Luke 18 - Lahta1 ထွို့မဲ့ ကိုယ်တော်ယေရှုအွယ့် ဟိုဖီတပည့်ဖုန်း သလီကေ့ဟ လီခံလျှောဟထွို့ အိုလူဆုတောင်တစေးတာအကြောင်ခရာအွယ့် မိန့်နေနောင် တတိုက်တွိုင်အဘာ။ 2 "အလိုင်ခါ့ ဝိန်းအဝိန်းကုဒီ လီစကန်ဟ ဗွယ်ဖရာ၊ အမျာကန်စာဖုန်းလောင်လဲ့ လီအန်ဒင်ရေဟ ပလူးဆုံဖြတ်တရာစာ အိုအပလား။ 3 မယ်မုဲင့်မွော် ကအိုဒါဝိန်းအွယ့်ကုအပလားအွယ့် "ဆုံဖြတ်မှန်မှန်ဖီ အာတရာ" အဆင်ဆင်လေဒေါင့် ပလူးအန်လာဒ် ဆုံဖြတ်တရာစာအွယ့်ပလားဆောင့်။ 4 ပလူးဆုံဖြတ်တရာစာအွယ့် ငြင်းမယ်မုဲင့်မွော်အွယ့်ပလား ကကွူလျှောက်တာဖုန်းခမိန်လိုင်လိုင် တွိုတွို့အချိန်ကမားမား။ ကန်စာ့စွက် ပလူးဆုံဖြတ်တရာစာအွယ့် "ငါးဒွို ဗွမ့်နောင် လီစကန်ဟ ဗွယ်ဖရာ ပလူးဖုန်းလောင်လဲ့ ငါးလီအန်ဒင်ရေဟာ။ 5 ဒေါင့်မာလဲ့ မယ်မုဲင့်မွော်ဒွိုးပလားဒွို အိုမိုးချုပ်တစေတွို့ငါးမဲ့ ကူညီကေ့မဲ့ဒါ။ နိန်းအွယ့်မဲ့ အာဒီ့အီအန်ဆောဝ်း လေးတစေ့တာငါးဆောင့်ထွို့ လေကွူ့လျှောက်တာဖုန်း" ဒေါင့်နိန်းအွယ့်" မိန့်နိန်းအွယ့်။ 6 ထွို့မဲ့ ကိုယ်တော်အွယ့် "စဉ်စာလိုကာ တရာဆုံဖြတ်စာအန်လာဒ်အွယ့်ပလား ကဒေါင့်တာဖုန်းလုဲင်"။ 7 ပလူးဆုံဖြတ်တရာ အန်လာဒ်စာ အွယ့်မသဲ အိုသညင် ပလူးကွူလျှောက်တာ ခမိန်လိုင်လိုင်စာအွယ့် မေဆုတောင်တာ ဗွယ်ဖရာဆောင့်ဒွို သိဒါတို အီလသေချာတို တခိုချမ်စာဖုန်း။ ဗွယ်ဖရာဒွို ရွေးအာထွို့ ဆုတောင်လျှောက်တာ အာဆောင့် ကျွမ်ငြီးကျွမ်ဟစာလောင် အာအီရေးဖီတို မေဟနောဝ်။ အီအိုနန်ဖီ အာကာတာ မေဟနောဝ်။ 8 ငါးဒေါင့်နားက့ဒွို၊ ဗွယ်ဖရာဒွို အီဆုံဖြတ်ဖီမွိုင့်တို အာကာ နောင်တရာရာ။ဒေါင့်မာလဲ့ ဗွယ်ဖရာဖုခု မေကြွချာဒါ ကမ်ဖာလောင်ခိန်းဒွို ပလူးလီယွမ်အန်ဟ ငါးစာဒွို အီအိုဟေတုဲင်းတို" မိန့်နိန်းအွယ့်။ 9 ထွို့မဲ့ ကိုယ်တော်ယေရှု မိန့်ဖီ အိုယူတိုး နန်တိုမြတ်ထွို့ ပလူးနျာ့ဖွိုဒါပလားလငါ့စာဖုန်း နောင်တတွိုက်တွိုင် အပုဒ်။ 10 "ပလူးအန်တငြီးအွယ့် ဆူတောင်တာတာ လေးလိုကာ ဗိမာန်တော်ကု။ အပလားအွယ့် ပျန့်ဖာရိရှဲထွို့ ဒါ့အပလားအွယ့် ပျန့်တခွမ်ကောက်စာ။ 11 ဖာရိရှဲအွယ့် အိုထွိုင်တိုတာ အပလားထွို့ "ဗွယ်ဖရာ၊ ငါးဒွို့ လောဘဒူဟနောင် ပလူးလငါ့၊ တရိုစာဟဖုန်းလဲ့ လီမိုးဖိုဟာ။ အီဖောက်ပြန် အိမ်ထောင်ရေလဲ့ အိုဟလီကာဟထွို့ လီဗွမ့်ဟနောင် တခွန်ကောက်စာဒွိုးပလားအွယ့်မဲ့ ကေဇူတင်တို ဗွယ်ဖရာ။ 12 ငါးဒွို အပတ်ကု အန်းငြီ့ငြီးအွယ့် ရှောင်စာထွို့ ဆူတောင်တာ။ ငါးကလဒါ ကွမ့်ကာကအို အစီ့ပွမ် အပွမ့်အွယ့် လှူ ဗိမာန်တော်ကု"ဆူတောင်တာနိန်းအွယ့်။ ဒေါင့်မာလဲ့ တခွန်ကျက်စာအွယ့် အိုထွိုင်ယားတိုတာ နောင်ပလားလငါ့ထွို့ မုငါးလဲ့ အာဟွိုင့်ထန်းဗွမ်ဟ။ အာအွယ့် လလွမ်တွို့ နောင်တထွို့ တွက်အာအင့် ထွို့မဲ့ "ဗွယ်၊ သညင်ဖီတပည့်။ တပည့်ဒွိုး ပျန်အကုသိုလ် မိုးတလီခိုဟစာ။" တောင်ပလန်းနိန်းအွယ့် ဟနေ။ 13 ဒေါင့်မာလဲ့ တခွန်ကောက်စာအွယ့် အိုထွိုင်ယားတာနောင် ပလားလငါ့ထွို့ မုငါးလဲ့ အာဟွိုင့်ထန် လီဗွမ်ဟ။ အာအွယ့် လလွမ်တွို့ နောင်တထွို့ တွက်အာအင့် "ဗွယ်၊ တညင်ဖီတပည့်။ တပည့်ဒွို့ ပျန့်ပလူးမိုးတလီခိုဟ အကုသိုလ်စာ အပလားအွယ့်မဲ့ ခွင်လွှတ်ဖီငါး" ဆုတောင်နိန်းအွယ့်။ 14 ပလူးအန်းတငြီ့အွယ့် ထွိုင်းကျိန်းတွိုကယွမ်းထွို့ ပလူးကလဒါး ဗွယ်ဖရာတခွင်လွှတ်စာအွယ့် ပျန့်ဖာရိရှဲမေဟ ပျန့်တို တခွန်ကောက်စာ။ ပလူးကထင်ဒူးတိုးနန်စာဒီ့ အီခံဘာ တနျလားထွို့ ပလူးကနျလားချာတိုး နန်စာဒီ့ အီခံဘာ တအန်းဖရား" မိန့်နိန်းအွယ့်။ 15 အငြီးကုဒီ့ ပလူးပိန်ပလားပလားအွယ့် ဟောင့်လေးလိုကာ အာကာဖုပီဖုန်းကိုယ်တော်ယေရှုဆောင့် ဖီခွိုင်းနောင်ကျွော့်ထွို့ ဖီကလတခိုဖုန်း။ ဒေါင့်မာလဲ့ တပည့်ဖုန်းအွယ့် သျှီလိုကာထွို့ ဖီကျန်းမိုရှုပ်မာ ကိုယ်တော်မာထွို့ ရေးလိုကာ ပလူးအွယ့်ဟို။ 16 ဒေါင့်မာလဲ့ ကိုယ်တော်အွယ့် ဟောင့်ပသာပီဖုန်းထွို့ "ဖီ ပသားပီဖုန်း လေးငါးဆောင့်ဒွိုး။ ကျန်ရေးမာ အာကာမာ။ အကြောင်ခရာအွယ့် ဗွယ်ဖရာသာသနာတော်ဒွို ဆိုင်နောင်ပလူးအွယ့်ဟိုဖုန်းမဲ့ဟနေ။ 17 ငါးဒေါင့်နားက့ အမှန်ဒွို၊ မေလီအိုဗွမ့်ဟနောင် ပသာပီအပလားအွယ့် နားဒွို့ ကမာခါ့ခါ့ယောဝ် အီနွူ ဗွယ်ဖရာသာသနာတော်ကုခွင် လဒါလီမေဟာ" မိန့်နိန်းအွယ့်။ 18 အလိုင်ခါ့ ဂျူးခေါင်းဆောင်အပလားဒီ့ "ဆရာခိုမြတ်၊ ဖီကလ ဆက်နိစ္စထာဝရဒွို့ အီမိုဘာနိန်းမာ"တစီ့လျှောက်ကိုယ်တော်နိန်းအွယ့်။ 19 ကိုယ်တော်ယေရှုအွယ့် "ကွက်တဟနာ ဟောင့်ငါးဒွို့ ခိုမြတ်။ လွို့ထွို့ ဗွယ်ဖရာ ပလူးခိုမြတ်စာလီအိုဟာ။ 20 စည်းကမ်းဖုန်းဒွို နားသိထွို့လိ။ အိမ်ထောင်ရေ ဖောက်ပလန်လဟ။ မိုးစီ့လဟ ပလူးဆက်။ တောင်ကွမ်းလဟ ပလားလငါ့ ဥစ္စာ။ ဒေါင့်တလျက်လဟ ပလူးလငါ့ခရာ။ ရိုသေဘာ မွိုဖဖုန်း" မိန့်နိန်းအွယ့်။ 21 ပလူးအွယ့်ပလားအွယ့် "ငါးဒွို့ လွိုက်နာကင်ကျန်တွယ့် စည်းကမ်းဒွိုးဟိုကားကအို ထျက်အိုပီခါ့ကာ" လျှောက်ဒင်နိန်းအွယ့်။ 22 ကိုယ်တော် ထွိုင်းဟွမ်းထွို ငိုအွယ့်ဘာထွို့ " နာအိုလူမိုးတုဲင်း တမိုးအဘာ။ အန်ကာ့ နားကပွိုင်ဒါတာကားကအိုဖုန်းထွို့ လှူဖီပလူးဆင်ရဲစာဖုန်းလုဲင်။ မေမိုးနိန်းအွယ့်အွယ့် နားအီလ ဥစ္စာစည်စိမ်ဖုန်း အွိုက်ဝိန်းခမ်းကု။ ထွို့မဲ့ တွယ်ငါးကျန်စာ့ နောင်ငါးတပည့်လုဲင်" မိန့်နိန်းအွယ့်။ 23 ဒေါင့်မာလဲ့ ဂျူးခေါင်းဆောင်အွယ့် ပျန့်ပလူးချမ်စာလွမ်စာအွယ့်မဲ့ ထွိုင်ဟွမ့်ငိုအွယ့်ဘာထွို့ သပီယွမ်တွို့တာ။ 24 ကိုယ်တော်ယေရှုအွယ့် သျှီပလူးအွယ့်ပလား သပီလွမ်တာထထွို့ ကိုယ်တော်အွယ့် " ပလူးချမ်စာစာဖုန်းအွယ့် အီနွူးဗွယ်ဖရာ သာသနာတော်ကုဒွို ခုဲင်ယွမ်တွို့။ 25 ပလူးချမ်စာအပလား အီနွူးဗွယ်ဖရာသာသနာတော်ကုတာ နောင်ကုလားအုတ်အဘား နွူးကျိန်း စူစွှော်ကုကု ဒွို အီပေါင်းယူ့ထိုင်။ 26 လူထုပရိသတ်ဖုန်း မေဟွမ့်ငိုအွယ့်ဘာ " မေဒေါင့်နိန်းအွယ့်အွယ့် ပလူးနိန်းမာကြား အီခံကယ်ဘာ" တစီ့လျှောက်ကာ ကိုယ်တော်နိန်းအွယ့်။ 27 ကိုယ်တော်ယေရှုအွယ့် " ပလူးဖုန်းတာ တလီပျန့်ဒါဟဖုန်းဒီ့ ဗွယ်ဖရာတာဒွို ပျန့်ဒါ" မိန့်နိန်းအွယ့်။ 28 ထွို့မဲ့ ပေတရုအွယ့် "ဗွယ်၊က့ဒွို့ ဖီကြွလူး တာကားကအိုထွို့ တွယ့်လေလိထွို့ ဗွယ်ကန်စာ" လျှောက်နိန်းအွယ့်။ 29 ကိုယ်တော်အွယ့် " ငါးဒေါင့်နားက့ အမှန်ဒွို၊ ဗွယ်ဖရာ သာသနာတော်တား ပလူးဖီကြွဒါ နန်တိုးယွမ်၊ မာ့၊ ပွော်ဝေ၊မွိုဖ၊ဖုဖုန်း အွယ့်ဟိုစာဒွို 30 ဘဝဒွိုးဘာကုလဲ့ လတခိုကျိုထွို့ အခိန်ကာလမေငါ့ကုဒီ့လဲ့ အီလသေချာတို ဆက်နိစ္စထာဝရ" မိန့်နိန်းအွယ့်။ 31 ထွို့မဲ့ ကိုယ်တော်အွယ့် အန်ချန့် သာဝက အစီ့ငြီ့ပလား လေးဘို့အာဆောင့်ထွို့ "နားလိုကာလုဲင်။ ဒွိုးခါ့ နားက့တွို့ ကလေလေး ဂျေရုဆလင်ကု။ ဗွမ့်နောင် အရိယာဆူတော်ကောင်ဖုန်း ကတျန်စေးကန်းဒါ ဗွယ်ဖရာဖုခုခရာ တာကားကအိုဒွိုလဲ့ အီပျန့်ထန်းနိန်းအွယ့်။ 32 အီအပ်ကားအာ ပလူးကန်လငါ့စာ ကျွော့်ကု။ အီအန်စွမ်ကားအာ။ အီမိုးပလာလိုကာ။ အီမိုးစာလိုကာ။ အီခံဘာ တဖီ့လွော်။ 33 ထွို့မဲ့ အီတွယ့်လိုကာထွို့ အီမိုးစီ့လိုကာ။ ဒေါင့်မာလဲ့ ထွို့အန်တွမ့်ငြီးကုအွယ့် ဆက်အီမွမ့်ချာဒါ့" မိန့်နိန်းအွယ့်။ 34 ဒေါင့်မာလဲ့ တပည့်ဖုန်းအွယ့် သိနားလိုကားဟ ကိုယ်တော်ငို အဓိပ္ပာယ်ဖုန်း။ အန်ဒင်အွိုစေးကန်း ငိုအွယ့်ဘားအဓိပ္ပာယ် အာကာ့ဆောင့် အွယ့်မဲ့ ကိုယ်တော်ဘာသဒေါင့် အဓိပ္ပာယ်ဟနာ သိနားလိုကားဟ။ 35 ကိုယ်တော်ယေရှု နောင် အာတပည့်ဖုန်းအွယ့် တွိုလေးကာ ယေရိခေါ ဝိန်းဆောင့်ခါ့ ပလူးမေးသျှီ့အပလားအွယ့် အိုနန်းကျွူအန်းတာ ကလေတီး။ 36 အာထွိုင်းဟွမ်းထွို့ ပလူးကျွို့ဒူ ဖြတ်လေကလေ့ ဇီ့ထွို့ အိုပျက်ထန်တဟနာ အာတစီ့ထန်။ 37 ပလူးပိန်ပလားပလားအွယ့် ကိုယ်တော်ယေရှု အို နာဇရက်ဝိန်းကုထွို့ ဖြတ်လေ ပြန်ဖရေချာဒါ့နိန်းအွယ့်။ 38 ထွို့မဲ့ အာအွယ့် "ဒါဝိဒ် ဖုခုယေရှု၊ သညင်ပန်ငါး" အာက့နိန်းအွယ့်။ 39 ပလူးကလေးတွယ့်ဒါး ကိုယ်တော်ယေရှုစာအွယ့် ပြားလိုကာအာ ဖီအိုးကျွော်ကျွော်တာ ။ ဒေါင့်မာလဲ့ အာအွယ့် "ဒါဝိဒ်ဖုခုယေရှု၊ သညင်ပန်ငါး" ယိမ်းက့ဆန်ဆန်ထိုင်ဒါ့။ 40 ထွို့မဲ့ ကိုယ်တော်ယေရှုအွယ့် အိုထွိုင်ထွို့ မိန့်ပလူးဖုန်း ဖီးကဟောင့်လေး ပလူးအွယ့်ပလား အာဆောင့်။ ပလားအွယ့်ပလား ထွိုင်တွိုဘို့လေထွို့ 41 ကိုယ်တော်အွယ့် "ငါအီမိုးဖီဘာနား နိန်းမာ" တစီ့နိန်းအွယ့်။ ပလူးအွယ့်ပလားအွယ့် " ဗွယ်၊ ငါးမေးဘာသသျှီတာ"လျှောက်ဒင်ချာဒါ့နိန်းအွယ့်။ 42 ထွို့မဲ့ ကိုယ်တော်အွယ့် "မေသျှီချာချန်းလုဲင်။ နားတယွမ်အန်ဒွို ကုဖီချာလိနား" မိန့်ချာဒါ့နိန်းအွယ့်။ 43 အာမေးသျှီစွူတွို့ အလိုင်ချင်ထွို့ အန်ဖရာဗွယ်ဖရာဂုဏ်တော်ထွို့မဲ့ တွယ့်လေးတွယ့် ကိုယ်တော်ယေရှုကန်စာ့။ ပလူးကသျှီဒါ တပျန့်အွယ့်ဟိုစာဖုန်းလဲ့ အန်ဖရာလိုကာ ဗွယ်ဖရာဂုဏ်တော်။ |
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.