Luke 17 - Lahta1 ကိုယ်တော်ယေရှုအွယ့် "ဖီပလူးဖုန်းမိုးကာ တလီခိုဟတာ ကောချိုစာနောင့် ကချိုဘာ အကြောင်တရာဒွို အီပိုထန်ဘာယွမ်တို။ ဒေါင့်မာလဲ့ မိုးဖီးကပျန့်ထန်ဘာ တချိုကျီအကြောင်တရာ လမာမားခယောဝ် ဗွယ်ဖရာဒွို အီဖီတိုအပျက်။ 2 ခရာအော်ဖီးပလားမိုးတလီခိုဟ ချွတ်ဘို့ငွမ်းတိုးနောင်နန်ပီးထွို့ ကျွိုတွိုင်းကလုံထွို့မဲ့ တန်ဘုတ်လင်ဘို့ ပင်လယ်ကုဒီ့ ပလူးအွယ်ပလားတာ ပေါင်းဆက်စာထိုင်။ 3 အွယ့်ကြားမဲ့ နားက့မိုးတဟနာ ဒင်စတိကာလုဲင်။ နားက့ပွော်ဝေ မေချန်းမိုးမာ အပျက်တစွိုစွိုလဲ့ ဆုံမအာလုဲင်။ အာမေချန်းလလိနောင်တခါ့လဲ့ ခွင်လွတ်ဖီ အာအပျက်လုဲင်။ 4 ပလူးအွယ့််ပလား မိုးမာနားလောင် အငြီးအန်နျွို့လိုင်ထွို့ လလီနောင်တ မေနောင်နိန်းအွယ့်လဲ့ ခွင်လွတ်ဖီထိုင်ဘာဒါ့အာ" မိန့်နိန်းအွယ့်။ 5 သာဝကဖုန်းအွယ့် "ကူညီဖီက့ တယွမ်အန် ဖီကခွိုင့်ထိုင်ဒါလုဲင်" လျှောက်ဒင်ကာနိန်းအွယ့်။ 6 အွယ့်ကြားမဲ့ ကိုယ်တော်ယေရှုအွယ့် " တယွမ်အန်မေအို ပီးတျာဟန်ဒူကွော့လဲ့ " အိုအကျွူကု တချီ့ထန့်ထွို့ ဒို့ပင်လယ်ကုလုဲင်" မေမိန့် ညောင်မွိုင်ဒူအွယ့်ဘာလဲ့ အာအီနာခံတိုနား။ 7 နားစွမ်းအွယ့် ထုဲင်လုဲင်ထွို့ မေဟလဲ့ တီဘဲထွို့ ကျိန်းကျိန်ခါ့ အာအွယ့်လေးနျက်ထွို့ အိုနန်းအန်လုဲင်" အီဒေါင့်နဲ့ နိန်းအွယ့်။ 8 ခရားအီးဒေါင့်နိန်းအွယ့် နားဒွို "နားအိုတိုတျက်တျက်ထွို့ ပဲင်ဖီးစေကန်း ငါးတာ တအန်တစွိုစွိုလုဲင်။ မေပဲင်ထွို့လဲ့ ငါးအီအန်။ ငါးအန်မေထွို့ နားအန်ဒါလိ" အီဒေါင့်နိန်းအွယ့်။ 9 နားစွမ်းဖုန်းဒွို့ မိုးကာတို တမိုး အိုလူမိုးအွယ့်ကြား နားလီအိုလူ ကေဇူတင်ဟာ အာကဟာ။ 10 နားက့ဒွိုးလဲ့ နိန်းအွယ့်အွယ့် နားက့ မေမိုးထွို့ တာကအန်းချန့်စေကန်းဒါနားက့ တာကားကအိုအွယ့် "ငါးဒွို့ ပျန့်စွမ်းဒါယွမ်တွို့ လီမေဟာ။ ကာ့အိုလူမိုဖီဘာတာမဲ့ ကမိုးတို ဒေါင့်ကာနိန်းအွယ့်လုဲင်" မိန့်နိန်းအွယ့်။ 11 ကိုယ်တော်အွယ့် ဖြတ်လေး ရှမာရိ နောင် ဂါလိလဲ ကန်းစွမ်းခါး ကလေ့လေးလေ ဂျေရုဆလင်ဝိန်းကု။ 12 ထွိုင်တွို ဒုန့်အဒုန့်ကုခါ့ ကစွယ်ဒါနူနာရောဂါစာ ပလူးအစီ့ပလားအွယ့် အိုထွိုင်ကာတာ မဘို့မယားနောင် ကိုယ်တော်မေ့ငါ့ကုထွို့ 13 နောင်ငိုစင် "ဗွယ်၊ယေရှု၊ နောင်တသညင်က့ထွို့ မိုးတမာဖီးကေ့က့" လျှောက်ကာနိန်းအွယ့်။ 14 ကိုယ်တော်သျှီအာကားထွို့ " လေးပုရောဟိတ်ဖုန်းဆောင့်ထွို့ နေကာ နားက့နန်ဖုန်းလုဲင်" မိန့်နိန်းအွယ့်။ အာကာ အိုလေးကာတုဲင်းမသဲ နာရောဂါဖုန်း တမာကေ့လိ။ 15 အာကာကုဒီ့ အပလားအွယ့် ထွိုင်သျှီးထွို့ နူနာရောဂါ တမာခါ့ အာအန်ဖရာစင် ဗွယ်ဖရာဂုဏ်တော်ထွို့ ပြန်လှည်ကျိန်ချာဒါ့ ကိုယ်တော်ဆောင့်။ 16 ထွို့မဲ့ အာအွယ့် ဝယ်လင်း ကိုယ်တော်ယေရှု ခင်ထိထွို့ အန်ဖရာလေ ကေးဇူတော်။ ပလူးအွယ့်ပလားအွယ့် ပျန့်ရှမာရိကန်စာ။ 17 ထွို့မဲ့ ကိုယ်တော်ယေရှုအွယ့် " နူနာရောဂါ တမာစာဒီ့ အစီ့ပလား မေဟနောဝ်။ ဒါ့လငါ့ အန်ခွူပလားဟာ အိုကမာ။ 18 အီအန်ဖရာဗွယ်ဖရာ ဂုဏ်တော်တာ ကကျိန်းချာစာဒွို့ လွို့ထိုင် ပလူးကန်လငါ့စာ ဒွိုးပလား ပလားလငါ့အိုဒွမ်းနောဝ်" မိန့်နိန်းအွယ့်။ 19 ထွို့မဲ့ ကိုယ်တော်အွယ့် "နားထွိုင်ထွို့ စွ့ာချန်းလုဲင်။ နားယွမ်အန် ငါးလောင်အွယ့်မဲ့ ဗွယ်ဖရာဒွို မိုးတမာဖီလိ နားရောဂါ" မိန့်နိန်းအွယ့်။ 20 အငြီးကု ဖာရိရှဲပိန်ပလားပလားဒီ့ " ဗွယ်ဖရာသာသနာတော်ဒွို အီပေါ်ထန် ကမာခါ့" တစီ့လျှောက်လိုကာ ကိုယ်တော်နိန်းအွယ့်။ ထွို့မဲ့ ကိုယ်တော်ယေရှုအွယ့် "ဗွယ်ဖရာ သာသနာတော်ဒွို့ လီသျှီဒါဟနောင် နားက့မေးဖုန်းဟာ။ 21 ဗွယ်ဖရာ သာသနားတော်ဒွို အိုဒွိုးရပ်ကု၊ အိုဒီရပ်ကု လမားဒေါင့်လိဒါဟာ။ မေဒေါင့်နိန်းမာအွယ့် ဗွယ်ဖရာ သာသနားတော်ဒွို အိုကိုတိုနောင် နားက့ထွို့ အိုတို နားက့သကူ" မိန့်နိန်းအွယ့်။ 22 ထွို့မဲ့ ကိုယ်တော်ယေရှုအွယ့် "တွိုတွို့ မငြီးနားက့ဘာသခွယ်ဒါ ဗွယ်ဖရာဖုခုမငြီးအငြီးတွို့လဲ့ နားက့လီသျှီဘာဟာ အွယ့်ငြီးဟာ။ 23 ပလူးဖုန်းအွယ့် " ဟွိုင့်လေး ဒီရပ်ကုလုဲင်၊ မေဟလဲ့ ဟွိုင့်လေး ဒွိုးရပ်လုဲင်" မေဒေါင့်နားက့နိန်းအွယ့်လဲ့ ထန်ခုနောင့်ထွို့ ကျန်ကွင်တွယ့်ကားမာလုဲင်။ 24 ဗွယ်ဖရာဖုခု အီတွို့ငြီးအွယ့် မုကန်အဘာကုဒီ့ အီဗွမ့်နောင် ပလျော်အိုအို့ထွို့ အီခါ့လက်တာ မုကန် အိုအဒိုင်ခို့ထွို့ တွို့တွို့ ဒါ့အဒိုင်ခို့။ 25 ဒေါင့်မာလဲ့ အာဒီ့ အကီစွက် အီခံစာဘာတခုဲင် ဝေဒနာဖုန်းထွို့ အီခံဘာ ပလူးမျိုဆက်ဒွိုးဖုန်းငြင်းပယ်။ 26 ဗွမ့်နောင် တာကပျန့်ထွို့ဒါ့ နောဧ ခေတ်ခါ့ ဗွယ်ဖရာဖုခု မေကြွခိန်းဒွိုလဲ့ အီပျန့်ထန်နိန်းအွယ့်။ 27 အွယ့်ခါ့အွယ့် နောဧဒီ့ တွိုတွို့ မွိုင်ငြီး နွူးကျိန်း ဆန်ဖိုကု ပလူးဖုန်းအွယ့် အန်းလိုကာ၊၊အိုလိုကာ၊မိုးလိုကာတို ပွဲမင်္ဂလာထွို့မဲ့ ကန်းစွို့ဒူထန်တာထွို့ ခံဘာသျှီ့ကလွမ့်ထွို့မဲ့ အာကာကားကအိုအွယ့် ခံလိုကာဘာ တယားကေ့။ 28 ဗွမ့်နောင်းအွယ့် လောတ ကအိုဒါ သောဒုံဝိန်ကုခါ့ဒီ့လဲ့ ပလူးအိုသောဒုံဝိန်းကုစာဖုန်း အန်အိုလိုကာထွို့ အန်ပလီ၊အန်ကား၊ အန်စူ့နောင် တေးလိုကာတိုတာဖုန်း။ 29 ဒေါင့်မာလဲ့ လောတ အိုသောဒုံဝိန်းကုထွို့ စစွာ့ထန်ငြီးအွယ့် မီးကွူ့ဖုန်း အိုမုကန်ကုလင်းလင်ထွို့ မိုးစီ့မိုကေ့ကေ့ ပလူးကအိုဒါ ဝိန်းအွယ့်ကုပါစာဖုန်း။ 30 ဗွယ်ဖရာဖုခု ပိုထန်ငြီးအွယ့်လဲ့ အီပျန့်ထန်နိန်းအွယ့်။ 31 မငြီးအွယ့်ငြီးကု လမားခယောဝ် အီချွော်တစွို့စွို့တာ အိုယွမ်ခုလောင်ထွို့ ကျန်းဖီလင်းမာ ယွမ်းကုမာ။ အိုလုဲင်ကုထွို့ တစွိုစွို့တာ လမားခယောဝ် ကျန်ဖီကျိန်းမာ ယွမ်ကုမာ။ 32 လောတမာ့ ပျန့်ဘာနိန်းမာ ယူလလိုကာလုဲင်။ 33 ပလူးကြိုစားကယ်ချာဆက်စာဒီ့ အီစွမ့်ဘာဆက်။ ပလူးခံစွမ့်ချာဆက်စာဒီ့ အီခံဘာ တကယ်ဆယ်။ 34 ငါးအီဒေါင့် နားက့ဒွို့။ ငါးအီပြန်ကြွချာဟာ့ဒွို့ ပလူးအန်းတငြီ့ အိုငြီ့ကိုကာ ခမ်းလန်အတောင်ချန်လဲ့ ပလူးယွမ်အန်ငါးစာပလားဟို့ အီခံဘာငါးဟောင့် ထွို့ ဒါ့အပလားအွယ့် အီအိုကေ့ဘာ။ 35 ပမွော်တောင်ကားဘွူ့ အန်းတငြီ့ကုအွယ့် အီခံဟောင့်ဘာ အပလားဟို့ထွို့ ဒါ့အပလားအွယ့် အီအိုကေ့ဘာ။ 36 ပလူးအိုလုဲင်ကုအန်းတငြီ့ကုအွယ့် အပလားဒီ့ အီခံဟောင့်ဘာထွို့ ဒါ့အပလားဒီ့ အီအိုကေ့ဘာ။ 37 ထွို့မဲ့ တပည့်ဖုန်းအွယ့် "ဗွယ်၊ တကမာရပ်ကု အီပျန့််နိန်းအွယ့်" ထွိုင်တစီ့လျှောက်နိန်းအွယ့်ထွို့ ကိုယ်တော်ယေရှုအွယ့် "တစီ့ကုမ့်ဖုန်း အိုကမာရပ်လဲ့ လင်တဖုန်းလဲ့ အီအိုစုကမား" မိန့်နိန်းအွယ့်။ |
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.