Luke 2 - Lahta1 အွယ့်ခိန်းကာလခါ့ ခွမ့်ခမ်းဧကရာဇ်ဩဂုတ္တုချိထန်းအမိန့်တရာဝင် ပလူးကအိုဒါး ရောမကန်မင်စုံခန်လားကျွမ်ပလားပလား အီကောက်ဘာအိမ်ထောင်စုစရင်း။ 2 ကောက်အိမ်ထောင်စုစရင်း အွယ်ဘာဒီ့ ကမိုးအကီစွက်ဒွို့ ပျန့်တို ဆီးရီးယားကန်ခွမ့်ခံကုရေနိ။ 3 အွယ့်မဲ့ ပလူးကားကအိုအွယ့် ကျိန်းလိုကာ အာကာဇာတိထွို့ လေသွင်လိုကားဘာ ပလူးစရင်း။ 4 ယောသပ်ဒွိုလဲ့ အိုဂါလိလဲကန်နာဇရက်ဝိန်းကုထွို့ လေးယုဒကန်ကဟောင်ဒါဗက်လင်ဝိန်း ကပျန့်ဒါ ခွမ့်ဒါဝိဒ်ဇာတိဝိန်းကု။ ကွက်တဟာနာမေဒေါင့်ဘာအွယ့် အာဒီ့ ပျန့်တိုခွမ့်ဒါဝိဒ်မိသားစုကုအပလားဟနေ။ 5 လေဆူစရင်းတာ အာကလေးတွယ့်ဘားနောင် မာရိဒွို့ ပျန့်တိုမာရိအွယ့်ပျန့် ပလူးဒေါင့်ပလောင့်စေးကန်းထွို့နောင်အာထွို့ မာရိအိုဒေါင့်လိအွယ့်စားမဲ့ဟနေ။ 6 အာကားအန်းတငြီ့ ထွိုင်းတွိုလေးအွယ့်ကုခါ့ မာရိလဲ့ အခိန်အန်းလွူဖူတွိုလေးလိထွို့။ 7 ထွို့မဲ့မာရိပွာလင်းဖုခုယင်ခိန်း ခမ်းလန်တည်ကုအွယ့် အာကာတာ ခမ်းလန်တည်လွတ်အိုဟမဲ့ အာအွယ့်ပလွမ်ပသားပီးနောင်တဘီ့ထွို့ ဖီးငြီ့လင်း ပူစာကလောင့်ကု။ 8 အွယ့်ဟအွယ့် ဘဲသီစာဖုန်း အိုသီလိုကာ ဘဲ အွိုက် ဗက်လင်ဝိန်းသီးလုဲင်ကွင်ကု။ 9 ဗွယ်ဖရာလွှော်အပါးကုဒီ့ ပိုလေကျွို့ အာကားမေငါ့ထွို့ အာကားတီးအွယ့်ခါ့လက်ထန်တွို့ဒေါင် ဗွယ်ဖရာ တန်ခိုတော်။ဘဲသီစာဖုန်းလဲ့ စကန်းလွန်နေတွို့။ 10 ထွို့မဲ့ ''ကျန်းစကန်ကားမာ၊ငါးကျိလင်းဖီ ပလူကားကအိုးအီဟွမ်နိတ်စပ်ခရား စတင်းခိုတို ဖရာဆောင့်တို လွှော်ဒေါင့်အာကာနိန်းအွယ့်။ 11 နောင်းမငြီးထူးမငြီးမြတ်ဒွို့ငြီးကုဗွယ်ကယ်ဆယ်စာ ဗွယ်မေရှိယဒွို ပွာလင်းလိထွို့ ခွမ့်ဒါဝိဒ်ဝိန်းကူ့။ 12 နားကားမေအီးသျှီးဘာ ပလားပလွမ့်ဒေါင်တဘိ ထွို့ အန်ဒင်စေးကန်း အွိုက် ပူစားကလောင့်ကူခါ့ နားကားအီးသိတိုအာ" လွှော်ဒေါင့်နိန်းအွယ့်။ 13 လွှော်လာငါ့ ကအိုဒါး ဝိန်းခမ်းကုလဲ့ လင်းလင်ကွို့ကားထွို့ လင်ပူးဇော်အန်းဖရားလိုကာ ဖရာဂုဏ်တော်နိန်းဒွိုး။ 14 ''အန်းဖရားလေတို ဗွယ်ဖရာကအိုဒါဝိန်းခမ်းကူ။ ကန်းဖားလောင် ပလူးပူဇော်ဒါးဗွယ်ဖရာစာကားကအို တငင်ငဲ့စားယာဖုန်း ဖီကအိုကာ ကျွမ်းပလားလား" ဒေါင့်လေနိန်းအွယ့်။ 15 ထွို လွှော်ဖုန်း ပြန်ကျိန်းချာဒါ အွိုက် ဝိန်းခမ်းကု ထွို့ ဘဲသီစာဖုန်းအွယ့် "က့လေးကာဗက်လင်ဝိန်း က့လေဟွေိုင်ကာ လွှော်ကဒေါင့်ဖီက့တပျန့်အွယ့်ဟို" အာကာချင်ချင် ဒေါင့်လိုကား။ 16 ထွို့မဲ့အာကားနျက်လေးကာထွို့ အာကာလေသျှီး ယောသပ်၊မာရိဒေါင် ပသာပီ အိုငြီ့တာ ပူစာကလောင့်ကု။ 17 ဘဲသီစာဖုန်း ထွေိုင်းလေသျှီးကား ပသာပီယေရှုထွို့ ဒေါင့်နေချားဒါ့ ယောသပ်၊မာရိ နောင် ပလူးကအိုအွယ့်ကုပါ လွှော်ကဒေါင့်နေ့အာကားဆိုင်နောင် ပသာပီအကြောင်ခရာဖုန်း။ 18 ပလူးကွယ်းနား ဘဲသီစာဒေါင့်အကြောင်ခရာ ကားကအိုဖုန်းလဲ့ ဟွမ်ဆန်လွမ်လိုကား။ 19 ဒေါင့်မာလဲ့ မာရိအွယ့် သိနန်းတစေထွို့ အိုယူထိုင်ဒါ့ အကြောင်ခရာအွယ့်ဘာ အပလန်းထွို့အပလန်း ။ 20 ဘဲသီစာဖုန်းလဲ့ ကျိန်းချာဒါလုဲင်ကွင်ကုထွို့ အန်ဖရာလိုကာ ဗွယ်ဖရာဂုဏ်တော်ထွိုမဲ့ အာကားချင်ချင် ဒေါင့်ချာကားဒါ့ လွှော်ဖုန်းဒေါင့်စေးကန်းအာကာ အကြောင်ခရာဖုန်းဒီ့ ပျန့်ထန်အမှန်။ 21 ကြာအန်စူးငြီးထွို့ မာရိဒေါင့် ယောသပ်ဒီ ဖီကမိုးဖီ ပသာပီအွယ်ပလား ဒွူ့ယာမင်္ဂလာပွဲ နောင်မောရှေ ဥပဒေ အတွိုင် ဖီနျန်းလိုကာယေရှု ဗွမ်နောင် လွှော်ကဒေါင့်စေးကန်း ထျက်အပသားပီးခတေကောင်းစမ်းဌေးအာဖွော်ကူ့။ 22 မောရှေဥပဒေအတွိုင်မငြီ့ပလာသျှီ့ထွေိုင်ထွို့မွိုဖဖုန်းအွယ့် ဟောင့်လေးကအာ ဂျေရုဆလင်ဝိန်းကု အီလေပူဇော်အာ ဗွယ်ဖရာဆောင့်။ 23 ဗွယ်ဥပဒေကုကနေစေးကန်းဒါးအတွိုင် "ဖုခုယင်ကျွမ်းပလားလားဒွို့ ဖီးကစင်းကလယ် ဗွယ်ဖရာဆောင့်။ အီအပ်ဘာ ဗွယ်ဖရာဆောင့်" နောင် 24 ဗွယ်ဥပဒေကုကနေစေးကန်းဒါးအတွိုင်''အီပူးဇော်ဘား ထူးကာဝူးအကြုံ မေဟလဲ့ ထူးကွူးအန်းငြီ့ဘား " ကဒေါင့်စေးကန်းနိန်းအွယ့် ဖီကပူဇော်လေ။ 25 အွယ့်ခိန်အွယ့် ယေရုရှလင်ဝိန်းကုဒီ့ ပလားနျန်းရှုမောင် အိုအပလား။အာဒီ မိုးတိုတမိုးဗွယ်ဖရာကြုပ်ထွို့ နာခံတို ဗွယ်ဖရာစည်းကမ်း။ အာဒီ ပျန့်တို ပလူးကအိုပိုင်းဒါး ဗွယ်ဖရာအီလင်ဖီအားထွို့ ကယ်ဆယ် ပလူးအစ္စရေးခွို အပလားမဲ့ ဉာဏ်ရောင်းတော်အွယ့် လင်းလင်အာဆောင့်ထွို့ 26 "နားဒွို မေလိသျှီ့ဘာကောင်း ဗွယ်မေရှိယဒွို နာလိစီ့ကောင်းဟ'' မိန့်အာနိန်းအွယ့်။ 27 မာရိ ဒေါင် ယောသပ်ကားအွယ့် ဖီးကမိုးဖီးဘာပသာပီ နောင်းဗွယ်ဖရာမိန့်အတွိုင်အီကပ်ပူဇော်တား ဟောင်လေကာဗိမာန်ကုခိန်း ဉာဏ်ရောင်တော်အွယ့် နေ့ကလေ့ဖီရှုမောင် ဖီးကာနျူးကျိန် ဗိမာန်တော်ကူ။ 28 ထွို့မဲ့ ရှုမောင်ဒီ အာဖို့ပသာပီယေရှု အာကျွော့်ကူထွို့ အန်းဖရာဂုဏ်တော်။ 29 "ဗွယ်၊ ဒွိုးခါ့ နောင်နားဖီးစေးကန်းငိုသစ္စာအတွိုင် ခွင့်ဖီချန်းနားစွမ်း ဖီးစီငင်ငင်ကေချန်း။ 30 ကွက်တဟာမေဒေါင့်ဘာအွယ့် နားကကြွလင်းဒါးဗွယ် အီကယ်ဖီပလူးဖုန်းတာဒွို ငါကြုံခွယ်ဘားယွမ်လိထွို့။ 31 နားကပျင်းစေးကန်းဒါ ပလူးဖုန်းတာ 32 နေတင်းရှာ နားအလိုတော် ကန်လငါ့ဆောင့်ထွို့၊ ဆောင်သရေဖီး ပလူးနားခွိုမျို အစ္စရေးစာတာ ဖီလိထွို့ အရောင်တော်" နိန်းအွယ့်ဟနေ။ 33 ယေရှုမွိုနောင်ဖအွယ့် ထွိုင်းဟွမ့်ရှုမောင်ဒေါင့် အာခရာထွို့ ဟွမ်ဆန်လိုကာ။ 34 ထွိုမဲ့ ရှုမောင်ဆုတောင်ဖီ အာကားထွို့ဒေါင့်မာရိ "ဗွယ်ဖရာဒွို ရွေးလိနားဖုဖီကခွဲခြာ အစ္စရေးခွိုမျိုဖုန်း သိဗွယ်ဖရာနောင် သိဟဗွယ်ဖရာစာ ။ အာနုဲင့်ပျန့်တို ဗွယ်ဖရာ ဘသာဖီစသိပလူးကားကအို နိမိတ်လက္ခဏာအဘားထွို့ ပလူးဖုန်း အီဆန့်ကင်ကားအာ။ 35 ပလူးဖုန်း တယူအိုသ့ကုဖုန်းလဲ့ အီပိုထန်နောင် အိုအတွိုန်ထွို့ တသ့ပီ တကူလဖုန်းလဲ့ ဗွမ့်နောင် ဒို့ကျိုအဘောင် ကျို့ကျိန်း အာကာသ့သာကုထွို့ အီခံစာကာဘာယွမ်တွို့" ဒေါင့်နိန်းအွယ့်။ 36 အွယ့်ကုပါ အာရှာခွိုနွယ်ဝင်း ဖနွေလဖုမွော် ပရောဖက် အန်နလည်း အိုအိုဗိမာန်တော်ကူ့။အာအွယ့် တိုယွမ်တိုပါထွို့ အိုကိုနောင်အာဝါး လအန်နျွိုနိန်းထွို့ 37 အာအိုမယ်မုဲင်တာ လနိန်းပေါင်း အန်စူးစီ့လျွူအွယ့်မဲ့ အဆက်အရွယ်ဒူထွို့ အိုပလာလေလိ။ အာဒီ့ စစွာ့ထန်ဒွမ်းဗိမာန်တော်ကူ့ထွို့ ဝယ်ဘို့ဖရာ၊ ခံဘို့သီလ ကျွမ်ငြီး ကျွမ်ဟ။ 38 အွယ့်ခိန်းကုဟို့ အန်နလေးအာကာဆောင့်ထွို့မဲ့ အန်ဖရားဗွယ်ဖရာဂုဏ်တော်ထွို့အာစဒေါင့်နေ ပသားပီးအွယ့်ပလားခရာ အွိုက်ပလူးကအိုပွိုင်းဒါ တကယ်ဆယ်ဖီ ဂျေရုဆလင်ဝိန်းစာဆောင့်။ 39 ထွို့မဲ့ မာရီ ဒေါင် ယောသပ်ကားအွယ့် မိုးကေးဖီထွို့ဗွယ်ဖရာပညတ်တော်အတွိုင်ထွို့မဲ့ ကျိန်းကာဒါ အာကားယွမ်းကအိုဒါ ဂါလိလဲဒေသ နာဇရက်ဝိန်းကု။ 40 ပသားပီ ထွိုင်းဒူးထန်ခါ့ ခရိုင်းဆန်ထွို့ ဝေကျွမ်းနောင် ဉာဏ်ပညာ အွယ်ကြားမဲ့ ခံဘာဗွယ်ဖရာဖီတခို။ 41 ကျွမ်နိန်းနိန်း မာရိနောင်ယောသပ် လေးလိုကာ ပသာခါပွဲတာ အွိုက် ဂျေရုဆလင်ဝိန်း။ 42 ကိုယ်တော်ယေရှု ဆက်ထွိုင်လထွို့ အစီ့ငြီ့နိန်း အာကာကားကအိုအွယ် ဗွမ့်နောင်လေးကျွမ်နိန်းနိန်း လေးလိုကာ ဝိန်းအွယ့်ကူ့ပါ အီလေမိုးကာပသာခါပွဲတာ။ 43 ပသာခါပွဲ ထွိုင်းထွို့ထွို့ ပသားယေရှု အိုကေ့ငါ့တိုဝိန်းကု အာကာသိကာဟထွို့ အာကာကျိန်းလိုကား။ 44 အာကာထင်မား ပသာယေရှုပါကျိန်းတွယ်တို ပလူးကျိန်းယွမ်အကျွိုကူ့ထွို့ အာကာဆက်ကျိန်းကားဒါ မငြီးအငြီး။အွယ့်မေထွို့မဲ့ အာကာကွင်းကချာဒါ ပသာယေရှု အွိုက်ပွော်ဖုန်း နောင် ဖောဝ်ဖုန်းခါး။ 45 ထွိုင်းလိမို့ဟထွို့ကျိန်းကွင်ကားချာဒါ ပသာယေရှု ဂျေရုဆလင်ဝိန်းကု။ 46 လအန်းတွမ်ငြီးထွို့ အာကားမို့ဒါ့ ကိုယ်တော်ယေရု အိုနင်းတာ ဂျူးဘာသားရေဆရားဖုန်းခါ့အွိုက်ဗိမာန်တော်ကွင်ကု။အာအိုနန်းနားတို အာကာငိုဆုံးမဖုန်းထွို့ အိုပြန်တစီချာဒါး အာကာ။ 47 ပလူးကဟွမ့်ဘာ ပသားယေရှုငိုကားကအိုအွယ့် ဟွမ်ဆန်လိုကား အတသိပညာ ဒေါင့် အာငိုပလန်းဖုန်း။ 48 ယောသပ်ဒေါင် မာရိကာ ထွိုင်မို့ပသားယေရှုထွို့ အာကာ ဟွမ်ဆန်လိုကာ။ အာမွိုအွယ့် ''ဖုခု၊ဘားဟနာ မိုးတေက့လောင် နိန်ဒွိုးအယ်။ က့ဒွို အိုနန်ငါးလွမ်းထွို့ ကွင်ကာနား'' ဒေါင့်အာ နိန်းအွယ့်။ 49 ပသားယေရှုအွယ့် "ဘာဟနာ ကွင်းကားတေ ဖုခုအယ်။ ငါးအိုဘိုတေပ ငါးဖယွမ်ကုဟို့လဲ့ သိကာဟနဝ်" ဒေါင့်ချားနိန်းအွယ့်။ 50 ဒေါင်မားလဲ့ ပသားယေရှုဒေါင်တဟနာ အာကားသိနာကာဟ။ 51 ထွို့မဲ့ပသားယေရှုအွယ့် နားခံယောသပ်ဒေါင်မာရိငိုထွို့ ကျိန်းတွဲ့ ချားဒါအာကာ နာဇရက်ဝိန်းကု။ အာမွိုအွယ့် တာကပျန့်ဒါ ကားကအိုဖုန်း အိုမှတ်စေကန်းဘို့ အာသသာကု။ 52 ထွို့မဲ့ကိုယ်တော်ယေရှုထွိုင်းဒူထန် ခရိုင်းဆန်ထွို ဝေ့ကျွမ်းဒေါင် ဉာဏ်ပညာအွယ့်ကြားခံဘာတခို ဗွယ်ဖရာဆောင့်ထွို့ ပလူးဖုန် ကားကအိုလဲ့ ဟွမ်နေဆက်လိုကား။ |
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.