးအာနောင်နုန့်ထွို့ "ပလူးဒွိုးပလားဒွို့လဲ့ ပျန့်ဖောဝ်းနောင် ပလူးကကျန်းစေးဒါ ယေရှု" ဒေါင့်နိန်းအွယ့်။ 57 ထွို့မဲ့ ပေတရုအွယ့် "ပမွော်၊ ငါးလီသိဟာအာဟာ" ငြင်းနိန်းအွယ့်။ 58 ထွိုင်ငီးထွို့ ပလူးအပလားအွယ့် သျှီပေတရုအွယ့်ကြားမဲ့ "နားဒွိုလဲ့ ပျန့်အာကာကုအပလား" ဒေါင့်နိန်းအွယ့်။ ဒေါင့်မာလဲ့ ပေတရုအွယ့် "ငါးဒွို အာကာကု လီမေဟာ" ငြင်းထိုင်ဒါ့ နိန်းအွယ့်။ 59 ဒါ့အနာရီကုအာ့ ပလူးဒါ့အပလားအွယ့် "ပလူးဒွိုးပလားဒွို အိုဂါလိလဲကုထွို့ အိုကိုနောင် ယေရှုဒွို သေချာတို" ဒေါင့်သေချာယွမ်တွို့နိန်းအွယ့်။ 60 ဒေါင့်မာလဲ့ ပေတရုအွယ့် "နားဒေါင့်ဒါတာခရာဖုန်းဒွို ငါးလိသိဟာ" ငြင်းထိုင်ဒါ့ နိန်းအွယ့်။ တေးကဒေါင့်နိန်းအွယ့်ထွို့ စာ့အွော့်ထန်တာ။ 61 ထွို့မဲ့ ကိုယ်တော်အွယ့် လှည့်ဟွိုင့်လေ ပေတရု။ပေတရုအွယ့် " မွိုင်ငြီးဒွိုးငြီးကု စာ့ခအွော့်ကောင်းခါ့ နားအီငြင်း နားလီသိဟငါး အန်းတွမ်လိုင်မှန်မှန် " အာယူလချား ကိုယ်တော်မိန်းစေးကန်းငို အွယ့်ကြားမဲ့ 62 ထန်ခုနောင်ထွို့ ငိုယွမ်ထန်တွို့တာ။ 63 ပလူးကအိုပွိုင်းဒါ ယေရှုစာဖုန်းဒီ့ မိုးပလား ထွို့ တွယ်လိုကာကိုယ်တော်။ 64 ဖီးကျန်သျှီဒါမာထွို့ တွိုင့်လိုကာ ကိုယ်တော်မေ့ဖုန်းနောင် ပိတ်ယာထွို့ " လမာတွယ်နာ ဒေါင့်လုဲင်" ဒေါင့်ကာနိန်းအွယ့်ထွို့ 65 နိတ်စက်ထွို့ ဒေါင့်စော်ကားလိုကာ ကိုယ်တော်နောင် နယ်အမျိုမျို။ 66 မွိုင်ထွိုင်လီ့ထွို့ ပုရောဟိတ် အဒူအကဲဖုန်း၊ ကျမ်ဒါဆရာဖုန်းနောင် ဂျူးခွိုမျို အဒူအကဲဖုန်းအွယ့် ကျက်ချေ တစီ့လိုကာ ကိုယ်တော် တရာလွှတ်တော်ကု။အာကာအွယ့် 67 "နားနုဲင့် ဗွယ်ကယ်ဆယ် မေရှိယ မေနဲ့၊ ဒေါင့်နေက့လုဲင်" ဒေါင့်ကာ ကိုယ်တော်နိန်းအွယ့်။ ကိုယ်တော်အွယ့် " ငါးမေဒေါင့် မေတိုအွယ့် နားက့အီယွမ်ငါး လီမေဟာ။ ငါးမေတစီ့နားကလဲ့ နားကအီးဖရေးလဲ့ မေဟ။ 68 ငါးမေတစီ့ နားက့ ဗွယ်ကယ်ဆယ်မေရှိယခရာအွယ့် နားက့ အီဖရေလီမေဟာ။ 69 ဒေါင့်မာလဲ့ တေးတွို့ဒွိုး ဗွယ်ဖရာဖုခုဒွို အိုနန်းတာ ဖာ့ဖရာဝေ့ကျွမ်နောင် တန်ခိုတော်၊ ဂုဏ်တော် အနန္တ ပန်ချို့ဒိုင် ထွို့ အီအုပ်စိုလိထွို့"မိန့်နိန်းအွယ့်။ 70 ထွို့မဲ့ ပလူးအွယ့်ဟို ကားကအိုအွယ့် မေနိန်းအွယ့်အွယ့် နားနုဲင့် ပျန်ဗွယ်ဖရာနောဝ်" ထွိုင်ဒေါင့်ကာနိန်းအွယ့်ထွို့ ကိုယ်တော်အွယ့် "ဗွမ့်နောင်နားက့ဒေါင်အတွိုင် ငါးဒွိုပျန့်နိန်းအွယ့်ဟနေ" ပြန့်မိန့်ချာဒါ့နိန်းအွယ့်။ 71 ထွို့မဲ့ ပလူးအွယ့်ဟိုဖုန်းလဲ့ " က့ဟွမ့်ဘာတိုလီးထွို့ ငိုကထန်ဒါ အာနာပလောင်ကုအွယ့်မဲ့ လီအိုလူဒွမ်ဟာ သက်သေ အီဒေါင့်ဆန့်ကျင်နောင်အာဟာ" ဒေါင့်လိုကာနိန်းအွယ့်။ |
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.